Ester 8:1-17
8 Teʼ kʼiin jeʼeloʼ le rey Asuerooʼ tu kʼubaj tiʼ reina Ester u yotoch Amán,+ le u enemigo kaʼach le judíoʼoboʼ.+ Ka tsʼoʼokeʼ Mardoqueoeʼ ook tu táan le reyoʼ tumen Estereʼ tsʼokaʼaniliʼ u yaʼalik de ke u láakʼtsileʼ.+
2 Le rey túunoʼ tu luʼsaj le anillo ikil u sellar+ u tsʼaamaj kaʼach tiʼ Amánoʼ ka tu tsʼáaj tiʼ Mardoqueo. Estereʼ tu kʼubaj tiʼ Mardoqueo u yotoch Amán.+
3 Tsʼoʼoleʼ Estereʼ kaʼa tʼaanaj yéetel le reyoʼ. Letiʼeʼ tu xóolkʼabtuba tu yiknal u yook le reyoʼ, ka túun káaj u sen okʼol yéetel u kʼáatik tiʼ le rey maʼ u chaʼik u béeytal le baʼax u chʼaʼtukultmaj kaʼach Amán le agaguitaoʼ mix u chaʼik u beetaʼal loob tiʼ le judíoʼoboʼ.+
4 Le reyoʼ tu tichʼaj u xóolteʼ de oro tu tojil Ester,+ le oʼolal Estereʼ líikʼeʼ ka pʼáat waʼatal tu táan le reyoʼ.
5 Estereʼ tu yaʼalaj: «Yuum rey, wa uts ta tʼaan, wa maʼalob a wilik, wa tsʼoʼok in lúubul utsil tiʼ teech bey xan wa a yaabiltmeneʼ beet u tsʼíibtaʼal junpʼéel orden utiaʼal ka luʼsaʼak le baʼax tu tsʼíibtaj le kʼasaʼan Amán+ le agaguita,+ u hijo Amedata, tu contra le judíoʼob yanoʼob tiʼ tuláakal le luʼumoʼob ka gobernarkoʼ.
6 Tumen junpuliʼ maʼ kun páajtal in soportartik le loob kun taal tu yóokʼol in kaajaloʼ, maʼ xan kun páajtal in soportartik in wilik u xuʼulsaʼal tiʼ in láakʼtsiloʼob».
7 Le rey Asuero túunoʼ tu yaʼalaj tiʼ reina Ester yéetel tiʼ Mardoqueo le judíooʼ: «Ilawileʼex, teneʼ tsʼoʼok in kʼubik tiʼ Ester+ u yotoch Amán yéetel tsʼoʼok in beetik u chʼuykíintaʼal Amán tiʼ junpʼéel cheʼ+ tumen tu líiʼsaj u kʼab tu contra le judíoʼoboʼ.
8 Jeʼel u béeytal a tsʼíibtikeʼex tu kʼaabaʼ le rey jeʼel baʼaxak maʼalob a wilkeʼex tu favor le judíoʼoboʼ, kéen tsʼoʼokkeʼ ka sellarkeʼex yéetel le anillo ikil u sellar le reyoʼ, tumen junpʼéel baʼax ku tsʼíibtaʼal tu kʼaabaʼ le rey yéetel ku sellartaʼal yéetel le anillo ikil u sellar le reyoʼ maʼ tu páajtal u juʼubul».+
9 Teʼ kʼiin jeʼeloʼ tʼaʼan u secretarioʼob le reyoʼ. Muʼuchʼoʼob teʼ día 23 tiʼ le u yóoxpʼéel mesoʼ, lelaʼ u kʼáat u yaʼaleʼ tu mesil Siván.* Letiʼob túuneʼ tu tsʼíibtoʼob tuláakal le baʼax tu ordenartaj Mardoqueo tiʼ le judíoʼoboʼ, tiʼ le nukuch gobernadoroʼoboʼ,*+ tiʼ le u maasil gobernadoroʼoboʼ bey xan tiʼ u príncipeiloʼob le luʼumoʼob+ yaan desde India tak Etiopíaoʼ, tuláakaleʼ 127 luʼumoʼob yanoʼob yáanal u páajtalil le reyoʼ, tiʼ cada luʼumeʼ tsʼíibtaʼab jeʼex suuk u tsʼíibeʼ yéetel tiʼ cada kaajeʼ ichil u idioma. Tiʼ le judíoʼoboʼ jeʼex suuk u tsʼíiboʼobeʼ yéetel ichil u idiomaʼob.
10 Letiʼeʼ tu tsʼíibtaj tu kʼaabaʼ le rey Asuerooʼ yéetel tu sellartaj yéetel le anillo ikil u sellar+ le reyoʼ, ka tsʼoʼokeʼ tu túuxtaj máakoʼob yóoʼ tsíimin utiaʼal u biskoʼob le baʼax tsʼíibtaʼaboʼ. Letiʼobeʼ binoʼob yóoʼ tsíiminoʼob chich u yáalkaboʼob ku meyajoʼob tiʼ le reyoʼ.
11 Teʼ baʼax tsʼíibtaʼaboʼ le reyoʼ táan kaʼach u tsʼáaik permiso tiʼ le judíoʼob yanoʼob tiʼ tuláakal kaajoʼob utiaʼal ka u muchʼubaʼob yéetel ka u defendert u kuxtaloʼob, bey xan ka u kíimsoʼob yéetel ka u xuʼulsoʼob tiʼ u kajnáaliloʼob le kaajoʼob wa le luʼumiloʼob jeʼel u líikʼloʼob tu contraʼoboʼ, kex koʼoleloʼob wa kex paalaloʼob, yéetel jeʼel u páajtal u chʼaʼikoʼob baʼax yaantiʼobeʼ.+
12 Lelaʼ unaj u beetaʼal tiʼ junpʼéeliliʼ kʼiin tiʼ tuláakal le luʼumoʼob yaan yáanal u páajtalil rey Asuerooʼ, unaj u beetaʼal teʼ día 13 tiʼ le mes 12, lelaʼ u kʼáat u yaʼaleʼ tu mesil Adar.*+
13 Le baʼax tsʼíibtaʼaboʼ unaj u pʼáatal bey junpʼéel ley tiʼ tuláakal le luʼumiloʼoboʼ. Lelaʼ unaj u tsʼaʼabal u yojéelt tuláakal le kaajoʼoboʼ, beyoʼ le judíoʼoboʼ yaan u prepararkubaʼob utiaʼal le kʼiin jeʼeloʼ yéetel yaan u vengarkubaʼob tiʼ u enemigoʼob.+
14 Le máaxoʼob bisik le baʼax tsʼíibtaʼaboʼ binoʼob yóoʼ tsíiminoʼob chich u yáalkaboʼob ku meyajoʼob tiʼ le reyoʼ. Séebaʼan yéetel chich úuchik u binoʼob utiaʼal u biskoʼob le baʼax tu ordenartaj le reyoʼ. Le leyaʼ beetaʼab tu palacioil Susa.+
15 Le ka lukʼ Mardoqueo tu táan le reyoʼ u takmaj junpʼéel nookʼ jeʼex le ku takik le reyoʼ, junpʼéel nookʼ color azul yéetel color sak, u tsʼaamaj xan junpʼéel nojoch corona de oro yéetel u tsʼaamaj junpʼéel capa jach fino, beetaʼan yéetel lana* color morado.+ Ka tsʼoʼokeʼ u kajnáaliloʼob Susaeʼ joʼopʼ u yawatoʼob yéetel kiʼimak óolal.
16 Le judíoʼob kajaʼanoʼob Susaoʼ yanchajtiʼob jeetsʼelil, xuʼul u sen chiʼichnaktaloʼob, jach kiʼimakchaj u yóoloʼob, yéetel pʼáat jach ku respetartaʼaloʼob.
17 Tiʼ tuláakal le luʼumoʼob yéetel tiʼ tuláakal le kaajoʼob tuʼux kʼuch le ley bey xan le baʼax tu yaʼalaj le reyoʼ le judíoʼoboʼ jach kiʼimakchaj u yóoloʼob, sen kiʼimakchaj u yóoloʼobeʼ ka joʼopʼ u janaloʼob yéetel u festejaroʼob. Yaʼab tiʼ u kajnáaliloʼob le kaajoʼob yanoʼob teʼ luʼumoʼ joʼopʼ u yaʼalikubaʼob judíoʼob+ tumen ook saajkilil tiʼob tu yoʼolal le judíoʼoboʼ.
Notas
^ Wa «sátrapaʼob».
^ Ilawil página 2580.
^ Ilawil página 2554.
^ Wa «tela beetaʼan yéetel u tsoʼotsel taman».
