Deuteronomio 23:1-25
23 Mix juntúul xiib uchaʼan loob tu xiibil wa luʼsaʼan u xiibil jeʼel u páajtal u yantal ichil le máaxoʼob adorartik Jéeobaoʼ.+
2 Mix juntúul paal chéen bey úuchik u kaxtaʼal jeʼel u páajtal u yantal ichil le máaxoʼob adorartik Jéeobaoʼ.+ Mix juntúul tiʼ u paalaloʼob jeʼel u páajtal u yantaloʼob ichil le máaxoʼob adorartik Jéeobaoʼ, mix bikʼin kun antaloʼobiʼ.
3 Mix juntúul ammonita wa moabita jeʼel u páajtal u yantal ichil le máaxoʼob adorartik Jéeobaoʼ.+ Mix juntúul tiʼ u paalaloʼob jeʼel u páajtal u yantaloʼob ichil le máaxoʼob adorartik Jéeobaoʼ, mix bikʼin kun antaloʼobiʼ.
4 Tumen le ka jóokʼeʼex tu luʼumil Egipto, le táan a bineʼex teʼ bejoʼ, letiʼobeʼ maʼ tu yáanteʼexoʼob yéetel janal mix yéetel jaʼiʼ,+ tsʼoʼoleʼ tu boʼotoʼob Balaam utiaʼal ka u tsʼáauba ta contra yéetel utiaʼal ka u maldecirtech. Balaameʼ tiʼ u taal kaʼach Petor tu luʼumil Mesopotamiaeʼ.+
5 Chéen baʼaleʼ Jéeoba a Dioseʼ maʼ tu yóotaj u yuʼub Balaamiʼ.+ Baʼaxeʼ Jéeoba a Dioseʼ tu beetaj u suut bendiciónil le maldición kun aʼalbil kaʼach ta contraoʼ,+ tumen Jéeoba a Dioseʼ tu yaabiltech.+
6 Tiʼ tuláakal u kʼiiniloʼob a kuxtaleʼ mix bikʼin unaj a wáantkoʼob utiaʼal ka kuxlakoʼob ich jeetsʼelil mix unaj a kaxtik u yutsiloʼobiʼ.+
7 Maʼ unaj a pʼektik le edomitaoʼ tumen letiʼeʼ a sukuʼun.+
Maʼ unaj a pʼektik le egipciooʼ, tumen techeʼ kajlajech bey j-táanxel luʼumil tu luʼumil Egiptoeʼ.+
8 U yáabiloʼob kun antaloʼ jeʼel u páajtal u yantaloʼob ichil le máaxoʼob adorartik Jéeobaoʼ.
9 Le kéen jóokʼkech utiaʼal a bin baʼateʼel tu contra a enemigoʼobeʼ maʼ unaj a beetik mix baʼal kʼaasiʼ.+
10 Wa juntúul xiib maʼ limpio yanil tu táan Dios tumen jóokʼ u semen de nocheeʼ+ unaj u jóokʼol paachil tiʼ le campamentooʼ yéetel maʼ unaj u kaʼa ookliʼ.
11 Le kéen chíinik kʼiineʼ unaj u yichkíil, yéetel le kéen tsʼoʼokkeʼ jeʼel u páajtal u kaʼa suut le kéen tʼúubuk le kʼiinoʼ.+
12 Unaj u separartaʼal junpʼéel lugar* paachil tiʼ le campamentooʼ, teʼeloʼ tiʼ unaj a biniʼ.
13 Ichil le nuʼukuloʼob ken a bisoʼ unaj u yantal junpʼéel estacaiʼ. Le kéen xiʼikech paachil taʼeʼ unaj a páanik junpʼéel jool yéetel unaj a mukik a taʼ.
14 Tumen Jéeoba a Dioseʼ tiʼ ku máan chúumuk teʼ tuʼux jelekbalech+ utiaʼal u salvarkech yéetel utiaʼal u tsʼáaik a enemigoʼob ta kʼaboʼ. Le tuʼux jelekbalechoʼ unaj u pʼáatal santoil,+ utiaʼal beyoʼ letiʼeʼ maʼ u yilik mix baʼal suʼtsil teʼeloʼ yéetel ka u pʼateʼex chéen ta juunaleʼex.
15 Le kéen púutsʼuk juntúul esclavo yéetel le kéen taalak ta wiknaleʼ maʼ unaj a cháachik utiaʼal a kʼubik tu kʼab u tsʼuuliliʼ.
16 Letiʼeʼ jeʼel u páajtal u yéeyik jeʼel máakalmáak tiʼ le kaajoʼob yaantech utiaʼal u kajtaloʼ, jeʼel u páajtal u kajtal jeʼel tuʼuxak u kʼáateʼ. Techeʼ maʼ unaj a maltratarkiʼ.+
17 Mix juntúul koʼolel israelita unaj u beetik u x-prostitutail,*+ yéetel mix juntúul xiib israelita unaj xan u beetik u prostitutoil.*+
18 Le taakʼin ku boʼotaʼal tiʼ juntúul x-prostituta wa tiʼ juntúul prostitutoeʼ* maʼ unaj u yoksaʼal tu yotoch Jéeoba a Dios utiaʼal u tsʼoʼokbesaʼal junpʼéel baʼax prometertaʼaniʼ, tumen leloʼ junpʼéel baʼal jach táaj kʼaas tu táan Jéeoba a Dios.
19 Maʼ unaj a beetik u boʼotaʼaltech interés tumen a sukuʼuniʼ,+ maʼ unaj u boʼotiktech interés yoʼolal taakʼin, yoʼolal janal wa yoʼolal jeʼel baʼalak jeʼel u páajtal u cobrartaʼal u interésileʼ.
20 Jeʼel u páajtal a beetik u boʼotaʼaltech interés tumen juntúul j-táanxel luʼumileʼ,+ pero maʼ unaj a beetik u boʼotaʼaltech interés tumen a sukuʼuniʼ,+ beyoʼ Jéeoba a Dioseʼ yaan u bendecirkech tiʼ tuláakal baʼax ken a beet teʼ luʼum kan okol a chʼaʼoʼ.+
21 Wa ka prometertik wa baʼax tiʼ Jéeoba a Dioseʼ+ maʼ unaj u xáantal utiaʼal a tsʼoʼokbeskiʼ.+ Tumen Jéeoba a Dioseʼ seguro yaan u kʼáatiktech, wa maʼ ta boʼotkeʼ yaan a kʼebantal.+
22 Chéen baʼaleʼ wa maʼ ta prometertik mix baʼaleʼ maʼ kan kʼebantal.+
23 Unaj a beetik le baʼax jóokʼ ta chiʼoʼ+ bey xan le baʼax ta prometertaj bey junpʼéel ofrenda ku síijil ta puksiʼikʼal a tsʼáaik tiʼ Jéeoba a Diosoʼ.+
24 Wa ka wokol ichil u pakʼal uva a vecinoeʼ jeʼel u páajtal a jaantik uva hasta a naʼajtaleʼ, chéen baʼaleʼ maʼ unaj a tsʼáaik mix junpʼéel ta sáabukaaniʼ.+
25 Wa ka wokol ichil u paakʼal a vecinoeʼ jeʼel u páajtal a chʼaʼik le baʼax tsʼoʼok u kʼantaloʼ, chéen baʼaleʼ maʼ unaj a xotik yéetel a lóobcheʼ* le baʼax u pakʼmaj a vecinooʼ.+
Notas
^ Lelaʼ junpʼéel letrina.
^ Ich hebreoeʼ ku yaʼalaʼal kaʼach «u x-prostitutail templo».
^ Ich hebreoeʼ ku yaʼalaʼal kaʼach «u prostitutoil templo».
^ Ich hebreoeʼ ku yaʼalaʼal kaʼach «juntúul peekʼ».
^ Wa «hoz».
