Deuteronomio 17:1-20
17 Maʼ unaj a kʼubik tiʼ Jéeoba a Dios juntúul toro wa juntúul taman yaan baʼax uchaʼan tu wíinkliliʼ bey xan wa yaan baʼax uchaʼantiʼ, tumen leloʼ junpʼéel baʼax jach táaj kʼaas tu táan Jéeoba a Dios.+
2 Koʼox aʼalikeʼ ichil le kaajoʼob táan u tsʼáaikteʼex Jéeoba a Diosoʼ ku yantal juntúul xiib wa juntúul koʼolel ku beetik baʼax kʼaas tu táan u yich Jéeoba a Dios yéetel ku mixbaʼalkúuntik u pacto,+
3 tsʼoʼoleʼ ku bin tu paach uláakʼ diosoʼob, ku adorarkoʼob yéetel ku chintal tu táanoʼob, wa ku adorartik le Kʼiin wa le Lunaoʼ, wa le uláakʼ baʼaloʼob yanoʼob teʼ kaʼanoʼoboʼ,+ junpʼéel baʼal maʼ teen aʼal ka beetaʼakiʼ.+
4 Le kéen aʼalaʼaktech wa le kéen a wuʼuy u tsikbaltaʼaleʼ, kʼaʼabéet a jach investigartik tubeel le baʼax ku yúuchloʼ. Wa ku yilaʼal jach tu jaajil+ tsʼoʼok u beetaʼal le baʼax táaj kʼaas tu luʼumil Israeloʼ,
5 unaj a jóoʼsik tu paach u joonajiloʼob le kaaj le xiib wa le koʼolel tu beetaj baʼax kʼaasoʼ, teʼ túunoʼ unaj a muruxtuntik hasta u kíimileʼ.+
6 Utiaʼal ka páajchajak u kíimsaʼal le máakoʼ unaj u yantal kaʼatúul wa óoxtúul testigoʼob+ aʼalik le baʼax úuchoʼ. Maʼ unaj u kíimsaʼal wa chéen juntúul testigo aʼalik le baʼax úuchoʼ.+
7 Le testigoʼoboʼ letiʼob unaj u yáax líiʼsik u kʼaboʼob utiaʼal u kíimskoʼob le máakoʼ, tsʼoʼoleʼ bey xan ken u beetil tuláakal le kaajoʼ. Techeʼ unaj a luʼsik le baʼax kʼaas ichileʼexoʼ.+
8 Wa ichil junpʼéel tiʼ le kaajoʼob ku yantal junpʼéel problema jach nojoch, tumen yaan máax kíimsaʼabi,+ yaan máax táan u quejarkuba yoʼolal wa baʼax, wa tsʼoʼok u beetaʼal junpʼéel nojoch loob, wa jeʼel baʼalak ku baʼateltaʼaleʼ, techeʼ unaj a bin teʼ lugar ken u yéey Jéeoba a Diosoʼ.+
9 Xeen tu yiknal le sacerdoteʼob levitaʼoboʼ yéetel tu yiknal le juez+ tsʼaʼan teʼ kʼiinoʼob jeʼeloʼ, kʼáattiʼob baʼax unaj u beetaʼal, letiʼob túuneʼ yaan u yaʼalikoʼobtech baʼax tu chʼaʼtukloʼob.+
10 Teech túuneʼ unaj a beetik según le baʼax ken u chʼaʼtukloʼob teʼ lugar ken u yéey Jéeobaoʼ.
11 Unaj a beetik según le ley ken u tsʼáaʼobtechoʼ yéetel según le baʼax ken u chʼaʼtukloʼoboʼ.+ Maʼ unaj a jóokʼol tiʼ le baʼax ken u yaʼaloʼobtechoʼ, maʼ unaj a kʼéechel mix ta x-noʼojiʼ mix ta x-tsʼíikiʼ.+
12 Le máax terco, le maʼ tu yuʼubik u tʼaan le sacerdote táan u meyajtik Jéeoba a Dios mix tu yuʼubik u tʼaan le juezoʼ, unaj u kíimsaʼal.+ Techeʼ unaj a luʼsik le baʼax kʼaas ichil u kaajil Israeloʼ.+
13 Tuláakal túun u kaajil Israeleʼ yaan u yuʼubik le baʼax úuchoʼ yéetel yaan u chʼaʼik saajkil, yéetel mix bikʼin ken u kaʼa beet u tercoiloʼob.+
14 Le kéen ookkech teʼ luʼum táan u tsʼáaiktech Jéeoba a Dios, le kéen a tiaʼalint yéetel le kéen pʼáatkech kajtal teʼeloʼ, wa ka waʼalik: ‹Chaʼa in yéeyik juntúul rey utiaʼal u gobernarken jeʼex u beetik uláakʼ naciónoʼob yanoʼob tin baʼpachoʼ›,+
15 wa ku yúuchul beyoʼ le rey ken a tsʼáaoʼ letiʼe rey kun yéeybil tumen Jéeoba a Diosoʼ.+ Le máax ken a tsʼáa utiaʼal u beetik u reyiloʼ unaj u jóokʼol ichil a sukuʼunoʼob. Prohibido a yéeyik juntúul j-táanxel luʼumil, juntúul máax maʼ a sukuʼuniʼ.
16 Chéen baʼaleʼ le reyoʼ maʼ unaj u yantal yaʼab u tsiiminoʼobiʼ+ mix unaj u beetik u suut le kaaj tu luʼumil Egipto utiaʼal u yaʼabkuntik u tsiiminoʼobiʼ,+ tumen Jéeobaeʼ tu yaʼalajteʼex: ‹Maʼ unaj a kaʼa suuteʼex mix bikʼin teʼ bejaʼ›.
17 Maʼ unaj xan u yantal yaʼab u yatanoʼobiʼ utiaʼal maʼ u kʼaskúuntaʼal u puksiʼikʼal.+ Maʼ unaj xan u muchʼkíintik jach táaj yaʼab oro yéetel plataiʼ.+
18 Le kéen kulak tu trono utiaʼal u gobernareʼ unaj u tsʼíibtik tiʼ junpʼéel libro* u copiail le Ley líiʼsaʼan tumen le sacerdoteʼob levitaʼoboʼ,+ le copiaaʼ u tiaʼal.
19 Le copiaoʼ unaj u pʼáatal tu yiknal, yéetel unaj u xokik tuláakal u kʼiiniloʼob u kuxtal,+ utiaʼal beyoʼ ka u kan u respetart Jéeoba u Dios yéetel utiaʼal u beetik tuláakal le baʼax tsʼíibtaʼan teʼ Leyaʼ bey xan le baʼaxoʼob tsʼoʼok u yaʼalaʼal ka beetaʼakoʼ.+
20 Beyoʼ maʼ ken u taasuba nojbaʼalil yóokʼol u sukuʼunoʼob yéetel maʼ kun jóokʼol tiʼ le mandamientoʼoboʼ, maʼ kun kʼéechel mix tu x-noʼoj mix tu x-tsʼíik, beyoʼ letiʼ yéetel u paalaloʼobeʼ yaan u xáantal táan u reinaroʼob tu yóokʼol u kaajil Israel.
Notas
^ Wa «junpʼéel rollo».
