Daniel 11:1-45
-
U reyiloʼob Persia yéetel Grecia (1-4)
-
U reyiloʼob noojol yéetel xaman (5-45)
-
Yaan u túuxtaʼal juntúul máak cobrartik impuesto (20)
-
‹Yaan u xuʼulsaʼal tiʼ u j-Nojchil le pactooʼ› (22)
-
Yaan u alabartik juntúul dios maʼ kʼaj óoltaʼab tumen u papáʼobiʼ (38)
-
U reyil noojol yéetel u reyil xamaneʼ yaan u léenchʼintikubaʼob (40)
-
Le noticiaʼob kun taal desde lakʼin yéetel xamanoʼ (44)
-
11 Tu yáax añoil u reinar Darío+ le medooʼ, teneʼ taalen utiaʼal in líiʼsik u yóol Miguel* yéetel utiaʼal in muʼukʼaʼankúuntik u yóol.
2 Le baʼax ken in waʼaltechaʼ jach jaaj:
¡Ilawile! Tu luʼumil Persiaeʼ yaan u yantal uláakʼ óoxtúul reyoʼob. Chéen baʼaleʼ le u kantúul kun antaloʼ yaan u muchʼkíintik maas yaʼab baʼaloʼob ke le yanchaj tiʼ u maasiloʼoboʼ. Le kéen tsʼoʼokok u yantal u páajtalil yoʼolal le baʼaloʼob yaantiʼoʼ yaan u meyajtiʼ tuláakal baʼal utiaʼal u tsʼáaikuba tu contra u reinoil Grecia.+
3 Yaan u yantal juntúul rey jach yaan u páajtalil, yéetel yaʼab luʼumoʼob ken u gobernarte,+ letiʼeʼ yaan u beetik jeʼel baʼaxak u kʼáateʼ.
4 Chéen baʼaleʼ le kéen anchajak u páajtalileʼ u reinoeʼ yaan u xeʼexetʼaʼal, yéetel yaan u jaʼatsal tu tojil le kanpʼéel iikʼoʼob yanoʼob teʼ kaʼanoʼ.+ Pero maʼ kun tsʼaabil tiʼ u paalaloʼob, yéetel u páajtalil le reinoʼobaʼ maʼ ken u chuk le páajtalil yanchaj tiʼ letiʼoʼ, tumen u reinoeʼ yaan u jóokpaytaʼal yéetel yaan u tsʼaʼabal tiʼ uláakʼ máakoʼob.
5 U reyil noojoleʼ yaan u yantal u páajtalil, letiʼeʼ juntúul tiʼ le u príncipeʼoboʼ. Chéen baʼaleʼ yaan u yantal juntúul máax* ken u tsʼáauba tu contra, le máak jeʼelaʼ maas yaan u muukʼ ke letiʼ, tsʼoʼoleʼ yaan u gobernar yéetel junpʼéel autoridad maas nojoch.
6 Le kéen máanak jujunpʼéel añoseʼ letiʼobeʼ yaan u chʼaʼikoʼob junpʼéel acuerdo, u hija le u reyil noojoloʼ yaan u taal tu yiknal le u reyil xamanoʼ utiaʼal ka u sellartoʼob le acuerdooʼ. Chéen baʼaleʼ le hijatsiloʼ yaan u xuʼulul le páajtalil yaan tu kʼaboʼ. Le rey xanoʼ yaan u perdertik le páajtalil yaan tu kʼaboʼ, yéetel le hijatsiloʼ yaan u kʼuʼubul tu kʼab uláakʼ máakoʼob, bey xan kun úuchul tiʼ le máaxoʼob taasoʼ, tiʼ le máax beet u síijiloʼ yéetel tiʼ le máax beet u yantal u páajtalil teʼ kʼiinoʼob jeʼeloʼoboʼ.
7 Juntúul máax ku taal tiʼ u familia le hijatsiloʼ yaan u yantal tu lugar u papá.* Letiʼeʼ yaan u taal tu contra le ejércitooʼ yéetel tu contra le lugar tuʼux ku taʼakikuba u reyil xamanoʼ, yaan u baʼateʼel tu contraʼob yéetel yaan u ganar.
8 Yaan u taasik tu luʼumil Egipto le diosoʼob tu chʼaʼajtiʼoboʼ, le imagenoʼob de metaloʼ, le jatsʼuts baʼaloʼob beetaʼanoʼob de plata yéetel de orooʼ, yéetel yaan xan u taasik máakoʼob bey esclavoʼobeʼ. Tu yáamil wa jaypʼéel añoseʼ letiʼeʼ yaan u náachtal tiʼ le u reyil xamanoʼ.
9 U reyil xaman túuneʼ yaan u taal baʼateʼel tu contra u reyil noojol, chéen baʼaleʼ u reyil xamaneʼ yaan u suut tu luʼum.
10 U hijoʼobeʼ yaan u líiʼskubaʼob utiaʼal u binoʼob baʼateʼel yéetel yaan u muchʼkíintikoʼob junpʼéel ejército jach nojoch. Juntúul tiʼ letiʼobeʼ* yaan u taaleʼ yéetel yaan u míistik le luʼum jeʼex u beetik yaʼabkach jaʼobeʼ. Chéen baʼaleʼ yaan u suut paachil yéetel yaan u seguer u baʼateʼel tak ken kʼuchuk teʼ lugar tuʼux ku kanáantaʼaloʼ.
11 U reyil noojol túuneʼ yaan u pʼuʼujul yéetel yaan u jóokʼol baʼateʼel tu contra u reyil xaman, le rey jeʼelaʼ yaan u muchʼkíintik yaʼabkach máakoʼob. Chéen baʼaleʼ tuláakal le máakoʼobaʼ yaan u kʼuʼubloʼob tu kʼab le uláakʼ reyoʼ.*
12 Tuláakal le yaʼabkach máakoʼoboʼ yaan u bisaʼaloʼob. U puksiʼikʼal le reyoʼ yaan u taaskuba nojbaʼalil, yéetel yaan u beetik u lúubul u decenasil u milesil máakoʼob. Chéen baʼaleʼ maʼ ken u jóoʼs u yutsil tiʼ le páajtalil yaantiʼoʼ.
13 U reyil xamaneʼ yaan u suut yéetel yaan u muchʼkíintik maas yaʼab máakoʼob ke le tu yáax muchʼkíintoʼ. Le kéen máanak junpʼéel tiempo, jujunpʼéel añoseʼ, letiʼeʼ jach tu jaajil yaan u suut yéetel junpʼéel nojoch ejército bey xan yéetel yaʼab baʼaloʼob.
14 Teʼ kʼiinoʼob jeʼeloʼ yaʼab máakoʼob ken u tsʼáaubaʼob tu contra u reyil noojol.
Chéen baʼaleʼ le máakoʼob jach ku beetkoʼob loob* yanoʼob ichil a kaajaloʼ yaan u bisaʼaloʼob utiaʼal u yilik u béeykuntkoʼob junpʼéel baʼax tsʼoʼok u yilaʼal, chéen baʼaleʼ yaan u tʼóochpajloʼob.
15 U reyil xamaneʼ yaan u taal, yéetel yaan u beetik junpʼéel rampa utiaʼal u baʼateʼel tu contra le kaajoʼ, yéetel yaan u chʼaʼik le kaaj yaan u pakʼiloʼob tu baʼpachoʼ. U kʼab* u reyil noojoleʼ yaan u pʼáatal minaʼan u muukʼ, bey xan kun úuchul tak tiʼ u maas maʼalobil tiʼ u soldadoʼoboʼ. Maʼ kun antal u muukʼoʼob utiaʼal u seguer u baʼateloʼob.
16 Le máax kun taal tu contra u reyil noojoleʼ yaan u beetik jeʼel baʼaxak u kʼáateʼ, yéetel mix máak kun páajtal u pʼáatal waʼatal tu táan. Letiʼeʼ yaan u waʼatal teʼ Kiʼichkelem Luʼumoʼ,+ yéetel tu kʼabeʼ yaan u yantal u páajtalil utiaʼal u xuʼulsaj.
17 Letiʼeʼ yéetel u jaajil u yóol kun taal, yaan u taal junmúuchʼ yéetel tuláakal le soldadoʼob yaan tu reinooʼ. Tu yéeteleʼ yaan u chʼaʼabal junpʼéel acuerdo, yéetel letiʼeʼ yaan baʼax ken u beete. Tiʼ letiʼeʼ yaan u tsʼaʼabal u páajtalil u xuʼulsik tiʼ u hija le koʼoleloʼoboʼ. U hija le koʼoleloʼobaʼ maʼ kun chúukpajal u yóol, yéetel maʼ kun seguer u pʼáatal tu yéetel.
18 Letiʼeʼ yaan u sutkuba u pakt le luʼumoʼob yanoʼob teʼ jáal jaʼoʼ yéetel yaan u chʼaʼik yaʼab tiʼ letiʼobiʼ. Juntúul u nojchil junpʼéel ejército túuneʼ yaan u beetik ka xuʼuluk le suʼtsilil tu taasaj tu yóokʼoloʼob le rey jeʼelaʼ, yéetel yaan u beetik ka pʼáatak ich suʼtsilil le reyoʼ.
19 Letiʼ* túuneʼ yaan u suut* tuʼux yaan u kaʼanal pakʼiloʼob u luʼumoʼ, yaan u tʼóochpajal, yaan u lúubul yéetel yaan u saʼatal.
20 Tu lugar túuneʼ yaan u yantal yaanal máakiʼ. Le máak jeʼelaʼ yaan u túuxtik juntúul máax cobrartik impuesto tiʼ tuláakal le kiʼichkelem reinooʼ. Le kéen máanak wa jaypʼéel kʼiinoʼobeʼ letiʼeʼ yaan u kíimil, chéen baʼaleʼ maʼ tumen beetaʼab loob tiʼiʼ mix tu yoʼolal junpʼéel guerraiʼ.
21 Tu lugar túuneʼ yaan u yantal juntúul máak pʼektaʼan, chéen baʼaleʼ letiʼobeʼ maʼ ken u tsʼáaʼobtiʼ le respeto unaj u tsʼaʼabal tiʼ juntúul reyoʼ. Letiʼeʼ yaan u taal tiʼ junpʼéel tiempo tuʼux yaan jeetsʼelil,* yéetel yaan u meyajtiʼ chʼujuk tʼaanoʼob* utiaʼal u chʼaʼik le reinooʼ.
22 Letiʼeʼ yaan u tsʼáaik yáanal u páajtalil le ejércitoʼob beyoʼob yaʼabkach jaʼoboʼ yéetel yaan u xuʼulsiktiʼob, yaan xan u xuʼulsaʼal tiʼ u j-Nojchil+ le pactooʼ.+
23 Chéen baʼaleʼ tumen yaan u chʼaʼabal junpʼéel acuerdo tu yéeteleʼ, letiʼeʼ yaan u tuus yéetel yaan u líikʼil baʼateʼel. Tsʼoʼoleʼ yéetel u yáantaj junpʼéel chan kaajeʼ yaan u yantal u páajtalil.
24 Tu kʼiiniloʼob yaan jeetsʼelileʼ* yaan u yokol teʼ tuʼuxoʼob maas yaan ayikʼaliloʼob teʼ luʼum jeʼeloʼ. Yaan u beetik le baʼax maʼ tu beetaj mix juntúul tiʼ u yúuchben láakʼtsiloʼoboʼ. Le baʼaloʼob ken u chʼaʼoʼ bey xan le u maasil baʼaloʼob maʼalobtakoʼ yaan u tʼoxik ichiloʼob. Letiʼeʼ yaan u chʼaʼtuklik baʼaloʼob kʼaastak tu contra le lugaroʼob yaan u pakʼiloʼob tu baʼpachoʼ, chéen baʼaleʼ yaan u beetik chéen ichil junpʼíit kʼiinoʼob.
25 Letiʼeʼ yaan u péeksaʼal tumen u puksiʼikʼal utiaʼal ka meyajnaktiʼ u nojoch páajtalil utiaʼal ka baʼatelnak junmúuchʼ yéetel junpʼéel nojoch ejército tu contra u reyil noojol. U reyil noojol túuneʼ yaan u líiʼskuba utiaʼal le baʼateloʼ, yaan u muchʼkíintik junpʼéel ejército jach táaj nojoch yéetel jach yaan u páajtalil. Chéen baʼaleʼ letiʼeʼ* maʼ kun pʼáatal waʼatalil tumen letiʼobeʼ yaan u chʼaʼtuklikoʼob baʼaloʼob kʼaastak tu contra.
26 Le máaxoʼob jaantik u kiʼikiʼ janaloʼoboʼ letiʼob kun beetik u lúubul.
U ejércitoeʼ yaan u míistaʼal,* yéetel yaʼab kun kíimloʼobiʼ.
27 Le kaʼatúul reyoʼobaʼ yaan u túulchʼintaʼaloʼob tumen u puksiʼikʼaloʼob utiaʼal ka u beetoʼob baʼax kʼaas. Letiʼobeʼ yaan u kutaloʼob tiʼ junpʼéeliliʼ mesa, chéen baʼaleʼ chéen tuusoʼob ken u yaʼal ichiloʼob. Pero mix baʼal kun jóokʼol maʼalobil tumen le u xuuloʼ yaan u taal teʼ kʼiin yéeyaʼanoʼ.+
28 Letiʼeʼ* yaan u suut tu luʼum yéetel yaan u bisik yaʼab baʼaloʼob maʼalobtak. U puksiʼikʼaleʼ yaan u tsʼáaikuba tu contra le pacto santooʼ. Tiʼ letiʼeʼ yaan u jóokʼol maʼalobil le baʼax ken u beetoʼ, yéetel yaan u suut tu luʼum.
29 Letiʼeʼ yaan u suut teʼ kʼiin yéeyaʼanoʼ yéetel yaan u taal tu contra u reyil noojol. Chéen baʼaleʼ teʼ vezaʼ maʼ kun úuchul jeʼex yáax úuchikoʼ.
30 Tumen u barcoiloʼob Kitimeʼ+ yaan u taaloʼob tu contra, yéetel yaan u pʼaʼatal ich suʼtsilil.
Letiʼeʼ yaan u suut, yéetel yaan u yeʼesik pʼujaʼan tu contra le pacto santooʼ,+ yéetel yaan u jóokʼol maʼalobil le baʼax ken u beetoʼ. Letiʼeʼ yaan u suuteʼ yéetel yaan u paktik le máaxoʼob pʼatik le pacto santooʼ.
31 Letiʼeʼ yaan u yantal u kʼaboʼob,* le kʼaboʼobaʼ yaan u kʼaskúuntikoʼob le lugar santooʼ,+ le lugar tuʼux ku kanáantaʼal máakoʼ, yéetel yaan u luʼskoʼob le ofrendaʼob unaj u kʼuʼubul sáamsamaloʼ.+
Teʼ lugar jeʼeloʼ yaan u tsʼáaikoʼob le x-laʼ baʼal ku xuʼulsajoʼ.+
32 Letiʼeʼ* yaan u kʼaskúuntik u tuukul le máaxoʼob táan u beetkoʼob baʼaloʼob kʼaastak yéetel ku tsʼáaikubaʼob tu contra le pactooʼ, lelaʼ yaan u beetik yéetel chʼujuk tʼaanoʼob. Chéen baʼaleʼ le kaaj u kʼaj óol u Diosoʼ yaan u chúukpajal u yóol, yéetel le baʼax ken u beetoʼ yaan u jóokʼol maʼalobil.
33 Le máaxoʼob yaan u naʼatoʼob+ yanoʼob ichil le kaajoʼ yaan u kaʼanskoʼob yaʼab máakoʼob. Letiʼobeʼ yaan u beetaʼal u tʼóochpajloʼob tumen le espadaoʼ bey xan tumen le kʼáakʼoʼ, yaan u beetaʼal u tʼóochpajloʼob le kéen cháachaʼak bisbiloʼoboʼ yéetel le kéen toʼokok le baʼaloʼob yaantiʼoboʼ. Lelaʼ yaan u xáantal wa jaypʼéel kʼiinoʼob.
34 Chéen baʼaleʼ le kéen beetaʼak u tʼóochpajloʼobeʼ yaan u tsʼaʼabaltiʼob junpʼíit áantaj. Yaʼab máakoʼobeʼ yaan u meyajtiʼob chʼujuk tʼaanoʼob utiaʼal u nupkubaʼob tu yéeteloʼob.
35 Jujuntúul tiʼ le máaxoʼob yaan u naʼatoʼoboʼ yaan u beetaʼal u tʼóochpajloʼob. Tu yoʼolaloʼobeʼ le kaajoʼ yaan u maas maʼalobkíintaʼal, yaan u limpiokíintaʼal yéetel yaan u sakkúuntaʼal+ tak tu tsʼook kʼiinoʼob. Le baʼaloʼobaʼ yaan u yúuchloʼob teʼ kʼiin yéeyaʼanoʼ.
36 Le reyoʼ* jach tu jaajil yaan u beetik jeʼel baʼaxak u kʼáateʼ. Yaan u nojbaʼalkúuntkuba yéetel yaan u yuʼubikuba maas nojoch ke tuláakal le diosoʼoboʼ. Tsʼoʼoleʼ yaan u yaʼalik baʼaloʼob jach kʼaastak tu contra le maas nojoch Diosoʼ.+ Le baʼax ken u beetoʼ yaan u jóokʼol maʼalobil tak ken kʼuchuk u kʼiinil u castigartaʼal tumen Dios. Tumen le baʼax chʼaʼtuklaʼanoʼ kʼaʼabéet u béeytal.
37 Maʼ ken u respetart u Dios u papáʼob, maʼ ken u yeʼes respeto tiʼ le baʼax ku tsʼíiboltik le koʼoleloʼoboʼ yéetel maʼ ken u respetart mix juntúul dios, baʼaxeʼ yaan u yuʼubikuba maas nojoch tiʼ tuláakal.
38 Letiʼeʼ yaan u alabartik le dios ku adorartaʼal teʼ lugaroʼob kaʼanal u pakʼiloʼoboʼ. Yaan u alabartik juntúul dios maʼ kʼaj óoltaʼab tumen u papáʼobiʼ, yaan u kʼubiktiʼob oro, plata, jatsʼuts tuunichoʼob bey xan baʼaloʼob maʼalobtak.
39 Letiʼeʼ yaan u bin tu paach* le túumben diosaʼ, yéetel u yáantaj le dios jeʼelaʼ yaan u bin maʼalobil tiʼ le kéen u tsʼáauba tu contra le lugaroʼob maas maʼalobtakoʼob utiaʼal u taʼakikuba máakoʼ. Yaan u alabartik le máaxoʼob yanoʼob tu favoroʼ* yéetel yaan u beetik u gobernaroʼob yóokʼol yaʼab máakoʼob. Letiʼeʼ tu tʼoxaj le luʼumoʼ, tu tʼoxaj según bajux u tojol.
40 Teʼ tu tsʼook kʼiinoʼoboʼ u reyil noojol yéetel letiʼeʼ yaan u paklan léenchʼintikubaʼob.* U reyil xamaneʼ yaan u taal tu contra, yaan u taal jeʼex u taal junpʼéel kʼaʼamkach iikʼeʼ, yaan u taal yéetel u carroiloʼob baʼateʼel, yéetel máakoʼob u natʼmaj u tsiiminoʼob bey xan yéetel yaʼab barcoʼob. Letiʼeʼ* yaan u yokol teʼ luʼumoʼoboʼ yéetel yaan u míistik tuláakal baʼal jeʼex u beetik yaʼabkach jaʼeʼ.
41 Letiʼeʼ yaan xan u yokol teʼ Kiʼichkelem Luʼumoʼ,+ yéetel yaʼab luʼumoʼobeʼ yaan u ganartaʼaloʼob. Chéen baʼaleʼ leloʼobaʼ letiʼe luʼumoʼob kun púutsʼloʼob tiʼ letiʼoʼ: Edom, Moab yéetel le jaats luʼum maas maʼalob yaan tu luʼum le ammonitaʼoboʼ.
42 Yaan xan u seguer u líiʼsik u kʼab tu contra le luʼumoʼoboʼ, yéetel u luʼumil Egiptoeʼ maʼ kun púutsʼul.
43 Letiʼeʼ yaan u gobernar yóokʼol le tesoroʼob taʼakaʼanoʼoboʼ, yóokʼol le oro yéetel le plataoʼ bey xan yóokʼol le baʼaloʼob maʼalobtak yanoʼob Egiptooʼ. Le libioʼob yéetel le etíopeʼoboʼ yaan u binoʼob tu paach.
44 Chéen baʼaleʼ le kéen u yuʼub le noticiaʼob ku taaloʼob desde teʼ lakʼin* yéetel desde teʼ xamanoʼ yaan u chiʼichnaktal. Letiʼ túuneʼ jach pʼujaʼan le kéen jóokʼok utiaʼal u kíimsik yéetel u xuʼulsik tiʼ yaʼab máakoʼob.
45 Letiʼeʼ yaan u armartik u kiʼichkelem najoʼob de nookʼ, yaan u tsʼáaikoʼob chúumuk tiʼ le nojoch kʼáaʼnáab yéetel tiʼ le santa montaña jach kiʼichkelmoʼ.+ Letiʼ túuneʼ yaan u kʼuchul u kʼiinil u xuʼulsaʼaltiʼ yéetel maʼ kun antal mix máak utiaʼal áantik.
Notas
^ Ich hebreoeʼ ku yaʼalaʼal kaʼach «letiʼ».
^ Maʼ xaaneʼ teʼelaʼ táan u tʼaan tiʼ u reyil xaman.
^ Maʼ xaaneʼ teʼelaʼ táan u tʼaan tiʼ u reyil noojol.
^ Ich hebreoeʼ ku yaʼalaʼal kaʼach «Letiʼeʼ».
^ Maʼ xaaneʼ teʼelaʼ táan u tʼaan tiʼ u reyil noojol.
^ Wa «u paalal le máakoʼob ku yookoloʼob».
^ Wa «U ejércitoʼob».
^ Maʼ xaaneʼ teʼelaʼ táan u tʼaan tiʼ u reyil xaman.
^ Ich hebreoeʼ ku yaʼalaʼal kaʼach «yaan u sutik u yich».
^ Uláakʼ bix u traducirtaʼaleʼ «tuʼux mix máak páaʼtik».
^ Wa «yéetel yaan u tuus».
^ Uláakʼ bix u traducirtaʼaleʼ «Teʼ kʼiinoʼob tuʼux mix máak páaʼtikoʼ».
^ Maʼ xaaneʼ teʼelaʼ táan u tʼaan tiʼ u reyil xaman.
^ Wa «yaan u búulul».
^ Maʼ xaaneʼ teʼelaʼ táan u tʼaan tiʼ u reyil xaman.
^ Wa «u ejércitoʼob».
^ Maʼ xaaneʼ teʼelaʼ táan u tʼaan tiʼ u reyil xaman.
^ Maʼ xaaneʼ teʼelaʼ táan u tʼaan tiʼ u reyil xaman.
^ Wa «yaan u yáantaʼal tumen».
^ Uláakʼ bix u traducirtaʼaleʼ «jeʼel máaxak ka lúubuk utsil tiʼeʼ».
^ Wa «atacarkubaʼob».
^ Maʼ xaaneʼ teʼelaʼ táan u tʼaan tiʼ u reyil xaman.
^ Wa «desde teʼ tuʼux ku jóokʼol le kʼiinoʼ».
