Números 25:1-18
25 Le tiaʼan kaʼach le israelitaʼob Sitimoʼ,+ le kaajoʼ kʼebanchaj úuchik u yantal baʼal u yiloʼob yéetel le koʼoleloʼob ku taaloʼob Moaboʼ.+
2 Le koʼoleloʼobaʼ joʼopʼ u yaʼalikoʼob tiʼ le kaaj ka táakpajkoʼob tiʼ le baʼaxoʼob ku kʼubkoʼob tiʼ u diosoʼoboʼ.+ Le kaaj túunoʼ joʼopʼ u janal yéetel u chintal tu táan u diosoʼob le koʼoleloʼobaʼ.+
3 U kaajil Israel túuneʼ joʼopʼ xan u adorartik Baal de Peor tu yéeteloʼob,+ Jéeoba túuneʼ joʼopʼ u sen pʼuʼujul tu contra Israel.
4 Jéeobaeʼ tu yaʼalaj tiʼ Moisés: «Chʼaʼ tuláakal u nuuktakil* le kaaj kʼebanchajoʼoboʼ ka a kíimsoʼob, yéetel chʼuykíint u wíinkliloʼob tu táan Jéeoba utiaʼal ka ilaʼak tumen u maasil. Utiaʼal ka páajchajak u xuʼulul u pʼuʼujul Jéeoba tu contra Israel».
5 Moisés túuneʼ tu yaʼalaj tiʼ u jueziloʼob u kaajil Israel:+ «Cada juntúul tiʼ teʼexeʼ unaj u kíimsik le xiiboʼob tu adorartoʼob Baal de Peoroʼ».+
6 Jach teʼ súutukoʼ juntúul israelitaeʼ joʼopʼ u beetik ka náatsʼak juntúul koʼolel madianita+ tu yiknal u sukuʼunoʼob tu táan u yich Moisés yéetel tu táan tuláakal le israelitaʼoboʼ, lelaʼ úuch mientras táan u yokʼoloʼob tu entradail le najil reuniónoʼ.
7 Le ka ilaʼab tumen Fineás,+ u hijo Eleazar, u yáabil Aarón le sacerdoteoʼ, tu séebaʼanileʼ líikʼ chúumuk tiʼ le kaajoʼ ka tu chʼaʼaj junpʼéel lanza.
8 Ka túun bin tu paach le israelitaoʼ, ook tu yotocheʼ ka tu táatsʼlomtaj tu kaʼatúulal. Tu táatsʼlomtaj le israelita tu xiibiloʼ yéetel tu táatsʼlomtaj le koʼolel tu x-chʼupiloʼ. Bey túun úuchik u xuʼulul u kíimsaʼal le israelitaʼob kʼebanchajoʼoboʼ.+
9 Tuláakal le máaxoʼob kíimoʼoboʼ tu chukaj 24,000.+
10 Jéeoba túuneʼ tu yaʼalaj tiʼ Moisés:
11 «Fineás, u hijo Eleazar,+ u yáabil Aarón le sacerdoteoʼ, tsʼoʼok u beetik u xuʼulul in pʼuʼujul tu contra u kaajil Israel, tumen letiʼeʼ maʼ tu chaʼaj u adorarkoʼob uláakʼ diosoʼobiʼ, chéen teen.+ Yoʼolal leloʼ teneʼ maʼ in xuʼuls tiʼ le israelitaʼoboʼ, kex teneʼ kin kʼáatik ka adorartaʼaken chéen teen.+
12 Le oʼolaleʼ, aʼaltiʼ: ‹Táan in beetik junpʼéel pacto tu yéetel utiaʼal ka in weʼes in wutsil tiʼ.
13 Le pactoaʼ utiaʼal u beetik u sacerdoteil letiʼ bey xan u paalal utiaʼal mantatsʼ.+ Tumen letiʼeʼ maʼ tu chaʼaj u adorarkoʼob uláakʼ diosoʼobiʼ,+ chéen teen, tsʼoʼoleʼ tu beetaj in perdonartik u kʼeban u kaajil Israel›».
14 U kʼaabaʼ kaʼach le israelita kíimsaʼab yéetel le koʼolel madianitaoʼ Zimrí, u hijo Saalu, Saalueʼ u nojchil junpʼéel familia ku taal tiʼ u tribu Simeón.
15 U kʼaabaʼ kaʼach le koʼolel madianita kíimsaʼaboʼ Kozbí, u hija Zur,+ Zureʼ u nojchil junmúuchʼ familiaʼob tu luʼumil Madián.+
16 Le ka tsʼoʼokeʼ Jéeobaeʼ tu yaʼalaj tiʼ Moisés:
17 «Xeen baʼateʼel tu contra le madianitaʼoboʼ yéetel xuʼulstiʼob.+
18 Tumen letiʼobeʼ tsʼoʼok u taaskoʼob problemas tiʼ teʼex, tu beetoʼob a kʼebantaleʼex yoʼolal le baʼax úuch Peoroʼ+ yéetel yoʼolal Kozbí u hija juntúul u nojchil junpʼéel familia tu luʼumil Madián, le koʼolel kíimsaʼab+ teʼ día ka kíimsaʼab yaʼab máakoʼob tu yoʼolal Peoroʼ».+
Notas
^ Ich hebreoeʼ ku yaʼalaʼal kaʼach «u pooliloʼob».
