Isaías 50:1-11
50 Lelaʼ letiʼe baʼax ku yaʼalik Jéeobaaʼ:
«¿Tuʼux yaan le juʼun ku yeʼesik tin divorciartinba+ tiʼ a maamaʼex le ka tin túuxtoʼ?
¿Tin koneʼex wa utiaʼal in boʼotik in pʼaax?
¡Ilawileʼex! Teʼexeʼ konaʼabeʼex tumen ka beetkeʼex baʼaloʼob kʼaastak,+tu yoʼolal le baʼaloʼob maʼ maʼalobtak ka beetkeʼexoʼ aʼalaʼab tiʼ a maamaʼex ka xiʼik.+
2 ¿Baʼaxten túun ka taaleneʼ mix máak yaan wayeʼ?
¿Baʼaxten le ka tʼaanajeneʼ mix máak núukten?+
¿Minaʼan wa páajtalil tiʼ in kʼab utiaʼal u salvartik máak?
¿Minaʼan wa ten u poderil utiaʼal in salvartik máak?+
¡Ilawileʼex! Le kéen tʼaanakeneʼ ku tijil le kʼáaʼnáaboʼ,+kin beetik u suut le ríoʼob junpʼéel desiertooʼ.+
Le kayoʼob túunoʼ ku kíimloʼob tumen ukʼajoʼobyéetel ku tuʼutaloʼob tumen ku tijil le jaʼoʼ.
3 Teneʼ kin búukbesik le kaʼan yéetel éeʼjochʼeʼeniloʼ,+kin pixik yéetel junpʼéel box nookʼ».
4 Kiʼichkelem Yuum Jéeobaeʼ tsʼoʼok u beetik u pʼáatal in waakʼ jeʼex u yaakʼ le máaxoʼob kaʼansaʼanoʼoboʼ,*+utiaʼal u páajtal in waʼalik maʼalob tʼaanoʼob tiʼ le máaxoʼob kaʼanaʼanoʼoboʼ.+
Letiʼeʼ sáamsamal temprano táan u yajsiken.
Ku yajsik in xikin utiaʼal u páajtal in chʼenxikin jeʼex u beetik le máaxoʼob kaʼansaʼanoʼoboʼ.+
5 Kiʼichkelem Yuum Jéeobaeʼ tsʼoʼok u jeʼekʼabtik in xikin,teneʼ maʼ tin beetaj in tercoiliʼ,+teneʼ maʼ tin beetaj chéen baʼax in kʼáatiʼ.+
6 Tin kʼubaj in puʼuch* tiʼ le máaxoʼob jatsʼikenoʼ,tin kʼubaj xan in pʼuʼuk tiʼ le máaxoʼob jóokpaytik u meʼex máakoʼ.
Maʼ tin taʼakaj in wich tiʼ le máaxoʼob pochʼkenoʼ mix tiʼ le máaxoʼob túubikenoʼ.+
7 Chéen baʼaleʼ yaan in wáantaʼal tumen Kiʼichkelem Yuum Jéeoba,+le oʼolal maʼ kun yaatal in wóol kex táan in taasaʼal mix baʼalil.
Baʼaxeʼ teneʼ yaan in chichkúuntik u táan in wich jeʼex junpʼéel tokʼ tuunicheʼ,+teneʼ in wojel maʼ kun pajbil in suʼtal.
8 Naatsʼ tiʼ teneʼ tiaʼan le Máax aʼalik toj in kuxtaloʼ.
Wa yaan máax takik in pooleʼ*+taalak utiaʼal k-utskíintik le baʼax uchaʼanoʼ.*
Wa juntúul máak yaan baʼax u kʼáat u yaʼal tin contraeʼtaalak tin wiknal.
9 ¡Uʼuy a wuʼuyeʼex lelaʼ! Teneʼ yaan in wáantaʼal tumen Kiʼichkelem Yuum Jéeoba.
¿Máax túun jeʼel u yaʼalik kʼasaʼan máakeneʼ?
¡Uʼuy a wuʼuyeʼex lelaʼ! Tuláakloʼobeʼ beyoʼob junpʼéel nookʼ ku bin u xuʼupulyéetel ku jaantaʼal tumen kʼamaseʼ.*
10 ¿Máax ichileʼex adorartik Jéeobayéetel ku yuʼubik baʼax ku yaʼalik le máax meyajtikoʼ?+
¿Máax tsʼoʼok u máan tuʼux jach éeʼjochʼeʼen, tuʼux mix junpʼíit sáasil yaan?
Letiʼeʼ unaj u kʼubik u yóol tiʼ u kʼaabaʼ Jéeoba yéetel unaj u kaxtik u yáantaj* u Dios.
11 «¡Uʼuy a wuʼuyeʼex lelaʼ! Tuláakleʼex le táan a tʼabkeʼex kʼáakʼyéetel táan a beetkeʼex u jóokʼol u chispailoʼ,xíimbalnakeʼex chéen yéetel u sáasil le kʼáakʼ ta tʼabeʼexoʼ,ichil le chispaʼob ta beeteʼex u yantaloʼ.
Lelaʼ letiʼe castigo ken in tsʼáateʼexaʼ:
yaan a sen muʼyajeʼex le kéen peklakeʼex».
Notas
^ Wa «u tsʼáaikten junpʼéel aakʼ maʼalob kaʼansaʼanil».
^ Tuláakʼ tuʼuxeʼ ku yaʼalaʼal «paach».
^ Wa «taak u baʼateʼel tin contraeʼ».
^ Wa «taalak tin táan».
^ Tuláakʼ tuʼuxeʼ ku yaʼalaʼal «x-tuyul».
^ Wa «u confiar tiʼ».
