Isaías 5:1-30
5 Teneʼ nikaʼaj kʼaay tiʼ le máax in yaabiltmoʼ,le kʼaayoʼ ku tʼaan tiʼ le máax in yaabiltmoʼ yéetel tiʼ le uva u pakʼmoʼ.+
Le máax in yaabiltmoʼ u pakʼmaj uva tiʼ junpʼéel ebekníix* maʼalob u luʼumil.
2 Letiʼeʼ tu péeksaj u luʼumil yéetel tu chʼíichʼaj u tuunichil.
Ka tsʼoʼokeʼ tu pakʼaj maʼalob uvaiʼ, junpʼéel clase chak uva.
Tu beetaj xan junpʼéel torre tu chúumukil,yéetel tu beetaj junpʼéel pila utiaʼal u yeʼetsʼel uva.+
Ka tsʼoʼokeʼ joʼopʼ u páaʼtik u yantal maʼalob uva,pero chéen yanchaj uva maʼ maʼalobtakiʼ.+
3 Le oʼolal letiʼeʼ tu yaʼalaj: «Beora túunaʼ, u kajnáalileʼex Jerusalén yéetel u kajnáalileʼex Judá,beet uts a wilkeʼex wa teen tsʼoʼok in beetik baʼax maʼ maʼalobiʼ wa letiʼe uva in pakʼmoʼ.+
4 ¿Yaan wa baʼax uláakʼ jeʼel u páajtal in beetik kaʼach tu yoʼolal in pakʼal uvaeʼ?
¿Yaan wa baʼax maʼ in beetmiʼ?+
¿Baʼaxten le ka joʼopʼ in páaʼtik u tsʼáaik maʼalob uvaeʼchéen tu tsʼáaj uvaʼob maʼ maʼalobtakiʼ?
5 Beoraaʼ nikaʼaj in waʼalteʼexbaʼax ken in beet tiʼ in pakʼal uvaoʼ:
yaan in luʼsik u suupʼil,*kéen tsʼoʼokkeʼ yaan u tóokaʼal.+
Yaan xan in jutik u kootil,kéen tsʼoʼokkeʼ yaan u pepeʼchaʼataʼal le uvaoʼ.
6 Yaan in beetik u pʼáatal jeʼex junpʼéel luʼum xúumpʼattaʼaneʼ.+
Maʼ kun podarbil mix kun páakbil.
Yaan u loʼobol yéetel kʼiʼixoʼob bey xan yéetel xíiwoʼob,+yaan in waʼalik tiʼ le múuyaloʼob maʼ u taaskoʼob mix junpʼíit jaʼ tu yóokʼoloʼ.+
7 U kaajil Israeleʼ letiʼe u pakʼal uva Jéeoba, le máax gobernartik le ángeloʼoboʼ.+
U kajnáaliloʼob Judáeʼ letiʼe u paakʼal jach u yaabiltmaj kaʼachoʼ.
Letiʼeʼ táan kaʼach u páaʼtik u beetaʼal justicia,+chéen baʼaleʼ beetaʼab injusticia.
Táan kaʼach u páaʼtik u beetaʼal baʼax toj,chéen baʼaleʼ tu lugar leloʼ, tu yuʼubaj u yawat le máaxoʼob táan u beetaʼal loob tiʼoboʼ».+
8 ¡Óotsil le máaxoʼob maʼ tu xuʼulul u chʼaʼikoʼob najoʼoboʼ,+le máaxoʼob maʼ tu xuʼulul u chʼaʼikoʼob luʼumoʼob+tak ken pʼáatak minaʼan mix baʼal utiaʼal u maasil máakoʼob,yéetel tak ken pʼáatak chéen letiʼob u yuumil le luʼumoʼ!
9 Jéeobaeʼ* tsʼoʼok u yaʼalik tin xikin,tsʼoʼok u jurartik lelaʼ: yaʼab najoʼobeʼ kex nuuktak yéetel kex jatsʼutstakeʼyaan u pʼáatal chéen x-lalaʼ najoʼobyéetel mix máak kun kajtaliʼ.+
10 Tumen cuatro hectáreas uvaeʼ chéen yaan u tsʼáaik 22 litros* vino,junpʼéel homer* chuup yéetel semillaeʼ chéen yaan u tsʼáaik junpʼéel efá* u yich.+
11 ¡Óotsil le máaxoʼob ku líikʼloʼob jach temprano utiaʼal u káaltaloʼoboʼ,+yéetel ku seguertik u yukʼikoʼob kex tsʼoʼok u yáakʼabtal, tak ken sen káalkuntaʼakoʼob tumen le vinooʼ!
12 Teʼ fiestaʼob ku beetkoʼoboʼ ku tsʼaʼabal vino, ku paʼaxal pandereta,flauta, arpa yéetel uláakʼ u nuʼukulil paax yaan u cuerdailoʼob.
Chéen baʼaleʼ maʼatech u tuukuloʼob tiʼ le baʼaxoʼob ku beetik Jéeobaoʼ,maʼatech u yilkoʼob le baʼaxoʼob ku beetik yéetel u kʼaboʼoboʼ.
13 In kaajaleʼ yaan u bisaʼal táanxel luʼumiltumen maʼ u kʼaj óolenoʼobiʼ.+
Le máaxoʼob yaan páajtalil tiʼoboʼ yaan u muʼyajtikoʼob wiʼij,+yéetel tuláakal u kajnáaliloʼobeʼ yaan u muʼyajtikoʼob ukʼaj.
14 Yoʼolal lelaʼ le Muknaloʼ* tsʼoʼok u nojochkíintkubayéetel nojoch u japmil u chiʼ.+
Tiʼ kun bin u nuuktakil le kaajoʼ bey xan le bukaʼaj máakoʼob kajaʼanoʼoboʼbey xan le máaxoʼob maʼ tu xuʼulul u festejaroʼoboʼ.
15 Le máakoʼoboʼ yaan u chintaloʼob,le máakoʼoboʼ yaan u mixbaʼalkúuntaʼaloʼob,le máaxoʼob nojbaʼal u taaskubaʼoboʼ yaan u paʼajal u suʼtaloʼob.
16 Jéeobaeʼ* yaan u alabartaʼal yoʼolal u justicia.
U jaajil Dios, le Máax Santooʼ,+ yaan u meyajtiʼ le justicia utiaʼal u yeʼesik de ke Santooʼ.+
17 Le mejen tamanoʼoboʼ yaan u máan u janaloʼob bey jeʼex u beetkoʼob teʼ tuʼux suuk u janaloʼoboʼ.
Le j-táanxel luʼumiloʼoboʼ yaan u jaantikoʼob le baʼaxoʼob ku yantal teʼ luʼum xúumpʼattaʼanoʼ, teʼ tuʼux yaan kaʼach le baʼalcheʼob poloktakoʼoboʼ.
18 ¡Óotsil le máaxoʼob ku tuusoʼoboʼ! Kʼaxaʼanoʼob tumen u kʼebanoʼob yéetel tumen le baʼax maʼ maʼalob ku beetkoʼoboʼ,beyoʼob juntúul baʼalcheʼ kʼaxaʼan tiʼ junpʼéel carreta yéetel ku jíitik jeʼel tuʼuxak ka xiʼikeʼ.
19 Letiʼobeʼ ku yaʼalikoʼob: «¡Ka u séeb beet Dios baʼax u tukultmaj.
Ka u séeb beet utiaʼal ka k-ile.
Ka úuchuk le baʼax u chʼaʼtukultmaj le Máax Santo yaan Israeloʼ,beyoʼ yaan k-ojéeltik baʼax u tukultmaj!».+
20 ¡Óotsil le máaxoʼob ku yaʼalikoʼob uts le baʼax kʼaasoʼ yéetel kʼaas le baʼax utsoʼ,+le máaxoʼob ku yaʼalikoʼob sáasil le éeʼjochʼeʼeniloʼ yéetel éeʼjochʼeʼen le sáasiloʼ,le máaxoʼob ku yaʼalikoʼob kʼáaj le baʼax chʼujukoʼ yéetel chʼujuk le baʼax kʼáajoʼ!
21 ¡Óotsil le máaxoʼob ku tuklikoʼob jach yaan u naʼatoʼobyéetel ku tuklikoʼob yaʼab baʼal u yojloʼoboʼ!+
22 ¡Óotsil le máaxoʼob kʼaj óolaʼanoʼob tumen ku yukʼikoʼob yaʼab vinooʼyéetel le máaxoʼob jach u yojloʼob u preparartoʼob le baʼaxoʼob ku káalkuntik máakoʼ,+
23 bey xan le máaxoʼob ku chaʼik u maʼanloʼob utiaʼal u yaʼalikoʼob minaʼan u culpa le kʼasaʼan máakoʼ+yéetel le máaxoʼob maʼ tu yóotkoʼob u beetoʼob justicia tiʼ juntúul utsul máakoʼ!+
24 Le oʼolaleʼ yaan u xuʼulsaʼaltiʼobjeʼex kéen tóokaʼak sojol yéetel tikin suʼukeʼ,le kéen tsʼoʼokkeʼ u mootsoʼobeʼ yaan u tsʼúukul yéetel yaan u tuʼutal,yéetel u looloʼobeʼ yaan u kʼiʼitpajal bey polvoeʼ,tumen letiʼobeʼ maʼ tu yóotoʼob u kʼamoʼob u ley* Jéeobaiʼ,*yéetel maʼ tu respetartoʼob le baʼax ku yaʼalik le Máax Santo yaan Israeloʼ.+
25 Le oʼolal Jéeobaeʼ tsʼoʼok u sen pʼuʼujul tu contra u kaajal,yéetel yaan u líiʼsik u kʼab utiaʼal u castigarkoʼob.+
Yaan u tíitkuba le montañaʼoboʼ,le máaxoʼob kimenoʼoboʼ yaan u pʼáatloʼob jaytal bey basura teʼ bejoʼoboʼ.+
Yoʼolal le baʼaxoʼob ku beetkoʼoboʼ Dioseʼ maʼ xuʼuluk u pʼujaʼaniliʼ,láayliʼ u líiʼsmaj u kʼab utiaʼal u castigarkoʼobeʼ.
26 Letiʼeʼ tsʼoʼok u tsʼáaik kaʼanal junpʼéel señal utiaʼal u yilaʼal tumen junpʼéel kaaj náach yanil.+
Tsʼoʼok u xóobtikoʼob utiaʼal u taaloʼob desde tu xuul yóokʼol kaab.+
¡Ilawileʼex!, letiʼobeʼ jach séebaʼan u taaloʼob.+
27 Mix juntúul tiʼ letiʼob kaʼanaʼaniʼ yéetel mix juntúul ku tʼóochpajliʼ.
Mix juntúul tiʼ letiʼob táan u yokol u weenliʼ yéetel mix juntúul ku weenliʼ.
U kʼaxnakʼoʼobeʼ maʼ táan u jáakaliʼyéetel mix tʼookol u táabil u xaanaboʼobiʼ.
28 Tuláakal u flechaʼobeʼ jóoʼsaʼan u puntaʼob,tuláakal u arcoʼobeʼ tesartaʼan maʼalob u suumiloʼob.*
U maay u tsiiminoʼobeʼ bey tokʼ tuunicheʼ,u ruedail u carroiloʼob u baʼateloʼobeʼ chich u suutoʼob, beyoʼob mosoneʼ.+
29 Ku jéenkaloʼob jeʼex juntúul leóneʼ,ku jéenkaloʼob jeʼex le táankelem leónoʼoboʼ.*+
Yaan u yuʼubaʼal bix u juum u kaaloʼob yéetel yaan u chukikoʼob le baʼax ku chʼúuktikoʼoboʼyéetel yaan u kuchik u bisoʼob, maʼ kun antal mix máak tokiktiʼob.
30 Teʼ kʼiin jeʼeloʼ yaan u juum u kaaloʼob kéen yanakoʼob tu yóokʼol le baʼax u chukmoʼoboʼ,yaan u juum jeʼex u juum le kʼáaʼnáaboʼ.+
Jeʼel máaxak ka u jach pakt le luʼumoʼ yaan u yilik junpʼéel éeʼjochʼeʼenil ku beetik u sajaktal máak,tak le kaʼanoʼ yaan u booxtal tumen tsʼoʼok u piʼixil le Kʼiin tumen le múuyaloʼoboʼ.+
Notas
^ Wa «bajada».
^ U luʼsaʼal le cheʼob wa le kʼiʼixoʼob ikil kʼalaʼanil u paachoʼ.
^ Wa «Jéeoba, le máax gobernartik le ángeloʼoboʼ».
^ Ich hebreoeʼ ku yaʼalaʼal kaʼach «junpʼéel bato». Ilawil «Bato», página 2557.
^ Lelaʼ letiʼe bukaʼaj ku bisik junpʼéel nuʼukul de 220 litrosoʼ. Ilawil «Homer», página 2565.
^ Lelaʼ letiʼe bukaʼaj ku bisik junpʼéel nuʼukul de 22 litrosoʼ. Ilawil «Efá», página 2561.
^ Ilawil página 2572.
^ Wa «Jéeoba, le máax gobernartik le ángeloʼoboʼ».
^ Wa «kaʼansaj».
^ Wa «Jéeoba, le máax gobernartik le ángeloʼoboʼ».
^ Wa «listoʼob utiaʼal meyaj».
^ Wa «le táankelem leónoʼob tsʼoʼok u chowaktal u tsoʼotsel u pooloʼoboʼ».
