Génesis 25:1-34
25 Abraháneʼ tu chʼaʼaj uláakʼ u yatan, u kʼaabaʼeʼ Keturá.
2 Ka máan tiempoeʼ Keturáeʼ yanchaj u hijoʼob, u kʼaabaʼobeʼ Zimrán, Joksán, Medán, Madián,+ Isbak yéetel Suaj.+
3 Joksáneʼ u papá Seba yéetel Dedán.
U paalal Dedáneʼ letiʼe asurimoʼoboʼ, le letusimoʼoboʼ yéetel le leumimoʼoboʼ.
4 U hijoʼob Madiáneʼ letiʼe jeʼeloʼobaʼ: Efá, Éfer, Anok, Abidá yéetel Eldá.
Tuláakal le jeʼeloʼobaʼ u hijoʼob Keturá.
5 Ka máan kʼiineʼ Abraháneʼ tu tsʼáaj tiʼ Isaak tuláakal le baʼax yaantiʼoʼ.+
6 Pero tiʼ u maasil u paalal yanchaj yéetel uláakʼ u yatanoʼoboʼ* tu síiaj baʼaloʼob tiʼob. Antes tiʼ u kíimil túuneʼ Abraháneʼ tu túuxtoʼob tu luʼumil Lakʼin, náach tiʼ u hijo Isaak.+
7 Abraháneʼ kuxlaj 175 años.
8 Letiʼeʼ xáanchaj u kuxtal, kuxlaj ich kiʼimak óolal tak ka kíimi. Ka tsʼoʼok u kíimileʼ muʼuk jeʼex úuchik u muʼukul u yúuchben láakʼtsiloʼobeʼ.
9 Muʼuk tumen Isaak yéetel Ismael, u hijoʼob, tsʼaʼab tu sajkabil Makpelá teʼ kʼáax utiaʼal kaʼach Efrón, u hijo Zoar le ititaoʼ. Le kʼáaxaʼ tiaʼan naatsʼ tiʼ Mamréeʼ.+
10 Le kʼáaxaʼ letiʼe tu manaj Abrahán tiʼ u paalal Etoʼ. Teʼeloʼ tiʼ muʼuk Abrahániʼ, teʼ lugar tuʼux muʼuk xan Sara u yatanoʼ.+
11 Le ka tsʼoʼok u kíimil Abraháneʼ, Dioseʼ seguernaj u bendecirtik Isaak, u hijo Abrahán.+ Isaakeʼ kajakbal kaʼach naatsʼ tiʼ Beer-lai-roy.+
12 Lelaʼ u tsikbalil u kuxtal Ismael+ u hijo Abrahán. Ismaeleʼ letiʼe hijo yanchaj tiʼ Abrahán yéetel Agar+ le egipciaoʼ, le u sirvienta Sara kaʼachoʼ.
13 Lelaʼ letiʼe u kʼaabaʼ u hijoʼob Ismaelaʼ, bey xan tsʼaʼabik u kʼaabaʼ le familiaʼob jóokʼoʼob tiʼ letiʼoboʼ: Nebayot,+ u yáax hijo, tsʼoʼoleʼ Quedar,+ Adbeel, Mibsam,+
14 Mismá, Dumá, Masá,
15 Adad, Temá, Jetur, Nafís yéetel Kedemá.
16 Lelaʼ letiʼe u kʼaabaʼ u 12 hijoʼob Ismaelaʼ. Letiʼob u nuuktakil tiʼ u familiaʼob.+ Le kʼaabaʼ yaantiʼoboʼ letiʼe kʼaabaʼ tsʼaʼab xan tiʼ le mejen kaajoʼob tuʼux kajlajoʼoboʼ bey xan tiʼ le lugaroʼob tuʼux pʼáatoʼob kajtal junpʼéel tiempooʼ.
17 Ismael túuneʼ kuxlaj 137 años. Ka tsʼoʼok u kíimileʼ muʼuk xan jeʼex úuchik u muʼukul u yúuchben láakʼtsiloʼobeʼ.
18 Letiʼobeʼ kajlajoʼob desde Avilá,+ naatsʼ tiʼ Sur+ le yaan naatsʼ tiʼ Egiptooʼ, tak tu luʼumil Asiria. Letiʼeʼ kajlaj naatsʼ tiʼ tuláakal u sukuʼunoʼob.*+
19 Lelaʼ u tsikbalil u kuxtal Isaak, u hijo Abrahán.+
Abraháneʼ u papá Isaak.
20 Isaakeʼ 40 años yaantiʼ ka tsʼoʼok u beel yéetel Rebeca, u hija Betuel,+ le arameo kajaʼan Padán-aramoʼ. Rebecaeʼ u yíitsʼin Labán le arameooʼ.
21 Isaak túuneʼ seguernaj u orar tiʼ Jéeoba yoʼolal u yatan tumen maʼ tu páajtal u yantal u paalal. Jéeoba túuneʼ tu núukaj u oracióneʼ ka tu beetaj u pʼáatal embarazadail Rebeca.
22 Le paalaloʼob túunoʼ káaj u baʼateloʼob ichil u nakʼ Rebeca.+ Le oʼolal tu yaʼalaj: «Wa bey kun seguer in muʼyajaʼ, maas maʼalob ka kíimken». Le oʼolal Rebecaeʼ orarnaj tiʼ Jéeoba.
23 Jéeobaeʼ tu yaʼalajtiʼ: «Yaan u yantal kaʼatúul a paalal.+ Tiʼ letiʼobeʼ yaan u jóokʼol kaʼapʼéel naciónoʼob,+ yéetel antes tiʼ u síijloʼobeʼ yaan u jatskubaʼob. Junpʼéel nacióneʼ yaan u dominartik le uláakʼ naciónoʼ.+ Yéetel le sukuʼuntsiloʼ yaan u servirtik le íitsʼintsiloʼ».+
24 Le ka kʼuch u kʼiinil u síijloʼobeʼ, ¡ilawile!, yaan gemeloʼob ichil u nakʼ.
25 Le ka síij le yáax juntúuloʼ láaj chak u wíinklil, tsʼoʼoleʼ piim u tsoʼotsel u wíinklil bey junpʼéel nookʼ de kʼéewel piim u tsoʼotseleʼ.+ Ka túun tsʼaʼab u kʼaabaʼt Esaú.*+
26 Ka tsʼoʼokeʼ jóokʼ u yíitsʼin u machmaj u tuunkuy Esaú,+ ka túun tsʼaʼab u kʼaabaʼt Jacob.*+ Isaakeʼ 60 años yaantiʼ ka yanchaj u paalal yéetel Rebeca.
27 Jeʼex máanik le tiempooʼ nojochchaj le paalaloʼoboʼ. Esaúeʼ tu beetuba juntúul maʼalob cazador+ yéetel uts tu tʼaan kaʼach u máan teʼ kʼáaxoʼ. Chéen baʼaleʼ Jacobeʼ juntúul máak suuk u beetik baʼax maʼalob yéetel kajaʼan tiʼ najoʼob de nookʼ.+
28 Isaakeʼ tu yaabiltaj Esaú tumen ku taasaʼal bakʼ u jaante. Chéen baʼaleʼ Rebecaeʼ tu yaabiltaj Jacob.+
29 Juntéenjeakil túuneʼ Jacobeʼ táan u chakik janal. Tiʼ leloʼ kʼuch Esaú, suut ku beetik kʼáax yéetel jach kaʼanaʼan.
30 Esaú túuneʼ tu yaʼalaj tiʼ Jacob: «¡Beet uts a jáan tsʼáaikten junpʼíit tiʼ le chak janal yaantech teʼeloʼ, tumen jach kaʼanaʼanen yéetel tin kíimil yéetel wiʼij!». Le oʼolal tsʼaʼab xan u kʼaabaʼt Edom.*+
31 Jacob túuneʼ tu núukajtiʼ: «Maʼalob, pero antes in tsʼáaiktecheʼ konten le derecho yaantech bey yáax hijooʼ».+
32 Esaúeʼ tu yaʼalajtiʼ: «¡Kin wuʼuyik jach nikaʼaj kíimil! Le oʼolaleʼ, ¿baʼax túun u biilal tiʼ teen le derecho jeʼeloʼ?».
33 Jacobeʼ tu yaʼalajtiʼ: «Maʼalob, pero anteseʼ jurarte». Letiʼ túuneʼ tu jurartaj ka tu konaj tiʼ Jacob le derecho yaantiʼ bey yáax hijooʼ.+
34 Jacob túuneʼ tu tsʼáaj tiʼ Esaú le lentejas u chakmajoʼ, tu tsʼáaj waaj tiʼ bey xan baʼax u yukʼe. Letiʼ túuneʼ tu jaantaj, le ka tsʼoʼokeʼ líikʼeʼ ka bini. Bey úuchik u mixbaʼalkúuntik Esaú le derecho yaantiʼ bey yáax hijooʼ.
Notas
^ Ich hebreoeʼ ku yaʼalaʼal kaʼach «concubinaʼob».
^ Uláakʼ bix u traducirtaʼaleʼ «Letiʼeʼ kuxlaj ich baʼatelil yéetel tuláakal u sukuʼunoʼob».
^ U kʼáat u yaʼal «Velludo».
^ U kʼáat u yaʼal «Le Máax ku Machik u Tuunkuy Uláakʼoʼ; Le Máax ku Chʼaʼik u Lugar Uláakʼ Máakoʼ».
^ U kʼáat u yaʼal «Chak».
