Génesis 14:1-24
14 Juntéenjeak túuneʼ Amrafel u reyil Sinar,+ Ariok u reyil Elasar, Kedorlaomer+ u reyil Elam+ yéetel Tidal u reyil Goyimeʼ
2 baʼatelnajoʼob tu contra Bera u reyil Sodoma,+ Birsá u reyil Gomorra,+ Sinab u reyil Admá, Seméber u reyil Zeboyim+ yéetel u reyil Bela wa Zóar, jeʼex kʼaj óolaʼanil xanoʼ.
3 Tuláakal le reyoʼobaʼ* tu muchʼubaʼob tu Táax Luʼumil Sidim+ wa le Mar Saladooʼ.*+
4 Le cinco reyoʼobaʼ 12 años yanchajoʼob yáanal u páajtalil Kedorlaomer, chéen baʼaleʼ tu 13 añoseʼ líikʼoʼob tu contra.
5 Tu 14 años túuneʼ Kedorlaomer yéetel le reyoʼob yanoʼob tu yéeteloʼ binoʼob baʼateleʼ ka tu ganartoʼob le refaímoʼob tu luʼumil Asterot-karnaimoʼ, tu ganartoʼob xan le zuzimoʼob tu kaajil Camoʼ, tu ganartoʼob le emimoʼob+ tu luʼumil Savé-kiriataimoʼ
6 yéetel tu ganartoʼob le oreoʼob+ tu montañail Seír+ tak El-parán, le luʼum yaan tu tséel le desiertooʼ.
7 Le ka tsʼoʼokeʼ Kedorlaomer yéetel le máaxoʼob tiaʼanoʼob tu yéeteloʼ binoʼob En-mispat wa Cadés+ ka tu chʼaʼajoʼob tuláakal u luʼum le amalekitaʼoboʼ.+ Letiʼob xaneʼ tu ganartoʼob le amorreoʼob+ kajaʼanoʼob Azazón-tamaroʼ.+
8 Le ka tu yiloʼob leloʼ u reyiloʼob túun Sodoma, Gomorra, Admá, Zeboyim yéetel Bela wa Zóareʼ, tu muchʼubaʼob tu Táax Luʼumil Sidim utiaʼal u baʼateloʼoboʼ.
9 Letiʼobeʼ líikʼoʼob tu contra Kedorlaomer u reyil Elam, Tidal u reyil Goyim, Amrafel u reyil Sinar yéetel tu contra Ariok u reyil Elasar.+ Kantúul reyoʼob tu contra cinco reyoʼob.
10 U reyiloʼob túun Sodoma yéetel Gomorraeʼ káaj u púutsʼloʼob, chéen baʼaleʼ tumen chuup kaʼach u Táax Luʼumil Sidim yéetel jooloʼob tuʼux yaan chapopoteeʼ* lúuboʼob ichil, yéetel le máaxoʼob púutsʼoʼoboʼ binoʼob teʼ montañaʼoboʼ.
11 Le kantúul reyoʼob ganarnajoʼob túunoʼ tu chʼaʼajoʼob tuláakal baʼal utiaʼal jaantbil bey xan tuláakal baʼal maʼalob yaan tiʼ Sodoma yéetel Gomorraeʼ ka binoʼob.+
12 Letiʼobeʼ tu bisoʼob xan Lot u sobrino Abrán, le máax kajakbal kaʼach Sodomaoʼ,+ bisaʼab paʼteʼ yéetel tuláakal baʼax yaantiʼ. Le ka tsʼoʼokeʼ lukʼoʼob teʼeloʼ.
13 Le ka tsʼoʼok leloʼ juntúul tiʼ le máaxoʼob púutsʼoʼ taal tuʼux yaan Abrán le hebreooʼ, ka tu yaʼalajtiʼ le baʼax úuchoʼ. Abrán kaʼacheʼ tiʼ kajaʼan* teʼ tuʼux yaan le nukuch cheʼob utiaʼal juntúul amorreo ku kʼaabaʼtik Mamréoʼ,+ letiʼeʼ sukuʼuntsil yéetel Escol bey xan yéetel Aner.+ Letiʼobeʼ u chʼaʼamoʼob kaʼach junpʼéel acuerdo utiaʼal u múul áantkubaʼob yéetel Abrán.
14 Bey túun tu yojéeltil Abrán tsʼoʼok u cháachaʼal bisbil u láakʼtsiloʼ.*+ Tu séebaʼanil túuneʼ tu muchʼaj 318 j-meyajoʼob sijnáaloʼob tu yotoch, máakoʼob kaʼansaʼanoʼob baʼateʼel, ka bin u chʼaʼpachtoʼob tak tu kaajil Dan.+
15 Tu áakʼabileʼ Abráneʼ tu jatsaj u j-meyajoʼobeʼ ka tu atacartaj le máakoʼoboʼ ka tu ganartoʼob. Ka túun tu chʼaʼpachtoʼob tak Obá, tu xamanil Damasco.
16 Bey úuchik u recuperartik tuláakal le baʼax bisaʼaboʼ yéetel tu salvartaj Lot, u láakʼtsil. Tu recuperartaj xan tuláakal baʼax u tiaʼal Lot, tu salvartaj le koʼoleloʼoboʼ bey xan le u maasil máakoʼoboʼ.
17 Le ka suunaj Abrán tsʼoʼok u ganartik Kedorlaomer yéetel le uláakʼ reyoʼob yanoʼob tu yéeteloʼ, u reyil Sodomaeʼ bin u yil Abrán teʼ lugar ku kʼaabaʼtik u Táax Luʼumil Savé wa u Táax luʼumil le reyoʼ.+
18 Melquisedek,+ u reyil Salem+ túuneʼ tu jóoʼsaj waaj yéetel vino. Letiʼ kaʼacheʼ u sacerdote le Maas Nojoch Diosoʼ.+
19 Letiʼ túuneʼ tu bendecirtaj táan u yaʼalik:
«¡Bendecirtaʼak Abrán tumen le Maas Nojoch Diosoʼ,le Máax Beetmil kaʼan yéetel luʼumoʼ!
20 ¡Alabartaʼak le Maas Nojoch Diosoʼ,le máax kʼub a enemigoʼob ta kʼaboʼ!».
Abrán túuneʼ tu tsʼáajtiʼ u diez por cientoil* tiʼ tuláakal le baʼaxoʼob tu recuperartoʼ.+
21 Le ka tsʼoʼok leloʼ u reyil Sodomaeʼ tu yaʼalaj tiʼ Abrán: «Pʼáataktech le baʼaloʼoboʼ, chéen baʼaleʼ tsʼáaten le máakoʼoboʼ».
22 Abráneʼ tu yaʼalaj tiʼ u reyil Sodoma: «Kin líiʼsik in kʼab utiaʼal in jurartik tiʼ Jéeoba, le Maas Nojoch Diosoʼ, le Máax Beetmil kaʼan yéetel luʼumoʼ,
23 de ke mix junpʼéel tiʼ le baʼaloʼob a tiaʼal ken in chʼaʼoʼ mix junxóotʼ hilo yéetel mix u táabil junpʼéel xanab, utiaʼal maʼ a waʼalik: ‹Teen ayikʼalkúunt Abrán›.
24 Le baʼax tin chʼaʼajoʼ chéen letiʼe baʼax tsʼoʼok u jaantik le táankelmoʼoboʼ, mix baʼal uláakʼ ken in chʼaʼe. Chéen baʼaleʼ chaʼa u chʼaʼik u parte Aner, Escol yéetel Mamré,+ le máaxoʼob áantenoʼ».
Notas
^ Maʼ xaaneʼ le reyoʼobaʼ letiʼe ku yaʼalaʼal teʼ versículo 1.
^ Uláakʼ bix kʼaj óolaʼanileʼ Mar Muerto.
^ Tuláakʼ tuʼuxeʼ ku yaʼalaʼal «chapapote».
^ Wa «kajaʼan kaʼach tiʼ najoʼob de nookʼ».
^ Ich hebreoeʼ ku yaʼalaʼal kaʼach «u sukuʼun».
^ Wa «u diezmoil».
