Eclesiastés 5:1-20
5 Le kéen xiʼikech tu yotoch u jaajil Dioseʼ+ kanáant baʼax ka beetik. Maas maʼalob ka a natsʼaba utiaʼal a chʼenxikint baʼax ku yaʼalaʼal+ ke ka a natsʼaba a beet junpʼéel sacrificio jeʼex u beetik le j-maʼ naʼatoʼoboʼ,+ tumen letiʼobeʼ maʼ tu tsʼáaikoʼob cuenta de ke maʼ maʼalob le baʼax ku beetkoʼoboʼ.
2 Maʼ a jáajan tʼaan. Tukult tubeel baʼax ken a waʼal tu táan u jaajil Dios,+ tumen u jaajil Dioseʼ tiaʼan teʼ kaʼanoʼ, pero techeʼ tiaʼanech way luʼumeʼ. Le oʼolal unaj a yéeyik tubeel baʼax ken a waʼale.+
3 Tumen jeʼex le u sen tuukul máak tiʼ u problemas ku beetik u wayakʼoʼ,*+ juntúul j-maʼ naʼat xaneʼ ikil u sen tʼaaneʼ ku yaʼalik baʼaloʼob chéen minaʼan u cuentail.+
4 Le kéen a prometert wa baʼax tiʼ Dioseʼ unaj a beetik tu séebaʼanil,+ tumen tiʼ letiʼeʼ maʼ tu lúubul utsil le j-maʼ naʼatoʼoboʼ.+ Beet le baʼax tsʼoʼok a prometerkoʼ.+
5 Maas maʼalob maʼ a prometertik mix baʼal ke ka a prometert junpʼéel baʼal maʼ ken a béeykunte.+
6 Maʼ a chaʼik u beetaʼal a kʼebantal tumen a chiʼ,+ yéetel maʼ a waʼalik tu táan le ángel* maʼ letiʼe baʼax taak a waʼalik kaʼachoʼ.+ ¿Baʼaxten unaj a beetik u tsʼíikil u jaajil Dios tu yoʼolal baʼax ka waʼalik, ka a beet tak u xuʼulsik tiʼ le baʼaxoʼob ka beetkoʼ?+
7 Tumen jeʼex le u sen tuukul máak tiʼ u problemas ku beetik u wayakʼoʼ,+ le sen tʼaanoʼ ku beetik u yaʼalik máak baʼaloʼob mix baʼal u biilal. Le oʼolaleʼ baʼax unaj u beetik máakeʼ u respetartik* u jaajil Dios.+
8 Wa ka wilik táan u pechʼ óoltaʼal le óotsiloʼob yéetel maʼ tu beetaʼal justicia mix tu beetaʼal baʼax toj teʼ luʼum tuʼux kajaʼanechoʼ, maʼ u jaʼakʼal a wóol tu yoʼolal le baʼax ku yúuchloʼ+ tumen le máax yaantiʼ autoridad ku beetik u kʼasaʼaniloʼ táan u jach ilaʼal tumen juntúul máax maas kaʼanal yanil tiʼ letiʼ. Le máaxoʼob yaan autoridad tiʼoboʼ mantatsʼ yaan uláakʼ máakoʼob maas kaʼanal yaniloʼob tiʼ letiʼob.
9 Le ganancia ku tsʼáaik le luʼumoʼ ku tʼoʼoxol ichil tuláakal máak. Tak le rey jaantik le baʼax ku tsʼáaik le luʼumoʼ.+
10 Le máax u yaabiltmaj plataeʼ mix bikʼin u kiʼimaktal u yóol yéetel le bukaʼaj plata yaantiʼoʼ, le máax u yaabiltmaj le ayikʼaliloʼ mix bikʼin xan u kiʼimaktal u yóol yéetel le bukaʼaj ku náajaltikoʼ.+ Leloʼ chéen kunel xan.+
11 Le kéen yaʼabchajak le baʼaloʼob maʼalobtak yaan tiʼ máakoʼ ku yaʼabtal xan máaxoʼob xupik.+ ¿Yaan wa uláakʼ utsil jeʼel u jóoʼsik u yuumil le baʼaloʼobaʼ? Minaʼan, chéen jeʼel u páajtal u paktikeʼ.+
12 Juntúul j-meyajeʼ kex chéen junpʼíit wa yaʼab baʼaloʼob yaan utiaʼal u jaanteʼ kiʼ u wenel, pero juntúul ayikʼaleʼ yoʼolal le bukaʼaj baʼaloʼob yaantiʼoʼ maʼ tu páajtal u wenel.
13 Yaan junpʼéel baʼal jach yaj tsʼoʼok in wilik way yóokʼol kaabeʼ: le ayikʼaliloʼob muchʼkíintaʼab tumen u yuumiloʼ chéen tu taasaj kʼaasil tiʼ.
14 U ayikʼaliloʼobeʼ pʼáat minaʼan tumen bin kʼaasil tiʼ junpʼéel meyaj, le ka túun yanchaj u paaleʼ mix baʼal yaan utiaʼal u pʼat bey herencia tiʼeʼ.+
15 Jeʼel bix síijik máakeʼ bey xan kun kíimiloʼ, mix baʼal tu taasaj mix baʼal xan ken u bise.+ Maʼ tu páajtal u bisik mix junpʼéel tiʼ le baʼaloʼob yanchajtiʼ úuchik u sen meyajoʼ.+
16 Lelaʼ uláakʼ junpʼéel baʼal jach yaj ku yúuchul: jach jeʼex úuchik u taaloʼ bey xan kun binoʼ. ¿Baʼax túun utsil ku jóoʼsik le máax ku sen meyajoʼ? Letiʼeʼ bey táan u chʼaʼpachtik le iikʼoʼ.+
17 Tuláakal u kʼiiniloʼob u kuxtaleʼ bey ich éeʼjochʼeʼenil ku janaleʼ, mantatsʼ táan u sen tuukul, mantatsʼ kʼojaʼan yéetel mantatsʼ pʼujaʼan.+
18 Teneʼ tsʼoʼok in wilkeʼ le baʼax maʼalob yéetel unaj u beetik máakoʼ letiʼ lelaʼ: maʼalob ka u jaant, ka u yukʼ yéetel ka u kiʼimakkúunt u yóol yéetel le baʼaxoʼob ku yantaltiʼ ikil u tsʼáaik u yóol meyaj way yóokʼol kaabeʼ.+ Bey unaj u beetik ichil le junpʼíit u kʼiiniloʼob u kuxtal tsʼoʼok u tsʼaʼabaltiʼ tumen u jaajil Diosoʼ tumen letiʼe boʼol* ken u kʼamoʼ.+
19 Wa u jaajil Dios ku tsʼáaik ayikʼalil bey xan yaʼab baʼaloʼob tiʼ máak,+ tsʼoʼoleʼ ku tsʼáaiktiʼ u páajtalil u disfrutartik le baʼaloʼobaʼ, máakeʼ unaj u kʼamik le boʼol ku tsʼaʼabaltiʼoʼ yéetel unaj u kiʼimakkúuntik u yóol yéetel le baʼaloʼob ku yantaltiʼ ikil u tsʼáaik u yóol meyajoʼ. Leloʼ letiʼe baʼax ku síik Dios tiʼ máakoʼ.+
20 Beyoʼ máakeʼ maʼ ken u jáan tsʼáa cuenta* bukaʼaj séebaʼanil u máan u kʼiiniloʼob u kuxtal, tumen u jaajil Dioseʼ u chupmaj u puksiʼikʼal yéetel kiʼimak óolal.+
Notas
^ Tuláakʼ tuʼuxeʼ ku yaʼalaʼal «náay».
^ Wa «mensajero».
^ Wa «u chʼaʼik saajkil tiʼ».
^ Wa «parte».
^ Wa «kʼaʼajs».
