2 Corintios 8:1-24
8 Beora túunaʼ, sukuʼuneʼex, k-kʼáat tsʼáa a wojéelteʼex le u nojoch utsil Dios tu yeʼesaj tiʼ u múuchʼuliloʼob Macedoniaoʼ.+
2 Teʼ kʼiinoʼob táan u muʼyajoʼob tumen jach yaj baʼax ku aktáantkoʼoboʼ letiʼobeʼ jach kiʼimakchaj u yóoloʼob, kex jach óotsiloʼobeʼ jach tu yeʼesaj u yutsiloʼob.
3 Teneʼ kin waʼalik jach tu jaajil maʼ chéen tu tsʼáajoʼob le baʼaxoʼob ku páajtal u tsʼáaikoʼoboʼ,+ baʼaxeʼ tu tsʼáajoʼob u maasil.+
4 Letiʼobeʼ nojoch baʼal u yilkoʼob u beetkoʼob lelaʼ, le oʼolal maʼ xuʼul u sen kʼáat óoltikoʼob tiʼ toʼon ka k-chaʼa u tsʼáaikoʼob yéetel yaabilaj le baʼaxoʼob yaantiʼoboʼ bey xan ka táakpajkoʼob tiʼ le meyaj ku beetaʼal utiaʼal u yáantaʼal le máaxoʼob santoʼoboʼ.+
5 Letiʼobeʼ tu beetoʼob u maasil tiʼ le k-páaʼtik kaʼachoʼ, tumen desde tu káajbaleʼ tu kʼububaʼob u meyajtoʼob Yuumtsil yéetel tu kʼububaʼob xan u yáantoʼonoʼob jeʼex tu yóotilak Dioseʼ.
6 Le oʼolal t-aʼalaj tiʼ Tito+ ka seguernak u juntartik le baʼaxoʼob ka tsʼáaikeʼex yéetel yaabilaj, jeʼex úuchik u beetik tu káajbaloʼ.
7 Teʼexeʼ jach maʼalob a beetkeʼex tuláakal baʼal: jach muʼukʼaʼan a fejeʼex, jach maʼalob bix a tʼaaneʼex, yaʼab baʼaxoʼob tsʼoʼok a kankeʼex, ka tsʼáaik a wóoleʼex tiʼ baʼax ka beetkeʼex yéetel jach ka yaabiltikeʼex u maasil jeʼex k-yaabiltmileʼexoʼ. Bey túunoʼ seguernak a síikeʼex yéetel yaabilaj le baʼaxoʼob yaanteʼexoʼ.+
8 Lelaʼ maʼ tin waʼalikteʼex bey junpʼéel leyeʼ, baʼaxeʼ kin waʼalikteʼex utiaʼal ka a wojéelteʼex yaan uláakʼ máakoʼob jach ku tsʼáaik u yóoloʼob xan tiʼ baʼax ku beetkoʼob, beyoʼ jeʼel u páajtal a weʼeskeʼex wa jach tu jaajil yaan a yaabilajeʼexeʼ.
9 Teʼexeʼ a wojleʼex bukaʼaj nojoch utsil tu yeʼesaj Yuumtsil Jesucristo. Letiʼeʼ kex ayikʼal kaʼacheʼ tu yóotsilkuntuba ta woʼolaleʼex+ utiaʼal ka ayikʼalchajkeʼex tu yoʼolal u yóotsilil letiʼ.
10 Tu yoʼolal lelaʼ teneʼ kin waʼalik:+ le baʼaxoʼob ken in waʼalteʼexaʼ utiaʼal a wutsileʼex, tumen tsʼoʼok junpʼéel año káajak a juntarkeʼex le baʼaxoʼob ka síikeʼexoʼ. Teʼexeʼ ta weʼeseʼex jach a kʼáat a beeteʼex.
11 Beora túunaʼ tsʼoʼokseʼex le baʼax ta káajseʼexoʼ, utiaʼal beyoʼ ka chíikpajak jach tu jaajil a kʼáateʼex áantaj yéetel le baʼaxoʼob yaanteʼexoʼ.
12 Tumen wa tu puksiʼikʼal máak ku síijil u tsʼáaik wa baʼaxeʼ, lelaʼ jach ku lúubul utsil tiʼ Dios, tumen Dioseʼ uts tu tʼaan ka u tsʼáa máak le baʼax ku páajtal u tsʼáaikoʼ,+ maʼ le baʼax maʼ tu páajtal u tsʼáaikoʼ.
13 Teneʼ maʼ in kʼáat ka pʼáatak chéen chʼaʼabil utiaʼal uláakʼoʼobiʼ, chéen baʼaleʼ ka pʼáatak istikyaj tiʼ teʼexiʼ.
14 Baʼax in kʼáateʼ, le baʼax ku yalabtik tiʼ teʼexoʼ ka u chúukbes le baʼax ku bineltik tiʼ letiʼoboʼ yéetel le baʼax ku yalabtik tiʼ letiʼoboʼ ka u chúukbes le baʼax ku bineltik tiʼ teʼexoʼ, utiaʼal beyoʼ ka yanaktiʼob xan jach le bukaʼaj yaanteʼexoʼ.
15 Jeʼex tsʼíibtaʼanileʼ: «Le máax yaan kaʼach yaʼab tiʼeʼ maʼ píitmáan u yantaltiʼiʼ, le máax yaan kaʼach junpʼíit tiʼeʼ maʼ xan tu bineltajtiʼiʼ».+
16 Beora túunaʼ, k-tsʼáaik gracias tiʼ Dios úuchik u tsʼáaik xan tu puksiʼikʼal Tito u tsʼíibolal u yáantkeʼex,+
17 tumen letiʼeʼ tsʼoʼok u beetik le baʼax t-aʼalajtiʼoʼ, chéen baʼaleʼ tumen jach taak u yáantkeʼexeʼ, tu juunal tu chʼaʼtuklaj u bin ta wiknaleʼex.
18 Tu yéeteleʼ táan k-túuxtik xan juntúul sukuʼun ku yúuchul maʼalob tʼaan tiʼ letiʼ ichil tuláakal le múuchʼuliloʼob tu yoʼolal le baʼaloʼob maʼalobtak ku tsʼáaik ojéeltbiloʼ.
19 Maʼ chéen leloʼ, baʼaxeʼ tsʼoʼok xan u yéeyaʼal tumen le múuchʼuliloʼob utiaʼal ka u láakʼintoʼon bey xan utiaʼal ka u tʼox le baʼaxoʼob síiʼan yéetel yaabilajoʼ. Tuláakal lelaʼ k-beetik utiaʼal u alabartaʼal Yuumtsil yéetel utiaʼal ka chíikpajak jach tu jaajil k-kʼáat áantaj.
20 Beyoʼ mix máak kun aʼalik wa maʼ maʼalob bix k-tʼoxik le yaʼabkach baʼaloʼob síiʼanoʼ.+
21 Tumen toʼoneʼ «k-ilik k-beetik toj tuláakal baʼal, maʼ chéen tu táan Jéeobaiʼ, baʼaxeʼ tak tu táan le máakoʼoboʼ».+
22 Tsʼoʼoleʼ tu yéeteloʼobeʼ táan xan k-túuxtik juntúul k-sukuʼun yaʼab u téenel tsʼoʼok k-probartik yéetel tsʼoʼok u yeʼesik jach ku tsʼáaik u yóol u beet jejeláas meyajoʼob. Chéen baʼaleʼ beoraaʼ maas yaan u tsʼáaik u yóol meyaj tumen jach ku confiar tiʼ teʼex.
23 Chéen baʼaleʼ, wa yaan baʼax a kʼáat a wojéelteʼex tu yoʼolal Titoeʼ, letiʼeʼ in wéet máan yéetel in wéet meyaj utiaʼal a wutsileʼex. Wa yaan baʼax a kʼáat a wojéelteʼex xan tu yoʼolal le uláakʼ k-sukuʼunoʼoboʼ, letiʼobeʼ túuxtaʼanoʼob* tumen le múuchʼuliloʼoboʼ yéetel ku nojbaʼalkúuntikoʼob Cristo.
24 Bey túunoʼ, eʼeseʼex a yaabilajeʼex tiʼ letiʼob+ yéetel eʼeseʼex tiʼ le múuchʼuliloʼob baʼaxten k-nojbaʼalkúuntikba ta woʼolaleʼexoʼ.
Notas
^ Ich griegoeʼ ku yaʼalaʼal kaʼach «apóstoloʼob».
