1 Reyes 7:1-51
7 Salomón túuneʼ tu beetaj u yotoch,*+ 13 años tu bisajtiʼ u láaj tsʼoʼoksik.+
2 Tu beetaj le naj tu kaʼanal kʼáaxil le Líbanooʼ, tu beetaj le u yotoch tu kʼaabaʼtaj le Naj Yaan tu Kʼáaxil Líbanooʼ.+ U chowakileʼ 44 metros y medio,* u kóochileʼ 22 metros yéetel 25 centímetros,* yéetel u kaʼanlileʼ 13 metros yéetel 35 centímetros,* etsʼekbal yóokʼol columnaʼob de cedro, tiʼ kanpʼéel filas yaniloʼob, yéetel yóokʼol le columnaʼoboʼ yaan vigas+ de cedroiʼ.
3 U yóokʼoleʼ piʼix yéetel tablas de cedro, le tablasoʼ tsʼaʼab yóokʼol le vigas yanoʼob yóokʼol le columnaʼoboʼ. Cuarenticinco u pʼéelal, 15 tiʼ cada fila.
4 Beetaʼab xan ventanas tsʼaʼan u marcoiloʼob, óoxpʼéel filas beetaʼabi, cada ventanaeʼ tiaʼan aktáan tiʼ le uláakʼ ventanaoʼ, tiʼ óoxpʼéel fila yaniloʼob.
5 Tuláakal u entradailoʼob le naj bey xan u marcoiloʼobeʼ cuadradoʼob,* cuadrado xan le ventanas yanoʼob aktáan tiʼ le uláakʼoʼoboʼ, le ventanas yanoʼob tiʼ óoxpʼéel filasoʼ.
6 Tu beetaj xan le naj ku kʼaabaʼtik u Najil le Columnaʼoboʼ, u chowakil le najaʼ 22 metros yéetel 25 centímetros,* u kóochileʼ 13 metros yéetel 35 centímetros.* Aktáan tiʼeʼ yaan junpʼéel entrada yaan u techoil yéetel u columnailoʼob.
7 Tu beetaj xan le naj ku kʼaabaʼtik u Najil Trono+ wa u Najil Juiciooʼ,+ teʼeloʼ tiʼ ku juzgar kaʼachiʼ. Teʼ najaʼ tsʼaʼab cedroiʼ, desde tu pisoil tak teʼ tuʼux yaan le vigasoʼ.
8 Le naj* tuʼux kun kajtal kaʼachoʼ tiaʼan tuláakʼ terrenoeʼ,+ beetaʼab paachil tiʼ le u Najil Tronooʼ, yéetel beetaʼab óoliʼ jeʼel bix beetaʼabik le u Najil Tronooʼ. Tu beetaj xan junpʼéel naj utiaʼal u hija Faraón, le máax yéetel tsʼoʼok u beeloʼ,+ le najaʼ beetaʼab xan óoliʼ jeʼex le u Najil Tronooʼ.
9 Tuláakal le baʼaxoʼob beetaʼaboʼ beetaʼab yéetel koʼokoj tuunichoʼob+ póolaʼanoʼob jach tu pʼiis. U tséelikoʼob le tuunichoʼobaʼ xoʼotʼ yéetel serrucho, yéetel tsʼaʼaboʼob desde tu cimientoil tak tu maas kaʼanlil le pakʼoʼoboʼ, letiʼe tsʼaʼaboʼob xan teʼ nojoch táankaboʼ.+
10 U cimientoiloʼobeʼ beetaʼaboʼob yéetel nukuch tuunich jach koʼojtak. U nojchil jujunpʼéel tuunichoʼobeʼ óoliʼ cuatro metros y medio,* yéetel uláakʼoʼobeʼ kex tres metros y medio.*
11 Tu yóokʼoloʼobeʼ tsʼaʼan xan koʼokoj tuunich póolaʼanoʼob jach tu pʼiis, meyajnaj xan u cheʼiloʼob cedroiʼ.
12 Tu baʼpach le nojoch táankaboʼ tsʼaʼab xan óoxpʼéel fila tuunichoʼob póolaʼanoʼob bey xan junpʼéel fila vigas de cedro, lelaʼ beetaʼab jeʼex beetaʼabik u chan táankabil+ u yotoch Jéeobaeʼ yéetel jeʼex beetaʼabik u pórticoil le najoʼ.+
13 Le rey Salomónoʼ tu túuxtaj tʼanbil Hiram,+ ka tu beetaj u taal desde Tiro.
14 Letiʼ kaʼacheʼ u hijo juntúul viuda ku taal tiʼ u tribu Neftalí, yéetel u papáeʼ juntúul tirio ku beetik baʼaloʼob de cobre.+ Hirameʼ jach u yojel le meyajaʼ, yaan u naʼat,+ yéetel u yojel u beet tuláakal u jejeláasil baʼaloʼob de cobre.* Letiʼ túuneʼ taal tu yiknal Salomóneʼ ka tu beetaj tuláakal le meyaj tsʼaʼab u beetoʼ.
15 Tu yibaj le cobre utiaʼal u beetik kaʼapʼéel columnaʼoboʼ,+ u kaʼanlil cada junpʼéel columnaeʼ kex 8 metros.* Utiaʼal u pʼiʼisil u polkil cada columnaeʼ kʼaʼabéetchaj junpʼéel suum de 5 metros yéetel 34 centímetros.*+
16 Letiʼeʼ tu beetaj xan kaʼapʼéel nukuch adornoʼob* de cobre utiaʼal u tsʼaʼabal tu punta le columnaʼoboʼ. Junpʼéel adornoeʼ 2 metros yéetel 22 centímetros* u kaʼanlil, yéetel le uláakʼ adornooʼ 2 metros yéetel 22 centímetros* xan u kaʼanlil.
17 Teʼ nukuch adornoʼob yaan tu punta cada columnaoʼ yaan junpʼéel adorno de u forma junpʼéel red beetaʼan yéetel cadenaʼob chʼoʼochʼot+ yaniloʼob, siete tiʼ junpʼéel nojoch adorno yéetel siete tiʼ le uláakʼoʼ.
18 Tu baʼpach le tuʼux tu tsʼáaj le adorno de u forma junpʼéel redoʼ tu tsʼáaj xan kaʼapʼéel fila granadas utiaʼal u adornartik le nukuch adornoʼob yaan tu punta le columnaʼoboʼ, bey tu beetil tiʼ le kaʼapʼéel nukuch adornoʼoboʼ.
19 Tu yóokʼol le nukuch adornoʼob yaan tu punta le columnaʼoboʼ beetaʼab lirioʼob de junpʼéel metro yéetel 78 centímetros* u kaʼanliloʼob.
20 Le nukuch adornoʼoboʼ tiaʼanoʼob kaʼach tu punta le columnaʼoboʼ. Letiʼobeʼ taakʼloʼob tiʼ le columnaʼoboʼ, teʼ parte wóolis tuʼux yaan le adorno de u forma junpʼéel redoʼ. Tu baʼpach cada junpʼéel tiʼ le nukuch adornoʼobaʼ yaan xan 200 u pʼéelal granadasiʼ, en fila tsʼaʼaniloʼob.+
21 Tu waʼakúuntaj u columnailoʼob le pórtico tuʼux yaan u entradail le templooʼ.*+ Tu waʼakúuntaj le columna ku bin teʼ x-noʼoj kʼaboʼ* ka tu tsʼáaj u kʼaabaʼt Jakín,* ka tsʼoʼokeʼ tu waʼakúuntaj le columna ku bin teʼ x-tsʼíik kʼaboʼ* ka tu tsʼáaj u kʼaabaʼt Boaz.*+
22 Tu punta le columnaʼoboʼ tsʼaʼab adornoʼob de u forma lirioiʼ. Bey túun úuchik u tsʼoʼoksaʼal u beetaʼal le columnaʼoboʼ.
23 Le ka tsʼoʼokeʼ beetaʼab junpʼéel nuxiʼ pila* de cobre.+ Le nuxiʼ pilaaʼ wóolis, u kóochileʼ 4 metros yéetel 45 centímetros,* yéetel u kaʼanlileʼ 2 metros yéetel 22 centímetros,* yéetel utiaʼal u pʼiʼisil u baʼpacheʼ kʼaʼabéet junpʼéel suum de 13 metros yéetel 35 centímetros.*+
24 Tu kabalil u chiʼ le nuxiʼ pilaoʼ yaan adornoʼob de u forma kʼúumiʼ,+ beetaʼab tiʼ tuláakal u baʼpach. Beetaʼab diez u pʼéelal adornoʼob de u forma kʼúum tiʼ cada 44 centímetros y medio.* Tu baʼpacheʼ beetaʼab kaʼapʼéel fila tiʼ le adornoʼobaʼ, junpʼéeliliʼ pieza beetaʼabikoʼob yéetel le nuxiʼ pilaoʼ.
25 Le nuxiʼ pilaoʼ tsʼaʼab yóokʼol 12 toroʼob,+ óoxtúuleʼ táan u paakatoʼob xaman, óoxtúuleʼ táan u paakatoʼob chikʼin, óoxtúuleʼ táan u paakatoʼob noojol yéetel uláakʼ óoxtúuleʼ táan u paakatoʼob lakʼin. Le nuxiʼ pilaoʼ etsʼekbal kaʼach tu yóokʼoloʼob, yéetel u paach le toroʼoboʼ pʼáatoʼob yáanal le nuxiʼ pilaoʼ.
26 U piimil le nuxiʼ pilaoʼ kex de 7 centímetros y medio,* u chiʼeʼ chíikaʼan tiʼ u chiʼ junpʼéel copa wa jeʼex u lool lirioeʼ. Ku bisik kaʼach 44,000 litros* jaʼ.
27 Tu beetaj xan diez u pʼéelal carretillaʼob*+ de cobre. U chowakil cada junpʼéeleʼ junpʼéel metro yéetel 78 centímetros,* u kóochileʼ junpʼéel metro yéetel 78 centímetros, yéetel u kaʼanlileʼ junpʼéel metro yéetel 33 centímetros.*
28 Bey úuchik u beetaʼaloʼobaʼ: beetaʼab cuadros utiaʼal u tsʼaʼabal tu tséelikoʼob le carretillaoʼ, le cuadrosaʼ tsʼaʼaboʼob tiʼ baʼaloʼob yaan u forma armazón tiʼob.
29 Yóokʼol le cuadrosaʼ beetaʼab leónoʼob,+ toroʼob yéetel querubínoʼob,+ láayliʼ letiʼe dibujoʼob tsʼaʼab xan yóokʼol le armazónoʼoboʼ. Tu kaʼanlil yéetel tu kabalil le leónoʼob yéetel le toroʼoboʼ beetaʼab adornoʼob bey wóolistakoʼobeʼ.
30 Cada carretillaeʼ yaan kanpʼéel ruedas de cobre tiʼ bey xan ejes de cobre, tiʼ cada esquinaeʼ beetaʼab junpʼéel baʼal utiaʼal u chʼaʼik u muukʼoʼob. Yáanal le nojoch pailaoʼ tsʼaʼan baʼaloʼob utiaʼal u yetsʼtaliʼ, tu tséel cada junpʼéel tiʼ le baʼaloʼobaʼ beetaʼab adornoʼob bey wóolistakeʼ, junpʼéeliliʼ pieza beetaʼabikoʼob tu yéetel.
31 Tu chiʼ le nojoch pailaoʼ yaan junpʼéel aroiʼ. Desde tu kabalil le nojoch paila tak tuʼux ku káajal le arooʼ 44 centímetros y medio* yaantiʼ. Le aro yéetel le baʼaloʼob tuʼux ku yetsʼtal le pailaoʼ letiʼe ku meyaj bey u baseoʼ. U kaʼanlil tuláakal le baseoʼ 66 centímetros yéetel 7 milímetros.* Tiʼ le arooʼ beetaʼab figuraʼobiʼ. Yéetel tsʼaʼab cuadros tu tséelikoʼob.
32 Le kanpʼéel ruedasoʼ tiaʼanoʼob yáanal le cuadros tsʼaʼab tu tséelikoʼob le carretillaʼoboʼ. Le baʼaxoʼob jepʼik le ruedasoʼ tiaʼanoʼob kabaleʼ, tu tséelikoʼob le carretillaoʼ. U kaʼanlil cada ruedaeʼ 66 centímetros yéetel 7 milímetros.*
33 Le ruedasoʼ beetaʼab jeʼex u ruedail junpʼéel carroeʼ. Le baʼaxoʼob utiaʼal u jeʼepʼloʼ, u llantasil,* u rayosil yéetel u masaileʼ láaj beetaʼan yéetel metal yibaʼan.
34 Tiʼ cada junpʼéel tiʼ u kanpʼéel esquinasil le carretillaoʼ beetaʼab junpʼéel baʼal utiaʼal ka u chʼaʼ u muukʼ, le baʼaloʼobaʼ beetaʼab de junpʼéeliliʼ pieza yéetel le carretillaoʼ.
35 Tu kaʼanlil le carretillaoʼ yaan junpʼéel aro wóolis kex de 22 centímetros* u kaʼanlil, yéetel yóokʼol xan le carretillaoʼ beetaʼab u armazónil le arooʼ yéetel le cuadros yaan tu tséelikoʼoboʼ. Tuláakal beetaʼab de junpʼéeliliʼ pieza.
36 Yóokʼol u armazónil yéetel yóokʼol u cuadrosiloʼoboʼ beetaʼab querubínoʼob, leónoʼob, yéetel palmeraʼob jeʼel tuʼuxak ku páajtaleʼ, beetaʼab xan adornoʼob wóolistak tiʼ tuláakal u baʼpach.+
37 Bey úuchik u beetik le diez carretillaʼoboʼ,+ igual úuchik u beetkoʼob,+ junpʼéeliliʼ medida yéetel junpʼéeliliʼ forma yanchajtiʼob.
38 Letiʼeʼ tu beetaj diez nukuch pailaʼob de cobre.+ Cada junpʼéeleʼ ku bisik 880 litros.* Cada pailaeʼ junpʼéel metro yéetel 78 centímetros* u kóochil. Tu beetaj junpʼéel nojoch paila utiaʼal cada carretilla.
39 Tu tsʼáaj cinco u pʼéelel carretillaʼob tu x-noʼoj le najoʼ, yéetel uláakʼ cinco u pʼéelel tu x-tsʼíik le najoʼ. Le nuxiʼ pilaoʼ tu tsʼáaj tu x-noʼoj le najoʼ, tu noojol-lakʼinil.*+
40 Hirameʼ+ tu beetaj le uláakʼ pailaʼoboʼ, le palaʼoboʼ,+ yéetel le nukuch tazaʼoboʼ.+ Bey túunoʼ Hirameʼ tu tsʼoʼoksaj tuláakal le meyaj kʼubéentaʼabtiʼ tumen Salomón ka u beet tu yotoch Jéeobaoʼ.+
41 Tu beetaj le kaʼapʼéel columnaʼoboʼ,+ yéetel le nukuch adornoʼob de u forma junpʼéel taza ku bin tu punta le kaʼapʼéel columnaʼoboʼ. Tu beetaj le kaʼapʼéel adorno de u forma junpʼéel red+ ku bin yóokʼol le kaʼapʼéel nukuch adornoʼob de u forma junpʼéel taza ku bin tu punta le columnaʼoboʼ.
42 Tu beetaj xan le 400 u pʼéelel granadas+ utiaʼal le kaʼapʼéel redoʼ, tiʼ cada junpʼéel redeʼ yaan kaʼapʼéel fila granadasiʼ, lelaʼ utiaʼal u tsʼaʼabal yóokʼol le kaʼapʼéel nukuch adornoʼob de u forma junpʼéel taza ku bin tu yóokʼol le kaʼapʼéel columnaʼoboʼ.
43 Tu beetaj le diez carretillaʼob+ yéetel le diez nukuch pailaʼob+ ku bin tu yóokʼoloʼoboʼ.
44 Tu beetaj le nuxiʼ pilaoʼ,+ bey xan le 12 toroʼob tuʼux etsʼekbaloʼ.
45 Tu beetaj le chʼóoyoʼob utiaʼal u moʼolol le taʼanoʼ, le palaʼoboʼ, le nukuch tazaʼoboʼ, yéetel tuláakal le uláakʼ nuʼukuloʼoboʼ. Hirameʼ de cobre úuchik u beetik tuláakal le nuʼukuloʼobaʼ, ka tsʼoʼokeʼ tu pulirtoʼob, le baʼaloʼobaʼ kʼubéentaʼabtiʼ tumen Salomón utiaʼal u yotoch Jéeoba.
46 Le reyoʼ tu túuxtaj beetbiloʼob tiʼ moldeʼob de kʼat, lelaʼ beetaʼaboʼob tu táax luʼumil le Jordánoʼ, entre Sukot yéetel Zaretán.
47 Salomóneʼ maʼ tu pesartaj tuláakal le nuʼukuloʼoboʼ tumen jach táaj yaʼab. Maʼ tu pesartaj le bukaʼaj cobre meyajnajoʼ.+
48 Salomóneʼ tu beetaj tuláakal le nuʼukuloʼob ku meyajoʼob tu yotoch Jéeobaoʼ: tu beetaj le altar+ de orooʼ,+ le mesa tuʼux ku tsʼaʼabal le waaj ku kʼuʼubul tiʼ Diosoʼ,
49 le candelabroʼob+ de oro purooʼ, cinco tiʼ le candelabroʼobaʼ tu tsʼáaj teʼ x-noʼojoʼ yéetel cincoeʼ tu tsʼáaj teʼ x-tsʼíikoʼ aktáan tiʼ le Cuarto Maas Jach Santooʼ,* tu beetaj le looloʼoboʼ,+ le lámparaʼoboʼ, le tenazaʼoboʼ,* tu beetoʼob de oro.+
50 Tu beetaj le pailaʼoboʼ, le nuʼukuloʼob utiaʼal u tuʼupul kʼáakʼoʼ,+ le nukuch tazaʼoboʼ, le copaʼoboʼ,+ yéetel le nuʼukuloʼob utiaʼal u tsʼaʼabal chúukoʼ,+ tu beetoʼob de oro puro. Tu beetaj le base tuʼux ku yetsʼtal u joonajiloʼob le cuarto yaan paachiloʼ,+ le Cuarto Maas Jach Santooʼ, tu beetaj xan le baseʼob utiaʼal u joonajiloʼob le Cuarto Santooʼ,*+ tu beetoʼob de oro.
51 Bey úuchik u tsʼoʼoksik Salomón tuláakal le meyaj unaj u beetaʼal tu yotoch Jéeobaoʼ. Salomón túuneʼ tu taasaj le baʼaloʼob tu tsʼáaj aparteil*+ David, u papáoʼ, tu taasaj le plataoʼ, le orooʼ yéetel le uláakʼ baʼaloʼob ichil u tesoreríailoʼob u yotoch Jéeobaoʼ.+
Notas
^ Wa «palacio».
^ Ich hebreoeʼ ku yaʼalaʼal kaʼach «100 codos».
^ Ich hebreoeʼ ku yaʼalaʼal kaʼach «50 codos».
^ Ich hebreoeʼ ku yaʼalaʼal kaʼach «30 codos».
^ Wa «cuatro lados yaantiʼ; rectangular».
^ Ich hebreoeʼ ku yaʼalaʼal kaʼach «50 codos».
^ Ich hebreoeʼ ku yaʼalaʼal kaʼach «30 codos».
^ Wa «palacio».
^ Ich hebreoeʼ ku yaʼalaʼal kaʼach «diez codos».
^ Ich hebreoeʼ ku yaʼalaʼal kaʼach «ocho codos».
^ Wa «bronce», letiʼe baʼax u kʼáat u yaʼal le kéen chíikpajak tuláakʼ tuʼuxoʼob teʼ capítuloaʼ.
^ Ich hebreoeʼ ku yaʼalaʼal kaʼach «18 codos».
^ Ich hebreoeʼ ku yaʼalaʼal kaʼach «12 codos».
^ Ilawil página 2573.
^ Ich hebreoeʼ ku yaʼalaʼal kaʼach «cinco codos».
^ Ich hebreoeʼ ku yaʼalaʼal kaʼach «cinco codos».
^ Ich hebreoeʼ ku yaʼalaʼal kaʼach «cuatro codos».
^ Teʼelaʼ táan u tʼaan tiʼ le Cuarto Santooʼ.
^ Wa «teʼ noojoloʼ».
^ U kʼáat u yaʼal «Letiʼ [wa Jéeoba] ka u Beet Maʼ u Péek».
^ Wa «teʼ xamanoʼ».
^ Maʼ xaaneʼ u kʼáat u yaʼal «Yéetel Muukʼ».
^ Wa «depósito». Ich hebreoeʼ ku yaʼalaʼal kaʼach «kʼáaʼnáab beetaʼan yéetel metal yibaʼan».
^ Ich hebreoeʼ ku yaʼalaʼal kaʼach «diez codos».
^ Ich hebreoeʼ ku yaʼalaʼal kaʼach «cinco codos».
^ Ich hebreoeʼ ku yaʼalaʼal kaʼach «30 codos».
^ Ich hebreoeʼ ku yaʼalaʼal kaʼach «junpʼéel codo».
^ Ich hebreoeʼ ku yaʼalaʼal kaʼach «junpʼéel palmo menor». Ilawil «Palmo menor», página 2689.
^ Ich hebreoeʼ ku yaʼalaʼal kaʼach «2,000 batos». Ilawil «Bato», página 2557.
^ Wa «carreta utiaʼal u bisaʼal jaʼ».
^ Ich hebreoeʼ ku yaʼalaʼal kaʼach «cuatro codos».
^ Ich hebreoeʼ ku yaʼalaʼal kaʼach «tres codos».
^ Ich hebreoeʼ ku yaʼalaʼal kaʼach «junpʼéel codo».
^ Ich hebreoeʼ ku yaʼalaʼal kaʼach «junpʼéel codo y medio».
^ Ich hebreoeʼ ku yaʼalaʼal kaʼach «junpʼéel codo y medio».
^ Wa «u aroil».
^ Ich hebreoeʼ ku yaʼalaʼal kaʼach «medio codo».
^ Ich hebreoeʼ ku yaʼalaʼal kaʼach «40 batos».
^ Ich hebreoeʼ ku yaʼalaʼal kaʼach «cuatro codos».
^ Wa «sureste».
^ Wa «Santísimo».
^ Wa «pinzas».
^ Ich hebreoeʼ ku yaʼalaʼal kaʼach «templo».
^ Wa «tu santificartaj».
