Salmos 59:1-17
Utiaʼal máax ku nuʼuktaj: unaj u paʼaxal jeʼex le kʼaay ku kʼaabaʼtik «Maʼ a taasik xuʼulsaj». Le kʼaayaʼ David tsʼíibte. Miktam. Le ka túuxtaʼab máakoʼob tumen Saúl u chʼúuktoʼob David tu yotoch utiaʼal u kíimskoʼoboʼ.+
59 In Dios, salvarten tiʼ in enemigoʼob.+
Kanáanten tiʼ le máaxoʼob ku líikʼloʼob tin contraoʼ.+
2 Salvarten tiʼ le kʼasaʼan máakoʼoboʼ.
Salvarten tiʼ le máaxoʼob taak u beetkoʼobten looboʼ.
3 Jéeoba Dios, letiʼobeʼ táan u chʼúuktikenoʼob.+
Táan in atacartaʼal tumen máakoʼob muʼukʼaʼanoʼob,tsʼoʼoleʼ maʼ líiʼken tu contraʼobiʼ mix in beet baʼax maʼ maʼalobiʼ.+
4 Kex mix baʼal kʼaas in beetmeʼ ku prepararkubaʼob utiaʼal u atacarkenoʼob.
Le kéen in kʼáattech áantajeʼ líiʼkech a wáanten yéetel ilawil baʼax ku beetkoʼob.
5 Jéeoba Dios, teech gobernartik le ángeloʼoboʼ, teech u Dios u kaajil Israel.+
Koʼoten ka a jach il baʼax ku beetik le kaajoʼoboʼ.
Maʼ a chʼaʼik óotsilil tiʼ mix juntúul kʼasaʼan máak ku traicionar.+ (Séla)
6 Sáamsamal kéen áakʼabchajkeʼ ku suutoʼob,+ku chiʼibaloʼob jeʼex peekʼoʼobeʼ,+ ku máanoʼob tu baʼpach le kaajoʼ.+
7 Ilawil bix u yóomankil u chiʼob.
U chiʼobeʼ bey espadaʼobeʼ,+ku yaʼalikoʼob: «Mix máak táan u yuʼubik baʼax k-aʼalik».+
8 Chéen baʼaleʼ, Jéeoba Dios, yaan a cheʼejtikoʼob,+yaan a burlarkaba tiʼ tuláakal le kaajoʼoboʼ.+
9 In Dios, teech tsʼáaikten muukʼ, yéetel a wáantajeʼ maʼ kun náayal in wóol.+
In Dios, techeʼ beyech junpʼéel lugar seguro tuʼux kin taʼakikinbaeʼ.+
10 Le Dios ku yeʼesikten u nojoch yaabilajoʼ yaan u taal u yáanten.+
Dioseʼ yaan u yáantken in ganart le máaxoʼob pʼekmilenoʼ.+
11 Maʼ a jáan kíimskoʼob, utiaʼal u yilik in kaajal bix u tsʼoʼokol máakoʼob beyoʼ.
Yéetel le poder yaantechoʼ beet u máanoʼob chéen minaʼan u cuentail.
Jéeoba Dios, beet u bin kʼaasil tiʼob, techeʼ beyech junpʼéel escudo k-tiaʼaleʼ.+
12 Tsʼoʼok u kʼebantaloʼob yéetel baʼax ku yaʼalikoʼob, bey xan yéetel tuláakal baʼax ku jóokʼol tu chiʼob.
Xiʼiktiʼob kʼaasil tumen jach nojbaʼal u taaskubaʼob,+tumen ku maldeciroʼob yéetel tumen ku tuusoʼob.
13 Xuʼulstiʼob ichil a pʼujaʼanil,+xuʼulstiʼob utiaʼal maʼ u kaʼa ilaʼaloʼob.
Eʼestiʼob teech gobernartik Jacob bey xan tuláakal yóokʼol kaab.+ (Séla)
14 Ka suunakoʼob táan u taal u yáakʼabtal,ka chiʼibalnakoʼob jeʼex peekʼoʼobeʼ, ka máankoʼob tu baʼpach le kaajoʼ.+
15 Ka máanak u kaxt baʼal u jaantoʼob,+pero chéen junpʼíit ka u kaxtoʼobiʼ, yéetel maʼ u yantal tuʼux u jeʼeleloʼob.
16 Teneʼ yaan in kʼaay utiaʼal in alabartik a poder.+
Kéen sáasakeʼ yéetel kiʼimak óolal kin tʼaan tiʼ a nojoch yaabilaj.
Tumen beyech junpʼéel lugar seguro tuʼux kin taʼakikinbaeʼ,+beyech junpʼéel lugar tuʼux jeʼel u páajtal in bin tu kʼiinil táan in muʼyajeʼ.+
17 In Dios, teech tsʼáaikten muukʼ, yaan in kʼaay* utiaʼal in alabarkech.+
Techeʼ beyech junpʼéel lugar seguro tuʼux kin taʼakikinbaeʼ, ka weʼesikten a nojoch yaabilaj.+
Notas
^ Wa «in paax».
