Proverbios 4:1-27
4 In paalaleʼex, uʼuyeʼex u tsolnuʼuk juntúul taatatsil.+
Chʼenxikinteneʼex utiaʼal u yantalteʼex naʼat,
2 tumen teneʼ maʼalob le baʼax ken in tsolteʼexoʼ.
Maʼ a tuʼubsikeʼex le baʼax kin kaʼansikteʼexoʼ.*+
3 Teneʼ juntúul maʼalob hijoen kaʼach utiaʼal in papá,+yéetel jach yaabiltaʼaben tumen in maama.+
4 Letiʼeʼ utiaʼal u kaʼansiken kaʼacheʼ ku yaʼalik: «Ilawil u pʼáatal ta puksiʼikʼal le baʼaxoʼob kin waʼalikoʼ.+
Tsʼoʼokbes in mandamientoʼob utiaʼal u seguer a kuxtal.+
5 Ilawil u yantaltech naʼat, ilawil baʼax u kʼáat u yaʼal le baʼax kin waʼalikoʼ.+
Maʼ a tuʼubsik yéetel maʼ a kʼéechel tiʼ baʼax kin waʼalik.
6 Maʼ a xúumpʼattik, letiʼ túuneʼ yaan u kanáantkech.
Yaabilte, letiʼ túuneʼ maʼ ken u chaʼa u yúuchultech mix baʼal.
7 Le naʼatoʼ letiʼe baʼax maas kʼaʼabéetoʼ,+ ilawil u yantaltech naʼat,tiʼ tuláakal le baʼaxoʼob ka wilik u yantaltechoʼ, ilawil u yantaltech le naʼatoʼ.+
8 Jach yaabilte, letiʼ túuneʼ yaan u nojbaʼalkúuntikech.+
Tumen wa ka kʼamik tu chúukaʼanileʼ yaan u pʼatkech maʼalobil tu táan u maasil.+
9 Yaan u tsʼáaik junpʼéel jatsʼuts corona de flores ta pool.
Yaan u adornarkech yéetel junpʼéel kiʼichkelem corona».
10 In paal, chʼenxikinteniʼ yéetel kʼam baʼax kin waʼaliktech,bey túunoʼ yaʼab años kan kuxtal.+
11 Teneʼ jach tu jaajileʼ yaan in nuʼuktikech tu bejil le naʼatoʼ,+jach tu jaajileʼ yaan in nuʼuktikech tu bejil le toj kuxtaloʼ.+
12 Le kéen xíimbalnakecheʼ mix baʼal kun kʼatik a beel,yéetel wa ka wáalkabeʼ maʼ kan tʼóochpajal.
13 Kʼam le nuʼuktaj ku tsʼaʼabaltechoʼ, maʼ a pʼatik,+kʼaʼajs baʼax tsʼoʼok a kanik tumen jeʼel u tsʼáaiktech kuxtaleʼ.+
14 Maʼ a bin tu beel le kʼasaʼan máakoʼoboʼ,maʼ a xíimbal tu beel le máaxoʼob ku beetkoʼob baʼax maʼ maʼaloboʼ.+
15 Tséelte, maʼ a biniʼ,+náachkuntaba tiʼ letiʼ, yéetel seguert a beel.+
16 Tumen letiʼobeʼ maʼ tu weenloʼob wa maʼ u beetoʼob baʼax kʼaasiʼ.
Maʼ tu yokol u weenloʼob wa maʼ u beetoʼob u lúubul wa máaxiʼ.
17 Tumen le u beetik u kʼasaʼaniloʼob yéetel u beetkoʼob looboʼbey waaj yéetel vino u yilkoʼobeʼ.
18 Pero u beel le utsul máakoʼoboʼ bey jeʼex u juul le Kʼiinku bin u maas sáasiltal tak ken u chuk chúumuk kʼiinoʼ.+
19 U beel le kʼasaʼan máakoʼoboʼ bey jeʼex le éeʼjochʼeʼeniloʼ,letiʼobeʼ maʼ u yojloʼob baʼax beetik u tʼóochpajloʼobiʼ.
20 In paal, chʼenxikint baʼax kin waʼalik,jach uʼuy le baʼaxoʼob kin waʼalikoʼ.
21 Maʼ a chaʼik u tuʼubultech le baʼaloʼobaʼ,ilawil u pʼáatloʼob tu tsʼuʼ a puksiʼikʼal.+
22 Tumen ku tsʼáaik kuxtal tiʼ le máaxoʼob kʼamkoʼ,+yéetel ku beetik uts tiʼ tuláakal u wíinkliloʼob.*
23 Tiʼ tuláakal le baʼaxoʼob ka kanáantikoʼ, maas kanáant a puksiʼikʼal,+tumen tiʼ letiʼ u taal u sayabil le kuxtaloʼ.
24 Maʼ a waʼalik baʼaloʼob maʼ jaajtakiʼ,+náachkuntaba tiʼ le tuusoʼ.
25 A wichoʼobeʼ unaj u paakatoʼob aktáan,mantatsʼ unaj a chʼikik a paakat táanil.+
26 Táaxkunt* le tuʼux ka xíimbaloʼ,+beyoʼ mix baʼal ken u kʼatuba ta beel.
27 Maʼ a kʼéechel ta x-noʼoj mix ta x-tsʼíik.+
Náachkuntaba tiʼ baʼax kʼaas.
Notas
^ Wa «in ley».
^ Ich hebreoeʼ ku yaʼalaʼal kaʼach «u bakʼeloʼob».
^ Uláakʼ bix u traducirtaʼaleʼ «Jach ilawil».
