Mateo 8:1-34
8 Ka éem Jesús teʼ montañaoʼ yaʼabkach máakoʼob binoʼob tu paach.
2 Juntúul máak yaan lepra tiʼeʼ náatsʼ tu yiknaleʼ ka xolaj tu táaneʼ ka tu yaʼalajtiʼ: «Yuumtsil, wa a kʼáateʼ jeʼel u páajtal a tsʼakikeneʼ».+
3 Jesús túuneʼ tu tichʼaj u kʼabeʼ ka tu machaj táan u yaʼalik: «In kʼáat in tsʼakech. Utschajkech».+ Teʼ súutuk jeʼeloʼ lukʼ le lepra tiʼoʼ.+
4 Jesúseʼ tu yaʼalaj xan tiʼ: «Maʼ a waʼalik tiʼ mix máak,+ xeen ka u yilech le sacerdoteoʼ,+ yéetel kʼub le siibal tu yaʼalaj Moisés unaj u tsʼaʼabaloʼ,+ beyoʼ yaan u yojéeltaʼal tsʼoʼok a wutstal».
5 Jesús túuneʼ ook Capernaúm, teʼeloʼ náatsʼ juntúul u nojchil le soldadoʼob* tu yiknaloʼ, ka tu yaʼalajtiʼ:+
6 «Yuumtsil, juntúul tiʼ le máaxoʼob meyajtikenoʼ chilikbal tin najil tumen minaʼan u muukʼ u wíinklil, yéetel táan u sen muʼyaj».
7 Jesúseʼ tu yaʼalajtiʼ: «Kéen kʼuchken teʼeloʼ kin tsʼakik».
8 U nojchil le soldadoʼob túunoʼ tu núukajtiʼ: «Yuumtsil, teneʼ maʼ in náajaltmaj ka ookkech tin wotochiʼ, chéen aʼal ka utschajak le máax meyajtikenoʼ, letiʼ túuneʼ yaan u yutstal.
9 Teneʼ láayliʼ tiʼ yanen yáanal autoridadeʼ, yéetel yaan xan soldadoʼob yáanal in autoridad. Le oʼolal kéen in waʼal tiʼ juntúul: ‹¡Xeen!›, ku bin; yéetel kéen in waʼal tiʼ uláakʼ: ‹¡Koʼoten!›, ku taal; yéetel kéen in waʼal tiʼ máax meyajtiken: ‹¡Beet lelaʼ!›, ku beetik».
10 Ka tu yuʼubaj Jesús lelaʼ jaʼakʼ u yóoleʼ ka tu yaʼalaj tiʼ le máaxoʼob ku binoʼob tu paachoʼ: «Tu jaajil kin waʼalikteʼex: tu luʼumil Israeleʼ maʼ in kaxt mix juntúul máak jach nojoch u fe jeʼex le máakaʼ.+
11 Kin waʼalik xan teʼexeʼ, desde lakʼin yéetel chikʼineʼ* yaan u taal yaʼab máakoʼob, letiʼobeʼ yaan u múul kutaloʼob janal yéetel Abrahán, Isaak yéetel Jacob teʼ tu Reinoil kaʼanoʼ.+
12 Chéen baʼaleʼ u paalaloʼob le Reinooʼ yaan u píikchʼintaʼaloʼob teʼ táankab tuʼux éeʼjochʼeʼenoʼ. Teʼeloʼ tiʼ kun okʼoloʼobiʼ yéetel tiʼ ken u karachʼt u kojoʼobiʼ».+
13 Jesús túuneʼ tu yaʼalaj tiʼ u nojchil le soldadoʼoboʼ: «Xeen, úuchuk le baʼax ka páaʼtik ka úuchkoʼ».+ Le máak túun kʼojaʼanoʼ utschaj teʼ súutuk jeʼeloʼ.+
14 Jesús túuneʼ ook tu yotoch Pedroeʼ ka tu yilaj chilikbal u suegra+ Pedro tumen táan u chokwil.+
15 Jesúseʼ tu machaj u kʼabeʼ+ ka síischaj u chokwil. Le koʼolel túunoʼ líikʼeʼ ka joʼopʼ u beetik u yoʼoch Jesús.
16 Ka áakʼabchajeʼ bisaʼab yiknal Jesús yaʼab máaxoʼob okaʼan demonio tiʼob, letiʼeʼ chéen yéetel junpʼéel tʼaaneʼ tu jóoʼsaj le demonioʼoboʼ, yéetel tu tsʼakaj tuláakal le máaxoʼob kʼojaʼanoʼoboʼ.
17 Lelaʼ úuch utiaʼal ka béeychajak le baʼax aʼalaʼab tiʼ profeta Isaías ka u yaʼalaʼ: «Letiʼeʼ tu chʼaʼaj k-kʼojaʼaniloʼob, yéetel tu bisaj le baʼaxoʼob k-muʼyajtikoʼ».+
18 Ka tu yilaj Jesús baʼpachtaʼan tumen yaʼab máakoʼobeʼ tu yaʼalaj tiʼ u discípuloʼob ka xiʼikoʼob tuláakʼ u tséel le jaʼoʼ.+
19 Juntúul escribaeʼ náatsʼ tu yiknaleʼ ka tu yaʼalajtiʼ: «J-Kaʼansaj, yaan in bin ta paach jeʼel tuʼuxak ka xiʼikecheʼ».+
20 Chéen baʼaleʼ Jesúseʼ tu yaʼalajtiʼ: «Le chʼomakoʼoboʼ yaan u saajkaboʼob, yéetel le chʼíichʼoʼob ku máanoʼob teʼ kaʼanoʼ yaan u kʼuʼob, chéen baʼaleʼ u Paal máakeʼ minaʼan mix tuʼux u tʼalkúuntik u pool».+
21 Uláakʼ juntúul tiʼ le máaxoʼob tsaypachtik Jesúsoʼ tu yaʼalaj xan tiʼ: «Yuumtsil, yáaxeʼ chaʼa in bin in muk in taata».+
22 Jesúseʼ tu yaʼalajtiʼ: «Techeʼ seguernak a taal tin paach, yéetel chaʼa tiʼ le kimenoʼob ka u muk u yéet kimeniloʼoboʼ».+
23 Ka tsʼoʼokeʼ Jesúseʼ naʼak tiʼ junpʼéel barco, u discípuloʼobeʼ naʼakoʼob xan tu yéetel.+
24 Le táan u binoʼoboʼ káaj junpʼéel kʼaʼamkach iikʼ teʼ kʼáaʼnáaboʼ, le jaʼ túunoʼ joʼopʼ u yokol ichil le barcooʼ; chéen baʼaleʼ Jesúseʼ táan kaʼach u wenel.+
25 Letiʼob túuneʼ náatsʼoʼob tu yiknal utiaʼal u yajsikoʼob, tu yaʼaloʼobtiʼ: «¡Yuumtsil, salvartoʼoniʼ, tumen táan k-búulul!».
26 Chéen baʼaleʼ Jesúseʼ tu yaʼalajtiʼob: «¿Baʼaxten jach saajkeʼex?, ¿baʼaxten jach junpʼíit a fejeʼex?».+ Líikʼ túuneʼ ka tu kʼeyaj le kʼáaʼnáaboʼ bey xan le iikʼoʼ, ka pʼáat jach jejetsʼkil tuláakal.+
27 Letiʼobeʼ jaʼakʼ u yóoloʼobeʼ ka tu yaʼaloʼob: «¿Máax le máak beyaʼ? Tumen tak le iikʼ yéetel le kʼáaʼnáab uʼuyik u tʼaanoʼ».
28 Ka kʼuch Jesús tuláakʼ u tséel le jaʼoʼ, teʼ tuʼux kajaʼan le gadarenoʼoboʼ, ilaʼab tumen kaʼatúul máakoʼob okaʼan demonio tiʼob táan u jóokʼloʼob teʼ tuʼux yaan le muknaloʼoboʼ.+ Le máakoʼobaʼ jach táaj tsʼíikoʼob, le oʼolal tuláakal máak sajak máan teʼ bejoʼ.
29 Le máakoʼob túunoʼ tu yawtoʼob tiʼ Jesús: «U Paal Dios, ¿baʼax ka kaxtik wayeʼ?+ ¿Taalech wa a castigartoʼon*+ kex maʼ kʼuchuk le kʼiin aʼalaʼanoʼ?».+
30 Náach teʼ tuʼux yanoʼoboʼ yaan yaʼabkach kʼéekʼenoʼob táan u janaloʼobiʼ.+
31 Le demonioʼob túunoʼ tu kʼáat óoltoʼob tiʼ Jesús: «Wa ka jóoʼskoʼon tiʼ le máakoʼobaʼ chaʼa k-okol tiʼ le kʼéekʼenoʼoboʼ».+
32 Jesús túuneʼ tu yaʼalajtiʼob: «¡Xeeneʼex!». Letiʼobeʼ jóokʼoʼob tiʼ le máakoʼoboʼ ka ookoʼob tiʼ le kʼéekʼenoʼoboʼ; tuláakal le kʼéekʼenoʼob túunoʼ tu pulubaʼob teʼ kʼáaʼnáab desde teʼ sen kaʼanal lugar tuʼux yanoʼoboʼ, ka láaj kíimoʼob.
33 Le máaxoʼob kanáantik le kʼéekʼenoʼoboʼ púutsʼoʼobeʼ ka binoʼob teʼ kaajoʼ, ka tu tsikbaltoʼob tuláakal baʼax úuchi, tak le baʼax úuch yéetel le máaxoʼob okaʼan demonio tiʼob kaʼachoʼ.
34 Tuláakal túun u kajnáaliloʼob le kaajoʼ binoʼob tak tuʼux yaan Jesús; le ka tu yiloʼobeʼ tu sen kʼáat óoltoʼobtiʼ ka jóokʼok tu luʼumoʼob.+
Notas
^ Wa «centurión»; lelaʼ juntúul comandante tsʼaʼan 100 soldadoʼob u nuʼukte.
^ Wa «oeste».
^ Wa «a beet k-muʼyaj».
