Marcos 7:1-37
7 Jujuntúul fariseoʼob yéetel escribaʼobeʼ lukʼoʼob Jerusaléneʼ ka taaloʼob teʼ tuʼux yaan Jesúsoʼ ka tu muchʼubaʼob tu baʼpach.+
2 Letiʼobeʼ tu yiloʼob táan u janal jujuntúul u discípuloʼob Jesús éekʼ u kʼaboʼob, lelaʼ u kʼáat u yaʼaleʼ maʼ u pʼoʼomaj u kʼaboʼob jeʼex suuk u beetaʼaleʼ.
3 (Le fariseoʼob yéetel tuláakal le judíoʼoboʼ maʼ tu janaloʼob wa maʼ u pʼoʼomaj u kʼaboʼob tak tu kúukoʼobiʼ. Letiʼobeʼ jach suukaʼan u beetkoʼob le baʼax kaʼansaʼantiʼob tumen u yúuchben láakʼtsiloʼoboʼ.
4 Tsʼoʼoleʼ cada ken suunakoʼob kʼíiwikeʼ maʼatech u janaloʼob wa maʼ tu pʼoʼikubaʼob. Letiʼobeʼ yaʼab uláakʼ baʼax suuk u beetkoʼob jeʼex kaʼansaʼaniltiʼobeʼ, jeʼex u tʼubikoʼob le copaʼob ich jaʼoʼ bey xan le picheloʼob yéetel le vasoʼob de cobreoʼ).+
5 Yoʼolal leloʼ le fariseoʼob yéetel le escribaʼoboʼ tu kʼáatoʼob tiʼ Jesús: «¿Baʼaxten a discípuloʼobeʼ maʼatech u beetkoʼob le baʼax suuk u beetaʼal tumen le úuchben máakoʼoboʼ? ¿Baʼaxten ku jaantik u yoʼochoʼob kex éekʼ u kʼaboʼob?».+
6 Jesús túuneʼ tu yaʼalajtiʼob: «J-kaʼapʼéel icheʼex, jach jaaj le baʼax tu yaʼalaj le profeta Isaías ta woʼolaleʼexaʼ: ‹Le kaajaʼ chéen yéetel u chiʼ ku alabarken, chéen baʼaleʼ u puksiʼikʼaleʼ jach náach yanil tiʼ teen.+
7 Chéen kunel u seguer u adorarken, tumen le baʼaxoʼob ku kaʼansikoʼ chéen tiʼ máakoʼob u taal›.+
8 Teʼexeʼ ka pʼatkeʼex juntséelil baʼax ku yaʼalik Dios utiaʼal a beetkeʼex chéen le baʼaxoʼob suuk u beetik le máakoʼoboʼ».+
9 Tsʼoʼoleʼ tu yaʼalaj xan tiʼob: «Teʼexeʼ jach a wojel a tsʼáaʼex juntséelil le baʼax u yaʼalmaj Dios chéen utiaʼal a beetkeʼex le baʼaxoʼob suukaʼanteʼexoʼ.+
10 Moiséseʼ tu yaʼalaj: ‹Unaj a respetartik a papá bey xan a maama›,+ tu yaʼalaj xan: ‹Le máax ku kʼaakʼastʼaan tu contra u papá wa u maamaeʼ unaj u kíimsaʼal›.+
11 Chéen baʼaleʼ teʼexeʼ ka waʼalikeʼexeʼ juntúul máakeʼ jeʼel u páajtal u yaʼalik tiʼ u papá wa tiʼ u maamaeʼ: ‹Maʼ tu páajtal in wáantkech, tumen tuláakal baʼax yaanteneʼ corbán (u kʼáat u yaʼaleʼ junpʼéel baʼax kʼubaʼan tiʼ Dios)›.
12 Bey túunoʼ teʼexeʼ maʼ ta chaʼikeʼex u beetik máak mix baʼal tu yoʼolal u papá wa tu yoʼolal u maama.+
13 Le kéen a kaʼanseʼex tiʼ u maasil le baʼax suuk a beetkeʼexoʼ ka mixbaʼalkúuntikeʼex le baʼax u yaʼalmaj Diosoʼ.+ Tsʼoʼoleʼ ka beetkeʼex uláakʼ baʼaloʼob jeʼex lelaʼ».+
14 Jesúseʼ tu kaʼa tʼanaj le yaʼabkach máakoʼoboʼ ka tu yaʼalajtiʼob: «Chʼenxikinteneʼex yéetel chʼaʼnuʼukteʼex baʼax kin waʼalik.+
15 Le baʼax beetik u kʼastal máakoʼ maʼ letiʼe baʼax ku yokol tu wíinkliloʼ, baʼaxeʼ letiʼe baʼaxoʼob ku jóokʼol tu puksiʼikʼal máakoʼ».+
16 * ——
17 Le ka lukʼ Jesús tu yiknal le máakoʼoboʼ ook ichil junpʼéel naj, teʼeloʼ u discípuloʼobeʼ tu kʼáatoʼobtiʼ baʼax u kʼáat u yaʼal le baʼax tu yaʼaloʼ.+
18 Letiʼ túuneʼ tu yaʼalajtiʼob: «¿Tak wa teʼex maʼ ta naʼateʼexiʼ? ¿Maʼ wa ta wilkeʼexeʼ le baʼax ku yokol tu wíinklil máakoʼ maʼ tu beetik u kʼastal máak?
19 Tumen leloʼ maʼ tu puksiʼikʼal máak ku biniʼ, baʼaxeʼ tu nakʼ, kéen tsʼoʼokkeʼ ku máansik». Yéetel le baʼax tu yaʼalaʼ tu yeʼeseʼ tuláakal janaleʼ maʼalob utiaʼal jaantbil.
20 Tu yaʼalaj xan: «Le baʼax kʼaskúuntik máakoʼ letiʼe baʼax ku jóokʼol tu puksiʼikʼaloʼ,+
21 tumen tu puksiʼikʼal máakeʼ+ ku jóokʼol le kʼaakʼas tuukuloʼobaʼ: u núupkʼebantal,* u yookol, u kíimsik u yéet máakil,
22 u tusik u núup,* u sen tsʼíiboltik u yantal yaʼab baʼaloʼob tiʼ, u beetik baʼal kʼaas, u tuus, u kuxtal x-maʼ suʼtalil, u kʼuuxil tumen minaʼantiʼ baʼax yaan tiʼ u maasil, u poochʼil, u kaʼantal u yich yéetel u beetik baʼaloʼob x-maʼ naʼatil.
23 Tuláakal le kʼaakʼas baʼaloʼobaʼ tu puksiʼikʼal máak ku jóokʼol yéetel ku kʼaskúuntikoʼob máak».
24 Jesús túuneʼ lukʼ teʼeloʼ ka bin naatsʼ tiʼ u kaajil Tiro yéetel Sidón.+ Letiʼ túuneʼ ook tiʼ junpʼéel naj tumen maʼ u kʼáat kaʼach ka ojéeltaʼak wa tiaʼaniʼ; chéen baʼaleʼ kex beyoʼ ojéeltaʼabi.
25 Chéen pʼelak kʼuchik Jesús teʼeloʼ ojéeltaʼab tumen juntúul koʼolel de ke tiaʼaniʼ, ka túun bin xoltal tu táan.+ U chan hija le koʼolelaʼ okaʼan kaʼach juntúul demonio tiʼ.
26 Le koʼolelaʼ Grecia u taal, chéen baʼaleʼ kajaʼan Fenicia, tu luʼumil Siria; letiʼeʼ tu sen kʼáataj tiʼ Jesús ka u jóoʼs le demonio okaʼan tiʼ u hijaoʼ.
27 Chéen baʼaleʼ Jesúseʼ tu yaʼalajtiʼ: «Chaʼa u naʼajtal táanil le paalaloʼoboʼ tumen maʼ maʼalob ka chʼaʼabak u yoʼoch waaj le paalaloʼob utiaʼal ka tsʼaʼabak tiʼ le mejen peekʼoʼoboʼ».+
28 Le koʼoleloʼ tu yaʼalajtiʼ: «Jaaj a tʼaan, Yuumtsil, chéen baʼaleʼ le mejen peekʼoʼoboʼ ku jaantikoʼob u xiixel le waaj ku jutik le mejen paalaloʼob yáanal le mesaoʼ».
29 Jesús túuneʼ tu yaʼalajtiʼ: «Suunen ta wotoch, maʼ a tuklik mix baʼal, tu yoʼolal le baʼax ta waʼaloʼ tsʼoʼok u jóokʼol le demonio tiʼ a hijaoʼ».+
30 Le koʼolel túunoʼ bin tu yotoch, ka kʼucheʼ tu yilaj chilikbal le chan x-chʼúupal teʼ camaoʼ, tsʼoʼok u jóokʼol le demonio tiʼoʼ.+
31 Ka lukʼ Jesús tu kaʼatéen naatsʼ tiʼ Tiroeʼ máan tu kaajil Sidón utiaʼal u bin teʼ Mar de Galileaoʼ, máan xan chúumuk tiʼ u kaajiloʼob Decápolis.*+
32 Teʼ túunoʼ bisaʼab yiknal Jesús juntúul máak kóok yéetel istikyaj u jóokʼol u tʼaan,+ ka kʼáat óoltaʼab tiʼ ka u tsʼáa u kʼab tu yóokʼol le máakaʼ.
33 Jesús túuneʼ tu bisaj junpáayil, náach tiʼ le yaʼabkach máakoʼoboʼ, ka tu tsʼáaj u dedos tu xikin le máakoʼ yéetel ka tsʼoʼok u túubeʼ tu machaj u yaakʼ le máakoʼ.+
34 Paakatnaj kaʼaneʼ, tu taam chʼaʼaj u yiikʼeʼ ka tu yaʼalaj: «Éfata», lelaʼ u kʼáat u yaʼal: «Jeʼepajkech».
35 Le máak túunoʼ jeʼepaj u xikin,+ xuʼul u tʼiʼilil u yaakʼ, ka túun páajchaj u tʼaan maʼalob.
36 Jesús túuneʼ tu kʼubéentajtiʼob maʼ u yaʼalikoʼob mix baʼal,+ chéen baʼaleʼ wa maas táan u yaʼaliktiʼob maʼ u tsikbaltikoʼobeʼ maas táan u beetkoʼob.+
37 Le yaʼabkach máakoʼoboʼ jach jaʼakʼ u yóoloʼobeʼ+ ka joʼopʼ u yaʼalikoʼob: «Tuláakal le baʼaloʼobaʼ jach maʼalob úuchik u beetik. Tak le kóokoʼoboʼ ku beetik u jeʼepajal u xiknoʼob yéetel le mudoʼoboʼ* ku beetik u tʼaanoʼob».+
Notas
^ Yaan úuchben tsʼíiboʼob ich griegoeʼ maʼatech u taaskoʼob le versículoaʼ, lelaʼ ku yeʼesikeʼ le versículoaʼ maʼ táakaʼan ichil le Bibliaoʼ.
^ Ilawil página 2573.
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
^ Wa «teʼ luʼum tuʼux yaan le Diez Kaajoʼoboʼ».
^ Wa «tootoʼoboʼ».
