Job 19:1-29
19 Job túuneʼ tu yaʼalaj:
2 «¿Tak baʼax kʼiin ken xuʼuluk a náaksikeʼex in wóol,+yéetel a pechʼkeneʼex yéetel baʼaxoʼob ka waʼalikeʼex?+
3 Tsʼoʼok diez u téenel a waʼalikeʼexten baʼal,maʼ suʼlakeʼex ikil a tratarkeneʼex beyoʼ.+
4 Wa yaan baʼax maʼ maʼalob in beetmeʼ,teeniliʼ kin kuchkeʼ.
5 Maʼ tu xuʼulul a taaskabaʼex nojbaʼalil tin wóokʼolikil a waʼalikeʼex yaan razón ka tratartaʼaken kʼaas,
6 wa jaajeʼ, u kʼáat túun u yaʼaleʼ Dios tusmilen,yéetel tsʼoʼok in lúubul tu trampa.
7 ¡Ilawileʼex! Teneʼ mantatsʼ kin wawtik: ‹¡Loobiltaʼanen!›, chéen baʼaleʼ mix máak núukikten,+kex táan in kʼáatik ka áantaʼakeneʼ mix máak beetikten justicia.+
8 Dioseʼ tsʼoʼok u kʼatik in beel yéetel junpʼéel nuxiʼ pakʼ de tuunich, le oʼolal maʼ tu páajtal in máan.
Tsʼoʼok u beetik u yéeʼjochʼeʼental le tuʼux kin máanoʼ.+
9 Tsʼoʼok u luʼsikten tuláakal le baʼaloʼob yaanten kaʼachoʼ,tsʼoʼok u luʼsik le corona yaan kaʼach tin pooloʼ.
10 Letiʼeʼ jujunpʼíitil u xuʼulsikten tak ken u kíimsen.
Jeʼex u jóokpaytaʼal junkúul cheʼeʼ bey u luʼsik le baʼax kin páaʼtikoʼ.
11 Sen pʼujaʼan tin contra,ku yilken bey u enemigoeʼ.+
12 Ku taal u soldadoʼobeʼ ku baʼpachtikenoʼobyéetel ku baʼpachtikoʼob in wotoch.
13 Tsʼoʼok u náachkuntik in sukuʼunoʼob tiʼ teen.
Le máaxoʼob u kʼaj óolenoʼoboʼ tsʼoʼok xan u náachtaloʼob.+
14 In láakʼtsiloʼobeʼ tsʼoʼok u pʼatkenoʼob,le máaxoʼob jach in kʼaj óoloʼoboʼ tsʼoʼok u tuʼubsikenoʼob.+
15 In wuʼulaboʼob yéetel in x-meyajoʼobeʼ+ bey maʼ u kʼaj óolenoʼobeʼ,bey j-táanxel luʼumilen tu táanoʼobeʼ.
16 Le kéen in tʼan le máax ku meyaj tin wotochoʼ maʼ tu núukik,kex kin sen kʼáatiktiʼ ka u chʼaʼten óotsilil.
17 In wataneʼ u pʼeek u yuʼubik u book in chiʼ,+in sukuʼunoʼobeʼ ku yilkenoʼob bey junpʼéel tuʼutuʼ baʼaleʼ.
18 Tak le mejen paalaloʼoboʼ maʼ tu respetarkenoʼob,le kéen líiʼkeneʼ ku joʼopʼol u burlarkenoʼob.
19 Tuláakal le máaxoʼob jach kin biskinba tu yéeteloʼoboʼ u pʼekmenoʼob,+le máaxoʼob in yaabiltmaj kaʼachoʼ ku tsʼáaikubaʼob tin contra.+
20 In wíinklileʼ tsʼoʼok u pʼáatal chéen ootʼ yéetel baak,+istikyaj in púutsʼul tiʼ le kíimiloʼ.
21 In wéet máakileʼex, chʼaʼexten óotsilil, chʼaʼexten óotsilil,tumen kin wuʼuyik u pechʼmen Dios yéetel u kʼab.+
22 ¿Baʼaxten maʼ tu xuʼulul a chʼaʼpachtikeneʼex jeʼex u beetik Dioseʼ?+
¿Baʼaxten maʼ tu xuʼulul a atacarkeneʼex?+
23 ¡Wa ka béeyak u tsʼíibtaʼal le baʼaxoʼob kin waʼalikaʼ!
¡Wa ka béeyak u tsʼíibtaʼal tiʼ junpʼéel libroeʼ!
24 ¡Bukaʼaj maʼalobil wa ka béeyak u labrartaʼal tiʼ junpʼéel tuunichyéetel junpʼéel cincel de fierro, tsʼoʼoleʼ ka láalaʼak plomoiʼ!
25 Teneʼ in wojel kuxaʼan le máax salvarkenoʼ.+
Letiʼeʼ yaan u taal yéetel yaan u pʼáatal waʼatal yóokʼol le luʼumaʼ.
26 Kex tsʼoʼok u láaj kʼastal in wootʼeleʼ,mientras kuxaʼaneneʼ yaan in wilik Dios,
27 teen kin ilik,in wichoʼob kun ilik maʼ u yichoʼob yaanal máakiʼ.+
¡Kin wuʼuyik jach lubaʼan in wóol!
28 Teʼexeʼ ka waʼalikeʼex: ‹¿Baʼaxten ku yaʼalik táan k-chʼaʼpachtik?›.+
Hasta bey tsʼoʼok a wilkeʼex tiʼ teen yaan u culpail le baʼax ku yúuchloʼ.
29 Teʼex unaj a chʼaʼikeʼex saajkil tiʼ le espadaoʼ,+tumen le espadaoʼ ku castigartik le máaxoʼob ku beetkoʼob baʼaloʼob kʼaastakoʼ.
Ojéelteʼexeʼ yaan juntúul juez».+
