Ezequiel 7:1-27
7 Jéeobaeʼ tu kaʼa tʼaneneʼ ka tu yaʼalajten:
2 «U paal máak, lelaʼ letiʼe baʼax ku yaʼalik Jéeoba, le máax yaan tuláakal autoridad tiʼoʼ, letiʼeʼ ku yaʼalik tiʼ tuláakal u luʼumil Israel: ‹¡Tsʼoʼok u kʼuchul u xuul! Tsʼoʼok u kʼuchul u xuul tiʼ tuláakal le luʼumaʼ.
3 Israel, tsʼoʼok u kʼuchul u kʼiinil a xuʼulsaʼal. Teneʼ yaan in láalik in pʼujaʼanil ta contra, yaan in juzgarkech tu yoʼolal bix a kuxtal yéetel yaan in kʼáatiktech cuenta tu yoʼolal tuláakal le baʼaloʼob kʼaastak ka beetkoʼ.
4 Teneʼ maʼ ken in chʼaʼtech óotsilil mix kun yaatal in wóol kéen in wil bix a tsʼoʼokol.+ Teneʼ yaan in tsʼáaiktech le baʼax ka náajaltik tu yoʼolal le bix a kuxtaloʼ, yaan a muʼyaj tu yoʼolal le baʼax kʼaas ka beetkoʼ.+ Bey túunoʼ yaan a wojéeltik máax Jéeoba›.+
5 Jéeoba, le máax yaan tuláakal autoridad tiʼoʼ, ku yaʼalik: ‹¡Ilawile! Táan u taal junpʼéel nojoch loob, junpʼéel nojoch loob mix juntéen ilaʼak.+
6 Tsʼoʼok u náatsʼal u kʼiinil le xuʼulsajoʼ. Táan u taal, yaan u líikʼil* ta contra. ¡Ilawile! Táan u taal.
7 Tsʼoʼok u kʼuchul u kʼiinil u taal junpʼéel nojoch loob tu yóokʼol u kajnáaliloʼob le luʼumaʼ. Taʼaytak u kʼuchul u súutukil, naatsʼ yanil le kʼiinoʼ.+ Le máakoʼob yaan teʼ montañaʼoboʼ maʼ táan u yawatoʼob tumen kiʼimak u yóoloʼobiʼ, baʼaxeʼ tumen maʼ tu kaxtik baʼax u beetoʼob.
8 Jach taʼaytak in láalik in pʼujaʼanil ta wóokʼol,+ yaan in láalik tuláakal in pʼujaʼanil ta contra,+ teneʼ yaan in juzgarkech tu yoʼolal bix a kuxtal yéetel yaan in kʼáatiktech cuenta tu yoʼolal tuláakal le baʼaloʼob kʼaastak ka beetkoʼ.
9 Teneʼ maʼ ken in chʼaʼtech óotsilil mix kun yaatal in wóol kéen in wil bix a tsʼoʼokol.+ Teneʼ yaan in tsʼáaiktech le baʼax ka náajaltik tu yoʼolal le bix a kuxtaloʼ, yaan a muʼyaj tu yoʼolal le baʼax kʼaas ka beetkoʼ. Bey ken a wojéeltil Jéeoba castigarkechoʼ.+
10 ¡Táan u taal u kʼiinil! ¡Tsʼoʼok u náatsʼal!+ Tsʼoʼok u kʼuchul u kʼiinil u taal ta wóokʼol. Tsʼoʼok in preparartik le cheʼ kun meyajten utiaʼal in jatsʼkechoʼ. Le enemigooʼ tsʼoʼok u maas taaskuba nojbaʼalil.
11 Le máax ku beetik looboʼ bey junpʼéel cheʼ utiaʼal u castigartaʼal le máaxoʼob ku beetik u kʼasaʼaniloʼoboʼ.+ Le kʼasaʼan máakoʼoboʼ maʼ ken u salvartubaʼob mix ken u salvartuba u genteʼob. Yaan u xuʼulul tiʼ u ayikʼaliloʼob bey xan tiʼ le páajtalil yaantiʼoboʼ.
12 Lelaʼ yaan u kʼuchul u kʼiinil u yúuchul, yaan u kʼuchul u súutukil. Bey túunoʼ le máax ku maanoʼ maʼ unaj u kiʼimaktal u yóoliʼ, yéetel le máax ku koonoloʼ maʼ unaj u yaatal u yóoliʼ, tumen Dioseʼ pʼujaʼan tu contra tuláakal máak.*+
13 Le máax ku koonoloʼ kex láayliʼ kuxaʼaneʼ maʼ kun suut teʼ luʼum tu konoʼ, tumen le baʼax tsʼoʼok in waʼalikoʼ yaan u taal tu yóokʼol tuláakal máak. Mix máak kun púutsʼul, le máaxoʼob ku beetkoʼob baʼaloʼob kʼaastakoʼ maʼ ken u salvart u kuxtaloʼob.
14 Tsʼoʼok u yustaʼal le trompetaoʼ,+ tuláakal máak tsʼoʼok u prepararkuba, chéen baʼaleʼ mix máak ku jóokʼol baʼateʼel tumen teneʼ pʼujaʼanen tu yéetel le kaajoʼ.+
15 Paachil tiʼ le kaajoʼ tiʼ ku máan le espadaoʼ,+ ichil le kaajoʼ yaan kʼaakʼas kʼojaʼanil yéetel wiʼijiliʼ. Tuláakal le máaxoʼob yanoʼob paachil tiʼ le kaajoʼ yaan u kíimsaʼaloʼob yéetel espada, yéetel tuláakal le máaxoʼob yanoʼob ichil le kaajoʼ yaan u kíimsaʼaloʼob tumen kʼaakʼas kʼojaʼanil yéetel tumen wiʼijil.+
16 Le máaxoʼob kun púutsʼloʼoboʼ yaan u binoʼob teʼ montañaʼoboʼ. Le máakoʼob ku beetkoʼob baʼaloʼob maʼ maʼalobtakoʼ yaan u yokʼoloʼob jeʼex u yokʼol le palomaʼob+ yaan teʼ táax luʼumoʼ.
17 Tuláakal máakeʼ yaan u pʼáatal minaʼan u muukʼ yéetel yaan u wixkuba yoʼolal u saajkil.+
18 Letiʼobeʼ tsʼoʼok u búukintikoʼob toʼotoch nookʼoʼob*+ yéetel tsʼoʼok u sen sajaktaloʼob. Tuláakloʼob ken u chʼaʼob suʼtal yéetel tuláakloʼob kun kʼolistaloʼob.*+
19 Le plata yaantiʼoboʼ yaan u píikchʼintkoʼob teʼ bejoʼoboʼ yéetel yaan xan u pʼektikoʼob le oro yaantiʼoboʼ. Mix le plata mix le oro kun salvarkoʼob tu kʼiinil u pʼujaʼanil Jéeobaoʼ.+ Kex yaantiʼob plata yéetel oroeʼ maʼ kun naʼajtaloʼob mix kun xuʼulul u wiʼijiloʼob. Le plata yéetel le oro yaantiʼoboʼ chéen meyajnaj utiaʼal u tʼóochpajloʼob yéetel utiaʼal u lúubloʼob tiʼ baʼax kʼaas.
20 Jach nojbaʼal kaʼach u taaskubaʼob tu yoʼolal le kiʼichkelem adornoʼob yaantiʼoboʼ, tu yéeteloʼobeʼ tu beetoʼob u x-lalaʼ imagenoʼob, u x-lalaʼ diosoʼob.+ Teneʼ yaan in beetik u pʼektikoʼob le plata yéetel le oro yaantiʼoboʼ.
21 Le baʼaloʼobaʼ yaan in kʼubik tu kʼab le j-táanxel luʼumiloʼoboʼ yéetel yaan in tsʼáaik tiʼ le kʼasaʼan máakoʼob yaan way yóokʼol kaabeʼ, letiʼob túuneʼ yaan u taaskoʼob mix baʼalil le baʼaloʼob jach koʼojtakoʼoboʼ.
22 Teneʼ yaan in sutik in paach tiʼ letiʼob.+ Bey túunoʼ le kiʼichkelem lugar yaantenoʼ* yaan u taasaʼal mix baʼalil, tumen le j-ookoloʼoboʼ yaan u yookloʼobiʼ yéetel yaan u kʼaskúuntikoʼob.+
23 Preparart le cadenaʼoboʼ*+ tumen le luʼumoʼ chuup yéetel u kʼiʼikʼel le máaxoʼob beetaʼab injusticia tiʼoboʼ,+ tsʼoʼoleʼ le kaajoʼ chuup yéetel kʼasaʼanil.+
24 Yaan in taasik le máakoʼob maas kʼasaʼanoʼob yaan teʼ luʼumoʼoboʼ,+ letiʼob túuneʼ yaan u chʼaʼikoʼob a wotocheʼex.+ Yaan in xuʼulsik le baʼax beetik u creerkuba le máakoʼob yaan páajtalil tiʼoboʼ, yaan u taasaʼal mix baʼalil le lugaroʼob santoʼoboʼ.+
25 Le kéen taalak le nojoch loob ta wóokʼoleʼexoʼ yaan a kaxtikeʼex jeetsʼelil, chéen baʼaleʼ maʼ ken a kaxteʼex.+
26 Tu paach junpʼéel loobeʼ tiʼ kun taal uláakʼ loobiʼ, maʼ tsʼoʼokok a wojéeltikeʼex junpʼéel baʼaleʼ le ku taal aʼalbilteʼex uláakʼ. Chéen kunel ka u kʼáat máak tiʼ juntúul profeta baʼax tsʼoʼok u tsʼaʼabal u yile.+ Tak le kaʼansaj ku tsʼáaik kaʼach le sacerdoteʼob bey xan le nuʼuktaj ku tsʼáaik u nuuktakil le kaajoʼ yaan u pʼáatal mix baʼal u biilaloʼob.+
27 Le reyoʼ jach yaan u yaatal u yóol,+ u nojchil le kaajoʼ maʼ ken u kaxt baʼax u beete, u kajnáaliloʼob le luʼumoʼ yaan u kikilankiloʼob tumen jach saajkoʼob. Yaan in boʼotiktiʼob baʼax u beetmoʼob yéetel yaan in juzgarkoʼob jeʼex u juzgaroʼoboʼ. Bey túunoʼ letiʼobeʼ yaan u yojéeltikoʼob máax Jéeoba›».+
Notas
^ Ich hebreoeʼ ku yaʼalaʼal kaʼach «u yajal».
^ Lelaʼ u kʼáat u yaʼaleʼ mix máak kun jóoʼsik u yutsil le baʼax ku manikoʼ wa le baʼax ku konikoʼ tumen yaan u láaj xuʼulsaʼaltiʼob.
^ Lelaʼ u kʼáat u yaʼaleʼ yaan u tsʼikik u pooloʼob utiaʼal u yeʼeskoʼob yaachajaʼan u yóoloʼob.
^ Ilawil «Toʼotoch nookʼ», página 2582.
^ Wa «le lugar taʼakaʼanoʼ».
^ Lelaʼ letiʼe cadenaʼob ku meyaj kaʼach utiaʼal u kʼaʼaxal le máaxoʼob ku bisaʼaloʼob táanxel luʼumiloʼ.
