Ezequiel 40:1-49
40 Teʼ año 25 bisaʼakoʼon táanxel luʼumiloʼ,+ tu káajbal le añooʼ teʼ día diez tiʼ le yáax mesoʼ, u poder* Jéeobaeʼ taal tin wóokʼoleʼ ka tu bisen teʼ kaajoʼ,+ úuch tu 14 años chʼaʼabak u kaajil Jerusalén.+
2 Dioseʼ tu yeʼesajten junpʼéel baʼal, tin wileʼ bey tiaʼanen tu luʼumil Israeleʼ ka tu tsʼáajen yóokʼol junpʼéel jach kaʼanal montaña.+ Tu noojolil le montañaoʼ tiaʼan junpʼéel baʼal chíikaʼan tiʼ junpʼéel kaajiʼ.
3 Le ka tu kʼujsen teʼeloʼ tin wilaj yaan juntúul máak ku léembal jeʼex le cobreoʼ.+ Tu kʼab le máakoʼ yaan junpʼéel suum de lino yéetel junpʼéel cheʼ utiaʼal u yúuchul pʼiis.*+ Letiʼeʼ tiʼ waʼalakbal kaʼach tu yookbaleʼ.
4 Le máakoʼ tu yaʼalajten: «U paal máak, pʼil a wich maʼalob, chʼenxikinteniʼ yéetel jach ilawil tuláakal baʼax ken in weʼestech, tumen le oʼolal tin taasech wayeʼ. Tuláakal le baʼax ken a wiloʼ unaj a waʼalik tiʼ u kaajil Israel».+
5 Tin wilaj junpʼéel pakʼ baʼpachtik le templooʼ. Le máakoʼ u machmaj junpʼéel cheʼ utiaʼal u yúuchul pʼiis de seis codos u chowakil (tiʼ cada codoeʼ tsʼaʼab xan junpʼéel palmo menor).* Letiʼ túuneʼ káaj u pʼisik le pakʼoʼ, u kóochileʼ letiʼe bukaʼaj u chowakil le cheʼoʼ bey xan u kaʼanlil.
6 Letiʼ túuneʼ náatsʼ teʼ entrada yaan lakʼinoʼ+ ka naʼak teʼ escaleraʼoboʼ. Le ka tu pʼisaj le sala yaan teʼ entradaoʼ tu yileʼ u kóochileʼ letiʼe bukaʼaj chowakil le cheʼoʼ, yéetel u kóochil xan le uláakʼ salaoʼ letiʼe bukaʼaj chowakil le cheʼoʼ.
7 U chowakil cada junpʼéel tiʼ le cuarto tuʼux ku yantal le guardiaʼoboʼ letiʼe bukaʼaj chowakil le cheʼoʼ bey xan u kóochil, desde junpʼéel cuarto tak tuláakʼ cuartoeʼ+ yaan junpʼéel espacio de cinco codos.* Le sala yaan tu tséel u pórticoil le entrada ku paakat tu tojil le templooʼ le ka pʼiʼiseʼ láayliʼ bukaʼaj jeʼex le cheʼ utiaʼal pʼiisoʼ.
8 Letiʼeʼ tu pʼisaj u pórticoil le entrada ku paakat tu tojil le templooʼ, ka tu yileʼ bukaʼaj jeʼex le cheʼ utiaʼal pʼiisoʼ.
9 Letiʼeʼ tu pʼisaj u pórticoil le entradaoʼ, tu pʼisaj ocho codos. Tu pʼisaj xan le columnaʼob yaan tu tséelikoʼ, tu pʼisaj kaʼapʼéel codo. U pórticoil le entradaoʼ tiaʼan kaʼach teʼ tséel ku paakat tu tojil le templooʼ.
10 Tiʼ cada tséel tiʼ le entrada yaan lakʼinoʼ yaan kaʼach óoxpʼéel cuarto tuʼux ku yantal le guardiaʼoboʼ, le cuartoʼobaʼ igual u nojchiloʼob. Le columnaʼob yaan tu tséel cada junpʼéel tiʼ le cuartoʼobaʼ igual xan u nojchiloʼob.
11 Letiʼ túuneʼ tu pʼisaj u kóochil le entradaoʼ, tu pʼisaj diez codos. Yéetel paachil tiʼ le entradaoʼ u kóochileʼ 13 codos.
12 Tu yookbal le cuartoʼob tuʼux ku yantal le guardiaʼob, le yanoʼob tu kaʼatséelil le entradaoʼ, yaan kaʼach junpʼéel parte kʼalaʼan yéetel junpʼéel pretil, lelaʼ junpʼéel codo ku pʼisik. Le cuartoʼob tuʼux ku yantal le guardiaʼoboʼ, le yanoʼob tu kaʼatséelil le entradaoʼ, seis codos ku pʼiskoʼob.
13 Le ka tsʼoʼokeʼ tu pʼisaj le entrada desde tu techoil junpʼéel tiʼ le cuarto tuʼux ku yantal le guardiaʼoboʼ tak tu techoil le uláakʼ junpʼéel cuartooʼ, u kóochileʼ 25 codos. U yookbal cada junpʼéel cuartoeʼ tiaʼan kaʼach aktáan tiʼ uláakʼ cuartoeʼ.+
14 Le ka tsʼoʼokeʼ tu pʼisaj le columnaʼob yanoʼob tu tséelikoʼ, u kaʼanlileʼ 60 codos. Tu pʼisaj xan le columnaʼob yaan tu tséelil le entradaʼob yanoʼob tu baʼpach u táankabil le templooʼ.
15 Desde aktáan tiʼ le entrada tak teʼ tuʼux ku tsʼoʼokol le pórtico ku paakat tu tojil le templooʼ tu pʼisaj 50 codos.
16 Teʼ cuartoʼob tuʼux ku yantal le guardiaʼob yéetel tiʼ le columnaʼob yanoʼob tiʼ cada tséel tiʼ le entradaoʼ yaan kaʼach ventanas ku bin u nuʼutʼtal u jooliloʼob.+ Teʼ columnaʼoboʼ beetaʼan kaʼach u figura palmeraʼobiʼ.+ Tsʼoʼoleʼ ichil le pórticoʼoboʼ yaan kaʼach ventanas tu tséelikoʼob.
17 Le ka tsʼoʼokeʼ tu bisen teʼ nojoch táankaboʼ, teen túuneʼ tin wilaj lugaroʼob tuʼux ku yúuchul janal+ bey xan junpʼéel piso beetaʼan tu baʼpachil le táankaboʼ. Tu yóokʼol le pisooʼ yaan kaʼach 30 u pʼéelal lugaroʼob tuʼux ku yúuchul janal.
18 Le pisooʼ tiaʼan kaʼach tu tséelil le entradaʼoboʼ yéetel u kóochileʼ igual yéetel u chowakil le entradaʼoboʼ, le pisoaʼ maas kabal yanil tiʼ le chan táankaboʼ.
19 Tsʼoʼoleʼ tu pʼisaj bukaʼaj kóochil desde teʼ tuʼux ku tsʼoʼokol le entradaoʼ tak teʼ tuʼux ku káajal le chan táankaboʼ. Tu tojil lakʼin yéetel tu tojil xamaneʼ 100 codos u kóochil.
20 Le nojoch táankaboʼ yaan kaʼach junpʼéel u entradail tu tojil xaman, letiʼeʼ tu pʼisaj bukaʼaj u kóochil bey xan u chowakil.
21 Tiʼ cada tséel tiʼ le entradaoʼ yaan kaʼach óoxpʼéel cuarto tuʼux ku yantal le guardiaʼoboʼ. Le columnaʼob yanoʼob tu tséelil le entrada bey xan le pórticooʼ igual kaʼach u nojchiloʼob yéetel le yanoʼob teʼ yáax entradaoʼ, u chowakileʼ 50 codos yéetel u kóochileʼ 25 codos.
22 Le ventanas, le pórtico yéetel le palmeraʼoboʼ+ igualoʼob kaʼach yéetel le yanoʼob teʼ entrada yaan lakʼinoʼ. Utiaʼal u kʼuchul máak teʼ entradaoʼ unaj kaʼach u naʼakal tiʼ siete escaleraʼob, aktáan tiʼ letiʼobeʼ tiaʼan kaʼach le pórticooʼ.
23 Le chan táankaboʼ yaan kaʼach junpʼéel u entradail aktáan tiʼ le entrada yaan xamanoʼ yéetel yaan uláakʼ junpʼéel u entradail aktáan tiʼ le entrada yaan lakʼinoʼ. Letiʼeʼ tu pʼisaj bukaʼaj u náachil junpʼéel entrada tiʼ uláakʼ junpʼéel entrada, tu pʼisaj 100 codos.
24 Le ka tsʼoʼokeʼ tu bisen tu tojil noojoleʼ ka tin wilaj yaan junpʼéel entradaiʼ.+ Letiʼ túuneʼ tu pʼisaj le columnaʼob yaan tu tséelikoʼ bey xan u pórticoil, leloʼobaʼ igualoʼob yéetel le yanoʼob teʼ tuláakʼ entradaʼoboʼ.
25 Yaan kaʼach ventanas tiʼ cada tséel tiʼ le entradaoʼ bey xan tiʼ le pórticooʼ, leloʼobaʼ igualoʼob kaʼach yéetel le uláakʼ ventanasoʼ. U chowakil le entradaoʼ 50 codos yéetel u kóochileʼ 25 codos.
26 Utiaʼal u kʼuchul máak teʼ entradaoʼ unaj kaʼach u naʼakal tiʼ siete escaleraʼob,+ aktáan tiʼ letiʼobeʼ tiaʼan kaʼach le pórticooʼ. Teʼ columnaʼob yaan tu tséelikoʼ beetaʼan kaʼach u figura palmeraʼobiʼ, junpʼéel tiʼ cada tséel.
27 Le chan táankaboʼ yaan kaʼach junpʼéel u entradail tu tojil noojol. Teʼ noojolaʼ letiʼeʼ tu pʼisaj bukaʼaj náachil yanil junpʼéel entrada tiʼ le uláakʼ entradaoʼ, tu pʼisaj 100 codos.
28 Le ka tsʼoʼokeʼ tu bisen teʼ entrada yaan tu tojil noojoloʼ yéetel tu yoksen teʼ chan táankaboʼ. Letiʼ túuneʼ tu pʼisaj le entrada yaan tu tojil noojoloʼ, le jeʼelaʼ igual kaʼach yéetel le u maasiloʼoboʼ.
29 Le cuartoʼob tuʼux ku yantal le guardiaʼoboʼ, le columnaʼob yanoʼob tu tséelikoʼ yéetel le pórticooʼ igualoʼob kaʼach yéetel le yanoʼob tiʼ uláakʼ entradaʼoboʼ. Yaan kaʼach ventanas tiʼ cada tséel tiʼ le entradaoʼ bey xan tiʼ le pórticooʼ. U chowakil le entradaoʼ 50 codos yéetel u kóochileʼ 25 codos.+
30 Tuláakal le entradaʼob utiaʼal u yokol máak teʼ chan táankaboʼ yaan kaʼach u pórticoiloʼob, u chowakileʼ 25 codos yéetel u kóochileʼ 5 codos.
31 U pórticoil le entradaoʼ tiaʼan kaʼach aktáan tiʼ le nojoch táankaboʼ. Teʼ columnaʼob yanoʼob tu tséelikoʼ yaan kaʼach u figura palmeraʼobiʼ.+ Utiaʼal u kʼuchul máak teʼ entradaoʼ unaj kaʼach u naʼakal tiʼ ocho escaleraʼob.+
32 Le ka tu bisen teʼ entrada yaan lakʼin yéetel le ka tu yoksen teʼ chan táankaboʼ, tu pʼisaj le entradaoʼ. Le entradaoʼ igual yéetel le uláakʼ entradaʼoboʼ.
33 Le cuartoʼob tuʼux ku yantal le guardiaʼoboʼ, le columnaʼob yanoʼob tu tséelik yéetel le pórticooʼ igualoʼob kaʼach yéetel le yanoʼob tiʼ uláakʼ entradaʼoboʼ. Yaan kaʼach ventanas tiʼ cada tséel tiʼ le entradaoʼ bey xan tiʼ le pórticooʼ. U chowakil le entradaoʼ 50 codos yéetel u kóochileʼ 25 codos.
34 U pórticoil le entradaoʼ tiaʼan kaʼach aktáan tiʼ le nojoch táankaboʼ. Teʼ columnaʼob yanoʼob tu kaʼatséeliloʼ yaan kaʼach u figura palmeraʼobiʼ. Utiaʼal u kʼuchul máak teʼ entradaoʼ unaj kaʼach u naʼakal tiʼ ocho escaleraʼob.
35 Le ka tsʼoʼokeʼ letiʼeʼ tu bisen teʼ entrada yaan xamanoʼ+ ka tu pʼisaj. Le entradaoʼ igual yéetel le uláakʼ entradaʼoboʼ.
36 Le cuartoʼob tuʼux ku yantal le guardiaʼoboʼ, le columnaʼob yanoʼob tu tséelik yéetel le pórticooʼ igualoʼob kaʼach yéetel le yanoʼob tiʼ uláakʼ entradaʼoboʼ. Yaan kaʼach ventanas tiʼ cada tséel tiʼ le entradaoʼ. U chowakil le entradaoʼ 50 codos yéetel u kóochileʼ 25 codos.
37 Le columnaʼob yanoʼob tu tséelikoʼ tiaʼan kaʼach aktáan tiʼ le nojoch táankaboʼ. Teʼ columnaʼob yanoʼob tu kaʼatséeliloʼ yaan kaʼach u figura palmeraʼobiʼ. Utiaʼal u kʼuchul máak teʼ entradaoʼ unaj kaʼach u naʼakal tiʼ ocho escaleraʼob.
38 Naatsʼ tiʼ le columnaʼob yanoʼob tu tséelil le entradaʼoboʼ yaan kaʼach junpʼéel lugar tuʼux ku yúuchul janaliʼ, lelaʼ yaan junpʼéel u joonajil yéetel tiʼ ku pʼoʼobol le tóokbil ofrendaʼoboʼ.*+
39 Teʼ pórtico yaan teʼ entradaoʼ, tiʼ cada tséel tiʼ le pórticooʼ yaan kaʼach kaʼapʼéel mesaʼobiʼ, teʼeloʼ tiʼ ku kíimsaʼal kaʼach le baʼalcheʼob utiaʼal u kʼuʼubul bey tóokbil ofrendaoʼ,+ le ofrendaʼob yoʼolal le kʼebanoʼ*+ bey xan le ofrendaʼob yoʼolal le culpaoʼ.*+
40 Teʼ tuʼux ku naʼakal máak teʼ entrada yaan xamanoʼ yaan kaʼach kaʼapʼéel mesaʼobiʼ, tiaʼanoʼob kaʼach paachil tiʼ le entradaoʼ. Tuláakʼ tséel tiʼ u pórticoil le entradaoʼ yaan xan uláakʼ kaʼapʼéel mesaʼobiʼ.
41 Yaan kaʼach kanpʼéel mesaʼob tiʼ cada tséel tiʼ le entradaoʼ, tuláakaleʼ ocho u pʼéelal, tiʼ ku kíimsaʼal kaʼach le baʼalcheʼob ku kʼuʼubloʼoboʼ.
42 Le kanpʼéel mesaʼob ku meyaj utiaʼal le tóokbil ofrendaʼoboʼ beetaʼanoʼob de póolbil tuunich. U chowakileʼ codo y medio, u kóochileʼ codo y medio yéetel u kaʼanlileʼ junpʼéel codo. Tu yóokʼoloʼobeʼ tiʼ ku pʼaʼatal kaʼach le nuʼukuloʼob utiaʼal u kíimsaʼal le baʼalcheʼob ku kʼuʼubul bey tóokbil ofrenda yéetel bey sacrificiooʼ.
43 Ichil le entradaoʼ yaan kaʼach mejen voladoʼob de 7 centímetros yéetel 4 milímetros* u kóochil, lelaʼ tsʼaʼan kaʼach teʼ pakʼoʼoboʼ. Tu yóokʼol le mesaʼoboʼ tiʼ ku tsʼaʼabal kaʼach u bakʼel le ofrendaʼoboʼ.
44 Paachil tiʼ le entradaoʼ yaan kaʼach lugaroʼob tuʼux ku janal le máaxoʼob ku kʼaayoʼoboʼ,+ leloʼobaʼ tiaʼanoʼob kaʼach teʼ chan táankaboʼ naatsʼ teʼ entrada yaan xamanoʼ, u jooliloʼobeʼ ku paakatoʼob tu tojil noojol. Teʼ entrada yaan lakʼinoʼ yaan xan junpʼéel lugar tuʼux ku yúuchul janal, lelaʼ ku paakat tu tojil xaman.
45 Letiʼeʼ tu yaʼalajten: «Le lugar tuʼux ku yúuchul janal ku paakat tu tojil noojolaʼ utiaʼal le sacerdoteʼob ku meyajoʼob teʼ templooʼ.+
46 Le lugar tuʼux ku yúuchul janal ku paakat tu tojil xamanoʼ utiaʼal le sacerdoteʼob ku meyajoʼob teʼ altaroʼ,+ utiaʼal u hijoʼob Sadok,+ le máaxoʼob yéeyaʼanoʼob ichil le levitaʼob utiaʼal ka náatsʼkoʼob tu yiknal Jéeoba utiaʼal u meyajtikoʼoboʼ».+
47 Le ka tsʼoʼokeʼ tu pʼisaj le chan táankaboʼ. Lelaʼ cuadrado kaʼachi, u chowakileʼ 100 codos yéetel u kóochileʼ 100 codos. Le altaroʼ tiaʼan kaʼach aktáan tiʼ le templooʼ.
48 Le ka tsʼoʼokeʼ tu bisen tu pórticoil le templooʼ+ ka tu pʼisaj le columnaʼob yaan tu tséelikoʼob le pórticooʼ, juntséeleʼ tu pʼisaj cinco codos yéetel uláakʼ juntséeleʼ cinco codos. U kóochil le joonaj tiʼ juntséeloʼ óoxpʼéel codo yéetel tiʼ uláakʼ juntséeleʼ óoxpʼéel codo.
49 U chowakil le pórticooʼ 20 codos yéetel u kóochileʼ 11 codos.* Utiaʼal u kʼuchul máakeʼ unaj kaʼach u naʼakal tiʼ escaleraʼob. Tu tséel u columnailoʼob le pórticooʼ yaan kaʼach uláakʼ columnaʼob, junpʼéel tiʼ cada tséel.+
Notas
^ Ich hebreoeʼ ku yaʼalaʼal kaʼach «u kʼab».
^ Ilawil página 2689.
^ Teʼelaʼ táan u tʼaan tiʼ codo largo. Ilawil página 2689.
^ Ilawil «Codo», página 2559.
^ Ilawil «Tóokbil ofrenda», página 2582.
^ Ilawil «Ofrenda yoʼolal le culpaoʼ», página 2574.
^ Ilawil «Ofrenda yoʼolal le kʼebanoʼ», página 2574.
^ Ich hebreoeʼ ku yaʼalaʼal kaʼach «junpʼéel palmo menor». Ilawil «Palmo menor», página 2689.
^ Uláakʼ bix u traducirtaʼaleʼ «12 codos».
