Ezequiel 21:1-32
21 Jéeobaeʼ tu kaʼa tʼaneneʼ ka tu yaʼalajten:
2 «U paal máak, sut a paakat tu tojil Jerusaléneʼ ka a waʼal baʼax ku taal u kʼiin u yúuchul tiʼ le lugaroʼob santoʼoboʼ bey xan tiʼ u luʼumil Israel.
3 Aʼal tiʼ u luʼumil Israel lelaʼ: ‹Jéeobaeʼ ku yaʼalik: «Teneʼ tsʼoʼok in líikʼil ta contra. Teneʼ nikaʼaj in jóoʼs in espada tu piix+ utiaʼal in xuʼulsik tiʼ utsul máak bey xan tiʼ kʼasaʼan máak.
4 Teneʼ yaan in xuʼulsik tiʼ utsul máak bey xan tiʼ kʼasaʼan máak, le oʼolal yaan in jóoʼsik in espada tu contra tuláakal máak, desde noojol tak xaman.
5 Tuláakal máak ken u yojéelt de ke teen Jéeobaeʼ tsʼoʼok in jíilpaytik in espada, yéetel maʼ kun kaʼa suut tu piix»›.+
6 U paal máak, techeʼ unaj a jajak iikʼ mientras táan a kikilankil. Jach beyoʼ, bey unaj a beetik tu táanoʼoboʼ tumen jach yaj le baʼax ka muʼyajtikoʼ.+
7 Wa ku kʼáatkoʼobtech: ‹¿Baʼaxten ka jajak iikʼ?›, techeʼ unaj a núukiktiʼob: ‹Táan in jajak iikʼ tu yoʼolal junpʼéel baʼal tin wojéeltaj›. Le baʼax tin wojéeltoʼ yaan u taal. Le kéen taalakeʼ u puksiʼikʼal tuláakal máakeʼ yaan u yíibil yéetel saajkil, u kʼab tuláakal máakeʼ yaan u lúubul u muukʼ, tuláakal máakeʼ yaan u lúubul u yóol yéetel yaan u yáalal jaʼ tu píix.*+ Jéeoba, le máax yaan tuláakal autoridad tiʼoʼ, ku yaʼalik: ‹¡Uʼuy a wuʼuye!, le baʼax ta wojéeltoʼ yaan u taal, yaan u béeytal›».
8 Jéeobaeʼ tu kaʼa tʼaneneʼ ka tu yaʼalajten:
9 «U paal máak, profetizart lelaʼ: ‹Jéeobaeʼ ku yaʼalik: «¡Junpʼéel espada! Junpʼéel espada+ jach yaan u yej yéetel ku léetsʼbal.
10 Jóoʼsaʼan u yej utiaʼal u kíimsik yaʼab máakoʼob, yéetel tsʼoʼok u jaʼabal utiaʼal u léembal jeʼex u léembal le rayooʼ»›».
Le kaajoʼ tu yaʼalaj: «¿Maʼ wa túun unaj u kiʼimaktal k-óoliʼ?».
Chéen baʼaleʼ Dioseʼ tu yaʼalaj: «‹Letiʼeʼ,* ¿yaan wa u taasik mix baʼalil u xóolteʼ in hijo+ jeʼex u beetik yéetel jeʼel baʼaxak cheʼileʼ?
11 Le espadaoʼ kʼuʼub utiaʼal u jaʼabal yéetel utiaʼal u tsʼaʼabal tu kʼab wa máax. Tsʼoʼok u jaʼabal yéetel tsʼoʼok u jóoʼsaʼal u yej utiaʼal u kʼuʼubul tu kʼab juntúul máax ku kiimsaj.+
12 U paal máak, awat okʼolnakech,+ tumen le espadaoʼ tsʼoʼok u taal tu contra in kaajal. Le espadaoʼ tiaʼan tu contra tuláakal u nuuktakil Israeleʼ,+ letiʼobeʼ yaan u kíimsaʼaloʼob paʼteʼ yéetel in kaajal. Le oʼolaleʼ laj u muukʼ a wook utiaʼal a weʼesik yaachajaʼan a wóol.
13 Tsʼoʼok u jach ilaʼal baʼax ku beetik in kaajal,+ le oʼolaleʼ, ¿baʼax kun úuchul wa ku taasaʼal mix baʼalil le xóolteʼ tumen le espadaoʼ?, yaan u xuʼulul tiʼ le xóolteʼoʼ›,+ leloʼ bey u yaʼalik Jéeoba, le máax yaan tuláakal autoridad tiʼoʼ.
14 U paal máak, aʼal baʼax ku taal u kʼiin: papaxkʼabnen yéetel aʼal óoxtéen lelaʼ: ‹¡Junpʼéel espada!›. Letiʼe espada ku xuʼulsajoʼ, le espada ku kíimsik yaʼab máakoʼoboʼ, le espada baʼpachtmiloʼoboʼ.+
15 U puksiʼikʼal le máakoʼoboʼ yaan u yíibiloʼob tumen jach saajkoʼob,+ yéetel yaʼab tiʼ letiʼob kun lúubloʼob tu joonajil u kaajaloʼob. Yaan in beetik u xuʼulsaʼal tiʼ yaʼab máakoʼob yéetel espada. ¡Le espadaoʼ ku léembal jeʼex le rayooʼ yéetel jóoʼsaʼan u yej utiaʼal u kíimsik yaʼab máakoʼob!
16 Espada, ¡kíims le máakoʼob yanoʼob ta x-noʼojoʼ bey xan le yanoʼob ta x-tsʼíikoʼ! Espada, ¡xeen le tuʼux kun nuʼuktbil a yejeʼ!
17 Teen xaneʼ yaan in papaxkʼab yéetel yaan in beetik justicia, le kéen tsʼoʼokkeʼ yaan u jéetsʼel in pʼujaʼanil.+ Teen Jéeoba, teen aʼalik».
18 Jéeobaeʼ tu kaʼa tʼaneneʼ ka tu yaʼalajten:
19 «U paal máak, marcart kaʼapʼéel bej utiaʼal u máan u espada u reyil Babilonia. Tu kaʼapʼéelal le bejoʼoboʼ unaj u káajaloʼob tiʼ junpʼéeliliʼ luʼum. Le tuʼux kun xaʼaypajal le bejoʼob utiaʼal u binoʼob tiʼ kaʼapʼéel kaajoʼoboʼ tiʼ unaj a tsʼáaik junpʼéel señaliʼ.
20 Unaj a marcartik junpʼéel bej utiaʼal u máan le espada kun bin tu contra Rabá,+ u kaajal le ammonitaʼoboʼ. Le kéen tsʼoʼokkeʼ ka marcartik uláakʼ junpʼéel bej utiaʼal u bin tu contra Jerusalén,+ le kaaj yaan Judá kaʼanal u pakʼiloʼoboʼ.
21 Tumen u reyil Babiloniaeʼ yaan u jeʼelel teʼ tuʼux ku xaʼaypajal le bejoʼoboʼ. Letiʼeʼ yaan u chiklik u flechaʼob, yaan u kʼáat óolal tiʼ u imagenoʼob,* yéetel yaan u meyajtiʼ u táamnel baʼalcheʼ* utiaʼal u chuchuknaʼatik baʼax unaj u beetik.
22 Le baʼax yaan tu x-noʼoj kʼaboʼ yaan u yeʼesik unaj u bin Jerusalén yéetel unaj u tsʼáaik u nuʼukuliloʼob baʼateʼel tu contra le kaajoʼ. Unaj u bin utiaʼal u yaʼalik ka kíimsaʼak yaʼab máakoʼob, utiaʼal u beetik u yawatil baʼateʼel, utiaʼal u tsʼáaik u nuʼukuliloʼob baʼateʼel tu contra le joonajoʼoboʼ, utiaʼal u beetik junpʼéel rampa utiaʼal u atacartik le kaajoʼ yéetel utiaʼal u kʼalik u paach le kaajoʼ.+
23 Chéen baʼaleʼ le máaxoʼob* tu jurartoʼob baʼaloʼob tiʼ letiʼoboʼ yaan u tuklikoʼob maʼ jaaj le baʼax ken u chuchuknaʼatoʼ.+ Pero tiʼ letiʼeʼ yaan u kʼaʼajaltiʼ le baʼax maʼ maʼalob u beetmoʼoboʼ, le oʼolal yaan u chukikoʼob utiaʼal u bisoʼob táanxel luʼumil.+
24 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik: ‹Teʼexeʼ ta beeteʼex u kʼaʼajsaʼal le baʼax maʼ maʼalob a beetmeʼexoʼ, tumen ta weʼeseʼex yaan baʼax maʼ táan a beetkeʼexiʼ yéetel tumen ta chíikbeseʼex a kʼebaneʼex tiʼ tuláakal baʼax ka beetkeʼex. Beora tsʼoʼok a kʼaʼajsaʼaleʼexaʼ yaan a bisaʼaleʼex kex maʼ a kʼáateʼexiʼ›.
25 U nojchil Israel, techeʼ kʼasaʼanech yéetel jach loobiltaʼanech,+ tiʼ techeʼ tsʼoʼok u kʼuchul u kʼiinil u tsʼaʼabaltech u tsʼook castigo.
26 Jéeoba, le máax yaan tuláakal autoridad tiʼoʼ, ku yaʼalik: ‹Luʼs le nookʼ a bakʼmaj ta pooloʼ bey xan le coronaoʼ.+ Mix baʼal kun pʼáatal jeʼex yanil kaʼacheʼ.+ Tsʼáa kaʼanal le máax yaan kabaloʼ+ yéetel tsʼáa kabal le máax yaan kaʼanaloʼ.+
27 Yaan in xuʼulsik, yaan in xuʼulsik, yaan in xuʼulsik le gobiernooʼ.* Lelaʼ tiʼ mix máak kun pʼáatal, chéen baʼaleʼ le kéen taalak le máax yaan u derechoil u kʼamkoʼ+ yaan in tsʼáaiktiʼ›.+
28 U paal máak, profetizart lelaʼ: ‹Jéeoba, le máax yaan tuláakal autoridad tiʼoʼ, ku tʼaan tu contra le ammonitaʼob yéetel tu yoʼolal le baʼaloʼob kʼaastak ku yaʼalikoʼoboʼ›. Techeʼ unaj a waʼalik: ‹¡Junpʼéel espada! Yaan junpʼéel espada jíilpaytaʼan utiaʼal u kíimsaʼal yaʼab máakoʼob. Le espadaaʼ jóoʼsaʼan u yej yéetel táan u léembal jeʼex u léembal le rayooʼ.
29 Kex yaan baʼaloʼob maʼ jaajtak tsʼoʼok u tsʼaʼabal ilbil ta woʼolaleʼ, techeʼ yaan a tsʼaʼabal tu yóokʼol le kimenoʼoboʼ, tu yóokʼol le kʼasaʼan máakoʼob tsʼoʼok u kʼuchul u kʼiinil u tsʼaʼabal u tsʼook castigo tiʼoboʼ.
30 Sut le espada tu piixoʼ. Teneʼ yaan in juzgarkech teʼ luʼum tuʼux síijechoʼ, teʼ tuʼux a taaloʼ.
31 Teneʼ yaan in láalik in pʼujaʼanil ta wóokʼol, yéetel yaan in wustikech yéetel u kʼáakʼil in pʼujaʼanil. Teneʼ yaan in kʼubkech tu kʼab kʼasaʼan máakoʼob jach u yojloʼob u xuʼulsoʼob máak.+
32 Yaan a pʼáatal bey suʼuk utiaʼal kʼáakʼeʼ,+ a kʼiʼikʼeleʼ yaan u weʼekel teʼ luʼumoʼ yéetel mix bikʼin kan kʼaʼajsbil tu kaʼatéen, tumen teen Jéeoba, teen aʼalik›».
Notas
^ Lelaʼ u kʼáat u yaʼaleʼ yaan u wixkubaʼob tumen saajkoʼob.
^ Teʼelaʼ táan u yúuchul tʼaan tiʼ u espada Jéeoba.
^ Ich hebreoeʼ ku yaʼalaʼal kaʼach «terafimoʼob». Ilawil «Terafim», página 2582.
^ Le u táamnel baʼalcheʼoʼ ku meyaj kaʼach tiʼ le j-meenoʼob utiaʼal u chuchuknaʼatoʼoboʼ.
^ Teʼelaʼ táan u yúuchul tʼaan tiʼ u kajnáaliloʼob Jerusalén.
^ Wa «coronaoʼ».
