Deuteronomio 6:1-25
6 Leloʼobaʼ letiʼe mandamientoʼob, le leyoʼob yéetel le baʼaxoʼob tsʼoʼok u yaʼalik Jéeoba a Dioseʼex utiaʼal u kaʼanskeʼexoʼ, tu tsʼáajteʼex utiaʼal ka a tsʼoʼokbeseʼex le kéen ookkeʼex teʼ luʼum ken a chʼaʼexoʼ.
2 Lelaʼ bey unaj a beetkeʼexoʼ utiaʼal ka a respetarteʼex Jéeoba a Dioseʼex yéetel utiaʼal ka a tsʼoʼokbeseʼex tuláakal u leyoʼob yéetel u mandamientoʼob táan in waʼalikteʼexoʼ. Bey unaj a beetkeʼex tuláakal u kʼiiniloʼob a kuxtaleʼexoʼ, beyoʼ teʼex yéetel a paalaleʼex bey xan a wáabileʼexeʼ+ yaan u páajtal a kuxtaleʼex yaʼab tiempo.+
3 U kaajil Israel, techeʼ unaj a wuʼuyik tʼaan yéetel jach unaj a wilik a beetik tuláakal le baʼaloʼobaʼ. Wa ka beetkeʼ yaan u bintech maʼalobil yéetel yaan a sen yaʼabtaleʼex teʼ luʼum tuʼux ku tuul leche yéetel kaaboʼ, yaan u yúuchul jach jeʼex tsʼoʼok u prometertiktech Jéeoba, u Dios a úuchben láakʼtsiloʼoboʼ.
4 U kaajil Israel, uʼuy a wuʼuy lelaʼ: Jéeoba k-Dioseʼ chéen juntúuliliʼ Jéeoba.+
5 Kʼaʼabéet a yaabiltikeʼex Jéeoba yéetel tuláakal a puksiʼikʼaleʼex, yéetel tuláakal a kuxtaleʼex+ bey xan yéetel tuláakal a muukʼeʼex.*+
6 Le tʼaanoʼob táan in waʼalikteʼex bejlaʼaʼ kʼaʼabéet u yantal ichil a puksiʼikʼaleʼex,
7 kʼaʼabéet a kaʼansik* tiʼ a paalaleʼex+ yéetel a tsikbaltikeʼextiʼob le kéen kulakeʼex ta wotocheʼex, le kéen xíimbalnakeʼex teʼ bejoʼ, le kéen chilakeʼex bey xan le kéen líiʼkeʼex.+
8 Kʼaʼabéet a kʼaxkeʼexoʼob ta kʼabeʼex utiaʼal a kʼaʼajskeʼexoʼob, yéetel kʼaʼabéet a kʼaxkeʼex tu táan a pooleʼex jeʼex u kʼaxik máak junxóotʼ nookʼ tu táan u pooleʼ.*+
9 Tsʼíibteʼex yóokʼol u marcoiloʼob bey xan yóokʼol u joonajiloʼob a wotocheʼex.
10 Tiʼ a úuchben láakʼtsileʼex, Abrahán, Isaak yéetel Jacobeʼ, Jéeoba a Dioseʼexeʼ tu prometertaj u tsʼáaikteʼex le luʼumaʼ.+ Le kéen u tsʼáateʼex le kaajoʼob nuuktak yéetel maʼalobtak maʼ teʼex beetoʼ,+
11 le kéen a chʼaʼex le najoʼob chuupoʼob yéetel u clasesil baʼaloʼob maʼ teʼex meyajtoʼ, le kéen a chʼaʼex le cisternaʼob maʼ teʼex páanoʼ, le kéen a chʼaʼex le uvaʼob yéetel le olivoʼob maʼ teʼex pakʼoʼ, yéetel le kéen jaankeʼex yéetel le kéen naʼajchajkeʼexeʼ,+
12 bik wal a tuʼubseʼex Jéeoba,+ le máax jóoʼseʼex tiʼ u luʼumil Egipto, le luʼum tuʼux esclavizartaʼaneʼex kaʼachoʼ.
13 Kʼaʼabéet a respetarkeʼex Jéeoba a Dioseʼex,+ chéen letiʼ unaj a meyajtikeʼex+ yéetel chéen tu kʼaabaʼ unaj a jurareʼex.+
14 Maʼ unaj a adorarkeʼex uláakʼ diosoʼobiʼ, mix juntúul tiʼ le diosoʼob ku adorartaʼal tumen le kaajoʼob yanoʼob ta baʼpacheʼexoʼ,+
15 tumen Jéeoba a Dioseʼexeʼ juntúul Dios u kʼáat ka adorartaʼak chéen letiʼ.+ Tumen wa maʼ ta beetkeʼex beyoʼ Jéeoba a Dioseʼexeʼ yaan u pʼuʼujul ta contraʼex+ yéetel yaan u xuʼulsikteʼex teʼ yóokʼol kaabaʼ.+
16 Maʼ unaj a tsʼáaikeʼex a pruebail Jéeoba a Dioseʼex+ jeʼex úuchik a beetkeʼex teʼ lugar ku kʼaabaʼtik Masaoʼ.+
17 Unaj a jach tsʼoʼokbeskeʼex u mandamientoʼob, u leyoʼob yéetel le baʼaxoʼob tsʼoʼok u yaʼalikteʼex Jéeoba ka a beeteʼexoʼ.
18 Unaj a beetkeʼex baʼax maʼalob yéetel baʼax uts tu táan Jéeoba. Wa ka beetkeʼexeʼ yaan u binteʼex maʼalobil yéetel yaan a wokol a chʼaʼex le maʼalob luʼum u yaʼalmaj Jéeoba u tsʼáaik tiʼ a úuchben láakʼtsileʼexoʼ.+
19 Jéeobaeʼ yaan u tojolchʼintik ta táaneʼex tuláakal a enemigoʼex jeʼex u yaʼalmaj u beetkoʼ.+
20 Le kéen máanak tiempo yéetel le kéen kʼáataʼakteʼex tumen a paalaleʼex: ‹¿Baʼax u kʼáat u yaʼal le mandamientoʼob, le leyoʼob yéetel le baʼaxoʼob tsʼoʼok u yaʼalik Jéeoba ka k-beetoʼ?›,
21 teʼex túuneʼ yaan a waʼalikeʼextiʼob: ‹Toʼon kaʼacheʼ u esclavoʼon Faraón* tu luʼumil Egipto, pero Jéeobaeʼ tu jóoʼsoʼon tiʼ u luʼumil Egipto yéetel u nojoch poder.
22 Toʼoneʼ t-ilaj bix tu beetil Jéeoba Dios nukuch milagroʼob utiaʼal u kʼaskúuntik u luʼumil Egipto+ yéetel utiaʼal u castigartik Faraón bey xan tuláakal le máaxoʼob yanoʼob tu yotochoʼ.+
23 Dioseʼ tu jóoʼsoʼon teʼeloʼ ka tu taasoʼon wayeʼ utiaʼal u tsʼáaiktoʼon le luʼum u yaʼalmaj u tsʼáaik tiʼ k-úuchben láakʼtsiloʼoboʼ.+
24 Jéeoba túuneʼ tu yaʼalajtoʼon ka k-beet tuláakal le baʼaxoʼob tsʼoʼok u yaʼaliktoʼonoʼ. Jéeobaeʼ tu yaʼalaj xan toʼon ka k-adorart letiʼ utiaʼal ka xiʼiktoʼon maʼalobil mantatsʼ+ yéetel utiaʼal ka yanaktoʼon kuxtal+ jeʼex tak bejlaʼeʼ.
25 Yéetel wa k-jach tsʼoʼokbesik tuláakal le mandamientoʼob tsʼoʼok u tsʼáaiktoʼon Jéeoba k-Diosoʼ,+ letiʼeʼ yaan u yilkoʼon bey máakoʼob ku beetkoʼob baʼax maʼalob tu táaneʼ›.
Notas
^ Wa «tuláakal a poder; tuláakal baʼax yaantech».
^ Wa «a waʼaliktiʼob yaʼab u téenel; a sellartik tu yóokʼoloʼob».
^ Ich hebreoeʼ ku yaʼalaʼal kaʼach «entre tu kaʼapʼéelil a wichoʼob».
^ Ilawil página 2563.
