Deuteronomio 18:1-22
18 Le sacerdoteʼob levitaʼob bey xan tuláakal u tribu Levíeʼ maʼ kun ts’aabil u herenciaʼob ichil u kaajil Israel. Letiʼobeʼ yaan u jaantikoʼob le ofrendaʼob ku tóokaʼaloʼob utiaʼal Jéeobaoʼ, letiʼe u herenciaʼoboʼ.+
2 Bey túunoʼ letiʼobeʼ maʼ unaj u yantal u herenciaʼob ichil u sukuʼunoʼobiʼ. Jéeoba u herenciaʼob, jeʼex tsʼoʼok u yaʼaliktiʼoboʼ.
3 Lelaʼ letiʼe baʼax yaan u derechoil u tsʼaʼabal tiʼ le sacerdoteʼob tumen le kaajoʼ: jeʼel máaxak ka u kʼub junpʼéel sacrificioeʼ sea juntúul toro wa juntúul tamaneʼ, unaj u tsʼáaik tiʼ le sacerdote u muukʼ u kʼab le baʼalcheʼoʼ, u kamaʼach* yéetel u panza.
4 Le u yáax ichoʼob a pakʼal trigooʼ,* le túumben vinooʼ, le aceiteoʼ yéetel le u yáax tsoʼotsel a walakʼ taman ken a kʼosoʼ unaj xan a tsʼáaik tiʼ le sacerdoteoʼ.+
5 Ichil tuláakal a tribuʼobeʼ, Jéeoba a Dioseʼ tsʼoʼok u yéeyik letiʼ yéetel u paalal utiaʼal u meyajoʼob mantatsʼ tu kʼaabaʼ Jéeoba.+
6 Chéen baʼaleʼ wa juntúul levita ku lukʼul tiʼ junpʼéel u kaajil Israel tuʼux kajakbal+ kaʼach yéetel u kʼáat bin kajtal teʼ lugar tuʼux ken u yéey Jéeobaoʼ,*+
7 teʼeloʼ jeʼel u páajtal u meyaj tu kʼaabaʼ Jéeoba u Dios jeʼex u beetik le u maasil levitaʼob táan u meyajoʼob tu táan Jéeobaoʼ.+
8 Letiʼeʼ yaan xan u kʼamik le bukaʼaj janal ku kʼamkoʼob letiʼoboʼ,+ lelaʼ aparte tiʼ le ken u kʼam ikil u konik le baʼaxoʼob yaan kaʼach tiʼ u familiaoʼ.
9 Le kéen ookkech teʼ luʼum táan u tsʼáaiktech Jéeoba a Diosoʼ, maʼ unaj a kanik a beet le baʼaloʼob kʼaastak ku beetik le kaajoʼoboʼ.+
10 Ichileʼexeʼ maʼ unaj u yantal mix máak ka u tóok u hijo wa u hijaiʼ,+ mix máak ka u chuchuknaʼat baʼax ku taal u kʼiin,+ mix máak ka u beet magia,+ mix máak ka u jóoʼs suerte,+ mix juntúul j-meen,+
11 mix máak ka u pulyaʼajt máak, mix juntúul máak ku yaʼalik ku tʼaan yéetel le kimenoʼoboʼ,+ mix máak ka u kaxt u yáantaj juntúul j-meen*+ yéetel mix máak ka u kʼáat u yáantaj le kimenoʼoboʼ.+
12 Tumen Jéeobaeʼ u pʼekmaj jeʼel máaxak ka u beet le baʼaloʼobaʼ, yéetel tu yoʼolal le baʼaxoʼob kʼaastak ku beetik le kaajoʼoboʼ Jéeoba a Dioseʼ yaan u tojolchʼintkoʼob ta táaneʼex.
13 Techeʼ maʼ unaj a beetik mix baʼal kʼaas tu táan Jéeoba a Diosiʼ.+
14 Tumen le naciónoʼob ken a chʼaʼexoʼ suuk kaʼach u yuʼubikoʼob u tʼaan le máaxoʼob ku beetkoʼob magiaoʼ+ bey xan le j-meenoʼoboʼ,+ chéen baʼaleʼ Jéeoba a Dioseʼ maʼ u chaʼa a beetik mix junpʼéel tiʼ le baʼaloʼobaʼ.
15 Jéeoba a Dioseʼ yaan u beetik u yantal juntúul profeta ichil a sukuʼunoʼob, juntúul profeta jeʼex teneʼ. Teʼex túuneʼ unaj a wuʼuyikeʼex u tʼaan.+
16 Lelaʼ yaan u yúuchul tumen letiʼe baʼax ta kʼáateʼex tiʼ Jéeoba a Dios le tiaʼaneʼex Horeboʼ, teʼ kʼiin ka ta muchʼabaʼex+ yéetel ka ta waʼaleʼex: ‹Maʼ a chaʼik k-uʼuyik u voz Jéeoba k-Dios mix k-ilik le nuxiʼ kʼáakʼaʼ, utiaʼal maʼ k-kíimil›.+
17 Jéeoba túuneʼ tu yaʼalajten: ‹Maʼalob le baʼax tsʼoʼok u yaʼalikoʼoboʼ.
18 Yaan in beetik u yantal juntúul profeta ichil u sukuʼunoʼob, juntúul profeta jeʼex techoʼ.+ Teneʼ yaan in tsʼáaik tu chiʼ baʼax ken u yaʼale,+ letiʼ túuneʼ yaan u yaʼaliktiʼob tuláakal le baʼax ken in waʼaltiʼoʼ.+
19 Yaan in kʼáatik cuenta tiʼ le máak maʼ ken u yuʼub le baʼax ken u yaʼal le profeta tin kʼaabaʼoʼ.+
20 Wa juntúul profeta ku taaskuba nojbaʼalil yéetel ku yaʼalik wa baʼax tin kʼaabaʼ kex maʼ teen aʼaltiʼ ka u yaʼal bey xan wa ku tʼaan tu kʼaabaʼ uláakʼ diosoʼobeʼ, le profeta jeʼeloʼ unaj u kíimil.+
21 Chéen baʼaleʼ wa ka waʼalik ichil a puksiʼikʼal: «¿Bix túun ken k-ojéeltil wa maʼ Jéeoba aʼalmil le baʼax ku yaʼalikoʼ?».
22 Wa le baʼax ku yaʼalik le profeta tu kʼaabaʼ Jéeoba maʼ tu béeytal wa maʼ tu yúuchloʼ, u kʼáat u yaʼaleʼ maʼ Jéeoba aʼalmil le baʼax aʼalaʼaboʼ. Le profetaoʼ chéen tʼaanaj tumen tu taasuba nojbaʼalil. Maʼ unaj a chʼaʼik saajkil tiʼiʼ›.
Notas
^ Tuláakʼ tuʼuxeʼ ku yaʼalaʼal «noʼoch».
^ Wa maʼ xaaneʼ cebada.
^ Lelaʼ letiʼe lugar ken u yéey Jéeoba utiaʼal ka xiʼik adorarbiloʼ.
^ Ilawil página 2566.
