Deuteronomio 14:1-29
14 Teʼexeʼ u paalaleʼex Jéeoba Dios. Maʼ unaj a xoʼoxotik a wíinklileʼex+ wa a tsʼikik a cejaʼex* yoʼolal juntúul máax tsʼoʼok u kíimiliʼ.+
2 Tumen teʼexeʼ junpʼéel kaaj santo+ utiaʼal Jéeoba a Dioseʼex, yéetel Jéeoba a Dioseʼex yéeyeʼex utiaʼal ka kʼuchuk a beetabaʼex u kaajal, junpʼéel kaaj especial* ichil tuláakal le kaajoʼob yanoʼob teʼ yóokʼol kaabaʼ.+
3 Maʼ unaj a jaantikeʼex baʼaloʼob maʼ limpio yaniloʼob tu táan Diosiʼ.+
4 Leloʼobaʼ letiʼe baʼalcheʼob jeʼel u páajtal a jaantikeʼexaʼ:+ wakax, taman, chivo,
5 u clasesil kéej,* u chivoil montaña, kʼáaxil taman yéetel u tamanil montaña.
6 Jeʼel u páajtal a jaantikeʼex jeʼel baʼalak baʼalcheʼil xaʼaypajaʼan u maay yéetel ku kaʼa jaachʼeʼ.
7 Chéen baʼaleʼ yaan baʼalcheʼob ku kaʼa jaachʼoʼob wa xaʼaypajaʼan u maayoʼob maʼ unaj a jaantikeʼexiʼ, le baʼalcheʼobaʼ letiʼe jeʼeloʼobaʼ: le camellooʼ, le tʼuʼuloʼ* yéetel le damánoʼ,* tumen kex ku kaʼa jaachʼoʼobeʼ maʼ xaʼaypajaʼan u maayoʼobiʼ. Le baʼalcheʼobaʼ maʼ limpioʼobiʼ.+
8 Bey xan le kʼéekʼenoʼ, tumen kex xaʼaypajaʼan u maayeʼ maʼatech u kaʼa jaachʼ. Le baʼalcheʼaʼ maʼ limpioiʼ. Maʼ unaj a jaantikeʼex u bakʼel le baʼalcheʼobaʼ mix unaj a machkeʼex u kimen wíinkliloʼobiʼ.
9 Tiʼ le baʼalcheʼob kuxaʼanoʼob teʼ jaʼoʼ, leloʼobaʼ letiʼe jeʼel u páajtal a jaantikeʼexaʼ:+ jeʼel baʼalak baʼalcheʼil yaan u xiikʼoʼob yéetel u escamaʼobeʼ.
10 Chéen baʼaleʼ maʼ unaj a jaantikeʼex jeʼel baʼalak baʼalcheʼil minaʼan u xiikʼoʼob yéetel u escamaʼobeʼ. Le baʼalcheʼobaʼ maʼ limpioʼobiʼ.
11 Jeʼel u páajtal a jaantikeʼex jeʼel baʼalak chʼíichʼil limpio tu táan Dioseʼ.
12 Chéen baʼaleʼ leloʼobaʼ maʼ unaj a jaantikeʼexiʼ: le águilaoʼ, le águila ku chuk kayoʼ, le box chʼoomoʼ,+
13 le milano realoʼ, le milano negrooʼ yéetel tuláakal u clasesil milano,
14 tuláakal u clasesil cuervo,*
15 le avestruzoʼ, le xoochʼoʼ, le gaviotaoʼ, tuláakal u clasesil halcón,
16 le chan búhooʼ, le búho chowak u xikinoʼ, le cisneoʼ,
17 le pelícanooʼ, le nojoch chʼoomoʼ,* le cormoránoʼ,*
18 le cigüeñaoʼ, tuláakal u clasesil garzas, le abubillaoʼ yéetel le sootsʼoʼ.
19 Tuláakal u jejeláasil ikʼeloʼob* yaan u xiikʼoʼobeʼ maʼ limpioʼob xaniʼ. Maʼ unaj a jaantikeʼexiʼ.
20 Jeʼel u páajtal a jaantik jeʼel baʼalak baʼalcheʼil ku xikʼnal limpio tu táan Dioseʼ.
21 Maʼ unaj a jaantikeʼex u bakʼel juntúul baʼalcheʼ kimen ka kaxtaʼabi.+ Jeʼel u páajtal a tsʼáaikeʼex tiʼ le j-táanxel luʼumil kajaʼan teʼ ta kaajaleʼexoʼ, letiʼeʼ jeʼel u páajtal u jaantikeʼ, jeʼel xan u páajtal u koʼonol tiʼ juntúul j-táanxel luʼumileʼ. Tumen teʼexeʼ junpʼéel kaaj santo utiaʼal Jéeoba a Dioseʼex.
Maʼ unaj a chakik juntúul chan chivo ichil u leche u maamaiʼ.+
22 Cada añoeʼ kʼaʼabéet xan a tsʼáaik u diez por cientoil* u yich tuláakal le baʼax a pakʼmoʼ.+
23 Yaan a jaantik u diez por cientoil le trigooʼ, le túumben vinooʼ, le aceiteoʼ yéetel le u yáax xiibil tiʼ a walakʼ wakaxeʼex yéetel tiʼ a walakʼ tamaneʼex, yaan a jaantik tu táan Jéeoba a Dioseʼex teʼ lugar ken u yéey utiaʼal u tsʼáaik u kʼaabaʼoʼ.+ Beyoʼ yaan a kanik a respetarteʼex mantatsʼ u kʼaabaʼ Jéeoba a Dioseʼex.+
24 Chéen baʼaleʼ wa Jéeoba a Dios jach ku bendecirkech yéetel maʼ tu páajtal a bisik le diez por ciento tumen jach táaj náach le lugar ken u yéey Jéeoba utiaʼal u tsʼáaik u kʼaabaʼ+ yéetel jach náach le viajeoʼ,
25 le jeʼeloʼ jeʼel u páajtal a sutik taakʼinileʼ, le taakʼin túunoʼ yaan a chʼaʼikeʼ yéetel yaan a viajar tak teʼ lugar ken u yéey Jéeoba a Dios utiaʼal u tsʼáaik u kʼaabaʼoʼ.
26 Jeʼel u páajtal u meyajtech le taakʼin utiaʼal a manik jeʼel baʼaxak a kʼáateʼ: wakaxoʼob, tamanoʼob, chivoʼob, vino yéetel uláakʼ baʼaloʼob ku káalkunaj, jeʼel baʼaxak ka a tsʼíibolteʼ. Teech túun yéetel le máaxoʼob yanoʼob ta wotochoʼ tiʼ kan janaleʼex tu táan Jéeoba a Dioseʼexiʼ yéetel yaan u kiʼimaktal a wóoleʼex.+
27 Maʼ a pʼatik le levita kajaʼan ichil a kaajaleʼexoʼ,+ tumen letiʼeʼ maʼ tsʼaʼab u herencia ichileʼexi’.+
28 Cada tres añoseʼ kʼaʼabéet a jóoʼsik u diez por cientoil u yich a paakʼal yanchaj teʼ año jeʼeloʼ, yéetel unaj a líiʼsik ichil a kaajaleʼex.+
29 Bey túunoʼ le levita maʼ tsʼaʼan u herencia ichileʼexoʼ, le j-táanxel luʼumil kajakbal ichileʼexoʼ, le paal minaʼan u papáoʼ,* le viuda kajaʼan ichil a kaajaleʼexoʼ yaan u taaloʼob yéetel yaan u janaloʼob hasta ken naʼajchajkoʼob.+ Beyoʼ Jéeoba a Dioseʼ yaan u bendecirkech tiʼ tuláakal baʼax ka beetik.+
Notas
^ Wa «a tsʼikik a táanpoolaleʼex».
^ Wa «junpʼéel kaaj jach yaabiltaʼan».
^ Ich hebreoeʼ ku yaʼalaʼal kaʼach «kéej, gacela, corzo, antílope».
^ Ich hebreoeʼ ku yaʼalaʼal kaʼach «liebre». Lelaʼ juntúul baʼalcheʼ chíikaʼan tiʼ le tʼuʼuloʼ, pero maas nojoch.
^ Lelaʼ juntúul chan baʼalcheʼ chíikaʼan tiʼ tʼuʼul.
^ Le chʼíichʼaʼ chíikaʼan tiʼ kʼaʼaw, chéen baʼaleʼ maas nojoch.
^ Ich hebreoeʼ ku yaʼalaʼal kaʼach «buitre».
^ Lelaʼ juntúul chʼíichʼ ku chuk kay yéetel chíikaʼan tiʼ pato.
^ Wa «insectoʼob».
^ Wa «u diezmoil».
^ Wa «kimen u papáoʼ».
