Jeremías 38:1-28
38 Sefatías u paal Matán, Guedalías u paal Pasjur, Jucal+ u paal Selemías yéetel Pasjur+ u paal Malkiyaeʼ tu yuʼuboʼob le baʼax ku yaʼalik Jeremías tiʼ tuláakal le kaajoʼ. Letiʼeʼ táan kaʼach u yaʼalik:
2 «Lelaʼ letiʼe baʼax ku yaʼalik Jéeobaaʼ: ‹Le máax kun pʼáatal way kaajeʼ yaan u kíimsaʼal yéetel espada, yéetel wiʼijil bey xan yéetel kʼaakʼas kʼojaʼanil.+ Pero le máax kun jóokʼol u kʼububa tiʼ le caldeoʼoboʼ maʼ kun kíimsbil, mix ken u perdert u kuxtal, baʼaxeʼ yaan u salvartik u kuxtal›.+
3 Lelaʼ letiʼe baʼax ku yaʼalik Jéeobaaʼ: ‹Le kaajaʼ yaan u kʼuʼubul tiʼ u soldadoʼob u reyil Babilonia, letiʼ túuneʼ yaan u chʼaʼik›».+
4 Le príncipeʼob túunoʼ tu yaʼaloʼob tiʼ rey Sedequías: «Beet uts a waʼalik ka kíimsaʼak le máakaʼ,+ tumen yéetel le baʼaxoʼob ku yaʼalikoʼ táan u lúuʼsik u yóol le soldadoʼob pʼaatloʼob way kaajeʼ bey xan tuláakal u kajnáaliloʼob le kaajaʼ. Le máakaʼ maʼ táan u kaxtik u yutsil le kaajaʼ, baʼaxeʼ u kʼáat ka xiʼik kʼaasil tiʼ».
5 Rey Sedequías túuneʼ tu yaʼalajtiʼob: «¡Ilawileʼex! Tiaʼan ta kʼabeʼexeʼ. Teneʼ maʼ tu páajtal in jeʼelsikeʼex, beeteʼex jeʼel baʼaxak a kʼáateʼexeʼ».
6 Letiʼob túuneʼ tu machoʼob Jeremíaseʼ ka tu jalkʼesoʼob tiʼ junpʼéel chʼeʼen yaan teʼ lugar ku kʼaabaʼtik Táankab tuʼux ku kanáantaʼal máakoʼ,+ le chʼeʼenoʼ u tiaʼal Malkiya u paal le reyoʼ. Tiʼ letiʼobeʼ meyajnaj suumoʼob utiaʼal u jalkʼeskoʼob Jeremías. Chéen baʼaleʼ le chʼeʼenoʼ minaʼan u jaʼil, chéen u luukʼil. Le oʼolal Jeremíaseʼ joʼopʼ u tsʼóopol ichil.
7 Ébed-mélek,+ juntúul etíope tsʼaʼantiʼ autoridad* tu palacio le reyoʼ, tu yojéeltaj oksaʼab Jeremías tiʼ junpʼéel chʼeʼen. Teʼ súutuk jeʼeloʼ le reyoʼ tiʼ kulukbal kaʼach naatsʼ tiʼ le joonaj ku kʼaabaʼtik u Joonajil Benjamínoʼ.+
8 Ébed-mélek túuneʼ jóokʼ teʼ palaciooʼ ka bin u yaʼal tiʼ le reyoʼ:
9 «¡Yuum rey, jach maʼ maʼalob le baʼax beetaʼab tiʼ profeta Jeremías tumen le máakoʼobaʼ! Letiʼobeʼ tsʼoʼok u jalkʼeskoʼob ichil le chʼeʼenoʼ, tiʼ kun kíimil yéetel wiʼijiʼ, tumen tsʼoʼok u pʼáatal minaʼan baʼal jaantbil teʼ kaajaʼ».+
10 Le rey túunoʼ tu yaʼalaj tiʼ Ébed-mélek le etíopeoʼ: «Chʼaʼ 30 u túulal máakoʼob wayeʼ ka xiʼikech a jóoʼs profeta Jeremías teʼ chʼeʼen antes u kíimiloʼ».
11 Ébed-mélek túuneʼ tu chʼaʼaj le máakoʼob aʼalaʼabtiʼoʼ ka ookoʼob tu palacio le reyoʼ, ookoʼob tiʼ junpʼéel lugar yaan yáanal le tesoreríaoʼ.+ Teʼeloʼ tu chʼaʼajoʼob jujunpʼéel x-lalaʼ nookʼoʼob bey xan u xóoxotʼal x-lalaʼ telaʼob. Tsʼoʼoleʼ Ébed-mélekeʼ tu chʼaʼaj suumoʼobeʼ ka tu jalkʼesaj tiʼ Jeremías le baʼaloʼobaʼ.
12 Ka tsʼoʼokeʼ Ébed-mélek le etíopeoʼ tu yaʼalaj tiʼ Jeremías: «Tsʼáa le nookʼoʼob yéetel u xóoxotʼal tela yáanal a xiikʼoʼoboʼ utiaʼal maʼ u beetiktech loob le suumoʼoboʼ». Jeremías túuneʼ tu beetaj le baʼax aʼalaʼabtiʼoʼ.
13 Letiʼob túuneʼ tu páaytoʼob Jeremíaseʼ ka tu jóoʼsoʼob tiʼ le chʼeʼenoʼ. Ka tsʼoʼokeʼ Jeremíaseʼ pʼáat teʼ Táankab tuʼux ku kanáantaʼal máakoʼ.+
14 Rey Sedequíaseʼ tu túuxtaj chʼaʼabil profeta Jeremías utiaʼal ka taasaʼak tu yiknal, letiʼeʼ tiaʼan kaʼach teʼ tu yóoxpʼéel joonaj yaan tu yotoch Jéeobaoʼ. Ka tsʼoʼokeʼ le reyoʼ tu yaʼalaj tiʼ Jeremías: «Yaan junpʼéel baʼax taak in kʼáatiktech, chéen baʼaleʼ maʼ a taʼakikten mix baʼal».
15 Jeremías túuneʼ tu yaʼalaj tiʼ Sedequías: «Wa kin waʼaliktech u jaajileʼ, yaan a kíimsken. Wa kin waʼaliktech baʼax unaj a beetkeʼ, maʼ ken a wuʼuyen».
16 Le oʼolal rey Sedequíaseʼ tu x-mukul aʼalaj tiʼ Jeremías: «Kin jurartik tu kʼaabaʼ Jéeoba, le Dios kuxaʼan yéetel u tsʼaamaj k-kuxtaloʼ, de ke teneʼ maʼ ken in kíimsech, mix ken in kʼubech tiʼ le máaxoʼob taak u luʼskoʼob a kuxtaloʼ».
17 Ka tsʼoʼokeʼ Jeremíaseʼ tu yaʼalaj tiʼ Sedequías: «Jéeoba u Dios Israel, le Dios gobernartik le ángeloʼoboʼ, ku yaʼalik: ‹Wa ka jóokʼol a kʼubaba tiʼ le príncipeʼob taaljaʼanoʼob yéetel u reyil Babiloniaoʼ, yaan u perdonartaʼal a kuxtal, le kaaj xanaʼ maʼ kun tóokbil, teech yéetel a wotocheʼ yaan a perdonartaʼal.+
18 Pero wa maʼ ta jóokʼol a kʼubaba tiʼ le príncipeʼob taaljaʼanoʼob yéetel u reyil Babiloniaoʼ, le kaajaʼ yaan u kʼuʼubul tiʼ le caldeoʼoboʼ, letiʼob túuneʼ yaan u tóokikoʼob,+ yéetel techeʼ maʼ kan púutsʼul tiʼ letiʼob›».+
19 Ka tsʼoʼokeʼ rey Sedequíaseʼ tu yaʼalaj tiʼ Jeremías: «Teneʼ saajken tiʼ le judíoʼob u tsʼaamubaʼob tu tséel le caldeoʼoboʼ, tumen wa ka kʼuʼubken tu kʼaboʼobeʼ maʼ xaaneʼ letiʼobeʼ jach jeʼel u beetik u kʼasaʼaniloʼob teneʼ».
20 Chéen baʼaleʼ Jeremíaseʼ tu yaʼalajtiʼ: «Maʼ kan kʼubbil tu kʼaboʼob. Beet uts a tsʼoʼokbesik le baʼax tu yaʼalajten Jéeoba ka in waʼaltechoʼ, beyoʼ yaan u bintech utsil yéetel yaan u seguer a kuxtal.
21 Pero wa maʼ ta jóokʼol a kʼubabaeʼ lelaʼ letiʼe baʼax tsʼoʼok u yeʼesikten Jéeoba kun úuchlaʼ:
22 tin wileʼ tuláakal le koʼoleloʼob pʼaatloʼob tu yotoch* u reyil Judáoʼ táan u jóoʼsaʼaloʼob tu táan le príncipeʼob taaljaʼanoʼob yéetel u reyil Babiloniaoʼ,+ letiʼob túuneʼ ku yaʼalikoʼob:
‹Le máaxoʼob ta kʼubaj a wóol tiʼoboʼ tu tusechoʼob yéetel lúubech tu kʼaboʼob.+
Letiʼobeʼ tu beetoʼob u tsʼóopol a wookoʼob ich luukʼ,le ka tsʼoʼokeʼ ka tu sutaj u paachoʼob tiʼ teech›.
23 Tin wileʼ tuláakal a watanoʼob yéetel a paalaleʼ táan u kʼuʼubloʼob tiʼ le caldeoʼoboʼ, teech xaneʼ junpuliʼ maʼ kan púutsʼul, baʼaxeʼ yaan a chuʼukul tumen u reyil Babilonia.+ Ta woʼolaleʼ yaan u tóokaʼal le kaajaʼ».+
24 Sedequías túuneʼ tu yaʼalaj tiʼ Jeremías: «Ilawil maʼ u yojéeltaʼal tumen mix máak le baʼax tsʼoʼok a waʼaliktenaʼ, tumen wa maʼeʼ jeʼel a kíimsaʼaleʼ.
25 Wa ku yojéeltik le príncipeʼob tʼaanajen ta wéetel yéetel ku taal u yaʼaloʼobtech: ‹Beet uts a waʼaliktoʼon le baʼax ta waʼalaj tiʼ le reyoʼ. Wa ka waʼaliktoʼoneʼ maʼ ken k-kíimsech.+ ¿Baʼax tu yaʼalajtech le reyoʼ?›,
26 techeʼ unaj a núukiktiʼob: ‹Táan kaʼach in kʼáat óoltik tiʼ le rey maʼ u kaʼa túuxtiken tu yotoch Jeonatánoʼ, tumen wa maʼeʼ tiʼ kin kíimiliʼ›».+
27 Junpʼéel kʼiin túuneʼ tuláakal le príncipeʼoboʼ binoʼob tu yiknal Jeremíaseʼ ka joʼopʼ u kʼáatkoʼob u chiʼ. Letiʼ túuneʼ tu yaʼalajtiʼob tuláakal le baʼax aʼalaʼabtiʼ tumen le reyoʼ. Ka tsʼoʼokeʼ mix baʼal maas tu yaʼaloʼob tiʼ Jeremías tumen mix juntúul tiʼ letiʼob uʼuy le tsikbaloʼ.
28 Jeremíaseʼ pʼáat teʼ Táankab tuʼux ku kanáantaʼal máak+ tak le kʼiin ka lúub Jerusalénoʼ. Le ka chʼaʼab Jerusaléneʼ láayliʼ tiaʼan kaʼach teʼ lugar jeʼeloʼ.+
