Jeremías 22:1-30
22 Jéeobaeʼ tu yaʼalajten: «Xeen tu yotoch* u reyil Judáeʼ ka a tsʼáa ojéeltbil le baʼax ken in waʼaltechaʼ.
2 Le kéen kʼuchkecheʼ unaj a waʼalik: ‹U reyil Judá, teech kulukbalech tu trono Davideʼ uʼuy baʼax ku yaʼalik Jéeoba, bey xan unaj u beetik le máaxoʼob meyajtikechoʼ bey xan a kaajal, le máaxoʼob ku yookloʼob teʼ joonajoʼobaʼ.
3 Lelaʼ letiʼe baʼax ku yaʼalik Jéeobaaʼ: «Beeteʼex baʼax maʼalob bey xan baʼax toj. Maʼ a pʼatkeʼex juntúul máak tu kʼab juntúul j-ookol. Maʼ a beetkeʼex a kʼasaʼanileʼex tiʼ juntúul j-táanxel luʼumil. Maʼ a beetkeʼex loob tiʼ juntúul paal minaʼan u papá mix tiʼ juntúul koʼolel kimen u yíicham.+ Yéetel teʼ lugaraʼ junpuliʼ maʼ unaj a kíimskeʼex le máaxoʼob mix baʼal kʼaas u beetmoʼoboʼ.+
4 Tumen wa ka beetkeʼex le baʼax tsʼoʼok in waʼalikoʼ, le reyoʼob ku kutaloʼob tu trono Davidoʼ+ yaan u yookloʼob tu joonajiloʼob le najaʼ, yaan u yookloʼob yóoʼ kiʼichkelem carretaʼob yéetel yóoʼ tsíiminoʼob, bey xan ken u beetil le máaxoʼob meyajtikoʼoboʼ bey xan u kaajaloʼob»›.+
5 Jéeobaeʼ ku yaʼalik: ‹Teneʼ jach tu jaajil kin jurartik, wa maʼ ta beetkeʼex le baʼax tsʼoʼok in waʼalikoʼ le najaʼ yaan u pʼáatal chéen jutul pakʼoʼob›.+
6 Lelaʼ letiʼe baʼax ku yaʼalik Jéeoba yoʼolal le naj tuʼux yaan u reyil Judáoʼ:
‹Tin táaneʼ, techeʼ beyech u kʼáaxil Galaadeʼ,beyech jeʼex le kʼáax yaan tu kaʼanlil le Líbanooʼ.
Chéen baʼaleʼ yaan in beetik a pʼáatal bey junpʼéel desiertoeʼ.
Le kaajoʼob yaan ta luʼumiloʼ yaan u pʼáatal minaʼan u kajnáaliloʼob.+
7 Teneʼ jach tu jaajil yaan in yéeyik* máakoʼob utiaʼal xuʼulsiktech,cada juntúuleʼ u chʼaʼamaj u espada bey xan u báat.+
Letiʼobeʼ yaan u chʼakikoʼob le cedroʼob maas jatsʼutstak yaantechoʼ,yéetel yaan u pulkoʼob ich kʼáakʼ.+
8 Yaʼab máakoʼob ku taaloʼob táanxel luʼumileʼ yaan u máanoʼob naatsʼ tiʼ le kaajaʼ, le kéen u yiloʼob bix pʼáatikeʼ yaan u yaʼalikoʼob tu baatsiloʼob: «¿Baʼaxten bey tu beetilak Jéeoba tiʼ le nojoch kaajaʼ?».+
9 Letiʼobeʼ yaan u yaʼalikoʼob: «Tumen maʼ tu tsʼoʼokbesoʼob le pacto u beetmaj Jéeoba u Diosoʼob tu yéeteloʼoboʼ, tsʼoʼoleʼ chinlajoʼob tu táan yaanal diosoʼob yéetel tu adorartoʼob»›.+
10 Maʼ a woʼtikeʼex le máax tsʼoʼok u kíimiloʼ,maʼ u yaatal a wóoleʼex tu yoʼolal,baʼaxeʼ sen oʼteʼex le máax táan u bisaʼal táanxel luʼumiloʼ,tumen mix bikʼin kun kaʼa suut u yil le luʼum tuʼux síijoʼ.
11 Tu yoʼolal Salum*+ u paal Josías,+ le máax táan u reinar kaʼach tu lugar u papá tu luʼumil Judá yéetel tsʼoʼok u bisaʼal táanxel luʼumiloʼ, Jéeobaeʼ ku yaʼalik: ‹Maʼ bíin kaʼa suunakiʼ.
12 Letiʼeʼ yaan u kíimil teʼ tuʼux bisaʼaboʼ, maʼ bíin kaʼa suunak way luʼumeʼ›.+
13 Yaj bix kun tsʼoʼokol le máax ku beetik baʼax maʼ maʼalob utiaʼal u líiʼsik u yotochyéetel utiaʼal u beetik le cuartoʼob yaan tu kaʼanliloʼ.
Tumen letiʼeʼ chéen ku beetik u kíimskuba meyaj u yéet máakil,ku tsʼoʼokoleʼ maʼ tu yóotik u boʼote.+
14 Letiʼeʼ ku yaʼalik: ‹Yaan in beetik junpʼéel nojoch naj utiaʼal in kajtal,yéetel yaan in beetik nukuch cuartoʼob tu kaʼanlil.
Yaan in beetik u ventanailoʼob,yaan in jatsʼutskíintik yéetel u tablasil cedro, tsʼoʼoleʼ yaan in bonik color chak›.
15 ¿Ka tuklik wa yaan u seguer a reinar chéen tumen maas yaʼab u meyajtech cedro ke uláakʼ máakoʼob?
A taata xaneʼ jaani yéetel ukʼulnaji,pero tu beetaj baʼax maʼalob bey xan baʼax toj,+le oʼolal bin utsil tiʼ.
16 Letiʼeʼ tu beetaj justicia tiʼ le óotsiloʼoboʼ bey xan tiʼ le máaxoʼob ku pechʼ óoltaʼaloʼoboʼ,le oʼolal maʼalob jóokʼik tuláakal baʼax tu beetaj.
Jéeobaeʼ ku yaʼalik: ‹Letiʼeʼ tu beetaj beyoʼ tumen u kʼaj óolen.
17 Pero a wichoʼob yéetel a puksiʼikʼal techeʼ chéen táan u yilik u beetkoʼob baʼax maʼ maʼalob utiaʼal a náajaliʼ.
Táan u kaxtikoʼob bix jeʼel u kíimskoʼob le máax mix baʼal kʼaas u beetmoʼ,bey xan bix jeʼel u tuskoʼob yéetel u yoklikoʼob máakeʼ›.
18 Le oʼolaleʼ Jéeobaeʼ ku yaʼalik tu yoʼolal Jeoyakim+ u paal Josías, u reyil Judá:
‹Kéen kíimik juntúul maakeʼ suuk u yoʼtaʼal yéetel u yaʼalaʼal:
«¡Óotsil in sukuʼun! ¡Óotsil in kiik!».
Pero tu yoʼolal Jeoyakimeʼ mix máak kun okʼol yéetel mix máak kun aʼalik:
«¡Óotsil in yuumtsil! ¡Óotsil in tsʼuulil!».
19 Le kéen kíimkeʼ yaan u beetaʼaltiʼ jeʼex u beetaʼal tiʼ juntúul kimen burroeʼ,+yaan u jíiltaʼal utiaʼal u bisaʼal pulbil,náach tiʼ u joonajiloʼob Jerusalén›.+
20 Naʼakakech teʼ Líbanooʼ ka awatnakech,kʼaʼam awatnakech teʼ kaʼanal lugaroʼob yaan Basánoʼ,kʼaʼam awatnakech desde Abarim,+tumen tsʼoʼok u xuʼulsaʼal tuláakal le máaxoʼob yanchaj baʼal a wil tu yéeteloʼoboʼ.*+
21 Teneʼ tin tsolajtech u nuʼuk teʼ kʼiinoʼob ka tuklik kaʼach maʼalob yanilechoʼ.
Pero techeʼ ta waʼalaj: ‹Maʼ ken in beet baʼax ka waʼalik›.+
Leloʼ bey tsʼoʼok a beetik desde ta x-lóoʼbayaniloʼ,maʼ a wóot a beet baʼax kin waʼaliktechiʼ.+
22 Le j-kanan tamanoʼob yaan ta wiknaloʼ yaan u bisaʼaloʼob tumen junpʼéel kʼaʼamkach iikʼ.+
Le máaxoʼob yanchaj baʼax a wil tu yéeteloʼoboʼ yaan u bisaʼaloʼob táanxel luʼumil.
Bey túunoʼ yaan u paʼajal a suʼtal yéetel yaan a mixbaʼalkúuntaʼal yoʼolal le baʼaloʼob kʼaastak kun taal ta wóokʼoloʼ.
23 Teech le kajaʼanech teʼ Líbanooʼ,+teech le a beetmaj a kʼuʼ teʼ cedroʼoboʼ,+¡bukaʼaj wal kan muʼyaj le kéen káajak a dolorjeʼex le dolor ku muʼyajtik juntúul koʼolel táan u síijil u chaambaloʼ!».*+
24 «Jéeobaeʼ ku yaʼalik tiʼ Conías*+ u paal Jeoyakim,+ u reyil Judá: ‹Jeʼex jach tu jaajil kuxaʼaneneʼ kin waʼaliktech: kex wa beyech le u anilloil in sellar yaan tin x-noʼoj kʼaboʼ, ¡teneʼ yaan in jóotsʼpaytikech!
25 Teneʼ jach tu jaajil yaan in kʼubkech tu kʼab le máaxoʼob taak u kíimskechoʼoboʼ, tu kʼab le máaxoʼob a chʼaʼamaj saajkil tiʼoboʼ, tu kʼab Nabucodonosor u reyil Babilonia yéetel tu kʼab le caldeoʼoboʼ.+
26 Teneʼ jach tu jaajil yaan in píikchʼintkech táanxel luʼumil paʼteʼ yéetel a maama, tiʼ junpʼéel luʼum tuʼux maʼ síijechiʼ, teʼeloʼ tiʼ kan kíimleʼexiʼ.
27 Letiʼobeʼ mix bikʼin kun suutoʼob teʼ luʼum tuʼux ku yaayamtik u suutoʼoboʼ.+
28 Coníaseʼ ¿chéen wa bey junpʼéel nuʼukul de kʼat kʼaschajaʼan, minaʼan u biilalyéetel mix máak u kʼáateʼ?
¿Baʼaxten ku píikchʼintaʼal letiʼ yéetel u paalaltiʼ junpʼéel luʼum maʼ u kʼaj óoloʼobiʼ?›.+
29 U kajnáalileʼex luʼum,* chʼenxikinteʼex baʼax ku yaʼalik Jéeoba.
30 Lelaʼ letiʼe baʼax ku yaʼalik Jéeobaaʼ:
‹Tsʼíibteʼex u kʼaabaʼ le máakaʼ, tsʼíibteʼex bey minaʼan u paalaleʼ,bey juntúul máak maʼ kun bin utsil tiʼ ichil tuláakal u kʼiiniloʼob u kuxtaleʼ,tumen mix juntúul tiʼ u paalal kun bin utsil tiʼ,mix juntúul kun kutal tu trono David utiaʼal u kaʼa gobernartik u luʼumil Judáiʼ›».+
Notas
^ Wa «tu palacio».
^ Ich hebreoeʼ ku yaʼalaʼal kaʼach «in santificartik».
^ Uláakʼ bix kʼaj óolaʼanileʼ Jeoacaz.
^ Wa «a amanteʼoboʼ».
^ Tuláakʼ tuʼuxeʼ ku yaʼalaʼal «chaanpal».
^ Uláakʼ bix kʼaj óolaʼanileʼ Joaquín yéetel Jeconías.
^ Ich hebreoeʼ ku yaʼalaʼal kaʼach «Luʼum, luʼum, luʼum».
