Jeremías 20:1-18
20 Le táan u yaʼalik Jeremías baʼax ku taal u kʼiinoʼ, táan u yuʼubaʼal kaʼach tumen Pasjur u hijo Imer, le sacerdote tsʼaʼan u beet u nojchil tu yotoch Jéeobaoʼ.
2 Teʼ súutuk jeʼeloʼ Pasjureʼ tu loxaj* profeta Jeremías yéetel tu tsʼáaj tiʼ le cepo*+ yaan naatsʼ tiʼ u yotoch Jéeobaoʼ, le yaan naatsʼ tiʼ u Joonajil Benjamínoʼ.*
3 Ka tsʼoʼok le kʼiin jeʼeloʼ Pasjureʼ tu luʼsaj Jeremías tiʼ le cepooʼ. Jeremías túuneʼ tu yaʼalajtiʼ:
«Jéeobaeʼ ku yaʼalikeʼ, desde bejlaʼeʼ Magormissabib*+ a kʼaabaʼ, maʼ Pasjuriʼ.
4 Jéeobaeʼ ku yaʼalik: ‹Yaan in beetik a sen sajaktal teech bey xan le máaxoʼob ku biskubaʼob ta wéeteloʼ. Letiʼobeʼ tu táan a wich kun kíimsbiloʼob yéetel espada tumen u enemigoʼob.+ Teneʼ yaan in kʼubik tuláakal u kajnáaliloʼob Judá tu kʼab u reyil Babilonia. Letiʼ túuneʼ yaan ken u kíims yéetel espadaiʼ yéetel yaan ken u bis Babiloniaiʼ.+
5 Tuláakal u ayikʼalil le kaajaʼ, tuláakal le baʼax yaantiʼ, tuláakal le koʼokoj baʼaloʼob yaantiʼoʼ bey xan le ayikʼalil yaan tiʼ u reyiloʼob Judáoʼ yaan in láaj kʼubkoʼob tu kʼab u enemigoʼob.+ Letiʼobeʼ yaan u tokikoʼob yéetel yaan u chʼaʼikoʼob le baʼaloʼob yaantiʼoboʼ, le kéen tsʼoʼokkeʼ yaan u biskoʼob Babilonia.+
6 Chéen baʼaleʼ Pasjur, teech yéetel le máaxoʼob kajaʼanoʼob ta wotochoʼ yaan a bisaʼaleʼex táanxel luʼumil. Techeʼ yaan a bisaʼal Babilonia, tiʼ kan kíimiliʼ yéetel tiʼ kan mukbil paʼteʼ yéetel a amigoʼobiʼ, tumen chéen ta tusoʼob le ka ta waʼalajtiʼob baʼax ku taal u kʼiinoʼ›».+
7 Jéeoba Dios, techeʼ ta beetaj in kʼexik le bix in tuukul kaʼachoʼ.
Techeʼ maas yaan a muukʼ, le oʼolal maʼ páajchajen ta wéeteliʼ.+
Bul kʼiin táan in cheʼejtaʼal,tuláakal máak aʼalikten baʼal.+
8 Mantatsʼ táan in tʼaan tiʼ loob yéetel tiʼ xuʼulsajil,mantatsʼ le kin wawtik yéetel le kin kʼaʼam aʼalik.
Tumen kin tsʼáaik ojéeltbil baʼax ku yaʼalik Jéeobaeʼ bul kʼiin táan in poʼochʼol yéetel táan u yaʼalaʼalten baʼal.+
9 Le oʼolal tin waʼalaj: «Yaan u xuʼulul in tʼaan tiʼ letiʼ,yéetel mix bikʼin kin kaʼa suut tʼaan tu kʼaabaʼ».+
Pero u tʼaaneʼ pʼáat bey junpʼéel kʼáakʼ ku tóochʼbal ichil in puksiʼikʼal yéetel tu tsʼuʼ in baakeloʼobeʼ,le oʼolal maʼ páajchaj in makik in chiʼiʼ,maʼ páajchaj u seguer in aguantartik maʼ in tʼaaniʼ.+
10 Teneʼ tin wuʼuyaj baʼaxoʼob ku yaʼalaʼal tin contra.
Tin wilaj sajbeʼentsil tuláakal tuʼux.+
«¡Takeʼex u pool! ¡Koʼoneʼex takik u pool!».
Tuláakal le máaxoʼob ku yeʼeskoʼob bey ku biskubaʼob tin wéeteloʼ chéen táan kaʼach u páaʼtkoʼob in beetik junpʼéel baʼax maʼ maʼalobiʼ, letiʼobeʼ ku yaʼalikoʼob:+
«Maʼ xaan ka saʼatak u yóol ka u beet junpʼéel baʼax maʼ tu beeliʼ,beyoʼ yaan u lúubul t-kʼab yéetel yaan k-sutik u jeel tiʼ le baʼax u beetmaj toʼonoʼ».
11 Pero Jéeobaeʼ tiaʼan kaʼach tin wéeteleʼ, letiʼeʼ bey juntúul máax jach yaan u muukʼeʼ.+
Le oʼolal yaan u tʼóochpajal le máaxoʼob chʼaʼpachtikenoʼ, maʼ kun páajtaloʼob tin wéetel.+
Letiʼobeʼ yaan u paʼajal u suʼtaloʼob yéetel maʼ kun béeytal le baʼax taak u beetkoʼoboʼ.
Mix bikʼin kun tuʼubsbil bix úuchik u pʼáatloʼob ich suʼtsilil.+
12 Jéeoba,* techeʼ ka jach ilik bix u kuxtal le utsul máakoʼ.
Techeʼ ka jach ilik baʼax yaan ichil u puksiʼikʼal máak bey xan baʼax yaan tu tuukul.*+
Chaʼa in wilik bix a sutik u jeel tiʼob le baʼax ku beetkoʼoboʼ,+tumen teneʼ tsʼoʼok in pʼatik ta kʼab utiaʼal ka a beetten justicia.+
13 ¡Kʼaayneneʼex tiʼ Jéeoba! ¡Alabarteʼex Jéeoba!
Tumen letiʼeʼ maʼatech u pʼatik le óotsiloʼob tu kʼab le kʼasaʼan máakoʼoboʼ.
14 ¡Maldecirtaʼak le kʼiin ka síijenoʼ!
¡Maʼ u bendecirtaʼal le kʼiin ka taasaʼaben yóokʼol kaab tumen in maamaoʼ!+
15 Maldecirtaʼak le máax tu beetaj u sen kiʼimaktal u yóol in taata,le máax bin u yaʼaltiʼ:
«¡Tsʼoʼok u yantal a paal, juntúul chan xiʼipal!».
16 Pʼáatak le máak jeʼex le kaajoʼob maʼ chʼaʼabtiʼob óotsilil le ka xuʼulsaʼabtiʼob tumen Jéeobaoʼ.
Ka u yuʼub u yawat okʼol máakoʼob de temprano, yéetel de chúumuk kʼiineʼ ka u yuʼub u yawatil baʼateʼel.
17 ¿Baʼaxten maʼ kíimen tu nakʼ in maamautiaʼal ka pʼáatak bey in muknaleʼ?
Bukaʼaj maʼalobil kaʼach wa ka pʼáatak maʼ u síijil u chaambaleʼ.+
18 ¿Baʼax biilal jóokʼen tu nakʼ in maamawa chéen utiaʼal in muʼyaj, utiaʼal u yaatal in wóolyéetel utiaʼal in máansik u kʼiiniloʼob in kuxtal ich suʼtsilil?+
Notas
^ Maʼ xaaneʼ Pasjureʼ tu yaʼalaj ka loʼoxok Jeremías tumen wa máax.
^ Lelaʼ junpʼéel nuʼukul tuʼux ku kʼaʼalal kaʼach u kʼaboʼob, u yookoʼob yéetel u kaal máak utiaʼal u castigartaʼal.
^ Ich hebreoeʼ ku yaʼalaʼal kaʼach «u Kaʼanal Joonajil Benjamín».
^ U kʼáat u yaʼal «Yaan Saajkilil tu Baʼpach».
^ Wa «Jéeoba, le máax gobernartik le ángeloʼoboʼ».
^ Wa «jach bix u yuʼubikuba». Ich hebreoeʼ ku yaʼalaʼal kaʼach «tu riñónoʼob».
