Jeremías 16:1-21
16 Jéeobaeʼ tu kaʼa tʼaneneʼ ka tu yaʼalajten:
2 «Maʼ unaj u tsʼoʼokol a beeliʼ mix unaj u yantal a paalal wayeʼ.
3 Tumen Jéeobaeʼ ku yaʼalik yoʼolal le paalaloʼob ku síijloʼob wayeʼ, bey xan tu yoʼolal u maamaʼob yéetel tu yoʼolal u papáʼob:
4 ‹Letiʼobeʼ kʼaakʼas kʼojaʼaniloʼob kun kíimskoʼob,+ mix máak kun oʼtikoʼob mix kun mukikoʼob. Yaan u pʼáatloʼob jaytal jeʼex u jaytal u taʼ baʼalcheʼ teʼ luʼumoʼ.+ Yaan u kíimsaʼaloʼob yéetel espada, yaan u kíimloʼob yéetel wiʼij,+ le kéen tsʼoʼokkeʼ yaan u jaantaʼal u wíinkliloʼob tumen chʼíichʼoʼob yéetel tumen baʼalcheʼob›.
5 Lelaʼ letiʼe baʼax ku yaʼalik Jéeobaaʼ:
‹Maʼ a wokol teʼ naj tuʼux ku tsʼaʼabal janal tiʼ le máaxoʼob yaachajaʼan u yóoloʼoboʼ,maʼ a wokʼol mix a líiʼsik u yóoloʼob.+
Tumen teneʼ tsʼoʼok in luʼsik le jeetsʼelil in tsʼaamaj tiʼ le kaajaʼ,tsʼoʼok in luʼsik in nojoch yaabilaj tiʼ, yéetel tsʼoʼok u xuʼulul in chʼaʼik óotsilil tiʼ›,+ leloʼ bey u yaʼalik Jéeoba.
6 ‹Desde u nojchil tak u chichnileʼ yaan u kíimil teʼ luʼumaʼ,mix juntúul kun mukbiliʼ,mix máak kun oʼtikoʼob,mix máak ken u xoʼoxotuba mix ken u kʼoliskúuntuba tu yoʼolaloʼob.*
7 Mix máak kun tsʼáaik janal utiaʼal u líiʼsaʼal u yóolle máaxoʼob yaachajaʼan u yóoloʼob yoʼolal le máax kimen tiʼoboʼ,mix kun tsʼaabiltiʼob junpʼéel copa vino utiaʼal u líiʼsaʼal u yóoloʼobúuchik u kíimil u papáʼob wa u maamaʼob.
8 Maʼ unaj xan a wokol tiʼ junpʼéel naj tuʼux táan junpʼéel kʼiinbesajutiaʼal a kutal tu yéeteloʼob a jaant yéetel a wukʼ le baʼax ku tsʼaʼabaloʼ›.
9 Tumen Jéeoba u Dios Israel, le máax gobernartik le ángeloʼoboʼ, ku yaʼalik: ‹Wayeʼ yaan in beetik u xuʼulul u yuʼubaʼal u juum u cheʼej máakoʼob, u juum máakoʼob sen kiʼimak u yóoloʼob, u juum u tʼaan noviotsil bey xan u tʼaan noviatsil. Lelaʼ yaan in beetik tu kʼiinil kuxaʼaneʼex, yaan in beetik tu táan a wicheʼex›.+
10 Le kéen a waʼal tiʼ le kaaj tuláakal le baʼax tsʼoʼok in waʼaliktechaʼ, letiʼobeʼ yaan u kʼáatkoʼobtech: ‹¿Baʼaxten ku yaʼalik Jéeoba yaan u taal t-óokʼol tuláakal le nojoch loobilaʼ? ¿Baʼax maʼ maʼalob yéetel baʼax kʼebanil tsʼoʼok k-beetik tu táan Jéeoba k-Dios?›.+
11 Teech túuneʼ unaj a waʼaliktiʼob: ‹Lelaʼ letiʼe baʼax ku yaʼalik Jéeobaaʼ: «Lelaʼ yaan u yúuchul tumen a úuchben láakʼtsileʼexeʼ tu náachkuntubaʼob tiʼ teneʼ+ ka binoʼob tu paach uláakʼ diosoʼob, tu meyajtoʼob yéetel chinlajoʼob tu táanoʼob.+ Pero letiʼobeʼ tu xúumpʼattenoʼob yéetel maʼ tu beetoʼob baʼax ku yaʼalik in leyiʼ.+
12 Chéen baʼaleʼ teʼexeʼ maas kʼaas baʼax tsʼoʼok a beetkeʼex ke le baʼax tu beetoʼob letiʼoboʼ.+ Cada juntúul tiʼ teʼexeʼ tercoʼex, tu lugar a wuʼuyikeʼex in tʼaaneʼ ka beetkeʼex baʼax ku tsʼíiboltik a kʼasaʼan puksiʼikʼaleʼex.+
13 Le oʼolal yaan in tojolchʼintkeʼex tiʼ le luʼumaʼ utiaʼal a bineʼex tiʼ junpʼéel luʼum maʼ a kʼaj óoleʼex teʼexiʼ mix a úuchben láakʼtsileʼex.+ Teʼeloʼ bul kʼiin yéetel bul áakʼab ken a meyajteʼex uláakʼ diosoʼob,+ tumen junpuliʼ maʼ ken in weʼesteʼex in wutsil»›.
14 Jéeobaeʼ ku yaʼalik: ‹Yaan u kʼuchul u kʼiinileʼ letiʼobeʼ maʼ ken u yaʼaloʼob: «¡Kin jurartik tu kʼaabaʼ Jéeoba, le Dios kuxaʼanoʼ, le máax jóoʼs u kaajil Israel tu luʼumil Egiptooʼ!»,+
15 baʼaxeʼ yaan u yaʼalikoʼob: «¡Kin jurartik tu kʼaabaʼ Jéeoba, le Dios kuxaʼanoʼ, le máax jóoʼs u kaajil Israel teʼ luʼum yaan xaman yéetel tiʼ tuláakal le luʼumoʼob tuʼux tu kʼiʼitbesoʼob kaʼachoʼ!», letiʼobeʼ yaan u yaʼalikoʼob beyoʼ tumen yaan in beetik u suutoʼob tu luʼumoʼob, le luʼum tin tsʼáaj tiʼ u yúuchben láakʼtsiloʼoboʼ›.+
16 Jéeobaeʼ ku yaʼalik: ‹Nikaʼaj in taas yaʼab j-chuk kayoʼob,letiʼob túuneʼ yaan u chukikoʼob in kaajal.
Yaan xan in taasik yaʼab máakoʼob* utiaʼal ka máanak u kaxtoʼob,letiʼobeʼ yaan u kaaxanoʼob tiʼ tuláakal montaña, tiʼ tuláakal puʼukyéetel tu yáam le nukuch tuunichoʼoboʼ.
17 In wichoʼobeʼ táan u yilik tuláakal baʼax ku beetkoʼob.*
Maʼ tu páajtal u taʼakikoʼobten le baʼax ku beetkoʼoboʼ,in wichoʼobeʼ chíikaʼan u yilik le baʼax maʼ maʼalob ku beetkoʼoboʼ.
18 Yáax baʼax ken in beeteʼ in boʼotiktiʼob le bukaʼaj ku náajmatikoʼob yoʼolal u kʼebanoʼob yéetel yoʼolal le baʼaxoʼob maʼ maʼalobtak ku beetkoʼoboʼ,+tumen tsʼoʼok u kʼaskúuntikoʼob in luʼum yéetel le u x-lalaʼ imagenoʼob maʼ kuxaʼanoʼoboʼ,tsʼoʼok u chupikoʼob in luʼum yéetel le baʼaloʼob jach in pʼekmoʼ›».+
19 Jéeoba Dios, teech tsʼáaikten muukʼ, beyech junpʼéel maʼalob lugar tuʼux kin taʼakikinbaeʼ,junpʼéel lugar tuʼux jeʼel u páajtal in bin tu kʼiinil táan in muʼyajeʼ.+
Tuláakal le kaajoʼob yanoʼob tu maas náachil le yóokʼol kaabaʼ yaan u taaloʼob ta wiknalyéetel yaan u yaʼalikoʼob: «K-úuchben láakʼtsiloʼobeʼ yanchajtiʼob imagenoʼob,baʼaloʼob chéen kuneltak yéetel baʼaloʼob mix junpʼéel utsil ku taasik».+
20 Máakeʼ maʼ tu páajtal u beetik diosoʼob,tak wa ku beetkeʼ, maʼ u jaajil diosoʼobiʼ.+
21 «Teen túuneʼ yaan in beetik u kʼaj óoltikenoʼob,teʼ kʼiin jeʼeloʼ yaan in weʼesiktiʼob bukaʼaj in poder yéetel in muukʼ,letiʼobeʼ yaan u yojéeltikoʼobeʼ in kʼaabaʼeʼ Jéeoba».
Notas
^ Le baʼaloʼobaʼ suuk u beetaʼal kaʼach tumen le j-táanxel luʼumiloʼob utiaʼal u yeʼeskoʼob yaachajaʼan u yóoloʼoboʼ, maʼ xaaneʼ beetaʼab xan tumen le israelitaʼob xuʼul u meyajtikoʼob Diosoʼ.
^ Teʼelaʼ táan u yúuchul tʼaan tiʼ máakoʼob suuk u máanoʼob ich kʼáax u kaxtoʼob baʼalcheʼob u kíimsoʼob.
^ Ich hebreoeʼ ku yaʼalaʼal kaʼach «tuláakal u beeloʼob».
