Génesis 50:1-26
50 José túuneʼ le ka tu yilaj tsʼoʼok u kíimil u papáeʼ+ tu méekʼeʼ ka joʼopʼ u yokʼol, tsʼoʼoleʼ tu tsʼuʼutsʼaj.
2 Ka tsʼoʼokeʼ Joséeʼ tu yaʼalaj tiʼ le doctoroʼob ku meyajoʼob tu yiknaloʼ ka u embalsamartoʼob u papá.+ Letiʼob túuneʼ tu embalsamartoʼob Israel.
3 Durante 40 díaseʼ le doctoroʼoboʼ tu embalsamartoʼob u wíinklil, tumen letiʼe bukaʼaj tiempo ku bisik u beetaʼaloʼ. Le egipcioʼob túunoʼ máan 70 días táan u yoʼtikoʼob Jacob.
4 Le ka xuʼul u jach oʼtikoʼob úuchik u kíimil Jacobeʼ Joséeʼ tu yaʼalaj tiʼ le máaxoʼob tsʼaʼan autoridad tiʼob tumen* Faraónoʼ: «Wa tsʼoʼok in lúubul utsil ta táaneʼexeʼ beeteʼex uts a waʼalikeʼex tiʼ Faraón lelaʼ:
5 ‹In papáeʼ tu yaʼalajten: «Ilawile, taʼaytak in kíimil.+ Le kéen kíimkeneʼ unaj a mukiken teʼ lugar+ in prepararmaj tu luʼumil Canaánoʼ».+ Teen túuneʼ tin jurartaj+ bey ken in beetiloʼ, le oʼolaleʼ chaʼa in bin in muk in papá, le kéen tsʼoʼokkeʼ kin suut›».
6 Faraón túuneʼ tu yaʼalaj tiʼ José: «Xeen, yéetel muk a papá jeʼel bix ta jurartaj tiʼoʼ».+
7 José túuneʼ bin u muk u papá. Tu yéeteleʼ bin tuláakal u j-meyajoʼob Faraón, le máaxoʼob yanoʼob teʼ palacio tsʼaʼan autoridad tiʼoboʼ,+ bey xan u nuuktakil u luʼumil Egipto.
8 Bin xan tuláakal le máaxoʼob yanoʼob tu yotoch Joséoʼ, bin u sukuʼunoʼob bey xan le máaxoʼob yanoʼob tu yotoch u papáoʼ.+ Chéen u mejen paalaloʼob, u yalakʼ tamanoʼob yéetel u maasil u yalakʼ baʼalcheʼob pʼáatoʼob tu luʼumil Gosén.
9 Tu yéeteleʼ bin xan carroʼob,+ bey xan máakoʼob u natʼmaj u tsiiminoʼob. Jach yaʼabchaj le máaxoʼob láakʼintoʼ.
10 Letiʼob túuneʼ kʼuchoʼob tiʼ junpʼéel táax luʼum kʼaj óolaʼan bey Atadeʼ,* lelaʼ tiaʼan naatsʼ tiʼ le Río Jordánoʼ. Teʼeloʼ tiʼ sen okʼolnajoʼob tu yoʼolal Jacobiʼ, yéetel teʼ xanoʼ Joséeʼ pʼáat siete días sen yaachajaʼan u yóol yoʼolal u papá.
11 Le tiaʼanoʼob túun teʼeloʼ ilaʼaboʼob tumen u kajnáaliloʼob Canaán. Le cananeoʼob túunoʼ tu yaʼaloʼob: «¡Jach yaayaj baʼal le baʼax úuch tiʼ le egipcioʼoboʼ!». Le oʼolal le lugaroʼ tsʼaʼab u kʼaabaʼt Abel-mizraim,* lelaʼ tiaʼan naatsʼ tiʼ le Río Jordánoʼ.
12 U paalaloʼob túun Jacobeʼ tu beetoʼob jach jeʼex aʼalaʼabiktiʼob tumen u papáʼoboʼ.+
13 Tu bisoʼob Jacob, u papáʼob, tak tu luʼumil Canaán ka tu mukoʼob teʼ sajkab yaan tu kʼáaxil Makpeláoʼ, le yaan naatsʼ tiʼ Mamréoʼ. Le kʼáaxaʼ letiʼe tu manaj Abrahán tiʼ Efrón le itita utiaʼal u mukik u láakʼtsiloʼoboʼ.+
14 Le ka tsʼoʼok u mukik u papáeʼ Joséeʼ suunaj Egipto junmúuchʼ yéetel u sukuʼunoʼob bey xan yéetel tuláakal le máaxoʼob binoʼob u láakʼintoʼ.
15 Le ka tu yilaj u sukuʼunoʼob José tsʼoʼok u kíimil u papáʼobeʼ tu yaʼaloʼob: «Maʼ xaaneʼ Joséeʼ u pʼekmoʼon yoʼolal le baʼax kʼaas t-beetajtiʼoʼ yéetel u kʼáat u vengartuba».+
16 Le oʼolal tu túuxtoʼob aʼalbil tiʼ José: «Antes tiʼ u kíimil a papáeʼ tu yaʼalaj lelaʼ:
17 ‹Lelaʼ letiʼe baʼax unaj a waʼalikeʼex tiʼ Joséaʼ: «Kin sen kʼáatiktech ka a perdonart le baʼax tu beetajtech a sukuʼunoʼoboʼ bey xan ikil tu sen beetiloʼob a muʼyaj»›. Toʼoneʼ k-adorartik le Dios tu adorartaj a papáoʼ, beora túunaʼ beet uts a perdonartik tuláakal le baʼaxoʼob t-beetajtechoʼ». Le ka tu yuʼubaj lelaʼ Joséeʼ káaj u yokʼol.
18 U sukuʼunoʼob túun Joséeʼ taaloʼob tu yiknaleʼ ka xolajoʼob tu táan, ka tu yaʼaloʼobtiʼ: «¡Toʼoneʼ a esclavoʼon, beet t-éetel jeʼel baʼalak a kʼáateʼ!».+
19 Joséeʼ tu yaʼalajtiʼob: «Maʼ a sajaktaleʼex, ¿tiaʼanen wa tu lugar Dios utiaʼal ka in juzgarteʼexeʼ?
20 Teʼexeʼ a tukultmaj a beetkeʼexten kʼaas kaʼachi,+ chéen baʼaleʼ tu lugar leloʼ Dioseʼ tu beetaj u binten utsil utiaʼal ka páajchajak in salvartik yaʼab máakoʼob, jeʼex táan in beetik beoraaʼ.+
21 Le beetkeʼ maʼ a chʼaʼikeʼex saajkil. Teneʼ yaan u seguer in tsʼáaik baʼal a jaanteʼex bey xan tiʼ a mejen paalaleʼex».+ Bey úuchik u líiʼsik u yóoloʼob yéetel u tranquilizarkoʼoboʼ.
22 Ka tsʼoʼokeʼ José bey xan tuláakal le máaxoʼob yanoʼob tu yotoch u papáoʼ seguernaj u kajtaloʼob tu luʼumil Egipto. Tuláakal túun u kʼiiniloʼob u kuxtal Joséeʼ tu chukaj 110 años.
23 Joséeʼ tu kʼaj óoltaj u yáabiloʼob Efraín, u hijo.+ Tu kʼaj óoltaj xan u paalal Makir,+ u hijo Manasés. Joséeʼ tu yiloʼob jach bey u hijoʼobeʼ.*
24 José túuneʼ tu yaʼalaj tiʼ u sukuʼunoʼob: «Jach taʼaytak in kíimil. Chéen baʼaleʼ Dios kun áantkeʼex,+ letiʼ ken u jóoʼseʼex way tu luʼumil Egiptoeʼ yéetel yaan u biskeʼex tiʼ le luʼum tu jurartaj u tsʼáaik tiʼ Abrahán, Isaak yéetel Jacoboʼ».+
25 José túuneʼ tu yaʼalaj tiʼ u paalal Israel: «Dioseʼ seguro yaan u yáantkeʼex. Jurarteʼex maʼ ken a pʼateʼex in baakeloʼob wayeʼ».+
26 Joséeʼ 110 años yaantiʼ ka kíim tu luʼumil Egipto. Ka tsʼoʼok u embalsamartaʼaleʼ+ tsʼaʼab tu caja.
Notas
^ Wa «le máaxoʼob yanoʼob ichil u yotoch».
^ Teʼ táax luʼumaʼ tiʼ ku jóoʼsaʼal kaʼach u neekʼ cebada wa trigoiʼ.
^ U kʼáat u yaʼal «U Yaj Óolal le Egipcioʼoboʼ».
^ Ich hebreoeʼ ku yaʼalaʼal kaʼach «Letiʼobeʼ síijoʼob yóokʼol u píix José». Lelaʼ u kʼáat u yaʼaleʼ tu tratartoʼob bey u hijoʼobeʼ yéetel jach tu yeʼesaj u yutsil tiʼob.
