Génesis 18:1-33
18 Ka tsʼoʼokeʼ Jéeobaeʼ+ tu chíikbesuba tiʼ Abrahán teʼ tuʼux yaan u nukuch cheʼiloʼob Mamréoʼ.+ Lelaʼ úuch teʼ hora maas choko kʼiinoʼ mientras kulukbal kaʼach Abrahán tu jool u yotoch.
2 Le ka tu líiʼsaj u paakateʼ tu yilaj óoxtúul máakoʼob waʼalakbaloʼob maʼ sen náach tiʼ letiʼiʼ.+ Le ka tu yiloʼobeʼ áalkabnaj desde tu jool u yotocheʼ ka bin u kʼam u beeloʼob, le ka kʼuch tu yiknaloʼobeʼ xolajeʼ ka chinlaj tu táanoʼob.
3 Ka túun tu yaʼalaj: «Jéeoba,* wa tsʼoʼok in lúubul utsil tiʼ techeʼ beet uts a máan tin wotoch.
4 Beeteʼex uts a chaʼikeʼex u taasaʼal junpʼíit jaʼ utiaʼal u pʼoʼobol a wookeʼex,+ tsʼoʼoleʼ ka jeʼelsikabaʼex yáanal le cheʼaʼ.
5 Tumen tsʼoʼok a máaneʼex tin wotocheʼ paʼatik in taasik waaj a jaanteʼex utiaʼal ka a chʼaʼ a wóoleʼex tu kaʼatéen. Tsʼoʼoleʼ jeʼel u páajtal u seguer a bineʼexeʼ». Ka túun tu yaʼaloʼob: «Maʼalob, jeʼel u páajtal a beetik jeʼex tsʼoʼok a waʼalikoʼ».
6 Le oʼolal Abraháneʼ tu séebaʼanileʼ ook teʼ naj de nookʼ tuʼux yaan Saraoʼ ka tu yaʼalajtiʼ: «¡Jáan chʼaʼ óoxpʼéel medida* tiʼ le maas maʼalob harinaoʼ, yaʼachʼteʼ ka a beet waaj!».
7 Ka tsʼoʼokeʼ Abraháneʼ bin áalkabil u yéey juntúul chan wakax, tu yéeyaj u maas maʼalobil tiʼ le wakaxoʼob yaantiʼoʼ ka tu tsʼáaj tiʼ u j-meyaj, letiʼ túuneʼ bin u preparart tu séebaʼanil.
8 Tu chʼaʼaj túun mantequilla, leche yéetel le chan wakax preparartaʼanoʼ ka tu tsʼáaj le janal tu táanoʼoboʼ. Letiʼ túuneʼ pʼáat waʼatal tu yiknaloʼob yáanal le cheʼ mientras táan u janaloʼoboʼ.+
9 Letiʼobeʼ tu kʼáatoʼobtiʼ: «¿Tuʼux yaan Sara a watan?».+ Letiʼeʼ tu núukaj: «Teʼ naj de nookʼaʼ».
10 Juntúul tiʼ letiʼob túuneʼ tu yaʼalaj: «Jach tu jaajil kin waʼaliktecheʼ yaan in suut tuláakʼ año bey jeʼex teʼ kʼiinoʼobaʼ, yéetel Sara a wataneʼ yaan u yantal juntúul u hijo».+ Chéen baʼaleʼ Saraeʼ tiaʼan kaʼach tu jool le naj de nookʼ yaan paachil tiʼ le máakoʼ yéetel táan u yuʼubik kaʼach le baʼax ku yaʼalaʼaloʼ.
11 Abrahán yéetel Saraeʼ tsʼoʼok kaʼach u jach chʼíijloʼob.+ Tsʼoʼoleʼ Saraeʼ tsʼoʼok u máan u jaʼabil utiaʼal u yantal u paalal.*+
12 Sara túuneʼ joʼopʼ u x-mukul cheʼej táan u yaʼalik: «Kex tsʼoʼok in xuʼupul yéetel kex tsʼoʼok u chʼíijil in wíichameʼ, ¿jach wa tu jaajil jeʼel u yantalten le kiʼimak óolalaʼ?».+
13 Jéeoba túuneʼ tu yaʼalaj tiʼ Abrahán: «¿Baʼaxten cheʼejnaj Sara yéetel tu yaʼalaj: ‹¿Tu jaajil wa jeʼel u yantal juntúul in chaambal* kex tsʼoʼok in chʼíijleʼ?›?
14 ¿Yaan wa baʼax maʼ tu páajtal u beetik Jéeoba?+ Yaan in suut tuláakʼ año bey jeʼex teʼ kʼiinoʼobaʼ, yéetel Saraeʼ yaan u yantal juntúul u hijo».
15 Chéen baʼaleʼ Saraeʼ tu negarteʼ ka tu yaʼalaj: «¡Teneʼ maʼ cheʼejnajeniʼ!», bey tu yaʼaliloʼ tumen sajakchaji. Chéen baʼaleʼ Dioseʼ tu yaʼalajtiʼ: «Maʼ jaajiʼ, techeʼ cheʼejnajech».
16 Le ka líikʼ le máakoʼob utiaʼal u binoʼoboʼ paakatnajoʼob tu tojil u kaajil Sodoma,+ Abrahán túuneʼ joʼopʼ u bin tu yéeteloʼob utiaʼal u láakʼintikoʼob.
17 Jéeoba túuneʼ tu yaʼalaj: «¿Jeʼel wa u pʼáatal maʼ in tsʼáaik u yojéelt Abrahán baʼax ken in beeteʼ?+
18 Tumen Abraháneʼ seguro yaan u kʼuchul u beetuba junpʼéel nojoch nación jach yaan u páajtalil, tuláakal túun le naciónoʼob yaan yóokʼol luʼumoʼ yaan u bendecirtaʼaloʼob tu yoʼolal letiʼ.+
19 Tumen teneʼ in kʼaj óol Abrahán yéetel jach in wojleʼ yaan u yaʼalik tiʼ u paalal bey xan tiʼ le máaxoʼob yanoʼob tu yotochoʼ ka kuxlakoʼob jeʼex u kʼáat Jéeobaeʼ, ka u beetoʼob baʼax uts yéetel baʼax maʼalob,+ utiaʼal beyoʼ ka u béeykunt Jéeoba le baʼax u prometermaj tiʼ Abrahánoʼ».
20 Jéeoba túuneʼ tu yaʼalaj: «Sodoma yéetel Gomorraeʼ tsʼoʼok u píitmáan u kʼebantaloʼob,+ yéetel tsʼoʼok u sen yaʼabtal le máaxoʼob ku quejarkubaʼob tu contraʼoboʼ.+
21 Yaan in wéemel utiaʼal in wilik wa táan u beetkoʼob le baʼaxoʼob ku yaʼalaʼal tu contraʼoboʼ. Beyoʼ yaan in wojéeltik wa jaaj».+
22 Le kaʼatúul máakoʼob túunoʼ lukʼoʼob teʼeloʼ ka binoʼob Sodoma, chéen baʼaleʼ Jéeobaeʼ+ pʼáat yéetel Abrahán.
23 Abrahán túuneʼ tu natsʼubaeʼ ka tu yaʼalajtiʼ: «¿Tu jaajil wa yaan a xuʼulsik tiʼ le utsoʼob paʼteʼ yéetel le kʼasaʼan máakoʼoboʼ?+
24 Koʼox aʼalikeʼ yaan 50 utsul máakoʼob teʼ kaajoʼ, ¿yaan wa a xuʼulsik tiʼ le máakoʼobaʼ? ¿Maʼ wa ken a perdonart le kaaj tu yoʼolal le 50 utsul máakoʼob kajaʼanoʼob teʼeloʼ?
25 ¡Jach junpuliʼ maʼ ken a xuʼuls tiʼ le utsul máak paʼteʼ yéetel le kʼasaʼan máakoʼ! ¡Jach junpuliʼ maʼ ken a chaʼa u tsʼoʼokol tiʼ le utsul máak jeʼex u tsʼoʼokol tiʼ le kʼasaʼan máakoʼ!+ Techeʼ jach junpuliʼ maʼ ken a beet junpʼéel baʼal beyoʼ.+ U Juezil tuláakal yóokʼol kaabeʼ, ¿maʼ wa ken u beet baʼax maʼalob?».+
26 Jéeoba túuneʼ tu núukajtiʼ: «Wa kin wilik yaan 50 utsul máakoʼob tu kaajil Sodomaeʼ, u jaajileʼ jeʼel in perdonartik tuláakal le kaaj tu yoʼolal le 50 utsul máakoʼoboʼ».
27 Chéen baʼaleʼ Abraháneʼ tu kaʼa aʼalajtiʼ: «Kiʼichkelem Yuum Jéeoba, ilawile, teneʼ chéen polvo yéetel taʼanen, kex beyoʼ tsʼoʼok in atrever in tʼanech.
28 Koʼox aʼalikeʼ cinco u túulal máakoʼob ku bineltik utiaʼal u chukik le 50 utsul máakoʼoboʼ. ¿Yaan wa a xuʼulsik tiʼ tuláakal le kaaj chéen tu yoʼolal le cinco ku bineltikoʼ?». Dios túuneʼ tu núukajtiʼ: «Maʼ ken in xuʼuls tiʼ le kaaj wa kin wilik yaan 45 máakoʼoboʼ».+
29 Pero Abraháneʼ tu kaʼa aʼalaj tiʼ Dios: «Koʼox aʼalikeʼ chéen 40 máakoʼob yanoʼobiʼ». Dioseʼ tu núukajtiʼ: «Maʼ ken in xuʼuls tiʼ le kaaj tu yoʼolal le 40 u túulaloʼ».
30 Abraháneʼ tu yaʼalaj xan: «Jéeoba, beet uts maʼ a pʼuʼujul tin wéetel,+ baʼaxeʼ chaʼa u seguer in tʼaan, koʼox aʼalikeʼ chéen 30 máakoʼob yanoʼobiʼ». Dioseʼ tu núukajtiʼ: «Maʼ ken in xuʼuls tiʼ le kaaj tu yoʼolal le 30 u túulaloʼ».
31 Chéen baʼaleʼ Abraháneʼ tu yaʼalajtiʼ: «Kiʼichkelem Yuum Jéeoba, perdonarten ikil in atrever kaʼa tʼaan ta wéetel, koʼox aʼalikeʼ chéen 20 máakoʼob yanoʼobiʼ». Dioseʼ tu núukajtiʼ: «Maʼ ken in xuʼuls tiʼ le kaaj tu yoʼolal le 20 u túulaloʼ».
32 Tu tsʼookeʼ Abraháneʼ tu yaʼalajtiʼ: «Jéeoba, beet uts maʼ a pʼuʼujul tin wéetel, chaʼa in tʼaan kex chéen juntéen maas, koʼox aʼalikeʼ chéen diez máakoʼob yanoʼobiʼ». Dioseʼ tu núukajtiʼ: «Maʼ ken in xuʼuls tiʼ le kaaj tu yoʼolal le diez u túulaloʼ».
33 Le ka tsʼoʼok u tsikbal Jéeoba yéetel Abraháneʼ bini,+ Abrahán túuneʼ suunaj tu yotoch.
Notas
^ Teʼelaʼ Abraháneʼ tu yaʼalaj «Jéeoba» tiʼ juntúul tiʼ le ángeloʼoboʼ, tumen letiʼ representartik Jéeoba.
^ Ich hebreoeʼ ku yaʼalaʼal kaʼach «óoxpʼéel medidas sea». Lelaʼ letiʼe bukaʼaj ku bisik junpʼéel nuʼukul de óoliʼ 22 litrosoʼ. Ilawil «Sea», página 2579.
^ Ich hebreoeʼ ku yaʼalaʼal kaʼach «Tsʼoʼok kaʼach u jáawal u yúuchul tiʼ Sara le baʼax suuk u yúuchul tiʼ le koʼoleloʼoboʼ».
^ Tuláakʼ tuʼuxeʼ ku yaʼalaʼal «chaanpal».
