2 Pedro 2:1-22
2 Chéen baʼaleʼ ichil u kaajil Israeleʼ yanchaj profetaʼob tu yaʼaloʼob baʼaloʼob maʼ jaajtakiʼ, yéetel ichileʼexeʼ yaan xan u yantal máakoʼob ken u kaʼansoʼob baʼax maʼ jaajiʼ.+ Letiʼobeʼ taʼakumbail ken u kaʼansoʼob baʼaloʼob maʼ jaajtakiʼ, yaan u beetkoʼob utiaʼal a jatskabaʼex yéetel utiaʼal u kʼaskúuntikoʼob a fejeʼex. Tsʼoʼoleʼ yaan u pʼektikoʼob tak le tsʼuul manoʼoboʼ,+ yéetel yaan u séeb taaskoʼob xuʼulsajil tu yóokʼoloʼob.
2 Yaʼab máakoʼobeʼ yaan u kuxtaloʼob ich x-maʼ suʼtalil jeʼex u beetik le máakoʼobaʼ,+ yéetel tu yoʼolaloʼobeʼ yaan u yaʼalaʼal baʼal tiʼ u bejil le jaajoʼ.+
3 Tumen jach ku tsʼíiboltik u ayikʼaltaloʼobeʼ yaan u tuskeʼexoʼob utiaʼal u jóoʼskoʼobteʼex taakʼin. Chéen baʼaleʼ le juicio ken u kʼamoʼob aʼalaʼan desde úuchjeakiloʼ+ yaan u kʼuchul tu kʼiinil yéetel jach tu jaajil yaan u xuʼulsaʼaltiʼob.+
4 Dioseʼ tu castigartaj le ángeloʼob kʼebanchajoʼob úuchjeakiloʼ.+ Letiʼeʼ tu puloʼob teʼ Tártarooʼ,*+ tu kʼaxoʼob yéetel cadena* utiaʼal ka pʼáatkoʼob tuʼux jach éeʼjochʼeʼen, bey kun pʼáatloʼob tak ken kʼuchuk u kʼiinil le juiciooʼ.+
5 Dios xaneʼ tu castigartaj junpʼéel úuchben yóokʼol kaab,+ chéen baʼaleʼ tu kanáantaj Noé, le máax tu tsʼáaj ojéeltbil unaj u bisik máak junpʼéel toj kuxtaloʼ.+ Dioseʼ tu kanáantaj xan uláakʼ siete máakoʼob+ le ka tu taasaj le Búulkabal yóokʼol junpʼéel luʼum tuʼux kajaʼan máakoʼob jach kʼasaʼanoʼoboʼ.+
6 Dios xaneʼ tu pʼataj chéen taʼanil u kaajiloʼob Sodoma yéetel Gomorra. Le ka tu beetaj lelaʼ tu yeʼesaj jach kʼasaʼan u kajnáaliloʼob,+ yéetel tu yeʼesaj baʼax kun úuchul tiʼ le máaxoʼob ku tsʼáaikubaʼob tu contraoʼ.+
7 Teʼ kʼiinoʼob jeʼeloʼ tu salvartaj Lot,+ juntúul máak toj u kuxtal jach ku yaatal u yóol kaʼach tu yoʼolal le baʼaxoʼob ku beetik le kʼasaʼan máakoʼob ichil x-maʼ suʼtaliloʼ.
8 (Loteʼ juntúul máak toj u kuxtal, sáamsamal kaʼach ku yaatal u yóol u puksiʼikʼal tu yoʼolal le baʼaloʼob kʼaastak ku yuʼubik yéetel ku yilik u beetaʼal tumen le máakoʼob yanoʼob tu baʼpachoʼ).
9 Jeʼex túun k-ilkoʼ Jéeobaeʼ* jach u yojel bix jeʼel u tokik tiʼ túuntaj óolal le máaxoʼob adorarkoʼ.+ Chéen baʼaleʼ u yojel xan u tsʼáa junpáayil le kʼasaʼan máakoʼob utiaʼal ka xuʼulsaʼakoʼob tu kʼiinil le juiciooʼ,+
10 maases le máaxoʼob u pʼekmoʼob le autoridadoʼ+ bey xan le máaxoʼob táan u kaxtikoʼob bix jeʼel u núupkʼebantaloʼob utiaʼal u kʼaskúuntikoʼob u wíinklil uláakʼ máakoʼoboʼ.+
Le máakoʼob beyaʼ séeb u yaʼalikoʼob baʼal, yéetel chʼiikil u beetoʼob chéen baʼax u kʼáatoʼob. Maʼ saajkoʼob tʼaan kʼaas tiʼ le máaxoʼob yéeyaʼanoʼob tumen Diosoʼ.*
11 Le ángeloʼoboʼ kex maas yaan u muukʼoʼob yéetel u páajtaliloʼobeʼ mix juntéen ku takikoʼob u pool le kʼasaʼan máakoʼoboʼ mix tech u tʼaanoʼob kʼaas tiʼ letiʼob, tumen jach ku respetarkoʼob Jéeoba.+
12 Chéen baʼaleʼ le máakoʼobaʼ beyoʼob jeʼex le baʼalcheʼob minaʼan u naʼatoʼob ku nuʼuktikubaʼob chéen yéetel baʼax yaan tu tuukuloʼoboʼ. Letiʼobeʼ yanchajoʼob chéen utiaʼal ka chuʼukkoʼob yéetel ka kíimsaʼakoʼob, le oʼolal ku sen tʼaanoʼob kʼaas tiʼ baʼaloʼob maʼ u kʼaj óoloʼobiʼ.+ Letiʼobeʼ yaan u xuʼulsaʼaloʼob tumen táan u binoʼob tu bejil le xuʼulsajiloʼ,
13 yéetel yaan u muʼyajtikoʼob* u boʼolil u kʼasaʼaniloʼob.
Letiʼobeʼ jach uts tu tʼaan u béeykuntkoʼob u tsʼíibolal u bakʼeloʼob,+ bey u beetkoʼob tak de kʼiinoʼ. Beyoʼob junpʼéel mancha ichil le múuchʼuliloʼ yéetel uts tu tʼaan u kaʼanskoʼob baʼaloʼob maʼ jaajtak le kéen kulakoʼob janal ta wéeteleʼexiʼ.+
14 Le máakoʼobaʼ chéen núupchital yaan tu tuukuloʼob,+ maʼ tu náakal u yóoloʼob kʼebantal yéetel ku tuskoʼob le máakoʼob maʼ jeetsʼel u tuukuloʼoboʼ. U puksiʼikʼaloʼobeʼ chʼiikil u tsʼíiboltoʼob baʼax maʼ u tiaʼaloʼobiʼ. Letiʼobeʼ yaan u castigartaʼaloʼob tumen Dios.
15 Saatloʼob tumen tsʼoʼok u xúumpʼatkoʼob le toj bejoʼ. Tsʼoʼok u binoʼob teʼ bej tu bisaj Balaam+ u paal Beoroʼ. Letiʼeʼ utschaj tu tʼaan u náajaltik taakʼin utiaʼal u beetik u kʼasaʼanil.+
16 Chéen baʼaleʼ kʼeʼeyi, tumen bin tu contra le baʼax maʼaloboʼ.+ Juntúul x-burra maʼatech u tʼaaneʼ, tʼaanaj jeʼex u tʼaan wíinikeʼ, letiʼeʼ maʼ tu chaʼaj tiʼ le profeta u beetik le baʼax u tukultmaj u beetik yéetel choko pooliloʼ.+
17 Le máakoʼobaʼ beyoʼob chʼeʼenoʼob minaʼan u jaʼileʼ, yéetel beyoʼob múuyaloʼob ku bisaʼaloʼob tumen kʼaʼamkach iikʼeʼ. Tsʼoʼoleʼ yaan u tsʼaʼabaloʼob tiʼ junpʼéel lugar jach éeʼjochʼeʼen.+
18 Tumen letiʼobeʼ ku yaʼalikoʼob baʼaloʼob ku beetik u jaʼakʼal u yóol máak, chéen baʼaleʼ mix baʼal u biilaloʼob. Tsʼoʼoleʼ ikil u binoʼob tu paach u tsʼíibolal u bakʼeloʼob+ yéetel ikil u kuxtaloʼob ich x-maʼ suʼtalileʼ, ku kʼaskúuntikoʼob u tuukul le máaxoʼob táant u púutsʼloʼob tiʼ le baʼaloʼob kʼaastakoʼ.+
19 Le máakoʼobaʼ ku yaʼalikoʼob jeʼel a pʼáatleʼex libreileʼ, chéen baʼaleʼ u jaajileʼ letiʼobeʼ esclavoʼob tiʼ le baʼaloʼob kʼaastakoʼ.+ Tumen le máax ku ganartaʼaloʼ ku suut esclavo tiʼ le máax* ganartoʼ.+
20 U jaajileʼ le máakoʼobaʼ tsʼoʼok u púutsʼloʼob kaʼach tiʼ le baʼaloʼob éekʼtak yaan teʼ yóokʼol kaabaʼ+ tumen tu kʼaj óoltoʼob Yuumtsil Jesucristo le Salvadoroʼ. Chéen baʼaleʼ beoraaʼ táan u kaʼa jupkubaʼob tiʼ le baʼaloʼobaʼ yéetel ku kaʼa lúubloʼobiʼ, le oʼolal maas kʼaas yaniloʼob beoraaʼ ke le bix yaniloʼob kaʼach tu káajbaloʼ.+
21 Maas maʼalob kaʼach maʼ u kʼaj óoltikoʼob tubeel le u bejil le justiciaoʼ, tumen beora tsʼoʼok u kʼaj óoltikoʼobaʼ maas kʼaas yaniloʼob úuchik u náachkuntkubaʼob tiʼ le baʼax kʼubéentaʼabtiʼob tumen Diosoʼ.+
22 Jach tsʼoʼok u yúuchultiʼob le baʼax ku yaʼalaʼalaʼ: «Le peekʼoʼ ku suut u jaant u xej, le x-leech táant u yisíinsaʼaloʼ ku suut u baʼluba ich luukʼ».+
Notas
^ Ilawil página 2581.
^ Uláakʼ bix u traducirtaʼaleʼ «tu tsʼáajoʼob ich taamkach jooloʼob».
^ Ilawil página 2566.
^ Teʼelaʼ táan u yúuchul tʼaan tiʼ le máaxoʼob tsʼaʼan u kanáantoʼob le múuchʼuliloʼoboʼ.
^ Wa «u sufrirkoʼob».
^ Wa «tiʼ le baʼax».
