2 Crónicas 33:1-25
33 Doce años yaan kaʼach tiʼ Manasés+ ka káaj u reinar, yéetel 55 años xáanchaj táan u reinar desde Jerusalén.+
2 Manaséseʼ tu beetaj baʼax kʼaas tu táan Jéeoba, seguernaj u beetik le baʼaloʼob sen kʼaastak ku beetik kaʼach le naciónoʼob tojolchʼintaʼaboʼob tumen Jéeoba tu táan le israelitaʼoboʼ.+
3 Tu jel líiʼsaj le kaʼanal lugaroʼob xuʼulsaʼab tumen Ezequías, u papáoʼ.+ Tu beetaj cheʼob utiaʼal ka adorartaʼakoʼob bey xan altaroʼob utiaʼal le Baaloʼoboʼ. Tsʼoʼoleʼ chinlaj xan u adorart tuláakal le baʼaloʼob yanoʼob teʼ kaʼanoʼ.+
4 Tu beetaj xan altaroʼob tu yotoch Jéeoba,+ teʼ naj u yaʼalmaj Jéeoba tu yoʼolaloʼ: «In kʼaabaʼeʼ mantatsʼ kun antal tu kaajil Jerusalén».+
5 Teʼ kaʼapʼéel terrenoʼob yanoʼob tu yotoch Jéeobaoʼ,+ tu beetaj altaroʼob utiaʼal u adorartaʼal le baʼaloʼob yanoʼob teʼ kaʼanoʼ.
6 Letiʼeʼ tu tóokaj u hijoʼob+ tu táax luʼumil u paal Hinón,+ meyajnaj magia+ tiʼ yéetel tu yilaj u chuchuknaʼatik baʼax ku taal u kʼiin, tsʼoʼoleʼ táakpaj tiʼ pulyaʼaj, tu tsʼáaj xan máakoʼob utiaʼal ka tʼaanakoʼob yéetel le kimenoʼoboʼ bey xan j-meenoʼob.+ Tu beetaj yaʼab baʼaloʼob jach táaj kʼaastak tu táan Jéeoba utiaʼal u ofendertik.
7 Le imagen tu beetoʼ tu tsʼáaj teʼ tu yotoch le u jaajil Diosoʼ.+ Yoʼolal le najaʼ Dioseʼ u yaʼalmaj tiʼ David yéetel tiʼ Salomón, u hijo: «Ichil tuláakal u tribuiloʼob Israeleʼ, teneʼ tsʼoʼok in yéeyik le najaʼ bey xan u kaajil Jerusalén utiaʼal in tsʼáaik in kʼaabaʼiʼ, in kʼaabaʼeʼ tiʼ kun pʼáatal utiaʼal mantatsʼiʼ.+
8 Teneʼ maʼ ken in chaʼa u kaʼa jóoʼsaʼal u kaajil Israel teʼ luʼum tin tsʼáaj tiʼ u yúuchben láakʼtsiloʼoboʼ. Chéen baʼaleʼ unaj u beetkoʼob tuláakal le baʼaxoʼob tsʼoʼok in waʼaliktiʼoboʼ, unaj u tsʼoʼokbeskoʼob tuláakal le Leyoʼ, le baʼaxoʼob aʼalaʼanoʼ yéetel le mandamientoʼob aʼalaʼabtiʼob tumen Moisés ka u tsʼoʼokbesoʼoboʼ».
9 Manaséseʼ seguernaj u túulchʼintik le israelitaʼob yanoʼob Judá yéetel Jerusalén utiaʼal ka u beetoʼob baʼaloʼob kʼaastakoʼ. Le baʼaloʼobaʼ maas jach kʼaastak ke le ku beetik le luʼumoʼob tojolchʼintaʼaboʼob tu táanoʼob tumen Jéeobaoʼ.+
10 Jéeobaeʼ seguernaj u tʼanik Manasés bey xan le kaajoʼ, chéen baʼaleʼ letiʼobeʼ maʼ tu yóotaj u yuʼuboʼob tʼaaniʼ.+
11 Jéeoba túuneʼ tu beetaj u taal u nuuktakil u ejército u reyil Asiriaeʼ ka tu machoʼob Manasés. Letiʼobeʼ tu tsʼáajoʼob ganchoʼob tu wíinklileʼ,* tu kʼaxoʼob yéetel kaʼapʼéel cadenaʼob de cobreeʼ, ka tu bisoʼob Babilonia.
12 Le táan u sen muʼyajoʼ Manaséseʼ tu kʼáat óoltaj tiʼ Jéeoba ka chʼaʼabak óotsilil tiʼ. Letiʼeʼ seguernaj u jach mixbaʼalkúuntkuba tu táan u Dios u yúuchben láakʼtsiloʼob.
13 Manaséseʼ maʼ xuʼul u orar tiʼ Diosiʼ, yoʼolal leloʼ Dioseʼ péeknaj u yóol u puksiʼikʼal yéetel tu chʼenxikintaj le baʼax ku kʼáatikoʼ. Le oʼolaleʼ tu chaʼaj u suut Manasés tu kaajil Jerusalén utiaʼal ka gobernarnak tu kaʼatéeniʼ.+ Manasés túuneʼ kʼuch u yojéelteʼ Jéeobaeʼ letiʼ u jaajil Dios.+
14 Le ka máan kʼiineʼ Manaséseʼ tu beetaj junpʼéel kaʼanal pakʼ paachil tiʼ u Kaajal David.+ Lelaʼ káaj desde tu chikʼinil u jaʼiloʼob Guiyón,+ le yaan teʼ táax luʼumoʼ yéetel kʼuch tak teʼ joonaj ku kʼaabaʼtik u Joonajil Kayoʼ.+ Le kaʼanal pakʼaʼ máan paachil tiʼ Ofel.+ Tsʼoʼoleʼ tiʼ tuláakal le kaajoʼob yaan u baʼpakʼiloʼob tu luʼumil Judáoʼ, Manaséseʼ tu tsʼáaj jujuntúul tiʼ u nuuktakil le ejércitooʼ.
15 Teʼ tu yotoch Jéeobaoʼ, Manaséseʼ tu luʼsaj u diosoʼob le j-táanxel luʼumiloʼoboʼ bey xan le póolbil imagenoʼ.+ Tu nikaj xan tuláakal le altaroʼob tu beetaj teʼ montaña tuʼux yaan u yotoch Jéeobaoʼ+ bey xan le yanoʼob tu kaajil Jerusalénoʼ, le ka tsʼoʼokeʼ tu yaʼalaj ka puʼulkoʼob paach kaaj.
16 Manaséseʼ tu yutskíintaj u altar Jéeoba,+ yéetel tu yóokʼoleʼ joʼopʼ u kʼubik ofrendaʼob utiaʼal múul janal+ bey xan ofrendaʼob utiaʼal u tsʼáaik gracias tiʼ Dios.+ Tu yaʼalaj xan tiʼ u kajnáaliloʼob Judá ka u meyajtoʼob Jéeoba, u Dios u kaajil Israel.
17 Kex beyoʼ le kaajoʼ láayliʼ táan kaʼach u kʼubik sacrificioʼob teʼ kaʼanal lugaroʼoboʼ, chéen baʼaleʼ beoraaʼ tiʼ Jéeoba u Diosoʼob ku kʼubkoʼob.
18 Tuláakal u maasil baʼaloʼob úuch ichil u kuxtal Manasés bey xan le oración tu beetaj tiʼ Diosoʼ tsʼíibtaʼan ichil le baʼaxoʼob úuch ichil u kuxtal le reyoʼob yanchajoʼob Israeloʼ. Teʼeloʼ tiʼ tsʼíibtaʼan xan le baʼaxoʼob aʼalaʼabtiʼ tu kʼaabaʼ Jéeoba u Dios Israeloʼ, lelaʼ aʼalaʼabtiʼ tumen le máaxoʼob ilik baʼax ku taal u kʼiinil u yúuchloʼ.
19 Le baʼaxoʼob tu beetaj Manasés táanil tiʼ u mixbaʼalkúuntkuba tu táan Diosoʼ tiʼ tsʼíibtaʼan ichil le baʼaxoʼob tu yaʼalaj le máaxoʼob aʼaliktiʼ baʼax ku taal u kʼiinil u yúuchloʼ. Teʼeloʼ tiʼ tsʼíibtaʼan le bix úuchik u oraroʼ,+ le bix úuchik u tsʼaʼabaltiʼ le baʼax tu kʼáat óoltoʼ, le bix úuchik u kʼebantaloʼ, le bix úuchik u traicionartik Diosoʼ,+ le tuʼuxoʼob tu beetaj le kaʼanal lugaroʼoboʼ, le tuʼuxoʼob tu tsʼáaj le cheʼob utiaʼal u adorartaʼaloʼoboʼ+ yéetel le tuʼuxoʼob tu tsʼáaj le póolbil imagenoʼoboʼ.
20 Manasés túuneʼ kíimeʼ* ka muʼuki, muʼuk naatsʼ tiʼ u yotoch. Amón, u hijo túuneʼ, káaj u beetik u reyil tu lugar.+
21 Veintidós años yaan tiʼ Amón+ ka káaj u reinar, yéetel dos años xáanchaj táan u reinar desde tu kaajil Jerusalén.+
22 Amóneʼ seguernaj u beetik baʼax kʼaas tu táan Jéeoba, jeʼex úuchik u beetaʼal tumen Manasés, u papáoʼ.+ Amóneʼ tu kʼubaj sacrificioʼob tiʼ tuláakal le póolbil imagenoʼob beetaʼab tumen u papáoʼ,+ maʼ xuʼul u adorarkoʼobiʼ.
23 Chéen baʼaleʼ Amóneʼ maʼ tu mixbaʼalkúuntuba+ tu táan Jéeoba+ jeʼex tu beetil Manasés, u papáeʼ, baʼaxeʼ maas jach kʼebanchaji.
24 Le ka máan kʼiineʼ le máaxoʼob meyajtik Amónoʼ tu traicionartoʼobeʼ+ ka tu kíimsoʼob tu yotoch.
25 Chéen baʼaleʼ u kajnáaliloʼob Judáeʼ tu kíimsoʼob tuláakal le máaxoʼob traicionart le rey Amónoʼ+ ka tu tsʼáajoʼob Josías,+ u hijo, utiaʼal ka u beet u reyil tu lugar.
Notas
^ Uláakʼ bix u traducirtaʼaleʼ «tu chukoʼob Manasés teʼ jooloʼoboʼ».
^ Ich hebreoeʼ ku yaʼalaʼal kaʼach «jeʼel yéetel u yúuchben láakʼtsiloʼob».
