1 Reyes 4:1-34
4 Le rey Salomónoʼ gobernarnaj yóokʼol tuláakal Israel.+
2 Le u j-meyajoʼob* Salomón yaan autoridad tiʼoboʼ letiʼe jeʼeloʼobaʼ: Azarías u hijo Sadok,+ letiʼ kaʼacheʼ letiʼe sacerdoteoʼ;
3 Elióref yéetel Ajiya u hijoʼob Sisá, letiʼob kaʼacheʼ secretarioʼob;+ Jeosafat+ u hijo Ailud, letiʼ kaʼacheʼ ku tsʼíibtik le baʼaxoʼob unaj u kʼaʼajsaʼaloʼ;
4 Benaya+ u hijo Jeoyadá, letiʼ kaʼacheʼ tsʼaʼan u nuʼukt le ejércitooʼ; Sadok yéetel Abiatar,+ letiʼob kaʼacheʼ sacerdoteʼob;
5 Azarías u hijo Natán,+ letiʼ kaʼacheʼ tsʼaʼan u nuʼukt le comisarioʼoboʼ; Zabud u hijo Natán, letiʼ kaʼacheʼ juntúul sacerdote yéetel u amigo le reyoʼ;+
6 Aisar, letiʼ kaʼacheʼ tsʼaʼan u nuʼukt le meyaj ku beetaʼal teʼ palaciooʼ, yéetel Adoniram+ u hijo Abdá, letiʼ kaʼacheʼ tsʼaʼan u nuʼukt le máaxoʼob yéeyaʼaboʼob tumen le rey utiaʼal ka meyajtaʼakoʼ.+
7 Salomóneʼ u tsʼaamaj kaʼach 12 comisarioʼob tiʼ tuláakal u luʼumil Israel utiaʼal u tsʼáaikoʼob le janal kʼaʼabéet tiʼ le rey yéetel tiʼ le máaxoʼob yanoʼob tu yotochoʼ. U meyaj cada juntúuleʼ letiʼe u tsʼáaik janal ichil junpʼéel mes tiʼ le añooʼ.+
8 Lelaʼ letiʼe máakoʼobaʼ: u hijo Uur, letiʼ kaʼacheʼ tiaʼan tu montañailoʼob Efraíneʼ.
9 U hijo Déker, letiʼ kaʼacheʼ ku nuʼuktik le meyaj ku beetaʼal Makaz, Saalbim,+ Bet-semes yéetel Elón-bet-anán.
10 U hijo Ésedeʼ tiaʼan Aruboteʼ (letiʼ kaʼacheʼ yaan autoridad tiʼ yóokʼol Socó yéetel yóokʼol tuláakal u luʼumil Éefer).
11 U hijo Abinadabeʼ tiaʼan kaʼach tu ebekníixiloʼob* Doreʼ (letiʼeʼ tsʼoʼok u beel yéetel Tafat, u hija Salomón).
12 Baaná u hijo Ailudeʼ tiaʼan kaʼach Taanak, Meguidó+ yéetel tuláakal Bet-seáneʼ,+ lelaʼ tiaʼan tu tséel Zaretán, maas kabal tiʼ Jezreeleʼ, desde Bet-seán tak Abel-meolá yéetel tak tu luʼumil Jokmeam.+
13 U hijo Guébereʼ tiaʼan kaʼach Ramot-galaadeʼ+ (letiʼ kaʼacheʼ yaan autoridad tiʼ yóokʼol u mejen kaajiloʼob Jaír,+ Jaíreʼ u hijo Manasés, le mejen kaajoʼobaʼ tiaʼanoʼob kaʼach Galaadeʼ;+ yaan xan autoridad tiʼ yóokʼol u luʼumil Argob,+ le yaan kaʼach Basánoʼ:+ 60 nukuch kaajoʼob yaan u baʼpakʼiloʼob yéetel u joonajiloʼob, le joonajoʼobaʼ yaan u trancailoʼob de cobre).
14 Ainadab u hijo Idóeʼ tiaʼan kaʼach Maanaimeʼ.+
15 Aimáazeʼ tiaʼan kaʼach Neftalíeʼ (letiʼeʼ tsʼoʼok u beel yéetel Basemat, uláakʼ u hija Salomón).
16 Baaná u hijo Usayeʼ tiaʼan kaʼach Aser yéetel Bealoteʼ.
17 Jeosafat u hijo Parúajeʼ tiaʼan kaʼach Isacareʼ.
18 Simey+ u hijo Eláeʼ tiaʼan kaʼach Benjamíneʼ.+
19 Guéber u hijo Uríeʼ tiaʼan kaʼach tu luʼumil Galaadeʼ,+ lelaʼ u luʼum Seón+ u rey le amorreoʼoboʼ yéetel Og+ u reyil Basán. Yaan xan kaʼach juntúul comisario ku nuʼuktik tuláakal u maasil comisarioʼob yanoʼob tiʼ tuláakal le luʼumoʼ.
20 Judá yéetel Israeleʼ sen yaʼaboʼob kaʼachi, beyoʼob jeʼex u yaʼabil le arena yaan tu jáal le kʼáaʼnáaboʼ.+ Letiʼobeʼ táan kaʼach u janaloʼob yéetel u yukʼuloʼob yéetel táan kaʼach u kiʼimakkúuntik u yóoloʼob.+
21 Salomóneʼ gobernarnaj yóokʼol tuláakal le luʼumoʼob yanoʼob desde teʼ Ríooʼ*+ tak tu luʼum le filisteoʼoboʼ yéetel ku kʼuchul tak tu fronterail Egipto. U kajnáaliloʼob le luʼumoʼobaʼ tu boʼotoʼob impuesto yéetel tu meyajtoʼob Salomón tuláakal u kʼiiniloʼob u kuxtal.+
22 Le janal ku kʼaʼabéettal sáamsamal tu yotoch Salomónoʼ letiʼe jeʼelaʼ: 30 medidas de coro* maʼalob harina yéetel 60 medidas de coro* harina,
23 10 wakaxoʼob polokkíintaʼanoʼob, 20 wakaxoʼob ku tséentaʼaloʼob yéetel xíiw, 100 tamanoʼob, u clasesil kéejoʼob* bey xan chʼíichʼoʼob tséentbil u beetaʼaloʼob.
24 Letiʼ kaʼach gobernartik tuláakal le luʼum yaan way tu tséel le Ríoaʼ,*+ desde Tifsa tak Gaza,+ yáanal u páajtalil yaan xan tuláakal le reyoʼob yanoʼob way tu tséel le Ríoaʼ, le oʼolaleʼ yaan kaʼach jeetsʼelil tiʼ tuláakal le luʼumoʼ, tiʼ tuláakal le luʼum yaan tu baʼpachoʼ.+
25 Tuláakal le kʼiinoʼob táan u gobernar Salomónoʼ u kajnáaliloʼob Judá yéetel Israeleʼ kuxlajoʼob ich jeetsʼelil, cada juntúuleʼ kuxlaj ich jeetsʼelil yáanal u boʼoy u pakʼal uva yéetel yáanal u boʼoy u pakʼal higo, desde Dan tak Beer-seba.
26 Tiʼ Salomóneʼ yaan kaʼach 4,000* corraloʼob utiaʼal le tsíiminoʼob jíitik u carroʼoboʼ yéetel yaantiʼ 12,000 tsíiminoʼob.*+
27 Le comisarioʼoboʼ letiʼob tsʼáaik janal tiʼ le rey Salomón bey xan tiʼ tuláakal le máaxoʼob ku janaloʼob tu mesaoʼ. U meyaj cada juntúuleʼ u yilik maʼ u bineltik mix baʼal teʼ mes ku tocar tiʼoʼ.+
28 Letiʼob xaneʼ ku biskoʼob cebada bey xan suʼuk jeʼel tuʼuxak kʼaʼabéeteʼ, lelaʼ utiaʼal le tsíiminoʼoboʼ bey xan utiaʼal le tsíiminoʼob jíitik le carroʼoboʼ, ku biskoʼob le bukaʼaj aʼalaʼantiʼob ka u bisoʼoboʼ.
29 Dioseʼ tu beetaj u jach antal u naʼat Salomón yéetel tu tsʼáajtiʼ u páajtalil u yojéeltik baʼax unaj u beetik, tu tsʼáajtiʼ junpʼéel puksiʼikʼal jach yaan u naʼat maʼ tu páajtal u pʼiʼisil tumen mix máak.*+
30 U naʼat Salomóneʼ maas nojoch kaʼach tiʼ le naʼat yaan tiʼ tuláakal le máaxoʼob kajaʼanoʼob Lakʼinoʼ* bey xan tiʼ le yaan tiʼ le egipcioʼoboʼ.+
31 Letiʼ kaʼacheʼ maas yaan u naʼat ke u maasil máakoʼoboʼ, maas yaan u naʼat ke Etán+ u hijo Zera, Emán,+ Kalkol+ yéetel Dardá u hijoʼob Maol. Letiʼeʼ kʼuch kʼaj óoltbil tiʼ tuláakal le luʼumoʼob yanoʼob tu baʼpachoʼ.+
32 Letiʼeʼ tu yaʼalaj 3,000 proverbios*+ yéetel tu beetaj 1,005 kʼaayoʼob.+
33 Letiʼ kaʼacheʼ maʼ chéen ku tʼaan yoʼolal nukuch cheʼob jeʼex le cedroʼob yanoʼob teʼ Líbanooʼ, baʼaxeʼ ku tʼaan tak tiʼ le mejen xíiwoʼob jeʼex le hisopo*+ ku nojochtal teʼ pakʼoʼ. Ku tʼaan xan tiʼ le baʼalcheʼoboʼ,+ tiʼ le chʼíichʼoʼoboʼ,*+ tiʼ le baʼalcheʼob ku jíiltikubaʼoboʼ*+ bey xan tiʼ le kayoʼoboʼ.
34 Tiʼ tuláakal naciónoʼobeʼ ku taal máakoʼob uʼuyik le naʼat yaan kaʼach tiʼ Salomónoʼ. U reyiloʼob tuláakal le luʼumoʼ ku taaloʼob xan u yuʼuboʼob le naʼat yaan kaʼach tiʼoʼ.+
Notas
^ Wa «Le u príncipeʼob Salomón».
^ Wa «tu bajadailoʼob».
^ Uláakʼ bix kʼaj óolaʼanileʼ Éufrates.
^ Lelaʼ letiʼe bukaʼaj ku bisik junpʼéel nuʼukul de óoliʼ 6,600 litrosoʼ. Ilawil «Coro», página 2559.
^ Lelaʼ letiʼe bukaʼaj ku bisik junpʼéel nuʼukul de óoliʼ 13,200 litrosoʼ.
^ Ich hebreoeʼ ku yaʼalaʼal kaʼach «kéejoʼob, gacelaʼob, corzoʼob».
^ Le tséel jeʼelaʼ letiʼe u chikʼinil le Éufratesoʼ.
^ Le cantidad jeʼelaʼ bey yanil tiʼ jujunpʼéel úuchben tsʼíiboʼob ku meyajoʼob utiaʼal u traducirtaʼal le Bibliaoʼ bey xan yanil tiʼ uláakʼ tekstoʼob ku tʼaanoʼob tiʼ lelaʼ. Uláakʼ úuchben tsʼíiboʼobeʼ ku yaʼalikoʼob 40,000.
^ Wa «máakoʼob ku natʼkoʼob tsíiminoʼob».
^ Ich hebreoeʼ ku yaʼalaʼal kaʼach «bey jeʼex le arena yaan tu jáal le kʼáaʼnáaboʼ».
^ Wa «Este».
^ Ilawil página 2576.
^ Ilawil página 2565.
^ Wa «tiʼ u clasesil baʼalcheʼob ku xikʼnaloʼoboʼ».
^ Maʼ xaaneʼ táakaʼan xan insectoʼobiʼ.
