1 Corintios 2:1-16
2 Bey túunoʼ, sukuʼuneʼex, le ka binen ta wiknaleʼexeʼ maʼ tin tʼaneʼex yéetel tʼaanoʼob jelaʼantakiʼ+ mix tin taasinba bey jach yaan in naʼat le ka tin tsolajteʼex le baʼal taʼakaʼan*+ kaʼach tumen Diosoʼ.
2 Tumen le tiaʼanen ta wiknaleʼexoʼ tin chʼaʼtuklaj maʼ in tʼaan tiʼ uláakʼ baʼaloʼob, baʼaxeʼ chéen tiʼ Jesucristo yéetel le úuchik u kíimsaʼal tiʼ junpʼéel cheʼoʼ.+
3 Ka binen ta wiknaleʼexeʼ minaʼan in muukʼ, saajken yéetel táan in sen kikilankil.
4 Le ka tʼaanajen yéetel le ka kaʼansajnajeneʼ, maʼ meyajnajten le tʼaanoʼob ku meyaj tiʼ le máaxoʼob yaan u naʼatoʼob utiaʼal ka in woks ta pooleʼexoʼ, baʼaxeʼ le bix tʼaanajikenoʼ tu chíikbesaj le páajtalil yaan tiʼ u espíritu santo* Diosoʼ.+
5 Utiaʼal beyoʼ maʼ a tsʼáaik a fejeʼex tiʼ u naʼat chéen wíinik, baʼaxeʼ tiʼ u páajtalil Dios.
6 Toʼoneʼ, ichil le máaxoʼob yiijchajaʼan u tuukuloʼoboʼ,+ k-tʼaan tiʼ baʼaloʼob yaan yil yéetel le naʼatoʼ, chéen baʼaleʼ le naʼataʼ maʼ letiʼe yaan tiʼ le yóokʼol kaabaʼ* mix tiʼ le yaan tiʼ u gobernanteiloʼoboʼ tumen letiʼobeʼ yaan u xuʼulsaʼaloʼob.+
7 Baʼaxeʼ k-tʼaan tiʼ junpʼéel baʼal taʼakaʼan, le baʼax taʼakaʼanoʼ+ letiʼe naʼat ku taal tiʼ Diosoʼ, le baʼax u yaʼalmiliʼ Dios antes tiʼ u beetaʼal tuláakal baʼal utiaʼal k-nojbaʼalkúuntaʼaloʼ.
8 Mix juntúul tiʼ u gobernanteiloʼob le yóokʼol kaab kʼuch u kʼaj óoltoʼob le naʼataʼ,+ tumen wa ka u kʼaj óoltoʼob kaʼacheʼ bejlaʼa maʼ tu bajkoʼob tiʼ cheʼ kiʼichkelem Yuumtsil Jesúseʼ.
9 Chéen baʼaleʼ úuch jeʼex tsʼíibtaʼanilaʼ: «Icheʼ maʼ u yil mix baʼaliʼ, xikineʼ maʼ u yuʼub mix baʼaliʼ yéetel wíinikeʼ maʼ u tukult ichil u puksiʼikʼal le baʼaloʼob u beetmaj Dios utiaʼal u tsʼáaik tiʼ le máaxoʼob yaabiltmiloʼ».+
10 Tumen lelaʼ tiʼ toʼon tsʼoʼok u tsʼaʼabal k-ojéelt+ tumen Dios tu yoʼolal u espíritu santo,+ tumen le espíritu santooʼ ku xakʼaltik tuláakal baʼal, tak le u taamkach naʼat Diosoʼ.+
11 Mix máak u yojel baʼax ku tuklik uláakʼ máak. Tumen chéen cada máak u yojel baʼax yaan ichil u puksiʼikʼal. Bey túun xanoʼ mix máak kʼuchuk u kʼaj óolt le baʼaxoʼob ku taal tiʼ Diosoʼ, baʼaxeʼ chéen u espíritu santo Dios.
12 Chéen baʼaleʼ toʼoneʼ maʼ t-kʼamaj le tuukul ku taal tiʼ le yóokʼol kaabaʼ, baʼaxeʼ t-kʼamaj u espíritu santo Dios,+ utiaʼal beyoʼ ka k-kʼaj óolt le baʼaxoʼob tu tsʼáajtoʼon Dios tu yoʼolal u yutsiloʼ.
13 Toʼoneʼ k-tʼaan xan tiʼ le baʼaloʼobaʼ, chéen baʼaleʼ maʼ yéetel le tʼaanoʼob ku kaʼansik le wíinikoʼob yaan u naʼatoʼoboʼ,+ baʼaxeʼ yéetel le tʼaanoʼob ku kaʼansik le espíritu santooʼ.+ Lelaʼ k-beetik kéen meyajnaktoʼon le tʼaanoʼob ku taal tiʼ le espíritu santo utiaʼal k-tsolik* le baʼaloʼob yaan yil yéetel Diosoʼ.
14 Chéen baʼaleʼ le luʼumkabil máakoʼ maʼ tu kʼamik le baʼaloʼob ku taal tiʼ u espíritu santo Diosoʼ, tumen utiaʼal letiʼeʼ mix baʼal u biilaloʼob. Letiʼeʼ maʼ tu páajtal u kʼuchul u naʼate, tumen le baʼaloʼobaʼ chéen ku páajtal u xakʼaltaʼal yéetel u yáantaj le espíritu santooʼ.
15 Chéen baʼaleʼ le máax ku chaʼik u nuʼuktaʼal tumen u espíritu santo Dioseʼ ku xakʼaltik bix yanil tuláakal baʼal,+ pero letiʼeʼ mix máak xakʼaltik u tuukul.
16 Tumen «¿máax jeʼel u páajtal u yojéeltik bix u tuukul Jéeobaeʼ?, ¿máax jeʼel u kaʼansik wa baʼax tiʼeʼ?».+ Chéen baʼaleʼ toʼoneʼ k-ojel bix u tuukul Cristo.+
Notas
^ Wa «le baʼal santo taʼakaʼan».
^ Ilawil «Espíritu santo», página 2562.
^ Wa «tiʼ le máakoʼob kuxaʼanoʼob teʼ kʼiinoʼobaʼ».
^ Wa «k-nupik».
