Éxodo 5:1-23
5 Le ka tsʼoʼokeʼ Moisés yéetel Aaróneʼ bin u yaʼaloʼob tiʼ Faraón: «Lelaʼ letiʼe baʼax ku yaʼalik Jéeoba, u Dios u kaajil Israel: ‹Chaʼa u bin in kaajal utiaʼal ka u beetoʼob junpʼéel fiesta utiaʼal u adorarkenoʼob teʼ desiertooʼ›».
2 Chéen baʼaleʼ Faraóneʼ tu yaʼalaj: «¿Máax Jéeoba+ utiaʼal ka in wuʼuy u tʼaan yéetel utiaʼal ka in chaʼa u bin Israel?+ Jach junpuliʼ maʼ in kʼaj óol Jéeobaiʼ, tsʼoʼoleʼ maʼ ken in chaʼa u bin Israel».+
3 Moisés yéetel Aarón túuneʼ tu yaʼaloʼobtiʼ: «U Dios le hebreoʼoboʼ tsʼoʼok u tʼaan t-éetel. Yuum rey, beet uts a chaʼik k-bin teʼ desierto utiaʼal k-kíimsik baʼalcheʼob utiaʼal k-kʼub tiʼ Jéeoba k-Diosoʼ,+ tres días u náachil le viaje ken k-beetoʼ. Tumen wa maʼ t-beetkeʼ letiʼeʼ yaan u beetik u tsaʼayaltoʼon kʼaakʼas kʼojaʼaniloʼob wa yaan u chaʼik ka kíimsaʼakoʼon yéetel espada».
4 U reyil Egipto túuneʼ tu yaʼalajtiʼob: «Moisés yéetel Aarón, ¿baʼaxten a kʼáateʼex ka u xúumpʼat u meyaj le kaajoʼ? ¡Tuláakleʼexeʼ suuneneʼex meyaj!».+
5 Faraóneʼ tu yaʼalaj xan tiʼob: «¡Ilawileʼex bukaʼaj máakoʼob táan u meyajoʼob teʼ luʼumaʼ! Pero teʼexeʼ chéen taaljaʼaneʼex a beeteʼex u xuʼulul u meyajoʼob».
6 Teʼ mismo díaoʼ Faraóneʼ tu yaʼalaj tiʼ le capatazoʼob yéetel tiʼ le máaxoʼob áantkoʼoboʼ:
7 «Maʼ unaj u seguer a tsʼáaikeʼex suʼuk tiʼ le kaaj utiaʼal ka u beetoʼob ladrillosoʼ.*+ Túuxteʼexoʼob u chʼaʼob le suʼuk kun meyajtiʼoboʼ.
8 Chéen baʼaleʼ teʼexeʼ láayliʼ yaan a exigirkeʼextiʼob le bukaʼaj ladrillos aʼalaʼantiʼob ka u beetoʼoboʼ. Maʼ unaj u beetkoʼob menosiʼ, tumen chéen maʼakʼóoloʼob. Le oʼolal táan u máan u yaʼaloʼob: ‹¡Taak k-bin k-kíims baʼalcheʼob utiaʼal k-kʼub tiʼ k-Dios!›.
9 Baʼax unaj a beetkeʼexeʼ a tsʼáaikeʼex u maasil meyajtiʼob utiaʼal beyoʼ maʼ u beetkoʼob u cuentail le tuusoʼob ku yaʼalaʼaltiʼoboʼ».
10 Le capatazoʼob+ yéetel le máaxoʼob áantkoʼoboʼ binoʼobeʼ ka tu yaʼaloʼob tiʼ le kaajoʼ: «Lelaʼ letiʼe baʼax tsʼoʼok u yaʼalik Faraónaʼ: ‹Desde bejlaʼeʼ maʼ kun seguer in tsʼáaikteʼex suʼuk.
11 Xeeneʼex a kaxteʼex jeʼel tuʼuxak a kʼáateʼexeʼ, chéen baʼaleʼ láayliʼ letiʼe bukaʼaj ladrillos ken a beeteʼexoʼ›».
12 Le kaaj túunoʼ kʼiʼitpaj tiʼ tuláakal u luʼumil Egipto utiaʼal u molkoʼob mejen chʼiliboʼob tu lugar suʼuk.
13 Le capatazoʼob túunoʼ seguernaj u yaʼalikoʼobtiʼob: «Kex bejlaʼa maʼ kun tsʼaabilteʼex suʼukeʼ cada juntúuleʼ unaj u beetik le bukaʼaj ladrillos ku kʼáataʼaltiʼ ka u beet sáamsamaloʼ».
14 Le máaxoʼob áantik u capatazoʼob Faraónoʼ jaʼajatsʼaʼaboʼob.+ Letiʼob túuneʼ tu kʼáatoʼob tiʼ le israelitaʼoboʼ: «¿Baʼaxten maʼ ta beeteʼex le bukaʼaj ladrillos aʼalaʼanteʼex ka a beeteʼexoʼ? Bey úuchik joʼoljeakoʼ bey xan úuchik bejlaʼoʼ».
15 Le máaxoʼob áantik le capatazoʼob túunoʼ binoʼob u quejartubaʼob tu yiknal Faraóneʼ ka tu yaʼaloʼobtiʼ: «¿Baʼaxten bey a tratarkoʼonaʼ?
16 Maʼatech u tsʼaʼabaltoʼon suʼuk, tsʼoʼoleʼ táan u yaʼalaʼaltoʼon: ‹¡Beeteʼex ladrillos!›. Táan k-jaʼajatsʼaʼal xan, pero si tiʼ le egipcioʼob yaan u culpailoʼ».
17 Chéen baʼaleʼ Faraóneʼ tu yaʼalajtiʼob: «¡Chéen maʼakʼóoleʼex, chéen maʼakʼóoleʼex!+ Le oʼolal ka waʼalikeʼex: ‹¡Taak k-bin k-kíims baʼalcheʼob utiaʼal k-kʼub tiʼ Jéeoba!›.+
18 Mix tuʼux ka bineʼex, baʼaxeʼ ¡suuneneʼex meyaj! Maʼ kun tsʼaabilteʼex mix junpʼíit suʼuk, kex beyoʼ unaj a beetkeʼex le bukaʼaj ladrillos aʼalaʼanteʼex ka a beeteʼexoʼ».
19 Le máaxoʼob áantik le capatazoʼob túunoʼ tu tsʼáajoʼob cuentaeʼ jach nojoch problema yaantiʼob úuchik u tsʼaʼabal le ordenaʼ: «Junpuliʼ maʼ unaj u menostal le bukaʼaj ladrillos aʼalaʼanteʼex ka a beeteʼex sáamsamaloʼ».
20 Ka tsʼoʼok u tʼaanoʼob yéetel Faraóneʼ bin u yiloʼob Moisés yéetel Aarón teʼ tuʼux yanoʼoboʼ.
21 Chéen pʼelak kʼuchikoʼobeʼ tu yaʼaloʼob tiʼ Moisés yéetel tiʼ Aarón: «Jéeoba ka u yil yéetel ka u juzgart le baʼax tsʼoʼok a beetkeʼexoʼ, tumen tsʼoʼok a beetkeʼex k-pʼektaʼal tumen Faraón bey xan tumen le máaxoʼob meyajtikoʼ. Yéetel le baʼax tsʼoʼok a beetkeʼexoʼ bey ka a tsʼáaʼex junpʼéel espada tiʼ Faraón utiaʼal ka u kíimsoʼoneʼ».+
22 Moisés túuneʼ tu yaʼalaj tiʼ Jéeoba: «Jéeoba, ¿baʼaxten tsʼoʼok a beetik u muʼyaj le kaajaʼ? ¿Baʼax oʼolal ta túuxten wayeʼ?
23 Desde ka binen tu táan Faraón utiaʼal in tʼaan ta kʼaabaʼeʼ+ letiʼeʼ tsʼoʼok u maas kʼastal bix u tratartik a kaajal.+ Tsʼoʼoleʼ techeʼ maʼ a beet mix baʼal utiaʼal a salvarkoʼobiʼ».+
Notas
^ Le ladrillosaʼ bey mejen blokeʼ. Suuk kaʼach u beetaʼal yéetel suʼuk xaʼakʼtaʼan yéetel luukʼ wa yéetel kʼat.
