Éxodo 11:1-10
11 Jéeoba túuneʼ tu yaʼalaj tiʼ Moisés: «Yaan in castigartik Faraón yéetel u luʼumil Egipto juntéen maas. Le kéen tsʼoʼokkeʼ letiʼeʼ yaan u chaʼik a bineʼex.+ Pero maʼ chéen ken u yaʼal ka jóokʼkeʼexiʼ, hasta tojolchʼintbil ken u beetileʼex wayeʼ.+
2 Beoraaʼ aʼal tiʼ le kaajoʼ, tiʼ tuláakal le xiiboʼob yéetel le koʼoleloʼoboʼ ka u kʼáatoʼob tiʼ u vecinoʼob baʼaloʼob beetaʼan de oro yéetel de plata».+
3 Jéeobaeʼ tu beetaj u lúubul utsil u kaajil Israel tu táan le egipcioʼoboʼ. Tsʼoʼoleʼ Moiséseʼ jach ku respetartaʼal kaʼach tumen u j-meyajoʼob Faraón yéetel tumen u maasil egipcioʼoboʼ.
4 Moiséseʼ tu yaʼalaj: «Lelaʼ letiʼe baʼax tsʼoʼok u yaʼalik Jéeobaaʼ: ‹Kex bey chúumuk áakʼabeʼ yaan in máan tu chúumukil Egipto,+
5 yéetel yaan u kíimil tuláakal u yáax hijo le egipcioʼoboʼ.+ Yaan u kíimil u yáax hijo Faraón le reyoʼ, yaan u kíimil xan u yáax hijo le esclava táan u juuchʼ teʼ molino de manooʼ bey xan tuláakal le yáax xibil baʼalcheʼoboʼ.+
6 Tsʼoʼoleʼ yaan u yuʼubaʼal u kʼaʼam okʼol le máakoʼob tiʼ tuláakal u luʼumil Egiptooʼ. Mix juntéen úuchuk baʼal beyoʼ yéetel mix juntéen kun kaʼa úuchul.+
7 Tsʼoʼoleʼ mix juntúul peekʼ kun jóokʼol tojlik le israelitaʼoboʼ mix xan u yalakʼ baʼalcheʼob. Beyoʼ yaan a wojéeltikeʼ Jéeobaeʼ ku kanáantik le israelitaʼoboʼ,+ pero maʼ bey u beetik yéetel le egipcioʼoboʼ›.
8 Tuláakal túun a j-meyajoʼobeʼ yaan u taaloʼob xoltal tin táan yéetel yaan u yaʼalikoʼobten: ‹Xeen, teech bey xan tuláakal le máaxoʼob uʼuyik a tʼaanoʼ›.+ Le kéen tsʼoʼokok leloʼ kin bin». Ka tsʼoʼok u yaʼalik le baʼaloʼobaʼ, Moiséseʼ pʼujaʼan ka lukʼ tu táan Faraón.
9 Jéeoba túuneʼ tu yaʼalaj tiʼ Moisés: «Faraóneʼ maʼ ken u yuʼub a tʼaan,+ leloʼ yaan u tsʼáaik tuʼux in beetik u maasil milagroʼob tu luʼumil Egipto».+
10 Moisés yéetel Aaróneʼ tu beetoʼob tuláakal le milagroʼob tu táan Faraónoʼ,+ chéen baʼaleʼ Jéeobaeʼ tu chaʼaj u beetik u tercoil Faraón, Faraón túuneʼ maʼ tu chaʼaj u jóokʼol le israelitaʼob tu luʼumil Egiptooʼ.+
