Tu kʼiinil 19 tiʼ mayo tiʼ 2022, le Consejo de Seguridad yaan teʼ ONU, tu beetaj junpʼéel reunión tuʼux táakpaj maas tiʼ 75 máakoʼob jach yaan u autoridadoʼob. Teʼeloʼ aʼalaʼabeʼ «le COVID-19 bey xan le u sen kʼexpajal le climaoʼ tsʼoʼok u beetik u maas pʼáatal minaʼan baʼal jaantbil tiʼ tuláakal yóokʼol kaab, tsʼoʼoleʼ yaan u maas peortal yoʼolal le guerra yaan Ucraniaoʼ». Maʼ úuch tiʼ leloʼ junpʼéel revistaeʼ tu yaʼalaj xaneʼ «le guerraoʼ yaan u beetik u sen antal junpʼéel nojoch wiʼijil tiʼ tuláakal yóokʼol kaab» (The Economist). Le Bibliaoʼ u yaʼalmiliʼ yaan u pʼáatal casi minaʼan baʼal jaantbileʼ, chéen baʼaleʼ u tsʼaamaj xan consejoʼob utiaʼal u yáantkoʼon yéetel utiaʼal u yantaltoʼon esperanza.

•    Jesúseʼ tu yaʼalaj: «Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino, yaan u pʼáatal minaʼan baʼal jaantbil» (Mateo 24:7).

•    U libroil Apocalipsiseʼ ku tʼaan tiʼ kantúul tsíiminoʼob táan u yáalkaboʼob, juntúuleʼ ku chíikbesik le guerraoʼ yéetel le ku taal tu paachoʼ ku chíikbesik le wiʼijiloʼ. Le profecíaoʼ ku yaʼalikeʼ maʼ kun antal suficiente baʼaloʼob utiaʼal jaantbil wa yaan u koʼojtaloʼob. Le profecíaoʼ ku yaʼalik: «Tin wilaj juntúul box tsíimin. Le máax natʼmiloʼ u chʼúuymaj junpʼéel balanza. [...] Tin wuʼuyaj u juum, bey junpʼéel tʼaan táan u yaʼalik: ‹U tojol junwuutsʼ trigoeʼ junpʼéel denario, u tojol óoxwuutsʼ cebadaeʼ junpʼéel denario xan›» (Apocalipsis 6:5, 6).

 Le profecíaʼob ku tʼaanoʼob tiʼ le wiʼijiloʼ táan u béeytaloʼob teʼ ‹tu tsʼook kʼiinoʼobaʼ› (2 Timoteo 3:1). Wa a kʼáat a wojéelt u maasil tu yoʼolal le ‹u tsʼook kʼiinoʼob› bey xan tu yoʼolal le kantúul tsíiminoʼoboʼ, ilawil le video Tu añoil 1914 kʼexpaj yóokʼol kaab yéetel le xook «¿Máaxoʼob natʼmil le kantúul tsíiminoʼoboʼ?».

•    Le Bibliaoʼ ku yáantkoʼon k-aktáant le problemaʼob ku yantaloʼoboʼ, jeʼex u sen koʼojtal le baʼaloʼob utiaʼal jaantbiloʼ wa u pʼáatal minaʼan. Wa a kʼáat a wil jujunpʼéel tiʼ le consejoʼob ku tsʼáaikoʼ ilawil le xook «Bix jeʼel a kuxtal chéen yéetel junpʼíit taakʼineʼ».

•    Le Bibliaoʼ ku yaʼalikeʼ yaan u xuʼulul tuláakal baʼax beetik k-muʼyaj. Ku yaʼalik xaneʼ maʼ tun xáantaleʼ yaan u yantal baʼal u jaant máak yéetel mix máak ken u muʼyajt wiʼijil (Salmo 72:16). Wa taak a wojéeltik u maasil tu yoʼolal le esperanzaaʼ ilawil le xook ich español «La esperanza real de un mañana mejor».