¡MAʼ U NÁAYAL A WÓOLEʼEX!
¿Baʼax ku yaʼalik le Biblia yoʼolal le bix u apoyartik le religiónoʼob le guerra yaan Ucraniaoʼ?
Ilawil baʼax tsʼoʼok u publicartaʼal yoʼolal baʼax ku yaʼalik jujuntúul tiʼ u nuuktakil le religiónoʼob yoʼolal le guerra yaan Ucraniaoʼ:
«Le patriarca Kirill, u maas nojchil le Iglesia ortodoxa rusaoʼ, maʼ u yaʼal wa kʼaas le baʼax ku beetik Rusiaoʼ […]. Le Iglesiaoʼ tsʼoʼok xan u tʼaan tu contra Ucrania, lelaʼ tsʼoʼok u meyaj tiʼ Putin utiaʼal u yaʼalik maʼ kʼaas le guerra ku beetkoʼ» (EUobserver, 7 tiʼ marzo tiʼ 2022).
«Le patriarca Kirilloʼ […] tsʼoʼok xan u pʼatik claro maʼ kʼaas u yilik le baʼaxoʼob ku beetik Rusia tu contra Ucraniaoʼ. Ku yaʼalikeʼ leloʼ ku yáantaj utiaʼal u xuʼulsaʼal tiʼ le kʼebanoʼ» (AP News, 8 tiʼ marzo tiʼ 2022).
«Epifanio I de Kiev, u nojchil le Iglesia ortodoxa yaan Ucraniaoʼ, tu kʼiinil luneseʼ tu bendecirtaj le máaxoʼob ku baʼateloʼob tu contra Rusiaoʼ. Letiʼeʼ tu yaʼaleʼ maʼ junpʼéel kʼeban ka kíimsaʼak u soldadoiloʼob Rusiaoʼ» (The Jerusalem Post, 16 tiʼ marzo tiʼ 2022).
«Toʼoneʼ k-apoyartik u soldadoiloʼob Ucrania bey xan tuláakal le máaxoʼob defenderkoʼonoʼ. K-bendecirkoʼob tumen táan u baʼateloʼob tu contra u enemigoʼob Ucrania yéetel táan k-orar tu yoʼolaloʼob» (Declaración del Consejo de Iglesias y Organizaciones Religiosas de Ucrania, a 24 tiʼ febrero tiʼ 2022).
U nuuktakil le religiónoʼob ku yaʼalikubaʼob cristianoʼoboʼ, ¿maʼalob wa ka u péeksoʼob máak utiaʼal ka xiʼik guerra? ¿Techeʼ baʼax ka tuklik? ¿Baʼax wal ku yaʼalik le Biblia tu yoʼolal leloʼ?
Baʼax tsʼoʼok u beetik le religiónoʼob kéen yanak guerraoʼ
Desde úuchjeakileʼ yaʼab religiónoʼobeʼ, kex ku yaʼalikoʼob u kʼáatoʼob ka yanak jeetsʼelileʼ, tsʼoʼok u yeʼeskoʼob maʼ kʼaas u yilkoʼob ka yanak le guerraʼoboʼ, hasta ku túulchʼintkoʼob máak utiaʼal ka xiʼikiʼ. U testigoʼob Jéeobaeʼ tsʼoʼok u yúuchtal joʼopʼok u yaʼalikoʼob maʼ maʼalob le baʼax ku beetkoʼobaʼ. Ilawil jujunpʼéel baʼaxoʼob ku yaʼalaʼal teʼ publicaciónoʼob tsʼoʼok k-jóoʼsikoʼ:
Le xook ich español «Las cruzadas: ‹trágica ilusión›» ku yaʼalikeʼ le Iglesia católica romanaoʼ yaʼab máakoʼob tu beetaj u kíimsaʼal tu kʼaabaʼ Dios bey xan Cristo.
Le xook ich español «La Iglesia Católica y África» ku yeʼesikeʼ mix junpʼéel religión béeychaj u xuʼulsik u baʼateʼel yéetel u kíimskuba le jejeláas tribuʼoboʼ.
Le xook ich español «¿Tiene la culpa la religión?», «El papel de la religión en las guerras» yéetel «La religión toma partido» ku yeʼesikeʼ u nuuktakil le católicoʼob, le ortodoxoʼob yéetel le protestanteʼoboʼ tu apoyartoʼob le guerraʼob anchaj tiʼ cada luʼumil tuʼux u taaloʼoboʼ.
Le religiónoʼob ku yaʼalikubaʼob cristianoʼoboʼ, ¿maʼalob wa ka u apoyartoʼob le guerraʼoboʼ?
Baʼax tu kaʼansaj Jesús: «Kʼaʼabéet a yaabiltik a wéet máakil jeʼex a yaabiltikabaeʼ» (Mateo 22:39). «Maʼ u xuʼulul a yaabiltikeʼex a enemigoʼex» (Mateo 5:44-47).
Tuukulnen tiʼ lelaʼ: Wa junpʼéel Iglesia ku yaʼalik u yaabiltmaj u yéet máakil jeʼex tu kaʼansil Jesúseʼ, ¿maʼalob wa ka u yaʼal tiʼ le máaxoʼob ku binoʼob tu religión ka xiʼikoʼob guerraoʼ? Utiaʼal a wojéeltik u núukileʼ jeʼel u páajtal a wilik le xook ich español «Los cristianos verdaderos y la guerra» bey xan «¿Es posible amar a un enemigo?».
Baʼax tu kaʼansaj Jesús: «In reinoeʼ maʼ yóokʼol kaabiliʼ. Wa yóokʼol kaabil in reinoeʼ le máaxoʼob meyajtikenoʼ tsʼoʼok kaʼach u baʼateloʼob utiaʼal maʼ in kʼuʼubul[eʼ]» (Juan 18:36). «Tuláakal le máaxoʼob ku meyaj espada tiʼobeʼ bíin kíimsaʼakoʼob yéetel espada» (Mateo 26:47-52).
Tuukulnen tiʼ lelaʼ: Le discípuloʼoboʼ maʼ baʼatelnajoʼob mix tu yorail táan u maʼachal Jesús utiaʼal u kíimsaʼaliʼ. Utiaʼal a wilik baʼax tu beetaj le yáax cristianoʼob tu seguertoʼob le baʼax tu kaʼansaj Jesúsoʼ, ilawil le xook ich español «El cristianismo y la guerra: ¿son compatibles?».
¿Baʼax kun úuchul tiʼ le religiónoʼob ku apoyarkoʼob le guerraʼoboʼ?
Le Bibliaoʼ ku yaʼalikeʼ Dioseʼ maʼatech u kʼamik le religiónoʼob chéen ku yaʼalikoʼob táan u beetkoʼob baʼax tu kaʼansaj Jesúsoʼ (Mateo 7:21-23; Tito 1:16).
U libroil Apocalipsiseʼ ku yaʼalikeʼ tu táan Dioseʼ le religiónoʼobaʼ letiʼob u culpableil yoʼolal «tuláakal le máaxoʼob tsʼoʼok u kíimsaʼaloʼob way luʼumeʼ» (Apocalipsis 18:21, 24). Wa a kʼáat a wojéelt baʼaxteneʼ ilawil le xook ich español «¿Qué es Babilonia la Grande?».
Jesúseʼ tu yaʼaleʼ Dioseʼ yaan u xuʼulsik tiʼ tuláakal le religiónoʼob maʼ tu beetkoʼob baʼax maʼaloboʼ tumen tsʼoʼok u jach píit máan u beetkoʼob baʼaloʼob kʼaastak. Letiʼeʼ yaan u xuʼulskoʼob jeʼex u kúulchʼaktaʼal junkúul cheʼ maʼ tu tsʼáaik maʼalob icheʼ, ku tsʼoʼokoleʼ ku puʼulul ich kʼáakʼ (Mateo 7:15-20). Wa a kʼáat a wojéelt bix kun úuchul lelaʼ, ilawil le xook ich español «¡Se acerca el fin de la religión falsa!».
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Teʼelaʼ táakaʼan 15 Iglesiaʼobiʼ, ichil le jeʼeloʼobaʼ tiaʼan le Iglesia ortodoxaoʼ, le Iglesia católica romanaoʼ, le Iglesia católica griegaoʼ, protestanteʼob, evangélicoʼob, judíoʼob yéetel musulmanoʼob.
Maʼ xaaneʼ jeʼel u yutstal xan ta wicheʼ
ULÁAKʼ BAʼALOʼOB
¿Maʼalob wa ka u yoksuba le religión tiʼ políticaoʼ?
Tiʼ tuláakal yóokʼol kaabeʼ yaʼab máakoʼob ku yaʼalikubaʼob u discípuloʼob Cristoeʼ ku yoksikubaʼob tiʼ política. ¿Maʼalob wa le baʼax ku beetkoʼoboʼ?
¡MAʼ U NÁAYAL A WÓOLEʼEX!
Rusiaeʼ ku atacartik Ucrania | ¿Junpʼéel profecía wa táan u béeytal?
Ilawil baʼaxten kʼaʼabéet a wojéeltik baʼaxten ku yúuchul le baʼaloʼobaʼ
BAʼALOʼOB UNAJ A KANIK
¿Baʼax u Reino Dios?
Ka taal Jesús way Luʼumeʼ maases kaʼansajnaj yoʼolal u Reino Dios. Úuch joʼopʼok u kʼáataʼal ka taalak u Reino Dios.
U KAʼANSAJ LE BIBLIAOʼ
Kʼáat ka tsʼaʼabaktech xook
Kʼáat ka tsʼaʼabaktech xook yéetel le Bibliaoʼ, ilawil bix jeʼel a beetik le baʼax ka kanikoʼ.
