Le Cuerpo Gobernanteoʼ u kʼáat ka meyajnak le donaciónoʼob utiaʼal u beetaʼal construcciónoʼob ku yáantaj utiaʼal u yúuchul predicar. Por ejemploeʼ teʼ año de servicio 2023, u najiloʼob Beteleʼ tu xupoʼob maas tiʼ 500 millones dólares a utiaʼal u manikoʼob, u beetkoʼob yéetel u yutskíintikoʼob Salónoʼob bey xan u Salóniloʼob Asambleas tiʼ tuláakal yóokʼol kaab. Tsʼoʼoleʼ ichil lelaʼ maʼ táakaʼan le ku xuʼupul tumen le congregaciónoʼob utiaʼal u tsʼaʼabal mantenimiento tiʼ le Salónoʼoboʼ.

 Le donaciónoʼoboʼ ku meyaj xan utiaʼal u beetaʼal bey xan utiaʼal ka yanak tuláakal le baʼax kʼaʼabéet teʼ sucursaloʼoboʼ, le tuʼux ku nuʼuktaʼal le predicaciónoʼ. Utiaʼal ka meyajnak le donaciónoʼob utiaʼal u beetaʼal wa u yutskíintaʼal Salónoʼob wa u Salóniloʼob Asambleaseʼ le sucursaloʼoboʼ tu kʼexoʼob bix u beetaʼal le meyajoʼoboʼ. Chéen baʼaleʼ láayliʼ yaʼab xuupoʼob ku beetaʼal utiaʼal u yutskíintaʼal wa u beetaʼal uláakʼ sucursaloʼobeʼ. ¿Baʼaxten jach kʼaʼabéet le meyajoʼobaʼ? ¿Bix u yáantaj le meyajoʼob ku beetaʼal teʼ sucursaloʼob utiaʼal u maas kʼaʼaytaʼal le Reinooʼ? Koʼox ilik.

 Yaʼab sucursaloʼobeʼ tsʼoʼok kex 30 wa 40 años beetakoʼob. Nicholas, ku meyaj teʼ Departamento Mundial tiʼ Diseño yéetel Construccióneʼ, ku yaʼalik: «Tak le edificioʼob maʼalob u tsʼaʼabal mantenimiento tiʼoboʼ kéen máanak kʼiineʼ ku káajal u kʼastaloʼob. Chéen baʼaleʼ kéen utskíintaʼak junpʼéel edificioeʼ, bey ku kaʼa túumbentaleʼ yéetel ku seguer u meyaj jeʼex suukileʼ».

 Tu najiloʼob Beteleʼ mantatsʼ ku beetaʼal kʼeexoʼob utiaʼal u seguer u beetaʼal le meyajoʼob kʼaʼabéetoʼ. Teʼ kʼiinoʼobaʼ tsʼoʼok u maas yaʼabtal le publicadoroʼob tiʼ tuláakal yóokʼol kaaboʼ le oʼolal tsʼoʼok xan u kʼaʼabéettal u maasil voluntarioʼob meyaj Betel. Yoʼolal leloʼ tsʼoʼok u jach chuʼupul le sucursaloʼoboʼ.

 Uláakʼ baʼax ku chʼaʼabal en cuentaeʼ letiʼe baʼax yaan yil yéetel le seguridadoʼ. Como kuxaʼanoʼon tu tsʼook kʼiinoʼobeʼ jach yaʼab nukuch loobiloʼob jeʼel u tsʼáaik u kuxtal máak tu chiʼ kíimileʼ (Lucas 21:11). Le oʼolaleʼ kéen utskíintaʼak jujunpʼéel baʼaloʼob tiʼ junpʼéel sucursaleʼ le sukuʼunoʼoboʼ ku yilik u beetkoʼob u maas maʼalobil ku páajtal utiaʼal ka pʼáatak seguroil le lugaroʼ. Beyoʼ wa ka úuchuk junpʼéel nojoch loobileʼ jeʼel u páajtal u meyaj le sucursal utiaʼal u tsʼaʼabal baʼax kʼaʼabéet tiʼ le sukuʼunoʼoboʼ yéetel u seguer u nuʼuktaʼal le kʼaʼaytaj ku beetaʼal teʼ luʼumiloʼ.

 Teʼ año de servicio 2023, le Cuerpo Gobernanteoʼ tu aprobartaj ka utskíintaʼak 43 sucursaloʼob. Leloʼ u kʼáat u yaʼaleʼ casi táanchumuk tiʼ le sucursaloʼob yaan tiʼ tuláakal yóokʼol kaaboʼ yaan u yutskíintaʼaloʼob. Koʼoneʼex ilik jujunpʼéel utsiloʼob ku taasik le meyajoʼob ku beetaʼaloʼ.

 Angola. Matt, juntúul sukuʼun ku meyaj ichil le Comité de Sucursal yaan Angolaoʼ, ku yaʼalik: «Jach kiʼimak k-óol tumen táan k-ilik bix u béeytal Ageo 2:7. ¡Chéen ichil diez añoseʼ tsʼoʼok u yaʼabtal 60 por ciento le publicadoroʼoboʼ! Chéen baʼaleʼ utiaʼal u tsʼaʼabal baʼax kʼaʼabéettiʼobeʼ kʼaʼabéet u maasil sukuʼunoʼob meyaj Betel. Pero como minaʼan tuʼux u tsʼaʼabal le voluntarioʼoboʼ jujuntúul betelitaʼobeʼ anchaj u meyajoʼob maas yaʼab horas».

 Aʼalaʼab tiʼ jujuntúul sukuʼunoʼob ka u yiloʼob wa jeʼel páajtal u nojochkíintaʼal le sucursaloʼ. Tu káajbaleʼ tu tukloʼobeʼ maas maʼalob chéen ka utskíintaʼak yéetel ka pʼáatak jeʼex yanikoʼ. Chéen baʼaleʼ tu tsʼáajoʼob cuentaeʼ maas maʼalob ka u manoʼob uláakʼ edificio yaan naatsʼ tiʼob, beyoʼ maʼalob kun meyaj le donaciónoʼoboʼ. Matteʼ ku seguer u yaʼalik: «Le ka tu yaʼalaj le sukuʼunoʼob tiʼ le Comité tiʼ Sucursal táan u tuklikoʼob u mankoʼob junpʼéel edificiooʼ maʼ jach maʼalob t-uʼuyiliʼ tumen maʼ letiʼe organización beetmiloʼ. Chéen baʼaleʼ beoraaʼ tsʼoʼok k-ilkeʼ Jéeobaeʼ tu bendecirtaj le decisión chʼaʼaboʼ, le edificio maʼanoʼ jach letiʼe baʼax kʼaʼabéetoʼ».

 Maʼ xaaneʼ maas táanileʼ yaan u kʼaʼabéettal u maas nojochkíintal u sucursalil Angola. Chéen baʼaleʼ beoraaʼ yéetel le túumben edificio maʼanoʼ, le najoʼob instalartaʼaboʼob yéetel le cuartoʼob rentartaʼaboʼoboʼ jach yaan u yáantaj utiaʼal u seguer u tsʼaʼabal baʼax kʼaʼabéet tiʼ le publicadoroʼob jach séeb u bin u yaʼabtaloʼoboʼ.

 Japón. Tsʼoʼok casi 40 años beetaʼak jujunpʼéel tiʼ le edificioʼob yaan teʼ sucursaloʼ yéetel mix juntéen remodelartaʼakoʼob tu chúukaʼanil. Kex ku tsʼaʼabal mantenimiento tiʼobeʼ le edificioʼobaʼ tsʼoʼok u pʼáatal maʼ suficiente utiaʼal tuláakal le meyaj ku beetaʼaloʼ. Pero beoraaʼ tsʼoʼok u káajal u remodelartaʼal le sucursaloʼ.

 Teʼ tu tsʼook añosaʼ yaʼab baʼaloʼob tsʼoʼok u kʼexpajal Betel. Por ejemploeʼ, kaʼacheʼ le sukuʼunoʼob kajaʼanoʼob Beteloʼ yaan máax beetik u yoʼochoʼob, le oʼolal tu cuartoʼobeʼ chéen beetaʼan kaʼach junpʼéel «chan cocinaiʼ». Chéen baʼaleʼ desde tu añoil 2015, kʼexpaji. Beoraeʼ letiʼob kun beetik u yoʼochoʼob, le oʼolal maas nojochkíintaʼab le cocina yaantiʼoboʼ, beyoʼ maas chéen chʼaʼabil kun cocinaroʼob. Kumiko, juntúul kiik ku meyaj tu Betelil Japóneʼ, ku yaʼalik: «Jach jatsʼuts in wilik le cocina beetaʼaboʼ tumen beoraeʼ maas séeb in cocinar, kin wuʼuyik bey tiaʼanen tin wotocheʼ».

 Tuláakal le meyaj ku beetaʼal tu sucursalil Japónoʼ jach importante utiaʼal u tsikbaltaʼal u Reino Dios tiʼ tuláakal yóokʼol kaab (Mateo 28:19, 20). U sucursalil Japóneʼ junpʼéel tiʼ le kaʼapʼéel sucursaloʼob tuʼux ku imprimirtaʼal le Biblia tu chúukaʼaniloʼ, le oʼolaleʼ utiaʼal ka páajchajak u seguer u beetaʼal le meyajaʼ instalartaʼab junpʼéel máquina ku xúuchik tuláakal le polvooʼ bey xan u xéexetʼal le juʼunoʼoboʼ. Úuchik u maʼanal yéetel u instalartaʼal le máquinaaʼ tu tojoltaj óoliʼ junpʼéel millón de dólares, pero ku yáantaj utiaʼal u kanáantaʼal le sukuʼunoʼob ku meyajoʼoboʼ bey xan utiaʼal u seguer u imprimirtaʼal le publicaciónoʼoboʼ yéetel u túuxtaʼal tiʼ le sukuʼunoʼoboʼ.

 Le baʼax maas importante u yilaʼal le táan le proyectooʼ letiʼe maʼ u xuʼulul u imprimirtaʼal le Bibliaoʼ. Trey, juntúul sukuʼun ku meyaj tiʼ le Comité yaan tu sucursalil Japónoʼ ku yaʼalik: «Le táan le construcciónoʼ kʼaʼabéet kaʼach u imprimirtaʼal yaʼabkach Bibliaʼob tumen u kaajal Jéeobaeʼ táan u traducirtik ich yaʼab idiomaʼob». Utiaʼal maʼ u jeʼelel le meyajaʼ yaʼabkach departamentoʼobeʼ yanchaj u múul meyajoʼob yéetel le empresa utiaʼal u instalarkoʼob le máquinaoʼ, beyoʼ seguernaj u imprimirtaʼal le publicaciónoʼoboʼ. Maʼ chéen chʼaʼabil le baʼax beetaʼabaʼ tumen yaʼab meyaj ku beetaʼal utiaʼal u remodelartaʼal le imprentaoʼ, kex beyoʼ desde marzo tak agosto tiʼ 2023, imprimirtaʼab óoliʼ 220,000 Bibliaʼob cada mes. Tsʼoʼoleʼ beetaʼab sin ke u xuʼupul u maasil taakʼin utiaʼal le remodelaciónoʼ.

 Uláakʼ baʼax jach importante ku chʼaʼabal en cuentail tiʼ le proyectoaʼ letiʼe u kanáantaʼal maʼ u sen xuʼupul le corrienteoʼ. Yaan u tsʼaʼabal paneles solaresiʼ, beyoʼ yaan u ahorrartaʼal kex 120,000 dólares cada año. Yaan xan u tsʼaʼabal ventanaʼob de óox yáal u cristaliloʼobiʼ, beyoʼ maʼ tun sen xupbil yaʼab corriente yéetel yaan u ahorrartaʼal kex 10,000 dólares cada año. U jaajileʼ yaan u xuʼupul maas yaʼab taakʼin yéetel le meyaj kun beetbiloʼ, pero jach yaan u yáantaj. Tumen durante le tiempo kun meyaj le edificioʼoboʼ yaan u ahorrartaʼal maas tiʼ 3.5 millones de dólares. Tsʼoʼoleʼ yaan xan u yáantaj utiaʼal maʼ u sen afectartaʼal le baʼaxoʼob yaan naatsʼ tiʼoʼ.

 Le meyajoʼob beetaʼab tu sucursalil Angola yéetel Japónoʼ ku yeʼesik bukaʼaj meyaj kʼaʼabéet u beetaʼal tiʼ yaʼab sucursaloʼob utiaʼal u seguer u atenderkoʼob le congregaciónoʼob yanoʼob yáanal u nuʼuktajoʼ. ¡Yaʼab meyaj kʼaʼabéet u beetaʼal! Aaron, juntúul sukuʼun ku meyaj tiʼ le Departamento Mundial tiʼ Diseño yéetel Construcciónoʼ ku yaʼalik: «Kex yaʼab meyajoʼob tiʼ construcción tsʼoʼok u beetaʼaleʼ, u jaajileʼ yaʼab xan ku bineltikiʼ». Pero, ¿bix kun beetbil le meyajoʼobaʼ? Aaroneʼ ku seguer u yaʼalik: «Tuláakal le meyajoʼobaʼ ku béeytal yoʼolal le donaciónoʼob ku tsʼáaik tuláakal le sukuʼunoʼoboʼ. Pero jach k-tsʼáaik xan u graciasil tiʼ le sukuʼunoʼob ku taaloʼob áantaj teʼ construcciónoʼ bey xan tiʼ le táan u beetkoʼob planes utiaʼal ka taalakoʼoboʼ. Tuláakal le áantaj ku tsʼáaik le sukuʼunoʼoboʼ ku yeʼesikeʼ táan u bendecirkoʼon Jéeoba» (Salmo 110:3).

 Tuláakal le meyaj ku beetaʼal tiʼ construcción bey xan utiaʼal u yutskíintaʼal le jejeláas edificioʼoboʼ ku béeytal yoʼolal le donaciónoʼob ku tsʼaʼabaloʼ. Yaʼab tiʼ le donaciónoʼobaʼ ku beetaʼal ich Internet tiʼ donate.jw.org. ¡Jach diosboʼotik yoʼolal le donaciónoʼob ka tsʼáaikeʼexoʼ!