Tiʼ junpʼéel informe tsʼoʼok u yáax jóoʼsaʼaleʼ aʼalaʼabeʼ tu añoil 2022, tu chukaj 25 años káajak u meyaj le sitio jw.org yaan tiʼ u testigoʼob Jéeobaoʼ. Walajki diez años tu kʼiinil 27 tiʼ agosto tiʼ 2012, maas jatsʼutskíintaʼab bix u meyaj le sitiooʼ. Le xookaʼ yaan u tsolik bix tsʼoʼok u yáantik u millonesil máakoʼob yéetel maas táanileʼ yaan u jóoʼsaʼal uláakʼ kaʼapʼéel xookoʼob ku tʼaanoʼob xan tiʼ le sitioaʼ.

Videoʼob: Teʼ asambleaʼob beetaʼab tu añoil 2012, presentartaʼab kaʼapʼéel videoʼob tiʼ le jaats Beetaba u amigo Jéeoba. Leloʼobaʼ jóoʼsaʼaboʼob ich DVD, chéen baʼaleʼ maas koʼojchaj u beetaʼaloʼob tsʼoʼoleʼ pʼáat maʼ yaʼab máaxoʼob usartikiʼ. U maʼalobileʼ le ka actualizartaʼab le sitio jw.org tu añoil 2012, béeychaj xan u naʼaksaʼal videoʼobiʼ. Le oʼolal tu mesil enero tiʼ 2013, directo úuchik u naʼaksaʼal teʼ sitio le túumben kʼaay Kin orar sáamsamaloʼ. Desde leloʼ tsʼoʼok u naʼaksaʼal maas tiʼ 40 mejen videoʼob tiʼ le jaats Beetaba u amigo Jéeobaoʼ.

Tu añoil 2013 xaneʼ naʼaksaʼab ich Internet le video ¿Baʼaxten unaj a xokik le Bibliaoʼ? Le videoaʼ tiaʼan ichil le nuʼukuloʼob utiaʼal kaʼansajoʼ yéetel jach maʼalob utiaʼal u tsikbaltaʼal u Tʼaan Dios tiʼ le máakoʼoboʼ. Desde teʼ kʼiin jeʼeloʼ káaj u meyaj le sitio jw.org utiaʼal u naʼaksaʼal le videoʼob ku meyajoʼob utiaʼal u tsikbaltaʼal u Tʼaan Diosoʼ. Por ejemploeʼ tu mesil agosto tiʼ 2014 le ka beetaʼab le campaña yéetel le tratado ku meyaj utiaʼal u maas tsʼaʼabal kʼaj óoltbil le sitiooʼ, chaʼantaʼab yéetel descargartaʼab óoliʼ 15 millones videoʼob.

Juntúul sukuʼun áantajnaj utiaʼal u beetaʼal le sitiooʼ ku yaʼalik: «Jach tu muʼukʼaʼankúuntaj k-fe le ka t-ilaj bix tu yáantiloʼon Jéeoba yéetel le túumben meyaj t-beetoʼ. Mix t-tuukul ku máan kaʼach bukaʼaj utsil ken u taas tuláakal le meyaj t-beetaj yoʼolal le videoʼoboʼ». Chéen tu mesil octubre tiʼ 2014, le ka káaj u naʼaksaʼal u videoiloʼob JW Broadcasting teʼ sitiooʼ, maas tiʼ 37 millones videoʼob descargartaʼabi. Tu añoil 2020 le táan le COVID-19, maas yaʼabchaj u descargartaʼal yéetel u chaʼantaʼal videoʼob teʼ sitiooʼ. Jeʼex tu añoil 2022, descargartaʼab maas tiʼ 260 millones videoʼob cada mes.

Publicaciónoʼob: Teʼ kʼiinoʼobaʼ yaʼab máakeʼ maas uts tu tʼaan u yilik u xook tu celular wa tu tablet. Yaan máaxoʼobeʼ uts tu tʼaan u descargarkoʼob pero yaan xaneʼ uts tu tʼaan u xookoʼob directo teʼ Internetoʼ. Desde ka maas jatsʼutskíintaʼab bix u meyaj le sitio jw.org tu añoil 2012, le máakoʼoboʼ páajchaj u xokikoʼob le revistaʼob antes tiʼ u imprimirtaʼaloʼ. Le úuchik u káajal u naʼaksaʼal le publicaciónoʼob teʼ sitiooʼ jach nojoch bix úuchik u yáantaj utiaʼal u meyaj tiʼ máak le aplicación JW Library jóoʼsaʼab tu añoil 2013. Le aplicación yéetel le sitiooʼ jach maʼalob bix beetaʼaniloʼob jach ku yáantik máak utiaʼal u xook yéetel u xakʼalxook.

Kaʼach úuchileʼ le publicaciónoʼob ku presentartaʼal teʼ asamblea regionaloʼ hasta tak enero tiʼ le uláakʼ año táan u béeytal u naʼaksaʼaloʼob teʼ sitiooʼ. Pero teʼ asamblea regional beetaʼab tu añoil 2015, aʼalaʼabeʼ jeʼel u páajtal u descargartaʼal le publicaciónoʼob desde teʼ súutukiloʼ. Teʼ año jeʼeloʼ presentartaʼab le libro Jesús: le bejoʼ, le jaajoʼ yéetel le kuxtaloʼ, presentartaʼab xan le folleto Jéeobaeʼ u kʼáat ka suunakech yéetel le video ¿Jach wa tu jaajil yaabilaj? Tu añoil 2016 xaneʼ, teʼ programa JW Broadcasting tiʼ u mesil mayooʼ, le sukuʼun Anthony Morris juntúul sukuʼun tiʼ le Cuerpo Gobernanteoʼ tu presentartaj le folleto U núukil 10 preguntaʼob ku beetik le paalaloʼoboʼ, letiʼeʼ tu yaʼaleʼ jeʼel u páajtal u descargartaʼal le folleto desde teʼ súutukiloʼ. Lelaʼ letiʼe yáax juntéen úuchik u presentartaʼal junpʼéel publicación tiʼ tuláakal yóokʼol kaaboʼ.

U kaajal Dioseʼ desde úuch káajak u meyajtiʼ le tecnología utiaʼal u tsʼáaik kʼaj óoltbil baʼaxoʼob ken u beet le Reinooʼ yéetel utiaʼal u tsʼáaik le kaʼansaj ku keʼetel yéetel janal «jach tu yorailoʼ» (Mateo 24:45). ¡Jach kiʼimak k-óol k-ilik bix u yáantaj le sitio jw.org!

• Videoʼob ku descargartaʼal cada mes

• Jaytúul máakoʼob ku yookloʼob sáamsamal teʼ sitio ichil junpʼéel mesoʼ

• Enero tiʼ 2013, presentartaʼab le video Kin orar sáamsamal

• Octubre tiʼ 2013, káaj u meyaj le aplicación JW Libraryoʼ

• Agosto tiʼ 2014, tʼoʼox tiʼ tuláakal yóokʼol kaab le tratado áantajnaj utiaʼal u maas tsʼaʼabal kʼaj óoltbil le sitio jw.org

• Octubre tiʼ 2014, presentartaʼab JW Broadcasting

• Desde mayo tiʼ 2015, ku béeytal u descargartaʼal le publicaciónoʼob desde teʼ súutukiloʼob kéen presentartaʼakoʼob teʼ asamblea regionaloʼ.

• Mayo tiʼ 2016, tuláakal yóokʼol kaab páajchaj u yilik yéetel u descargartik le folleto U núukil 10 preguntaʼob ku beetik le paalaloʼoboʼ