Puranga yapuderi yapurandu Deus irum. Aé uputari pañhe miraita ta upurandu irum, ape ta upuderi ta upitá isumuara. (Salmo 65:2) Ma aé ti usendu pañhe oraçãoita. Deus ti usendu awá upuranduwaá irum ma unupá iximiriku u umuñhã puxiwerawaá ixupé. (1 Pedro 3:7) Deus ti usendu yuíri awá umuñhã maã puxiwerawaá ma ti upitá sasiara umuñhãwaá rupí. Mayété usasáwaá kuxiíma kuera imiraita irum. Ma mairamé yepé mira uxári ipuxiwerasá, Deus usendu aé.​—Releri Tiago 4:3; Ato 3:19.

Remaã kuá vídeo Será Deus Usendu Pañhe Oraçãoitá?

Yarikuté yapurandu añhu yané Muñhangara Jeová irum. Yawé yaxári ta ukuá yaruyari aé Deus retéwaá. (Mateu 4:10; 6:9) Yaprecisari yapurandu Deus irum Jesus rera rupí, ñhasé umanu yané pecado resewara. (João 14:6) Jeová ti uputari yayumbué añhu yepé maã yarikuãwaá yané akanga upé, ne yaleri ramé yepé livro upé. Yarikuté yapurandu irum yané pía suí.​—Releri Mateu 6:7; Filipowaraita 4:6, 7.

Deus usendu até yapurandu ramé irum yané manduarisá irum. (1 Samuel 1:12, 13) Yapuderi yaorari ma horantu: kuemeté, yasu yakiri ramé, yambaú ramé asuí yasasá ramé iwasuwaá rupí.​—Releri Mateu 15:36; 1 Pedro 5:7.

Iwasu awá Deus rumuarawaá supé uviveri arama miraita pitérupi tiwaita ta uruyari isesé, ne uruyari ipromessaita resé. (2 Timóteo 3:1, 4; 2 Pedro 3:3, 13) Ape, awáita ta usaisuwaá Deus asuí ta uputari ta umuñhã ivontade ta uprecisari ta uyumuatiri ta uyuajudari arama.​—Releri Ebreoita 10:24, 25.

 Puranga retana yaiku miraita ruaki ta usaisuwaá Deus, ñhasé umukirimbá yané amizade irum. Umbeusáita Jeová resé ta uyumuatiri ramé yamaã miraita ta uajudariwaá yamukirimbá arama yaruyariwaá.​—Releri Romawaraita 1:11, 12.

Yapitá arama Jeová rumuara, yaprecisari yayuka tempo yamanduari arama maã resé Biblía umbuéwaá. Remanduari maã resé Jeová umuñhãwaá, umbeuwaá resé asuí ipromessaita resé. Yamanduari ramé kuáita resé asuí yapurandu irum uajudari yakuá arama mayé Deus ugustari yandé asuí ukuáwaá.​—Releri Luka 11:28; Tiago 1:25.

Yaprecisari yuíri yaruyari Deus resé. Yaruyariwaá mayé yepé iwá yawé, uyukirari arama yaprecisari yamururu aé. Yaruyariwaá uyukirari asuí uyumukirimbá yayumbué ramé píri Deus resé.​—Releri Mateu 4:4; Ebreoita 11:1, 6.

Jeová umuñhakunta isumuaraita. Aé umukaturu yandé ti arama ne maã umbawa yané ruyarisá asuí yasaruwaá irum, aé uputari yaviveri pañhe ara. (Salmo 91:1, 2, 7-10) Aé uxári yakuá maã yarikuté yamuñhã yariku arama yepé saúde puranga asuí yaiku surí. Aé umbué mayé yapuderi yaviveri puranga píri.​—Releri Tiago 4:4, 8.