Apukalipisi 22:1-21
22 Asui umukame hamaa kua parana ii upakawaa umuturi werawerawaa kuaye kristalu yawe usemuwaa itrunu sui kua Deus kurderu yuiri.
2 Asui tetama rukara piterupi, asui parana rimbiwa upe suaxara kiti yuiri upuamu mirá upakawaa uriku iya duzi; asui umburi iya muiri yasi, asui kuaita sawa aintapusanga kuaita miraita.
3 Timaa kuri yamaa ape puxuwerawaita. Maa kuri ape itrunu kua Deus kua kurderu yuiri. Asui kuaita iyaraita aintaumee kuri ixupe purangawaa.
4 Aintaumaa kuri suwa, asui aintaruwa rese sera.
5 Asui tikuri pituna ape, asui timaa arama ainta supe turi, tiyuiri maa arama kurasi umuturi nyãse yaneruixawa Deus umuturi kuri aintarese, asui tuixawaita kuri ainta yawewarawate.
Supiwa kua nyenga
6 Asui umbeu ixe arama:
—Supiwa kua hambeuwaa yapuderi yaxari yanepia aintarese. Yaneruixawa aintaDeus kuaita espiritu uxariwaita aintautitika kuaita utitikawaita, umunduana ianju umukame arama ixupe aramawaita umaa kua usasawa kuri kutara.
7 Hayuiri kuri kutara. Suuri kuri kua uruyariwaa kua nyenga utitikawaa kua livru.
Umbeu anyu aramawaa
8 Ixe Juão aete kua usenduwaa umaawaa yuiri panye kua. Asui hasendu irumu hamaa irumu yuiri kua umukamewaa hamaa kua anju, asui hayawika ipi ruaki hamee arama maa ixupe purangawaa.
9 Asui umbeu ixe arama:
—Teremunya yawe, nyãse ixe yuiri ixupe aramawaa kuaye neyawe aintayawe yuiri kuaita nemuita, kuaita utitikawaita yuiri, aintayawe yuiri kuaita uruyariwaita kua livru nyenga. Remee Deus supe purangawaa.
10 Asui umbeu ixe arama:
—Teresikindawa selu irumu kua utitikawaita nyenga kua livru nyãse kuayentuana sangawa.
11 Pexari kua puxuwerawa umunya puxuwera, pexari ikiawaa aintapia kuaita ikiawaita, pexari kua purangawaa umunya xinga puranga, asui kua ikiaimawaa ipia pexari usikari uyumukaturu.
12 Hayuiri kuri kutara, haruri kuri seirumu sikuyara kua aintamuraki aintayaweyawe.
13 Ixete kua Alfa, Umega yuiri; ixete uyupirungawa, upawasawa yuiri; ixete kua uyupiruwaa, anyu aramawaa yuiri.
14 Suuri kuri kuaita umuyasukawaita aintarupa aintayara arama kua mirá upakawaa aintauwike arama ukena rupi tetama kiti.
15 Asui isui aintauiku kuri kuaita yawara, kuaita payeita yuiri, kuaita warixiwaita yuiri, kuaita uyukáwaita mira yuiri, kuaita aintaupuranduwaita idulu irumu yuiri, panye kuaita yuiri kuaita ugustariwaita marandua aintauganani arama.
16 Ixe Jesus, hamunduana seanju umbeu arama kua nyenga ainta supe kuaita ingreja puraita: Ixete sapu kua Davi, ximiariru ixe; ixete kua estrela kuemaitewara sendiwaa.
17 Asui kua Espiritu, kua nuiva yuiri aintaumbeu:
—Reyuiri. Asui awa usenduwaa umbeu:
—Reyuiri! Asui awa iisi rame inde reuri, awa uputari ixupe kua ii upakawaa sikuyaraimawaa, uri uyuka ae.
Teretrukari Deus nyenga
18 Asui panye kuaita usenduwaita kua utitikawaa kua livru hambeu ainta supe:
—Awa rame uputari umpinima umusasawa kua nyenga Deus uxari kuri upurara kuaye umpinimawaa yawe kua livru upe.
19 Awa rame uyuka inyenga sui kua utitikawaa sese kua livru, Deus kuri uyuka isui iparti kua mirá upakawaa kua tetama purangawaa yuiri, uyuka yuiri isui panye kua umpinimawaa sese kua livru.
20 Kua umbeuwaa supiwa kua nyenga, umbeu:
—Supiwa, kutara kuri hayuiri. Amem. Reyuiri inde Yaneruixawa Jesus.
21 Ipurangasawa kua yaneruixawa Jesus uiku peirumu muiri penye.
