Bo bana ba Isaeli badukisa nanga 40 di mimvu mu thandu, bawu banunga mavula mawombo mu mvita. Bosi bavitila mu thandu Moabi mu ndeku Mwila wu Yolidani, yiba thangu yi kusabuka mwila ayi kukota ku Ntoto Yave kaba kanikisa. Balaki, ntinu wu Moabi boma kaba. Nandi kaba mwena ti bana ba Isaeli baba tomba kubonga ntoto’andi. Diawu katumina dibakala baba tanguninanga Balami mwingi kasinga bana ba Isaeli.

Yave wukamba Balami: ‘Ngye wulendi ko kusinga bana ba Isaeli.’ Diawu nandi kamangina kukwenda. Balaki wubwe kuntumisa ntulu wumwadi, ayi wunkanikisa kumvana kyosokwa kima kantomba. Balami wubwe manga kwenda. Diawu Yave kankambila: ‘Ngye wulenda kwaku kwenda, vayi tuba to mambu yi kukamba.’

Balami wuyenda ku khonzo yi sude yi Moabi va yilu kibulu bantanguninanga phunda. Nandi kaba kwendila kuna, mu dyambu kusinga bana ba Isaeli mu mambu Yave kankandimina. Diawu mbasi yi Yave kamonikina kuntwal’andi mu khumbu zitatu. Balami kasa mona ko mbasi beni, vayi phunda kaba dyatila wumona. Khumbu yitheti, phunda wukota ku bititi. Khumbu yimwadi, mu thangu katelama vaba dimanya Balami wubunda kulu va dimanya beni. Vayi khumbu yintatu phunda wiza nonuka va tsi mu khati nzila. Balami bo kamona abobo wutona kumbula mu luswadi luba yandi.

Ntulu wuntatu wawu Yave kavangusa phunda kayoluka. Phunda yi yuvula Balami: ‘Mu kibila mbi wu kumbudila?’ Balami wunkamba: ‘Kibila mambu wumvanga, banga dilawu. Boti dikyeta yidi, khanu yima kuvonda.’ Phunda beni wumvutudila: ‘Mimvu miwombo yima kunatinanga. Khamba kilumbu mbi yimana kuvangila mambu amama?’

Bosi Yave wuvangusa Balami kamona mbasi yiba ku ntwal’andi. Mbasi wukamba Balami: ‘Yave be kukandimina wubika kwenda kusinga bana ba Isaeli ve!’ Balami wutuba: ‘Bukyedika dyambu dimbi  yidi mu kuvanga. Yamvutuka ku nzo.’ Vayi mbasi wunkamba: ‘Wulenda kwaku kwenda ku Moabi, vayi tuba to mambu Yave ka kukamba.’

Balami wulonguka dyambu mu mambu kamonikina? Ḿve. Kibila buvyokila thangu, nandi wubwe tomba kusinga bana ba Isaeli mu mintulu mitatu, vayi Yave wunkwika mwingi kasakumuna bana ba Isaeli. Mu thangu beni, bo bana ba Isaeli bayenda kanwana mvita na basi Moabi, Balami wufwa mu mvita beni. Mu mbwenu’aku boti Balami wuyuwila theti Yave khanu wufwa?