Ngenesi 48:1-22
48 Bosi bakamba Yozefi: “Tat’aku widi mu kubela.” Mu phila ayoyo, nandi wuyenda kuentala ayi wunata bana bandi ba babuadi Manase ayi Efraim.
2 Bakamba Yakobi: “Muan’aku Yozefi makuiza kutala.” Diawu Isaeli kavangila mangolo muingi kukotuka ayi wukala va kika.
3 Yakobi wukamba muan’andi Yozefi:
“Nzambi Nkua Ngolo Zioso wumbonikina ku divula di Luz didi ku ntoto wu Kanani ayi wutsakumuna.
4 Nandi wukhamba: ‘Minu yinkuiza kusadisa kubuta bana bawombo, ayi bawu bankuiza ba dikabu dinneni. Yinkuiza vana ntoto awuwu kuidi nkun’aku, muingi wuba kiuka kiawu ki mvu ka mvu.’
5 Buabu bana baku babuadi wubutidi ku ntoto wu Ngipiti ava minu yiza akuku, beka bama. Efraim ayi Manase bankuiza ba bama, dedi bo Rubem ayi Simioni badidi bana bama.
6 Vayi ngie kubue buta bana bankaka, bawu bankuiza ba baku. Ayi bawu mvawu bala tambula kiuka mu kuba zikhomba zi Efraim ayi Manase.
7 Bo tunanguka ku Padã, nkazi’ami Rakeli wufuila mu nzila ku ntoto wu Kanani ava tuvitila ku Efrata. Minu yinzikila mu nzila bo tuaba kuenda ku Efrata, voti Belém.”
8 Bosi bo Isaeli kavumuna thalu, wumona bana ba Yozefi ayi wunyuvula: “Abobo badi banani?”
9 Yozefi wuvutudila tat’andi: “Ababa bawu bana Nzambi kapheni ku ntoto awuwu.” Bosi Yakobi wutuba: “Lemvuka, wuba fikika avava muingi yiba sakumuna.”
10 Isaeli kabasa bue nunganga ko kumona buboti kibila wuba kiboba. Diawu Yozefi kaba fikikila vaba Yakobi, bosi nandi wuba vana besu ayi wuba bumbakana.
11 Isaeli wukamba muan’andi Yozefi: “Minu yabasa bue yindulanga ko ti yala bue kumona, vayi Nzambi matsadisa kumona mvandi bana baku.”
12 Yozefi wutatula bana bandi vaba Isaeli, bosi nandi wufukama vantual’andi ayi wuyinika kizizi kiandi va tsi.
13 Yozefi wubonga bana bandi babuadi: wusimba Efraim mu koko ku lubakala muingi kaba ku khonzu koko ku lukietu ku Isaeli, ayi wusimba Manase mu koko ku lukietu muingi kaba ku khonzu koko ku lubakala ku Isaeli, bosi wuba fikika vo vaba tat’andi Isaeli.
14 Kheti Efraim nandi wuba muana kilezi, Isaeli wutula koko kuandi ku lubakala ku ntu’andi, ayi wutula koko kuandi ku lukietu ku ntu wu Manase. Naveka Isaeli wuvanga mawu mu lutia kheti mu kuzaba ti Manase nandi wuba nkulutu.
15 Bosi Isaeli wusakumuna Yozefi ayi wutuba:
“Nzambi yikiedika no matata mami Abalahami ayi Isaki baba buongiminanga,
Nzambi yikiedika no wu kukhiebanga mu luzingu luama loso,
16 ayi no wusadila mbasi’andi muingi kukhula mu ziphasi ziama zioso, kasakumuna bana ababa.
Ayi bika dizina diama, di Abalahami ayi di Isaki diba dizabakana va khati’awu.Ayi bika mvil’awu wuba wuwombo va ntoto.”
17 Vayi bo Yozefi kamona ti, koko ku lubakala ku tat’andi Isaeli kuaba tatamana ku ntu wu Efraim, nandi kasa zola ko, diawu kamekina kubotula koko ku lubakala ku tat’andi ku ntu wu Efraim muingi kutula kuawu ku ntu wu Manase.
18 Yozefi wukamba tat’andi: “A papa bika kuvangila mu phila ayoyo, kibila Manase nandi muana wutheti. Diawu tetika koko kuaku ku lubakala ku ntu’andi.”
19 Vayi tat’andi Isaeli wumanga ayi wunkamba: “Muan’ama minu yizebi. Manase mvandi wunkuiza ba dikabu dinneni, vayi nkuna wu Efraim khomb’andi yi kilezi, wunkuiza luta ba wuwombo buka mimvila miwombo.”
20 Isaeli wutatamana kuba sakumuna muna kilumbu beni, bosi wutuba:
“Bika dikabu di Isaeli batangunanga dizina diaku mu thangu bansakumuna wunkaka mu kutuba:‘Bika Nzambi ka kusakumuna mu phila kasakumunina Efraim ayi Manase.’”
Mu phila ayoyo, Yakobi wutula Efraim vantuala Manase.
21 Bosi Isaeli wukamba muan’andi Yozefi: “Minu yembelama kufua, vayi Nzambi wala tatamana kuba yinu, ayi wala kuluvutula ku ntoto wu zikhaya zinu.
22 Minu yikuvana kitini ki ntoto kilutidi kena kio yimvana kuidi zikhomba ziaku, ntoto wo yibaka bo yinunga basi amorreu mu mvita.”
