Nkeu mbông éyi si ndeuè nguè épouô ménông shi’ wè lénang temi a ndoo sitsa’ fhô nteu Biible. (Psaume 37:29) Biible wè épô mékèté tè é ghô 66. Ndem lé lôk épouô épi lé wè temtesèt té ntôk 40 ndôk ntii. Moïse lé tii mvhô mékèté mèntaa tè ghô méngou’ 3500 té nzapté. Ngangto Jean a ping ntii nzôknzeum akèté Biible tè ghô méngou’ 1900 té ntôk. Wô tii Biible lé tii mékwangté wô? Ndem lé lôkô ajwaknè ndaané-laané zi té shoung-né a mbou wô tii Biible. (2 Samuel 23:2) Pô lè té mékwangté môp tii, pô lé tii émi Ndem. Ndôkô nguè, mékwangté Biible ntseum é fhô mbou Joovah.​—Tông-ô 2 Timothée 3:16; 2 Pierre 1:20, 21.

Jiô vidéo Mékwangté émi nteu Biible fhô mbou awô?

Mpè zhè nguè Biible si ngô akèté Ndem mela’mi, a la’nè kœuè, a shi’ ngnimné ntôk poup. Tsôô gning a ghô lé poup gheu. (Josué 23:14) Nda’ Ndem éteue tseum mè kou’ô lé shoung-ô ajoumi shi’ tè tôk anè lénang épouô ménông.​—Tông-ô Isaïe 42:9; 46:10.

Mè ghô zu’té nguè akèté zi fhô mbou Ndem a tswhi zi ntsi, Biible ping ngô poup. Mè lé fôk mébiible tè tôk mémilliard mbing nzeung ngapté anè méshoung-né méla’ té ntôk nkhœu. Té nfhou pa’ mè lé la’ ntii Biible, a pou shoung-ô akôlè anè scianci, a ghô anouneu. Anè épouô 40 té nzapté épi lé tii Biible, émô’ lè té shoung-ô azou anè ta’ athou ashoung-né, é pimô’ ping shoung ézi ndè’è. * Biible kwa’ nzeung nkuitè lé jiô nkông-né zi Ndem wè, mbing ngwè  pawa a lé koupné lénang épouô anè ntsi mbông. Métsoo mouô mèt mè gheu tè épouô  mémillion, é veung té mi’té nguè Biible si ngô kwa’ ashoung-nè Ndem.​—Tông-ô 1 Thessaloniciens 2:13.

Jiô vidéo Mpè ghô ghaa té nzhè nguè Biible shoung-ô anouneu?

Biible tswhi shoung-né anè ménda’né mbông émi Ndem si sang-a lé gheu é pooté anè épouô ménông. Biible kè’té shoung-ô ajoumi a lé gheu tè gning-nông a pii éshheu a lé nang té la’ nkwheu a nteu paradissi a ndoo sitsa’. A ping nzeung shoung pa’ a shi’ ghé zôkô, Ndem gheu poup tè sitsa’ zeung ntchi’è paradissi.​—Tông-ô Révélation 21:4, 5.

Ashoung-nè Ndem zeung ngwè mémbeu, pô ménteukné ngheu méntsuêté. Biible zeung mbêté shoung ntsi zi Ndem lé lôk ngôk poup pô épouô ménông éfœu’ mvhô—pêté mèt a ping nkuité lé zhè ntsi gning éyi Ndem a wuè. Ndôk ndeuè nguè Biible ghô kuitè wou lé zhè Ndem mbông-ô. A kè’té shoung pa’ o ghô gheu poup té ntchi’è éssoo yi.​—Tông-ô Psaume 19:7, 11; Jacques 2:23; 4:8.

Akèté jiô tsia anè ntsi zi Yésso lè ndôk nzi’nè épouô, é kuitè wou a lé jou’ô Biible mbông-ô. A lè nkimè ta’ ashoung-nè Biible, nkè’tè shoung-ô “ajoumi ashoung-nè Ndem lôk ndeuè” té mbing-è mbiè zi mô’.​—Tông-ô Luc 24:27, 45.

Métsoo émi pông pa’ ménkeu mbông émi nteu Biible é té tswhi nzaa. Téta’, émô’ épouô té lôk ntông-ô amô’ azou, a ping nzeung nguené pimô’. Ndè’ o kaa. O ku’né nzi’nè lé zhè Ndem, mbô é yè wou éshheu lé shi’ ngwè lénang temi.​—Tông-ô Jean 17:3.