GURUY NI 34
Uw Rogon ni Ngad Daged nib T’uf Jehovah Rodad?
Nap’an nim tabab i fil e Bible, ma gur, kam guy ni ke chugur e tha’ u thilmew Got? Ga baadag ni nge ulul ni nge chugur e tha’ u thilmew, fa? Faanra ga baadag, ma dab mu pagtalin ni faanra i guy Jehovah ni be gel feni t’uf rom, ma aram e ra i t’ufegem ma be ayuwegem. Ere uw rogon ni ngam dag nib t’uf rom?
1. Uw rogon ni gad ma dag ngak Jehovah nib t’uf rodad?
Faan gad ra fol rok Jehovah, ma aram e gad be dag nib t’uf rodad. (Mu beeg e 1 John 5:3.) Der ma towasariy be’ ni nge fol rok, ya ma pagdad ni ngad mel’eged ko ngad folgad rok fa danga’. Mang fan? Ya baadag ni ngad ‘folgad’ rok u polo’ i gum’ircha’dad. (Roma 6:17) Re n’ey e be yip’ fan ni baadag ni ngam fol rok ni bochan e ba t’uf rom, ma gathi bochan e ban’en nthingar mu rin’. Pi guruy ni bay u tan e Bin 3 nge 4 ko re ke babyor ney e kan ngongliy ni nge ayuwegem ni ngam rin’ e n’en nib m’agan’ Jehovah ngay, mag siyeg e n’en nde m’agan’ ngay ya nge yag nim dag nib t’uf rom.
2. Mang fan nrayog ni nge mo’maw’ ni ngad daged nib t’uf Jehovah rodad?
“En nib mat’aw e boor e gafgow ni ma yib ngak.” (Psalm 34:19) Gad gubin ndawor da flontgad. Ku rayog ni ngad mada’naged e magawon ko salpiy, ara un rin’ boch ban’en nde mat’aw ngodad, ara yugu boch e magawon. Nap’an ni gad ra mada’nag e magawon, ma rayog ni nge mo’maw’ ngodad ni ngad rin’ed e n’en baadag Jehovah. Re n’ey e bochan nib mom ndab da folgad rok. Machane nap’an ni ga ra rin’ e n’en baadag Jehovah u fithik’ e yul’yul’, ma aram e ga be dag ni kab gel feni t’uf rom ko tin ka bay ban’en, ma ka ga be dag ni gab yul’yul’ ngak. Ere angin nra yib riy e ku ra par nib yul’yul’ ngom, ma dabi digeyem.—Mu beeg e Psalm 18:25.
KUM FIL BOCH BAN’EN U MURUNG’AGEN
Mu fil fan nib ga’ fan u wan’ Jehovah e fol ni ga be tay, nge n’en nrayog ni nge ayuwegem ni ngam par ni gab yul’yul’ ngak.
3. Ban’en nib l’ag rogon ngom
Be yog fare babyor ko Bible ni Job ni gathi kemus ni yigoo Job e t’ar Satan e thin nga daken, ya kub muun ngay urngin e girdi’ ni yad baadag ni ngar pigpiggad ngak Jehovah. Mu beegew e Job 1:1, 6–2:10, mi gimew weliy e fulweg ko gal deer ni baaray:
-
Mang e yog Satan u murung’agen fan ni be fol Job rok Jehovah?—Mu guy e Job 1:9-11.
-
Mang e yog Satan u murung’agen urngin e girdi’ ni ka gab muun ngay?—Mu guy e Job 2:4.
Mu beegew e Job 23:11, 12, mi gimew weliy e fulweg ko re deer ni baaray:
-
Uw rogon ni micheg Job nriyul’ nib t’uf Jehovah rok?
I micheg Job nriyul’ nib t’uf Jehovah rok ni aram e i par nib yul’yul’ ngak
Gad ma micheg nriyul’ nib t’uf Jehovah rodad ni aram e gad ma par ni gad ba yul’yul’ ngak
4. Mu felfelan’nag Jehovah
Mu beegew e Proverbs 27:11, mi gimew weliy e fulweg ko gal deer ni baaray:
-
Uw rogon u wan’ Jehovah ni faan ga ra gonop ngam fol rok? Mang fan?
5. Rayog ni ngam yul’yul’ ngak Jehovah
T’ufeg rodad ngak Jehovah e ma k’aringdad ni ngad weliyed murung’agen ko girdi’. Gad ma rin’ e re n’ey ngki mada’ ko ngiyal’ nib mo’maw’ ngodad ni bochan e gad ba yul’yul’ ngak. Mu yaliyew e re VIDEO ney, mi gimew weliy e fulweg ko gal deer ni baaray.
-
Bay yu ngiyal’ nib mo’maw’ ngom ni ngam weliy murung’agen Jehovah ko girdi’, fa?
-
Mang e ayuweg Grayson ni nge dabki rus?
Ra mom ni ngad yul’yul’gad ngak Jehovah ni faanra ba t’uf rodad e pi n’en ni baadag ma gad ma fanenikay e pi n’en nib fanenikan. Mu beegew e Amos 5:15, mi gimew weliy e fulweg ko gal deer ni baaray:
-
Mang boch ban’en ni kam fil ni baadag Jehovah, ma mang boch ban’en ni ma fanenikan?
-
Uw rogon ni ngam fil rogon ni ngam adag e tin nib fel’ mag fanenikay e tin nib kireb?
6. Gad ra fol rok Jehovah ma ra yib angin ngodad
Gad ra fol rok Jehovah, ma gubin ngiyal’ nra yib angin ngodad. Mu beegew e Isaiah 48:17, 18, mi gimew weliy e fulweg ko pi deer ni baaray:
-
Rib mich u wan’um ni pi n’en ma yog Jehovah ni ngad rin’ed e gubin ngiyal’ nra yib angin ngodad, fa? Mang fan?
-
Ka nap’an nim tabab i fil e Bible kam nang Jehovah, ma mang boch i angin ni kam guy ni ke yib ngom?
MA GAAR BOCH E GIRDI’: “Gathi rib ga’ fan e ngongol rog u wan’ Got.”
-
Mang thin nu Bible e rayog ni ngam fanay ni ngam dag nib ga’ fan e ngongol rodad u wan’ Jehovah?
N’EN KAN FIL
Faan ga ra fol rok Jehovah mag par ni gab yul’yul’ ngak ni yugu aram rogon nib mo’maw’ ngom, ma aram e ga be dag nib t’uf rom.
Ngan Sul u Daken
-
Mang e kam fil ko n’en ni rin’ Job?
-
Uw rogon ni ga ra dag nib t’uf Jehovah rom?
-
Mang e ra ayuwegem ni ngam par ni gab yul’yul’ ngak Jehovah?
MU GAY MURUNG’AGEN
Mu guy rogon nrayog ni ngam par ni gab yul’yul’ ngak Jehovah nge ulung.
Kum fil boch ban’en u murung’agen e n’en ni yog Satan u murung’agen e girdi’.
“Job Keeps His Integrity” (The Bible—What Is Its Message? section 6)
Mu guy rogon nrayog ni nge dag e piin bitir nib t’uf Jehovah rorad.
Uw rogon nrayog ni nge par reb e fel’ yangaren nib yul’yul’ ngak Got ni yugu aram rogon ni be towasariy yugu boch e fel’ yangaren ni nge rin’ ban’en nib kireb?
