GURUY NI 23
Taufe e Aram Ban’en nib Manigil Nrayog ni Ngam Nameg!
I yog Jesus ni piin Kristiano e thingar ni taufenagrad. (Mu beeg e Matthew 28:19, 20.) Machane uw rogon nsusun e ngan taufenag be’? Ma mang e thingari rin’ be’ me yag ni nge un ko taufe?
1. Uw rogon nsusun e ngan taufenag be’?
Fare bugithin ni “taufe” e ke yib u bbugithin ni Greek ni be yip’ fan ni ngan “lithag” nga ar. Nap’an nni taufenag Jesus u lan fare Lul’ ni Jordan min lithag nga ar, ngemu’ me yib u ‘fithik’ e ran nga lang.’ (Mark 1:9, 10) Ere ku arrogon e tin riyul’ e Kristiano nrogon ni yima taufenagrad e aram e yima lithagrad nga ar.
2. Nap’an nra un be’ ko taufe, ma mang e be m’ug riy?
Nap’an nra un be’ ko taufe, ma aram e be m’ug riy ni ke ognag ir ngak Jehovah Got. Uw rogon ni ma ognag be’ ir ngak Got? U m’on ni ngan taufenag be’, ma aram e ra meybil ngak Jehovah ni yigoo ir me yog ngak ni baadag ni nge pigpig ngak ndariy n’umngin nap’an. Ra micheg ngak Jehovah ni kemus ni yigoo ir e nge liyor ngak, ma ra tay e tin nib m’agan’ ngay ni aram e n’en th’abi ga’ fan u lan e yafos rok. Ke dugliy ni nge ‘pag talin ir . . . nge lek’ Jesus ni aram e nge fol ko pi n’en ni i fil nge pi n’en ni i rin’. (Matthew 16:24) Nap’an nra ognag facha’ ir ngak Jehovah nge un ko taufe, ma aram e ke mab e kanawo’ ngak ni nge chugur e tha’ u thilrow nge piin yad ma liyor ngak.
3. Mang e ba t’uf ni nge rin’ be’ u m’on ni nge un ko taufe?
U m’on ni ngam un ko taufe, mab t’uf ni ngam fil murung’agen Jehovah mi ri mich u wan’um. (Mu beeg e Hebrews 11:6.) Nap’an nra ga’ e tamilangan’ rom ma be gel e michan’ rom i yan, ma aram e ra gel feni t’uf Jehovah rom. Aram e ngiyal’ ni ga ra adag ni ngam machibnag murung’agen ma ga be fol ko pi motochiyel rok. (2 Timothy 4:2; 1 John 5:3) Faanra be ngongol be’ ‘nrogon ni ba adag Somol, ma be rin’ e tin nib m’agan’ ngay ni gubin ngiyal’,’ ma aram e dabisiy nra adag ni nge ognag e yafos rok ngak Got me un ko taufe.—Kolose 1:9, 10. a
KUM FIL BOCH BAN’EN U MURUNG’AGEN
Mu guy e n’en nrayog ni ngad filed ko taufe ni un Jesus ngay nge n’en nib t’uf ni nge rin’ be’ u m’on ni nge rin’ e re n’ey nib ga’ fan.
4. Rayog ni ngad filed ban’en ko taufe ni un Jesus ngay
Mu beegew e Matthew 3:13-17 ni ngkum nangew boch ban’en u murung’agen e taufe ni un Jesus ngay. Tomuren mi gimew weliy e fulweg ko pi deer ni baaray:
-
Nni taufenag Jesus ni ka bochi tir, fa?
-
Uw rogon nni taufenag? Gur, kemus nni atngiy e ran nga daken?
Nap’an ni un Jesus ko taufe, me tabab ni nge rin’ ba maruwel nib ga’ fan ni pi’ Got ngak ni nge rin’ u fayleng. Mu beegew e Luke 3:21-23 nge John 6:38, mi gimew weliy e fulweg ko re deer ni baaray:
-
Mang maruwel e m’oneg Jesus u lan e yafos rok u tomuren ni un ko taufe?
5. Taufe e ban’en ni ga ra nameg ma rayog ni ngam rin’
Som’on e sana rayog ni ngam lemnag ndabiyog ni ngam ognagem ngak Got ngam un ko taufe. Machane faan ga ra ulul ni ngam fil murung’agen Jehovah mag nang nib fel’ rogon, ma aram e ra pagan’um ni ngam dugliy ban’en ni aray rogon nib ga’ fan. Mu yaliyew e re VIDEO ney ni be dag yaan boch e girdi’ nrin’ed e re n’ey.
Mu beegew e John 17:3 nge James 1:5, mi gimew weliy e fulweg ko re deer ni baaray:
-
Mang e ra ayuweg be’ ni nge bung rogon ni nge un ko taufe?
-
Ra ngad ognaged gadad ngak Jehovah, ma aram e nga dogned ngak ni gad baadag ni ngad pigpiggad ngak ndariy n’umngin nap’an
-
Nap’an ni gad ra un ko taufe, ma aram e gad be dag ko girdi’ ni kad ognaged gadad ngak Got
6. Nap’an ni gad ra un ko taufe, ma aram e kad manged bang ko tabinaw rok Jehovah
Nap’an ni gad ra un ko taufe, ma aram e kad manged bang u ba tabinaw ni bay u ga’ngin yang e fayleng nib taareban’ e girdi’ riy. Yugu aram rogon nib thilthil e nam nge rarogon e gin kad bad riy, machane ba taareb e michan’ rodad maku taareb rogon e motochiyel ni gad ma fol riy. Mu beegew e Psalm 25:14 nge 1 Peter 2:17, mi gimew weliy e fulweg ko re deer ni baaray:
-
Nap’an nra un be’ ko taufe, ma mang e ra rin’ ko tha’ u thilrow Jehovah nge piin yad ma liyor ngak?
MA GAAR BOCH E GIRDI’: “Dab kaa yag ni nggu un ko taufe.”
-
Faanra aray rogon e lem rom, ma ka ga baadag ni ngam nameg ni ngam un ko taufe, fa?
N’EN KAN FIL
I yog Jesus ni piin Kristiano e ba t’uf ni ngan taufenagrad. U m’on ni nge rin’ be’ e re n’ey, mab t’uf ni ngari mich Jehovah u wan’, me fol ko pi motochiyel rok, me ognag ir ngak.
Ngan Sul u Daken
-
Uw rogon nsusun e ngan taufenag be’? Mang nib ga’ fan ni nge un be’ ko taufe?
-
Nap’an nra un be’ ko taufe, ma mang e be m’ug riy?
-
Mang e ba t’uf ni nge rin’ be’ u m’on ni nge ognag ir ngak Got me un ko taufe?
MU GAY MURUNG’AGEN
Mu beeg rogon nsusun e ngan taufenag be’.
Mu beeg murung’agen boch e kanawo’ nrayog ni nge mon’og be’ riy nge un ko taufe.
Mu beeg murung’agen e n’en ni k’aring be’ nib pumoon ni nge un ko taufe.
Mu beeg fan ni taufe e aram ban’en nib manigil nrayog ni ngam nameg, nge n’en ga ra rin’ me bung rogom ni ngam un ko taufe.
“Should I Get Baptized?” (Questions Young People Ask—Answers That Work, Volume 2, chapter 37)
a Faanra kan taufenag be’ u barba’ e teliw, ma kub t’uf ni nge un ko taufe bayay. Mang fan? Ya ba’ nem e teliw ni i un ngay e der fil ko girdi’ e tin riyul’ u Bible.—Mu guy e Acts 19:1-5 nge Guruy ni 13.
