Got e de laniyan’ ma baadag ni nge tow’athnag urngin e girdi’.

I micheg Got ngak Abraham ni profet ni ‘urngin e nam nu fayleng e bay i fel’ waathrad ni bochan.’​—Genesis 12:3.

Mang e gad be fil riy? Ri gad ba t’uf rok Got ma baadag ni nge fal’eg waathan urngin e tabinaw u fayleng ni yad ma fol rok nib muun ngay e pumoon, nge ppin, nge bitir.

Got e ma runguyey ma ma tow’athnag e piin yad ma guy rogon ni ngar nanged.

Got ni Gubin Ma Rayog Rok e pi’ gelngin Moses ni profet ni nge ngongliy boch e maang’ang ni yira ngat ngay. Yugu aram rogon me meybil Moses ni gaar: “Ngam weliy ngog e tin ni kam lemnag ni ngam rin’, nge yog ni gu nang lanin’um.” (Exodus 33:13) Ba m’agan’ Got ko n’en ni ning Moses, ma aram me tow’athnag ni aram e ga’nag e tamilangan’ rok miki ayuweg ni nge nang e tin ke lemnag ni nge rin’ nge pi fel’ngin. Bod ni fil Moses ni En Ke Sunmiy urngin ban’en e ir reb e Got “nri ma runguy e girdi’ ma ma kireban’ ngorad.”​—Exodus 34:6, 7.

Mang e gad be fil riy? Baadag Got ni nge tow’athnagdad ni gad gubin nib muun ngay e pumoon, nge ppin, nge bitir ni faan gad ra athamgil ni ngad nanged rarogon nib fel’ rogon. Ke dag ngodad u lan e Babyor nib Thothup rogon ni ngad liyorgad ngak, ma kki dag rogon feni ri baadag ni ngad fel’gad u wan’ me tow’athnagdad.

Faan gad ra fil murung’agen Jesus nge pi n’en ni i rin’ nge pi n’en ni i fil ko girdi’, ma aram e rayog ni nge yag e pi tow’ath rok Got ngodad nra par ni manemus.

Boor ban’en u lan e Thin rok Got ni murung’agen e pi n’en ni i rin’ Jesus nge pi n’en ni i fil ko girdi’. I pi’ Got gelngin Jesus ni nge ngongliy boor e maang’ang ni bod ni i golnag e piin nib malmit, nge piin nib biling, nge piin nib mugutgut. Mus ko piin kar m’ad ni i fasegrad. I dag Jesus rarogon e pi tow’ath nra pi’ Got ko girdi’ boch nga m’on. I weliy rogon nrayog ni ngad felfelan’gad ko pi tow’ath nem. I gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Jesus e ir be’ ni ma kireban’ ko girdi’, mab sumunguy, ma kub gol. Urngin e girdi’ nib muun ngay e pumoon, nge ppin, nge bitir, nge pilibthir e ra bad ngak u nap’an ni yog ni gaar: “[Mu folwokgad] rog, ya gub munguy ma gub sobut’an’; mi gimed pirieg e toffan.” (Matthew 11:29) Jesus e ba thil ngak boch e girdi’ ni ur moyed kakrom ni yad ma gafgownag e ppin, ya ma dag e sumunguy ko piin nib pin ma ma tay farad.

Mang e gad be fil riy? Ri ma t’ufeg Jesus e girdi’, ma ke dag e kanawo’ u rogon e ngongol ni nge bagadad mi i dag ngak bagadad.

Be fil fare Babyor nib Thothup ni “ri taareb e Got rodad ni ba’,” ma Jesus Kristus e ir e tamol’og rok Got nib sobut’an’. (1 Korinth 8:6) I tamilangnag Jesus ni Got e kab tolang ngak, maku Got e ir e ke l’og ke yib nga fayleng.​—John 11:41, 42; 14:28. *