Bay boch e tow’ath nib ga’ fan u wan’dad ni bochan e en ni ke pi’ ngodad e ir be’ nib tolang e liw rok ara ir be’ ni gad ma tayfan. Ku bay boch e tow’ath ni yugu aram rogon nde tolang puluwon, machane ba ga’ fan u wan’dad ni bochan e ke pi’ reb i chon e tabinaw rodad nib t’uf rodad ara reb e fager rodad ni ma pagan’dad ngak. Aram rogon fare tow’ath ni pi’ Russell ngak Jordan ni faan kad weliyed murung’agen ko fa binem e article ni ke yan. Machane, mang rogon e re n’ey ko fare biyul ni kan pi’ nib tow’ath?

Som’on e, be yog e Bible ni ke “l’og [Got] Fak ni kari maagirag rok ngaray nga fayleng ni fan e nge yog e yafos ngodad u daken.” (1 John 4:9) Bochan e re n’ey, ma aram fan nrib ga’ fan e re tow’ath ney. Dariy be’ nib tolang ngak Got. I yoloy reb e psalmist ni ir reb e Hebrew murung’agen Got ni gaar: “Kemus ni gur e Somol, ni gur fare tagagiyeg Nib Th’abi Tolang u polo’ e fayleng.” (Psalm 83:18, BT) Dariy be’ ni kab tolang ngak Got nrayog ni nge pi’ reb e tow’ath ni aray rogon.

Bin migid e, Got e ir e ‘chitamangidad.’ (Isaiah 63:16) Ni uw rogon? Ir e ke pi’ e yafos ngodad. Maku reb e, ma ayuwegdad ni bod rogon reb e matam ni ma ayuweg pi fak. Nap’an ni be non ngak boch e girdi’ rok kakrom, me yog ni gaar: “Israel, i gur fakag ni pumoon nri gab t’uf rog, ni fare tir ni ir e ba th’abi t’uf rog. . . . Ga bay u lanin’ug ni gab t’uf rog; ri bay gu runguyem.” (Jeremiah 31:20) Ku aray rogon ni ma lemnag Got e pi tapigpig rok e ngiyal’ ney. Gathi kemus ni ir e En ni Ke Sunmiydad ni gubin ma rayog rok, ya ku ir e Chitamangidad nge Fager rodad nib yul’yul’ ngodad. Faanra aray rogon, me ere gathi gubin e tow’ath nra pi’ ngodad nra ga’ fan u wan’dad?

Bay boch e tow’ath nib ga’ fan u wan’dad ni bochan e kan pi’ ngodad u fithik’ e t’ufeg, ma gathi bochan e ban’en nthingar ni rin’. Be’ ni ma pi’ ban’en u fithik’ e gol e der ma lemnag ni ngan pi’ puluwon ngak.

I pi’ Got Fak ni fan ngodad ni bochan e gad ba t’uf rok. Be gaar e Bible, “Baaray rogon ni dag Got ni gadad ba t’uf rok: i l’og Fak ni kari maagirag rok.” Mang fan ni ke rin’ e re n’ey? “Fan e nge yog e yafos ngodad u daken.” (1 John 4:9) Gur, bay rogon ni nge rin’ Got e re n’ey? Danga’! Fare biyul ni pi’ Kristus Jesus e aram rogon ni ke dag Got e “runguy rok ngak e girdi’.”​—Roma 3:24.

Mang fan nre tow’ath ney ni ke pi’ Got e aram rogon ni ke dag e “runguy” rok ngak e girdi’? Be gaar e Bible: “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Roma 5:8) T’ufeg rok Got ndariy e lem ni fel’ ngak riy e aram e n’en ni ke k’aring ni nge rin’ ban’en ni fan ngak e girdi’ ni tadenen, ma yad ba meewar ndabiyog ni ngar ayuweged yad. Re n’ey e gathi puluwon ban’en ni kad maruweliyed ni nge yag ngodad, maku ban’en ndabiyog ni ngad pied puluwon ngak. Re tow’ath ney ni ke pi’ Got ngodad e aram e bin th’abi fel’ e kanawo’ ni ke dag be’ e t’ufeg rok riy.

Bay boch e tow’ath nib ga’ fan u wan’dad ni bochan e ri boor ban’en ni ke pag be’ fan ya nge yag ni pi’ fare tow’ath ngodad. Faanra m’agan’ be’ ngay ni nge t’ar laniyan’ u ban’en nrib ga’ fan ngak me pi’ ngodad nib tow’ath, ma rra ga’ fan fare tow’ath u wan’dad.

Ke pi’ Got “Fak ni kari maagirag rok.” (John 3:16) Ke pi’ ngodad e en nth’abi t’uf rok. Nap’an ni sunmiy Got e palpalth’ib u lan bokum milyon e duw, ma immoy Jesus rok ni yow be maruwel u taabang, ma gubin ngiyal’ ni i ‘par rok nib felfelan’.’ (Proverbs 8:30) Jesus e ir “Fak” Got nib t’uf rok ma “taareb rogon yaan ngak.” (Kolose 1:13-15) Dariy l’agruw ni’ ni aram feni chugur e tha’ u thilrow.

Yugu aram, me pi’ Fak ni “fan ngodad ni gadad gubin nde yog ni nge tel!” (Roma 8:32) Ke pi’ Jehovah e en nth’abi t’uf rok ngodad. Dariy reb e tow’ath ni ke pi’ nib tolang puluwon ni bod e re tow’ath ney.

Bay boch e tow’ath nib ga’ fan u wan’dad ni bochan e ra ayuwegdad u ban’en nrib t’uf rodad. Bod ni, faanra ba t’uf ni ngan tafalaynagem u ba mit e m’ar ni ga ra yim’ riy, machane dabiyog puluwon fare tafalay rom, ma aram me ognag be’ ir ni nge pi’ puluwon e tafalay rom, mab mudugil nri ga ra pining e magar ngak! Riyul’ nra yan i aw ni fare tow’ath ni ke pi’ facha’ ngom e ba tow’ath ndabiyog puluwon.

“Rogon ni ma yim’ urngin e girdi’ ni bochan e yad taab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar taab girdi’gad Kristus.” (1 Korinth 15:22) Bochan ni kad bad rok Adam, ma aram fan ni gad gubin ni gad ma “yim’,” ma dabiyog ni ngad chuwgad u tan gelngin e m’ar nge yam’, ara gadad rodad e ngad mat’awnaged gadad ngak Got ma gad chuw u tan wenegan e denen. Ma bochan ni gad bogi tadenen, ma aram fan ndabiyog ni ngad ‘faseged’ gadad ara be’ ko yam’. Be tamilangnag e Bible ni be gaar: “Girdi’ e dabiyog ni nge biyuliy ir ngak Got, dabiyog ni nge pi’ puluwon e pogofan rok ngak Got . . . Ya n’en ni nge pi’ ni puluwon ni fan e nge dab ki yim’ . . . e dabi gaman puluwon rok.” (Psalm 49:7-9) Riyul’ nrib t’uf e ayuw rodad, ya dabiyog puluwon fare biyul rodad. Ere, faanra digeydad Got ma dabiyog ni ngad ayuweged gadad.

Bochan nri gad ba t’uf rok Jehovah, ma aram fan ni ke pi’ e athap ngodad u daken Jesus ya nge dab kud ‘m’ad.’ Re n’ey e rayog ni ngan taareb rogonnag ko fare “tafalay” ni ngad uned ngay nra ayuwegdad ni nge dab da m’ad. Uw rogon ni ke yag ni nge buch e re n’ey u daken fare biyul? “Rachaen Jesus ni Fak e ir e be beechnagdad u urngin e denen rodad.” Arrogon, faanra mich u  wan’dad fare biyul ni ke pi’ Jesus, ma aram e rayog ni nge mab e kanawo’ ngodad ni ngan n’ag fan e denen rodad me yag e yafos ndariy n’umngin nap’an ngodad. (1 John 1:7; 5:13) Ma mang e ra rin’ fare biyul ngak e piin ni kar m’ad ni yad ba t’uf rodad? “Bod rogon ni yam’ e yib ni bochan taareb e girdi’, e aram rogon ni fos ko yam’ e yib ni bochan taareb e girdi’ [ni aram Jesus].”​—1 Korinth 15:21. *

Dariy reb e tow’ath ni ke pi’ Got ngodad ara ke m’ug gelngin e t’ufeg rok riy ngodad ni bod rogon fare maligach ni pi’ Jesus. Maku dariy be’ ni ke pag fan boor ban’en ni fan ngodad ni bod rogon Jehovah Got. Maku dariy reb e tow’ath ni kan pi’ nrayog ni nge ayuwegdad ko n’en nib t’uf rodad ni bod rogon fare biyul ni kan pi’ ni ir e ke chuwegdad u tan gelngin e denen nge yam’. Arrogon, dariy reb e tow’ath nrib ga’ fan ni bod rogon fare biyul.