1. Mang fan ni ma magafan’dad, ma mang e rayog ni ngad lemnaged ni bochan e re n’ey?

BAY ba ngiyal’ ni kari magafan’um nib gel, fa? * Sana rayog ni ke magawon lanin’um ni bochan ban’en ni ke yog be’ ara ke rin’ ni ke kirebnag lanin’um. Fa rayog ni be magafan’um ni bochan ban’en ni ka mog ara kam rin’. Bod nsana rayog ni kam rin’ reb e oloboch ma be magafan’um nri chey ma dabi n’ag Jehovah fan. Ere rayog ni ngam lemnag ni ke war e michan’ rom, ma gur be’ ni gab kireb ni bochan e be magafan’um nib pag rogon. Machane gur, riyul’ e re n’ey, fa?

2. Mini’ boch e girdi’ ni bay murung’agrad u Bible ni be dag ni faanra be magafan’dad ma gathi aram e be yip’ fan ni ke war e michan’ rodad?

² Am lemnag boch e girdi’ ni bay murung’agrad u Bible. Hannah ni mang chitiningin Samuel ni profet e ir be’ nrib gel e michan’ rok. Machane bay ba ngiyal’ ni i par ni be mochuch u nap’an ni tabab be’ u lan e tabinaw rok i rin’ boch ban’en ni i kirebnag laniyan’. (1 Sam. 1:7) Apostal Paul e ir be’ ni kub gel e michan’ rok, machane ku da i ‘paslag laniyan’ ni bochan e be lemnag urngin e galesiya i yan.’ (2 Kor. 11:28) David ni Pilung e kub gel e michan’ rok, ma aram fan nrib t’uf rok Jehovah. (Acts 13:22) Yugu aram rogon, ma bay boch e oloboch ni rin’ David nri magawonnag laniyan’. (Ps. 38:4) Pi girdi’ ney e yad gubin ni fal’eg Jehovah lanin’rad. Ere ngad weliyed e n’en nrayog ni ngad filed rorad.

3. Mang fan nrayog ni nge magawon lanin’dad u nap’an ke yog be’ ban’en ngodad nib kireb?

³ Nap’an nra yog ara rin’ be’ ban’en ngodad nib kireb, ma rayog ni nge magawon lanin’dad, nib ga’ ni faanra facha’ e ir reb e fager rodad ara girdi’ rodad. Rayog ni nge magafan’dad ya gad be lemnag ni aram e ke kireb thildad facha’. Yu ngiyal’ e facha’ ni ke kirebnag lanin’dad e rayog ni gathi lem rok ni nge yog fapi thin nib kireb, machane rayog ni kari kireban’dad ni bochan e n’en ke yog! (Prov. 12:18) Fa reb e rayog ni lem rok be’ ni nge yog ban’en ni nge kirebnag lanin’dad. Bay reb e walag nib pin ni ke buch e re n’ey rok. I gaar: “Fa in i duw ni ke yan, ma bay be’ ni ug lemnag nrib pach e thin romow ni tabab ni nge wereg boch ban’en nde riyul’ u murung’ageg u online. Ri kireban’ug ko re n’ey miki magawon lanin’ug. Da gur nang fan ni nge rin’ ban’en ngog ni aram rogon.” Faanra bay reb e fager rom ara girdi’ rom ni ke yog ara ke rin’ ban’en ni ke kirebnag lanin’um, ma boor ban’en nrayog ni ngam fil rok Hannah.

4. Mang boch e magawon nib mo’maw’ ni i mada’nag Hannah?

⁴ Bay boch e magawon nib mo’maw’ ni i mada’nag Hannah. Boor e duw ni i par nder yag ni nge diyen. (1 Sam. 1:2) Rogon ko yalen rok piyu Israel e be’ nib pin nder yag ni nge diyen e yima lemnag nib buch waathan. Ere aram fan nrib gel e tamra’ ni i tay Hannah. (Gen. 30:1, 2) Ku bay ban’en ni i buch ni ki yon’ daken e magawon rok Hannah. Bay yugu reb e ppin ni leengin e pumoon rok ni ka nog Peninnah ngak ni boor fak. I awan’ Peninnah ngak Hannah, ma i “yog e thin nib kireb ngak” ni bochan e nge kirebnag laniyan’. (1 Sam. 1:6) Som’on e rib gel e kireban’ ni i tay Hannah ni bochan e pi n’en be buch rok. I par ni “be yor ma dakir kay ban’en” ya “kari kireban’.” (1 Sam. 1:7, 10, BT) Ere uw rogon ni fel’ laniyan’ Hannah?

5. Uw rogon ni ayuweg e meybil Hannah?

⁵ I weliy Hannah urngin ban’en ni bay u laniyan’ ngak Jehovah u daken e meybil. Tomuren ni mu’ ko meybil, ma aram me weliy salpen ngak Eli ni ir e En Th’abi Tolang ko Prist. Ma aram me gaar Eli ngak Hannah: “Mman u fithik’ e gapas, mi Got, ni Got rok piyu Israel e nge pi’ ngom e tin ni ga be wenignag ngak.” Ere mang e buch nga tomuren? I yan Hannah “me abich ni ke chuw e kireban’ rok.” (1 Sam. 1:17, 18) Meybil e ayuweg Hannah ni nge gapas laniyan’.

6. Mang e rayog ni ngad filed rok Hannah nge fare thin ni bay ko Filippi 4:6, 7 u murung’agen e meybil?

⁶ Faanra ud tedan’dad ko meybil, ma rayog ni nge gapas lanin’dad. Ba n’uw nap’an ni i non Hannah ngak e Chitamangin ni bay u tharmiy.  (1 Sam. 1:12) Ku arrogodad nrayog ni ngad nonad ngak Jehovah nib n’uw nap’an ma gad weliy ngak e tin be magafan’dad ngay, nge tin be k’aring e marus ngodad, nge pi meewar rodad. De t’uf ni ngad weliyed gubin ban’en nrib fel’ rogon u nap’an e meybil. Bay yu ngiyal’ nrayog ni ngad yorgad u nap’an ni gad be weliy e kireban’ rodad ngak Jehovah. Yugu aram rogon, ma dabi chalban Jehovah ni nga i motoyil ngodad. Kub t’uf ndab da paged talin fare fonow ni bay ko Filippi 4:6, 7. (Mu beeg.) I tamilangnag Paul nsusun e ngaud pininged e magar ngak Jehovah u daken e meybil. Boor fan ni ngad pininged e magar ngak Jehovah. Bod nrayog ni ngad pininged e magar ngak ko yafos rodad ni ke pi’ nib tow’ath, nge tin ke sunmiy nib fel’ yaan, nge t’ufeg ni ma dag u fithik’ e yul’yul’, nge athap rodad ni ke pi’ nrib manigil. Ku mang e rayog ni ngad filed rok Hannah?

7. Mang e ma rin’ Hannah nge pumoon rok ni gubin ngiyal’?

⁷ Yugu aram rogon ni bay e magawon rok Hannah, machane gubin ngiyal’ ni ma un ko pumoon rok u nap’an nra yan nga tagil’ e liyor rok Jehovah u Shiloh. (1 Sam. 1:1-5) Nap’an ni bay Hannah u tabernacle me yog Eli ni ir e En Th’abi Tolang ko Prist ngak ni be athapeg ni manga yigi fulweg Jehovah taban e meybil rok, ma re n’ey e ri fal’eg laniyan’.​—1 Sam. 1:9, 17.

8. Uw rogon nrayog ni nge ayuwegdad e muulung? Mu tamilangnag.

⁸ Faanra ud uned ko muulung ni gubin ngiyal’, ma rayog ni nge gapas lanin’dad. U m’on ni gad ma tabab ko muulung, mab ga’ ni ma meybil reb e walag ni pumoon me ning gelngin Got nib thothup ni nge pow’iydad u nap’an e muulung. Gapas e aram bang u wom’engin gelngin Got nib thothup. (Gal. 5:22) Gad ra un ko muulung ni yugu aram rogon ni be magafan’dad nga boch ban’en, ma aram e gad be bing e kanawo’ ngak Jehovah nge pi walagdad u lan e ulung ni ngar pied e athamgil nga lanin’dad, mar ayuweged gadad ni nge gapas lanin’dad. Meybil nge muulung e aram l’agruw e kanawo’ nib ga’ fan ni ma fanay Jehovah ni nge fal’eg lanin’dad. (Heb. 10:24, 25) Ngkud weliyed reb e ban’en nrayog ni ngad filed ko n’en ni buch rok Hannah.

9. Mang e de thil ko n’en ni i buch rok Hannah, machane mang e ayuweg?

⁹ Re magawon nem ni i k’aring e mochuch ngak Hannah e de chuw ni ka chingiyal’ nem. Nap’an ni sul Hannah nga tafen u tomuren ni ke mu’ ko liyor u tabernacle, ma thingar ki par u taab tabinaw ni ma par Peninnah riy. Ku der yog e Bible ni thilyeg Peninnah e ngongol rok. Ere ba mudugil nthingar ki ulul Hannah ni nge k’adan’ u fithik’ e thin nib kireb ni be yog Peninnah ngak. Machane daki kireban’ Hannah ko n’en ni i rin’ Peninnah ngak. Nap’an ni pagan’ Hannah ngay ni ke rung’ag Jehovah e meybil rok, ma aram e daki magafan’ ko magawon rok. I pag Jehovah ni nge fal’eg laniyan’. Boch nga tomuren me fulweg Jehovah taban e meybil rok Hannah, ma aram me yag ni nge fakay e bitir!​—1 Sam. 1:19, 20; 2:21.

10. Mang e gad be fil ko n’en ni buch rok Hannah?

¹⁰ Rayog ni nge gapas lanin’dad ni yugu aram rogon nder chuw e magawon rodad. Yugu aram rogon ni gad ma tedan’dad ko meybil ma gad ma un ko muulung ni gubin ngiyal’, machane bay boch e magawon rodad nsana dabi chuw. Machane kad filed ko n’en ni buch rok Hannah ndariy ban’en nrayog ni nge taleg Jehovah ndabi fal’eg lanin’dad. Dabi pag Jehovah tildad, ma ra tow’athnagdad ni bochan e yul’yul’ rodad.​—Heb. 11:6.

11. Mang boch i fan ni i magafan’ Paul?

¹¹ Boor fan ni i magafan’ Paul. Bochan nrib t’uf pi walagen rok, ma aram e i magafan’ ngorad ko magawon ni yad be mada’nag. (2 Kor. 2:4; 11:28) Nap’an ni i rin’ Paul e maruwel rok ni ir reb e apostal, ma piin ur togopuluwgad ngak  e ba ga’ ni ur toyed ma yad be yon’ nga kalbus. Ku immoy boch e magawon ni i yan u fithik’ ni k’aring e magafan’ ngak ni bod rogon e “gafgow” ni i tay ni bochan boch ban’en ndakuriy rok. (Fil. 4:12) Maku bochan ni dalip yay ni pil e barkow ngak, mab mudugil ni kub gel e magafan’ ni i tay u nap’an ni be milekag u barkow. (2 Kor. 11:23-27) Ere mang e ayuweg Paul u nap’an ni i magafan’?

12. Mang e ayuweg Paul ni nge war e magafan’ rok?

¹² I magafan’ Paul ngak pi walagen u nap’an ni ur mada’naged e magawon, machane de guy rogon ni nge pithig gubin e pi magawon rorad ni yigoo ir. Manang ndabiyog ni nge rin’ gubin ban’en ni yigoo ir. Ere yog ngak boch e walag ni ngar uned ngak ngar ayuweged e ulung. Bod ni, boor e maruwel ni pag fan ngak boch e pumoon ni be pagan’ ngorad ni bod Timothy nge Titus. Maruwel ni i rin’ e pi walag ni pumoon nem e dariy e maruwar riy ni ayuweg Paul ni nge war e magafan’ rok.​—Fil. 2:19, 20; Titus 1:1, 4, 5.

13. Uw rogon nrayog ni nge folwok e piin piilal rok Paul?

¹³ Mu ning e ayuw ngak yugu boch e girdi’. Boor e piilal e ngiyal’ ney ni yad bod Paul ni ma magafan’rad ko pi walag u lan e ulung ni yad be mada’nag e magawon. Machane dabiyog ni nge ayuweg taareb e piilal gubin e walag u lan e ulung. Faanra nang reb e piilal ndabiyog ni nge ayuweg gubin e walag u lan e ulung ni yigoo ir, ma aram e ra ning e ayuw ngak yugu boch e piilal u lan e ulung, miki skulnag boch e walag ni ka yad ba pagel ni ngar uned ngak i ayuweg e pi saf rok Got.​—2 Tim. 2:2.

14. Mang e de magafan’ Paul ngay, ma mang e rayog ni ngad filed ko n’en ni rin’?

¹⁴ Ngam nang nib t’uf ni ngan fal’eg lanin’um. Paul e ir be’ nib sobut’an’, ere manang nib t’uf ni nge fal’eg e pi fager rok laniyan’. De magafan’ ngay nri chey me lemnag yugu boch e girdi’ nib meewar ni bochan e be pi’ e pi fager rok e athamgil nga laniyan’. Nap’an ni be yol Paul ngak Filemon, me yog ngak ni gaar: “T’ufeg rom, i gur walageg ni gab t’uf rog, e ba gel e felfelan’ ni ke pi’ ngog, ma ba ga’ e athamgil ni ke pi’ nga lanin’ug!” (Filem. 7) Ki weliy Paul murung’agen boch e walag ni ur maruwelgad u taabang nrib gel e athamgil ni ur pied ngak ko ngiyal’ ni ke kireban’. (Kol. 4:7-11) Faanra da sobut’naged lanin’dad ngad nanged nib t’uf ni ngan pi’ e athamgil ngodad, ma ra felfelan’ pi walagdad ni ngar ayuweged gadad u rogon kanawoen nib t’uf rodad.

15. Mang e rin’ Paul u nap’an ni buch ban’en rok ni k’aring e mochuch ngak?

¹⁵ Mu taga’ ko Thin rok Got. Manang Paul nra fal’eg e Thin rok Got laniyan’. (Rom. 15:4)  Manang ni ku ra pi’ e pi thin nem e gonop ngak ya nge yag ni athamgil ndemtrug e re miti magawon ni ke mada’nag. (2 Tim. 3:15, 16) Nap’an nni kalbusnag Paul u Roma ko yay ni gaman e l’agruw ngay, ma aram me lemnag ni bayi yim’. Ere mang e rin’ u nap’an ni buch e re n’ey rok nri k’aring e mochuch ngak? I yog ngak Timothy ni nge yib i guy nib papey ma nge fek “fa yu ke babyor.” (2 Tim. 4:6, 7, 9, 13) Mang fan? Bochan nrayog ni pi babyor nem e aram yu yang ko Pi Babyor ko Bible nni Yoloy Nsom’on ni Thin ni Hebrew nrayog ni nge fanay u nap’an ni be fil e Bible ni yigoo ir. Faan gad ra folwok rok Paul ngaud filed e Thin rok Got ni gubin ngiyal’, ma aram e ra fanay Jehovah e Thin rok ni nge fal’eg lanin’dad ndemtrug e re miti magawon ni gad be mada’nag.

16. Mang e rin’ David nri k’aring e magafan’ ngak?

¹⁶ Bay ban’en ni rin’ David ni magawonnag e nangan’ rok. Ra parew Bath-sheba ni leengin be’, me makathnag ni ngan li’ e pumoon rok nge yim’, miki guy rogon ni nge mithag e kireb ni ke rin’. (2 Sam. 12:9) Som’on e guy rogon ni nge dabki motoyil ko nangan’ rok. Machane re n’ey e magawonnag e tha’ u thilrow Jehovah, miki k’aring e kireban’ nge m’ar ngak. (Ps. 32:3, 4) Mang e ayuweg David ni nge athamgil u fithik’ e magafan’ ni i tay ni bochan e kireb ni ke rin’, ma mang e rayog ni nge ayuwegdad ni faanra kad rin’ed reb e denen nib ubchiya’?

17. Uw rogon nrayog ni ngad guyed ko fapi thin ko Psalm 51:1-4 ni kari kal David ngan’ ko n’en ke rin’?

¹⁷ Mmeybil ni ngan n’ag fan e kireb rom. Munmun ma aram me meybil David ngak Jehovah. Ri kalngan’ ko kireb rok me yog ngak Jehovah urngin ban’en ni ke rin’. (Mu beeg e Psalm 51:1-4.) Bochan e re n’ey, ma aram me yag ni nge gapas laniyan’ miki felfelan’ bayay! (Ps. 32:1, 2, 4, 5) Faanra kam ngongliy reb e denen nib ubchiya’, ma dab mu guy rogon ni ngam mithag. Machane ngam meybil ngak Jehovah mag weliy ngak urngin ban’en ni kam rin’. Ga ra rin’ e re n’ey, ma aram e ra tabab ni nge gapas lanin’um, ma dabki magawonnagem e nangan’ rom. Machane faanra ga baadag ni nge fel’ bayay e tha’ u thilmew Jehovah, ma de gaman ni kemus ni ngam meybil ngak, ya ku bay boch ban’en nib t’uf ni ngam rin’.

18. Mang e rin’ David u nap’an nni fonownag?

¹⁸ Nge m’agan’um ko fonow ni kan pi’ ngom. Nap’an ni l’og Jehovah Nathan ni profet ni nge yan i weliy ngak David murung’agen e kireb ni ke rin’, ma de gay David e tawey rok, ara yog nde gel e kireb ko n’en ke rin’. Ya ka chingiyal’ nem  me yog ni gathi kemus ni ke denen nib togopuluw ngak figirngin Bath-sheba, ya bin th’abi gel e kireb riy e ke denen nib togopuluw ngak Jehovah. I m’agan’ David ngay ni nge fol ko fonow ni ke pi’ Jehovah ngak, ma aram me n’ag Jehovah fan e kireb rok. (2 Sam. 12:10-14) Faanra kad rin’ed reb e denen nib ubchiya’, mab t’uf ni ngad nonad ngak e piin ke dugliyrad Jehovah ni ngar ayuweged e pi saf rok. (Jas. 5:14, 15) Thingar dab da guyed rogon ni ngad gayed e tawey rodad ko kireb ni kad rin’ed. Faan gad ra gur nge m’agan’dad ko fonow ni kan pi’ ngodad ma gad fol riy, ma ra papey ni nge gapas lanin’dad ma gad felfelan’ bayay.

19. Mang e susun ni ngad dugliyed u wan’dad ni ngad rin’ed?

¹⁹ Mu dugliy u wan’um ndab kum sul ko fare kireb bayay. Manang David ni Pilung ni faanra nge dabki sul ko kireb ni i rin’, mab t’uf ni nge ayuweg Jehovah. (Ps. 51:7, 10, 12) Tomuren ni n’ag Jehovah fan e kireb rok, me dugliy u wan’ ni nge dabki lemnag boch ban’en nib kireb. Angin ni yib riy e aram e yag ni ngki gapas laniyan’ bayay.

20. Uw rogon ni ngad daged nib ga’ fan u wan’dad rogon ni ke n’ag Jehovah fan e kireb rodad?

²⁰ Gad ra dag nib ga’ fan u wan’dad rogon ni ke n’ag Jehovah fan e kireb rodad ni faan gad ra weliy ngak u daken e meybil, me m’agan’dad ko fonow ni kan pi’ ngodad, ma gad athamgil nib gel ya nge dab kud sulod ko kireb ni ka ud rin’ed. Faan gad ra rin’ e pi n’ey, ma aram e ra gapas lanin’dad bayay. Ireray e n’en ni buch rok James nreb e walag ni pumoon ni rin’ reb e denen nib ubchiya’. I gaar: “Nap’an nu gog ngak e piin piilal e denen ni kug rin’, ma gowa kan chuweg ban’en nib tomal u pog. Ere tabab ni nge gapas lanin’ug bayay.” Ri be yib e athamgil nga lanin’dad ni kad nanged ni Jehovah e “ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay”!​—Ps. 34:18, BT.

21. Uw rogon ni ngad paged Jehovah ni nge fal’eg lanin’dad?

²¹ Bochan ni kari chugur nga tungun e re m’ag ney, ma aram fan ni boor ban’en nra i k’aring e magafan’ ngodad. Ere nap’an nra magafan’um, mag gurnagem ngam meybil ngak Jehovah ni nge ayuwegem. Mu tiyan’um ko fol Bible ni ga ma tay. Mu fil ban’en rok Hannah, nge Paul, nge David. Mu ning e ayuw ngak e Chitamam ni bay u tharmiy ni nge ayuwegem ngam nang fan ni be magafan’um. (Ps. 139:23) Mu pag ni nge ayuwegem ko pi magawon rom, nib ga’ ni tin dariy ban’en nrayog ni ngam rin’ ngay. Faan ga ra rin’ e re n’ey, ma aram e ga ra bod faen ni yoloy e Psalm ni faani tangnag Jehovah ni gaar: “Yu ngiyal’ nder paslagan’ug ma ke magafan’ug, mag fal’eg lanin’ug nggu felan’.”​—Ps. 94:19, BT.