1-2. Mang fan nrayog ni ngad lemnaged nder fulweg Jehovah taban e meybil rodad?

 “NGAR mu adag Somol me fel’ u wun’um, me pi’ ngom e tin ni ir e kari t’uf rom.” (Ps. 37:4) Rib manigil e re n’ey ni kan micheg! Machane gur, susun e ngad lemnaged nra pi’ Jehovah urngin e tin kad ninged ngak ni ka chingiyal’ nem, fa? Mang fan ni gad be fith e re deer ney? Am lemnag e pi n’en baaray nrayog ni nge buch. Reb e walag nib pin nib muchugbil e be meybil ya nge yag nni ayuweg ni nge un ko fare School for Kingdom Evangelizers. Machane ke yan in e duw ma dawori yib e thin ngak ni nge un ko re skul nem. Reb e walag ni kab pagel e be meybil ngak Jehovah ni ngan golnag u ba mit e m’ar nib ubchiya’ ni ke yib ngak ya nge yag ni ngki rin’ boch e maruwel u lan e ulung. Machane der gol ko m’ar rok. L’agruw e gallabthir ni Kristiano e yow be meybil ni nge par fakrow ko tin riyul’. Machane me dugliy fakrow ni nge tal ko pigpig ngak Jehovah.

² Sana rayog ni kam ning ban’en ngak Jehovah machane dawori pi’ ngom. Bochan e re n’ey ma rayog ni ngam lemnag ni bay boch e meybil ni be fulweg Jehovah taban ma tirom e danga’. Fa reb e rayog ni ngam lemnag nsana bay ban’en nib kireb ni kam rin’. Aram e n’en ni lemnag reb e walag nib pin ni ka nog Janice b ngak. Ra meybilgow figirngin ni bochan e yow baadag ni ngar pigpiggow u Bethel. I yog ni gaar: “Gu lemnag ndabi n’uw nap’an min fekmow nga Bethel.” Machane i yan boor e duw ma ka dawor ni fekrow nga Bethel. I gaar Janice: “I kireban’ug miki balyangan’ug. Ug lemnag ko mang e kug rin’ ni ke kirebnag laniyan’ Jehovah. Rib tamilang e n’en ku gog ngak u lan e meybil rog. Ere mang fan ndawori fulweg taban e meybil rog?”

3. Mang e gad ra weliy ko re article ney?

³ Bay yu ngiyal’ nrayog ni ngad lemnaged ko be motoyil Jehovah  ko meybil rodad fa danga’. Mus ngak boch e pumoon ni yad ba yul’yul’ kakrom ni ur lemgad ni aray rogon. (Job 30:20; Ps. 22:2; Hab. 1:2) Mang e rayog ni nge micheg nga lanin’um nra fulweg Jehovah taban e meybil rom? (Ps. 65:2) Som’on e gad ra weliy e pi n’en baaray ya nge yag nda nanged e fulweg ko re deer ney: (1) Mang e gad manang nra rin’ Jehovah? (2) Mang e baadag Jehovah ni ngad rin’ed? (3) Mang fan nrayog nib t’uf ni ngad thilyeged e n’en gad be yibilay?

4. Mang e ke micheg Jehovah nra rin’ nrogon ni be yog e Jeremiah 29:12?

⁴ Ke micheg Jehovah nra motoyil ko meybil rodad. (Mu beeg e Jeremiah 29:12.) Got rodad e ma t’ufeg e pi tapigpig rok ni yad ba yul’yul’, ere gubin ngiyal’ nra motoyil ko meybil rorad. (Ps. 10:17; 37:28) Machane re n’ey e der yip’ fan ni gubin ban’en ni gad ra ning ngak nra pi’ ngodad. Bay boch ban’en ni gad ra ning ngak nrayog nib t’uf ni ngad songad nga fin darod nga lan e bin nib beech e fayleng mfini pi’ ngodad.

5. Mang e ma lemnag Jehovah u nap’an ni be motoyil ko meybil rodad? Mu tamilangnag.

⁵ Ma lemnag Jehovah rogon nib peth e pi n’en gad be ning ngak ko n’en nib m’agan’ ngay. (Isa. 55:​8, 9) Bang ko n’en nib m’agan’ ngay e ba muun ngay ni nge sug e girdi’ u fayleng ni yad be par u tan e gagiyeg rok ni yad ba felfelan’ ma kub taareban’rad. Machane ke yog Satan ni kab gel e felfelan’ nra tay e girdi’ ni faanra yad e yad be gagiyegnaged yad. (Gen. 3:​1-5) Ere ke pag Jehovah e girdi’ ni ngar gagiyegnaged yad ya nge micheg nde riyul’ e n’en ke yog Moonyan’. Machane boor e magawon ni gad be mada’nag e ngiyal’ ney ni bochan e girdi’ e yad be gagiyeg. (Ekl. 8:9) Gad manang ndabi chuweg Jehovah urngin e pi magawon ney e ngiyal’ ney. Ya faanra rin’ ma rayog ni nge lemnag boch e girdi’ nrayog ko girdi’ ni ngar gagiyegnaged yad, mar pithiged e pi magawon rorad.

6. Mang fan nib t’uf ni nge pagan’dad ni gubin ngiyal’ nib mat’aw rogon ni ma rin’ Jehovah ban’en maku ma rin’ u fithik’ e t’ufeg?

⁶ Rayog nib thil rogon nra fulweg Jehovah taban e meybil rok l’agruw ni’ ni taab n’en e yow be yibilay. Bod nnap’an ni m’ar Hezekiah ni Pilung nrib ubchiya’, me wenig ngak Jehovah ni nge golnag. Ma aram e n’en ni rin’ Jehovah. (2 Ki. 20:​1-6) Machane nap’an ni wenig apostal Paul ngak Jehovah ni nge chuweg “ba liliy” ni immoy rok, ma de rin’ Jehovah. (2 Kor. 12:​7-9) Kum lemnag e n’en ni buch rok apostal James nge Peter. Yow l’agruw ni baadag Herod ni Pilung ni nge thang e fan rorow. Ere i pi’ e pi walag u lan e ulung e meybil ni fan ngak Peter, ma dabisiy ni ku aram e n’en nrin’ed ni fan ngak James. Yugu aram rogon min thang e fan rok James, me Peter e yib ba engel i ayuweg e yafos rok. (Acts 12:​1-11) Ere rayog ni nge lungudad u wan’dad, ‘Mang fan ni ayuweg Jehovah e yafos rok Peter, ma de ayuweg e yafos rok James?’ Der yog e Bible. c Machane rayog ni nge pagan’dad ngay ni Jehovah e “mmat’aw urngin e tin ni ma rin’.” (Deut. 32:4) Ma gad manang nib fel’ Peter nge James u wan’ Jehovah. (Rev. 21:14) Ere yu ngiyal’ e rayog ni ngan fulweg taban e meybil rodad u reb e kanawo’ ndad lemnaged. Machane bochan nib pagan’dad ni gubin ngiyal’ nib mat’aw rogon ni ma fulweg Jehovah taban e meybil rodad maku ma rin’ u reb e kanawo’ ni be m’ug riy ni gad ba t’uf rok, ma aram fan ndarud lemnaged nde puluw rogon ni ke dugliy ni nge fulweg taban e meybil rodad.​—Job 33:13.

7. Mang e gad ma guy rogon ndab da rin’ed, ma mang fan?

⁷ Gad ma guy rogon ndab ud taareb rogonnaged gadad ngak yugu boch e girdi’. Bod nrayog ni ngad weniggad ngak Jehovah ni nge ayuwegdad u reb e ban’en, machane de rin’ e n’en gad be yog ngak. Me yan i boch nga tomuren ma gad  nang ni bay ban’en ni ke yibilay be’ ni bod e n’en kad yibilayed ma bod ni ke fulweg Jehovah taban. Ireray e n’en ni buch rok reb e walag nib pin ni ka nog Anna ngak. I meybil ni ngan golnag Matthew ni figirngin ni ke yib e cancer ngak. Ma ngiyal’ nem e ku bay l’agruw e walag nib pin ni kar pilibthirgow ni kki yib e cancer ngorow. Ere i par Anna ni yugu be yibilay Matthew nge gal walag nem. Machane me gol fa gal walag, me yim’ Matthew. Som’on e i lemnag Anna nrayog ni ke ayuweg Jehovah fa gal walag nib pin ni ngar golgow. Ma faanra riyul’ ni ke ayuwegrow, me ere mang fan nde fulweg taban e meybil rok ni nge gol figirngin? Bin riyul’ riy e dad nanged rogon ni ke gol fa gal walag nib pin. Kemus ni gad manang nra chuweg Jehovah urngin e gafgow ni gad be yan u fithik’, maku baadag ni nge faseg e pi fager rok ni kar m’ad.​—Job 14:15.

8. (a) Uw rogon ni ma ayuwegdad Jehovah nrogon ni be yog e Isaiah 43:2? (b) Uw rogon nrayog ni nge ayuwegdad e meybil u nap’an ni gad be mada’nag boch e magawon nib mo’maw’? (Mu guy fare video ni kenggin e Prayer Helps Us to Cope.)

⁸ Gubin ngiyal’ nra ayuwegdad Jehovah. Bochan ni Jehovah e Chitamangidad ni gad ba t’uf rok, ma aram fan ndabun ni ma guydad ni gad be gafgow. (Isa. 63:9) Yugu aram rogon ma der ma yororiydad u gubin mit e magawon nrayog ni ngan taarebrogonnag ko lul’ nge nifiy. (Mu beeg e Isaiah 43:2.) Machane ke micheg nra ayuwegdad ni nga ‘darod u fithik’’ e pi n’em. Ku dabi pag e pi magawon ni ma yib ngodad ni nge gafgownagdad ndariy n’umngin nap’an. Kki pi’ gelngin nib thothup ni nge ayuwegdad ni ngad athamgilgad. (Luke 11:13; 2 Kor. 4:7) Bochan e re n’ey, ma rayog ni nge pagan’dad ni gubin ngiyal’ ni bay e tin nib t’uf rodad ya nge yag nda athamgilgad mad pared ni gad ba yul’yul’ ngak Jehovah. d

9. Mang fan nib t’uf ni nge pagan’dad nra ayuwegdad Jehovah nrogon nib puluw ko James 1:​6, 7?

⁹ Baadag Jehovah ni nge pagan’dad ngak. (Heb. 11:6) Yu ngiyal’ e rayog ni ngad lemnaged ni kaygi mo’maw’ e magawon ni gad be mada’nag. Ku rayog ni nge k’aringdad e re n’ey ni nge maruwaran’dad ko ra ayuwegdad Jehovah fa danga’. Machane be micheg e Bible ni faanra pi’ Got gelngidad, ma rayog ni ngad athamgilgad u fithik’ e pi magawon rodad ni bod ba “yoror” ni ke yag ni ngad gararawgad riy nga lang. (Ps. 18:​29, BT) Ere susun e ngad meybilgad u fithik’ e michan’ me pagan’dad nra fulweg Jehovah taban e meybil rodad ko bin nga i maruwaran’dad.​—Mu beeg e James 1:​6, 7. 

10. Mu susunnag rogon nrayog ni nge puluw e ngongol rodad ko n’en gad be yibilay.

¹⁰ Baadag Jehovah ni nge puluw e ngongol rodad ko n’en gad be yibilay. Bod nrayog ni nge yog reb e walag ni pumoon ngak Jehovah ni nge ayuweg ya nge yag ni fek e matal rok ko maruwel ni nge un nga reb e convention. Uw rogon nrayog ni nge fulweg Jehovah taban e re meybil ney? Rayog ni nge ayuweg Jehovah ni nge dabi rus ni nge yan i non ngak e en nib ga’ ko maruwel rok. Machane kub t’uf ni nge yan fare walag ni pumoon i ning e matal rok. Ku rayog nib t’uf ni boor yay ni nge rin’ e re n’ey. Ku rayog ni nge yan i yog ngak be’ u tabon e maruwel rok ni ngar thilyegew e rofen ni yow ma maruwel riy nge fek bagayow e rran rok bagayow. Ma faanra rib t’uf maku rayog ni nge yog ir ni nge fek e matal rok ndabin pi’ puluwon.

11. Mang fan nsusun e ngaud yibilayed e pi n’en be magafan’dad ngay?

¹¹ Baadag Jehovah ni ngaud yibilayed e pi n’en be magafan’dad ngay. (1 Thess. 5:17) Ba tamilang ko n’en ni yog Jesus ni bay boch ban’en ni gad ma ning ndabin pi’ ngodad ni ka chingiyal’ nem. (Luke 11:9) Ere dabi mulan’um! Dab mu tal ko meybil. (Luke 18:​1-7) Faanra ud pared ni  gad be yibilay taab n’en ngak Jehovah, ma aram e gad be dag ngak nib ga’ fan fare n’em u wan’dad. Ku gad be dag nib mich u wan’dad nrayog ni nge ayuwegdad.

12. (a) Mang reb e deer nsusun e ngad fithed gadad riy ni bay rogon ko n’en gad be ning u lan e meybil rodad, ma mang fan? (b) Uw rogon ni nge m’ug ko meybil rodad ni gad be tayfan Jehovah? (Mu guy fare kahol ni kenggin e “ Ma M’ug ko Tin Nug Ma Ning Nug Be Tayfan Jehovah, Fa?”)

¹² Faanra de yag ngodad e n’en gad be ning u lan e meybil rodad, ma dalip e deer nrayog ni ngad fithed gadad riy. Bin som’on e, ‘Ba puluw e n’en nug be yibilay, fa?’ Ba ga’ ni gad ma lemnag ni gad manang e n’en nib fel’ ni fan ngodad. Machane pi n’en gad ma ning u lan e meybil rodad e rayog ndab ri yib angin ngodad. Faanra gad be yibilay murung’agen reb e magawon ni gad be mada’nag, ma rayog ni ka bay reb e kanawo’ nra puf fare magawon riy ni kab fel’ boch ko bin gad be yibilay. Ku bay boch ban’en ni gad ma yibilay nrayog nde puluw ko n’en nib m’agan’ Jehovah ngay. (1 John 5:14) Am lemnag fa gallabthir ni kan weliy murung’agrow aram ko som’on. Kar meybilgow ngak Jehovah ni nge par fakrow ko tin riyul’. Bod nib puluw e n’en kar yibilayew. Machane dabi towasariy Jehovah be’ ni nge pigpig ngak. Baadag ni gad gubin ni ngad mel’eged ni ngad pigpiggad ngak ni kub muun pi fakdad ngay. (Deut. 10:​12, 13; 30:​19, 20) Ere rayog ni nge yog fa gallabthir ngak Jehovah ni nge ayuwegrow ya nge yag nra filew ngak fakrow rogon ni nge t’uf Jehovah rok me mang fager rok.​—Prov. 22:6; Efe. 6:4.

13. Mingiyal’ e ra ayuwegdad Jehovah nrogon ni be yog e Hebrews 4:16? Mu tamilangnag.

¹³ Bin l’agruw e deer e, ‘Ireray e ngiyal’ ni nge pi’ Jehovah e n’en nug be ning, fa?’ Sana rayog ni gad be lemnag nib t’uf ni ngan fulweg taban e meybil rodad ni ka chingiyal’ nem. Machane bin riyul’ riy e Jehovah e manang e ngiyal’ nib fel’ ni nge ayuwegdad. (Mu beeg e Hebrews 4:16.)  Ere faanra dan pi’ ngodad e n’en kad ninged ni ka chingiyal’ nem, ma rayog ni ngad lemnaged ni fulweg rok Jehovah e ‘Danga’.’ Machane bin riyul’ riy e rayog ni be gaar ‘Gathi chiney.’ Am lemnag fare walag ni kab pagel ni ke meybil ni ngan golnag ko m’ar rok. Faan gomanga golnag Jehovah u daken e maang’ang, ma rayog ni nge yog Satan ni fan ni be ulul ko pigpig ngak Jehovah e bochan ni kan golnag e m’ar rok. (Job 1:​9-11; 2:4) Maku reb e, ke mu’ Jehovah i dugliy e ngiyal’ ni nge golnag urngin mit e m’ar. (Isa. 33:24; Rev. 21:​3, 4) Ere chiney ni ka gad be sonnag e ngiyal’ nem e dabiyog ni ngad lemnaged ni ngaun golnagdad u daken e maang’ang. Ere rayog ni nge yog fare walag ngak Jehovah ni nge pi’ gelngin miki gapaseg laniyan’ ya nge yag ni athamgil u fithik’ e m’ar rok me ulul ni nge pigpig ngak u fithik’ e yul’yul’.​—Ps. 29:11.

14. Mang e ga be fil ko n’en ni buch rok Janice?

¹⁴ Am lemnag Janice ni faani meybil ni ngan ayuweg ni nge un ko pigpig u Bethel. Lal e duw ni yan mfini nang rogon ni ke fulweg Jehovah taban e meybil rok. I yog ni gaar: “I fanay Jehovah e ngiyal’ nem ni nge fil ban’en ngog maku be yal’uwegeg. Ba t’uf ni nge gel e pagan’ rog ngak. Kub t’uf ni nggu mon’og u rogon e fol Bible nug ma tay ni yigoo gag. Kub t’uf ni nggu nang nrayog ni nggu felfelan’ ni yugu demtrug e gin nug bay riy nug be pigpig ngak Jehovah.” Boch nga tomuren me taw e thin ngak Janice nge figirngin ni yibe yog ngorow ni ngaur lekagew e ulung. Nap’an ni sul Janice nge lemnag e re ngiyal’ i n’em, me yog ni gaar: “I fulweg Jehovah taban e meybil rog, machane de rin’ u rogon nug be lemnag. Ba n’uw nap’an mfini yag ni ngguy fel’ngin e fulweg ni pi’ ko meybil rog, machane gub felfelan’ ni ke yag ni ngguy rogon e t’ufeg nge sumunguy ni ke dag ngog.”

15. Mang fan nrayog ni bay yu ngiyal’ nib t’uf nri dab ddugliyed e meybil rodad nga daken taab n’en? (Kum guy e sasing.)

¹⁵ Bin dalip e deer e, ‘Gur, ba t’uf ni nggu yibilay  yugu ban’en, fa?’ Yugu aram rogon nib fel’ ni ngad tamilangnaged e n’en gad be yibilay, machane rayog ni ngad nanged e n’en nib m’agan’ Jehovah ngay ni fan ngodad ni faanra ri dab ddugliyed e meybil rodad nga daken taab n’en. Am lemnag fare walag nib pin nib muchugbil ni ke n’uw nap’an ni be meybil ni nge un ko fare School for Kingdom Evangelizers. Baadag ni nge un ko re skul nem ya nge yag ni yan i pigpig ko gin nib t’uf e ayuw riy ko machib. Ere nap’an ni be meybil ni nge ayuweg Jehovah ni nge un ko re skul nem, ma rayog ni nge yog ngak ni nge ayuweg ni nge pirieg boch e kanawo’ nrayog ni nge yoornag e tin be rin’ riy ni fan ngak. (Acts 16:​9, 10) Ma tomuren ni ke meybil, ma rayog ni nge fith e en ma lekag e ulung ko bay reb e ulung nib chugur ngak nib t’uf boch e pioneer riy fa dariy. Fa reb e rayog ni nge yol nga reb e branch ofis nge fith murung’agen e gin nib t’uf boch e tamachib riy. e

16. Mang e rayog ni nge pagan’dad ngay?

¹⁶ Kad filed nrayog ni nge pagan’dad ngay nib mat’aw rogon nra fulweg Jehovah taban e meybil rodad maku ra rin’ u reb e kanawo’ ni be m’ug riy ni gad ba t’uf rok. (Ps. 4:3; Isa. 30:18) Yu ngiyal’ e rayog ni nge fulweg taban e meybil rodad u reb e kanawo’ ndad lemnaged. Machane gubin ngiyal’ nra motoyil Jehovah ko meybil rodad. Ri gad ba t’uf rok, ma dariy ba ngiyal’ nra digeydad. (Ps. 9:10) Ere nge ulul ni nge ‘pagan’um ngak Got ni gubin ngiyal’,’ mag weliy urngin ban’en ni bay u lanin’um ngak u daken e meybil.​—Ps. 62:8.